HECHOS 5

Ananías jare Safira

1Oiko metei kuimbae Ananías jee vae jembireko Safira ndive, omee reta iɨvɨ. 2Jare Ananías oekɨ iyeupe jókuae ɨvɨ jepɨgüe güi jembireko vi oikuaa reve, jare güeru mbovɨño oñono temimondo reta ipo pe. 3Jayave Pedro jei chupe:

—Ananías, ¿maera pa remaeño Satanás güɨnoi mbaepuere nderé, ndeapu vaerä Espíritu Santo pe jare reekɨ ndeyeupe ndeɨvɨ jepɨgüe güi? 4Ndembae ko jókuae ɨvɨ, jare remee ma yave, jepɨgüe ndembae vi ko. ¿Maera pa reyemongeta reyapo vaerä ikavimbae vae? Mbaetɨ ko ndeapu kuimbae reta peño. Ndeapu ko Tumpa pe etei.

5Ananías kuae oendu yave, omano oa ɨvɨ re. Jare opaete kuae regua oikuaa vae reta okɨɨye yae. 6Jayave opüa kuimbae taɨrusu vae reta, jare oñoma reta jëogüegüe, jare güɨraja oñotɨ.

7Mboapɨ ora ma oasa yave, oike ou jembireko. Jae mbaetɨ oikuaa mbae ko oasa vae. 8Jayave Pedro oparandu chupe:

—Emombeu cheve, ¿pemee pa peɨvɨ körai pe?

Kuña jei chupe:

—Añete, jökorai pe ko.

9Jare Pedro jei chupe:

—¿Maera pa pe reta peyomborɨ katu pejäa vaerä yandeYa iEspíritu? Mase, ko öke pe ma yogüeru neme iñotɨa reta. Ndereraja retata vi.

10Jare jupiveiño Safira omano oa Pedro jóvai. Jare oike ma yave kuimbae taɨrusu vae reta, oecha omano ma. Jayave güɨraja oñotɨ ime amɨri iyɨpɨ pe. 11Jare oporogüɨrovia vae reta jare opaete kuae mbaembae regua oikuaa vae reta okɨɨye yae.

Jeta mɨakañɨ oyeecha oyeapo vae

12Jare oyeapo jeta mɨakañɨ reta tëta guasu pegua reta ipɨte pe temimondo reta rupi. Jare opaete oporogüɨrovia vae reta oyemboatɨ metei rami Salomón ikorero jee vae pe. 13Jare opaete ïru vae reta okɨɨye oñemoïru vaerä jae reta ndive. Ërei opaete vae reta omboete. 14Jare jeiete jeta güɨrovia yandeYa re kuimbae reta jare kuña reta. 15Jare kaye rupi güɨnoe oñono reta imbaerasɨ vae reta jupa reve. Pedro oasa yave iküaraɨa yepe oasa vaerä jupi. 16Jare jeta vae yogüeru Jerusalén pe ïru tëta guasu pegua reta köiño Jerusalén güi ñogüɨnoi vae güi, güeru imbaerasɨ vae reta jare aña oya jese vae reta. Jare opareve okuera reta.

Mburuvicha reta oyapo ikavimbae vae Pedro jare Juan pe

17Jayave sacerdote tenondegua ete jare opaete saduceo jae ndive ñogüɨnoi vae reta iyakatúä temimondo reta re. 18Jare oipɨɨ reta oñoña tembipɨɨrɨru opaete vae pegua pe. 19Ërei pɨ̈tu yave metei yandeYa iaraɨgua oipea tembipɨɨrɨru jöke reta, jare güɨnoe ikatu pe, jei chupe reta: 20“Pekua peyemboɨ tupao pe pemombeu opaete vae reta pe ñee tekove pegua.”#Jn 11.25; 14.6; Ro 6.4.

21Kuae oendu güire, Pedro jare Juan oike tupao pe ndeimboveasɨ jare oporomboe reta.

Jökorai ramboeve, sacerdote tenondegua ete jare jae ndive ñogüɨnoi vae reta oenɨi opaete mburuvicha judío reta jare Israel iñemuña itenondegua reta. Jare omondo reta güeruruka vaerä tembipɨɨrɨru güi temimondo reta. 22Ërei sacerdote tenondegua ete pe oyeokuai vae reta yogüɨraja oväe yave, mbaetɨ oväe temimondo reta tembipɨɨrɨru pe. Jayave yogüeru ye omombeu reta, 23jei reve:

—Roväe tembipɨɨrɨru jöke reta oyeokenda kavi oï, jare järoa reta oyemboɨ ñogüɨnoi öke reta rupi. Ërei roipea yave, mbaetɨ etei roväe kia japɨpe pe.

24Kuae oendu yave, sacerdote tenondegua ete, tupao järoa reta juvicha jare sacerdote reta itenondegua reta ipɨakañɨ, jare mbaetɨ oikuaa reta mbae ra oasata. 25Ërei ou metei, jare omombeu chupe reta:

—Kuimbae peñono tembipɨɨrɨru pe vae reta oime tupao pe ñogüɨnoi, jare omboe güɨnoi opaete vae reta.

26Jayave tupao järoa reta juvicha sacerdote tenondegua jembiokuai reta ndive yogüɨraja güeru kaviño. Echa okɨɨye reta oyeapiuka vaerä ita pe opaete vae reta pe. 27Jare güeru, oñono mburuvicha judío reta jóvai yave. Sacerdote tenondegua ete jei temimondo reta pe:

28—Ore poyókuai tëi ma agüɨye ye vaerä peporomboe jókuae kuimbae jee re. Ërei pe reta pemotɨnɨe opaete Jerusalén peporomboe pe. Jare peipota pemboya jókuae kuimbae imano oreré.#Mt 27.35.

29Jayave Pedro jare ïru temimondo reta jei chupe reta:

—Royapo tai ko Tumpa iporookuai, kuimbae reta iporookuai güi. 30Ñaneñemuñagüe reta iTumpa omoingove ye Jesús, pe reta peikutu kurusu re peyuka vae. 31Ërei kuae Jesús, Tumpa imbaepuere rupi oñono Tenondeguarä jare Oporomboasa vaerä, Israel pegua reta oeya vaerä iyemongeta ikavimbae vae ipɨa pe güɨnoi vae, jare Tumpa iñɨ̈ro vaerä chupe reta iyoa reta re. 32Jare ore romombeu ïru vae reta pe kuae, jare Espíritu Santo vi omombeu. Echa Tumpa omee Espíritu Santo jei vae oyapo vae reta pe.

33Kuae oendu reta yave, pochɨ chupe reta jare oipota oyuka. 34Ërei opüa metei fariseo Gamaliel jee reta ipɨte pe. Jae ko metei mborookuai re oikuaa yae vae, jare opaete vae reta omboete yae vae. Jae oyókuai güɨnoe vaerä ikatu pe michi pegua temimondo reta, 35jare jae jei chupe reta:

—Kuimbae Israel iñemuña reta, pemae kavi mbae peyapota kuae kuimbae reta pe vae re. 36Echa karamboe yave oyekuaa Teudas jee vae, jare oyereroviauka ïru vae reta pe. Jare cuatrociento rupi kuimbae reta oñemoïru jae ndive. Ërei jae oyeyukauka yave, opaete jae ndive ñogüɨnoi vae reta opa oñemoai moai, jare opa okañɨ. 37Jaɨkue rupi, yepapa iara rupi, oyekuaa Judas Galileaɨgua. Jae omboatɨ iyé jeta vae. Ërei jae vi omano, jare opaete jae ndive ñogüɨnoi vae reta opa oñemoai moai. 38Jáeramo añave che jae peve: Agüɨye mo peyapo mbae kuae kuimbae reta pe, jare pemaeño mo jese reta. Echa kuimbae iyemongetaño ani jembiapoño ko yave, okañɨta ko. 39Ërei Tumpa güi ko ou yave, ngaraa pepuere pemboai. Echa güɨramoi Tumpa re ko peyovaicho peï.

40Jare kuae Gamaliel jei vae ikavi chupe reta. Jayave oenɨi reta temimondo reta, jare oinupa güire oyopia yeyé agüɨye ye vaerä ma imiari Jesús jee re, jare oyora reta. 41Jayave temimondo reta ñogüɨnoe mburuvicha judío reta ñogüɨnoi vae güi oyerovia yae reve, Tumpa omee oiporara reta vaerä Jesús jee re ramo. 42Jare ara ñavo tupao pe jare o reta rupi ikueraimbae reve oporomboe jare omoërakua reta Jesucristo regua.

Currently Selected:

HECHOS 5: GUABD

Highlight

Copy