HECHOS 26

Pablo oñemoe iyé Agripa jóvai

1Jayave Agripa jei Pablo pe:

—Ndepuere nemiari ndeyé.

Jayave Pablo omopüa ipo, jare omboɨpɨ oñemoe iyé:

2“Mburuvicha guasu Agripa, ayerovia kërai añave chemiarita ayeepɨ vaerä nderóvai opaete judío reta chemboeko vae re. 3Echa nde reikuaa katu opaete judío reta jeko jare iyoaka. Jáeramo romoñera reyeapɨsaka vaerä cheré ndepɨaguasu reve.

4Chetaɨrusu güive aiko cherëtara reta ndive Jerusalén pe, jare judío reta oikuaa katu kërai aiko. 5Jae reta oikuaa katu vi kërai tenonde rupi che ko jae fariseo#Hch 23.6; Flp 3.5. vae. Kuae mboromboe pegua reta ko jägüɨro yae iporomboe pe vae. Jae reta ipuere chemombeu ndeve, oipota yave. 6Jare añave che arovia Tumpa oyapota ko oreñemuñagüe reta pe güɨrökuavee vae ramo judío reta oñeapo cheré. 7Jare jókuae doce oreñemuñagüe reta iñemuña reta vi güɨrovia Tumpa ombopota ko güɨrökuavee chupe reta vae. Jare oyeokuai reta Tumpa pe ikɨ̈reɨ reve ara rupi jare pɨ̈tu rupi. Mburuvicha guasu Agripa, kuae che vi arovia ramo, judío reta chemboeko. 8¿Maera pa mbaetɨ perovia Tumpa ipuere ko omoingove ye omanogüe vae reta?

9Che añetete arovia jupi ko ayapo vaerä jeta mbae ikavimbae Jesús Nazaret pegua jee kotɨ. 10Jare jökorai ayapo Jerusalén pe. Sacerdote reta itenondegua reta mbaepuere omee cheve yave, añono tembipɨɨrɨru pe jeta oporogüɨrovia vae reta. Jare oyuka reta yave, cheve jaekavi omano vaerä. 11Jare jeta rupi ainupa opaete judío reta itupao reta ñavo rupi, jare jaeuka chupe reta ikavimbae vae Jesús kotɨ. Jare chearasɨ yae ikotɨ reta ramo, aja aeka reta ïru tëta guasu#Hch 8.3; 22.4-5. reta rupi ave.

12Kuae ayapo aiko yave aja Damasco kotɨ, sacerdote reta itenondegua reta omee cheve mbaepuere vae ndive. 13Cheruvicha guasu, ërei kuaraɨ ara mbɨte ma oï yave tape rupi aja ramboeve, aecha metei tembipe ara güi jembipeasɨ yae kuaraɨ güi vae. Ou cheré jare cherupíe yogüɨraja vae reta re. 14Jare opareve roa ɨvɨ re, jare che aendu ñee hebreo pe jei cheve: ‘Saulo, Saulo, ¿maera pa reñemopüa chekotɨ? Nde ko jae metei güeye ɨvɨra jakuarovi vae re opatara vae rami.’ 15Jayave che aparandu: ‘¿Kia pa ko nde, cheYa?’ Jare yandeYa jei: ‘Che ko jae Jesús. Nde reñemopüa ikotɨ vae.’ 16Ërei epüa eyemboɨ. Che aipota reyeokuai vaerä cheve, jare remombeu vaerä reecha vae jare reechata vae. Echa jaerä ayekuaa ndeve, 17jare che roepɨta nerëtaɨgua judío reta güi jare judiombae vae reta güi. Jókuae romondo ikotɨ vae reta, 18reipea vaerä jesa reta, jare oyepoepɨ reta vaerä pɨtumimbi güi tembipe pe jare Satanás imbaepuere güi Tumpa kotɨ. Cheré güɨrovia reta yave Tumpa iñɨ̈rota chupe reta iyoa reta re jare omboresive retata vi imbaerä vae ïru oñeñono tee Tumpa peguarä vae reta ndive.#Hch 9.1-19; 22.6-16.

19Jáeramo, mburuvicha guasu Agripa, mbaetɨ cheäteɨ ayapo vaerä Tumpa oechauka cheve vae, 20jaeño amboɨpɨ amoërakua Damasco#Hch 9.20. pegua reta pe, jare Jerusalén#Hch 9.28-29. pegua reta pe, opaete Judea pegua reta pe jare judiombae vae reta pe. Amombeu chupe reta oeya vaerä jeko ikavimbae vae jare oyepoepɨ vaerä Tumpa kotɨ, oechauka reve jeko rupi oyepoepɨ reta ko vae. 21Kuae jeko pegua, judío reta chepɨɨ tupao pe, cheyuka vaerä tëi. 22Ërei Tumpa chemborɨ ramo, oimeño aikove kuae ara. Chemiari michi vae reta pe jare tuichagüe reta pe, mbaetɨ ambuaeyee jae Moisés jare ñeemombeúa reta jei oikota vae re: 23Echa jae reta jei Cristo oiporara ñotai ko, jare jae tenonde oikove yeta#1 Co 15.20. ko omanogüe reta ipɨte güi, oechauka vaerä tembipe judío reta jare judiombae#Is 42.6; 49.6. vae reta pe.”

Pablo jei Agripa pe oporogüɨrovia vaerä

24Jare Pablo jökorai oñemoe iyé yave, Festo iñeeäta reve jei:

—¡Ndembokere ma Pablo! ¡Jeta yae reyemboe vae ndemombokere ma!

25Ërei Pablo jei chupe:

—Chembokereä ko aï, mburuvicha tuichagüe vae Festo. Che jae ndeve vae añete vae jare arakuaa pegua ko. 26Ko oï mburuvicha guasu Agripa, jae oikuaa kavi kuae mbaembae regua, jáeramo chemiari jóvai aipoɨumbae reve. Aikuaa jae oikuaa katu kuae mbaembae regua. Echa kuae mbaetɨ ko oyeapo vɨari ketɨ. 27Mburuvicha guasu Agripa, ¿rerovia pa ñeemombeúa reta oikuatiagüe? Che aikuaa rerovia ko.

28Jayave Agripa jei Pablo pe:

—Arovia seri aipo Cristo re.

29Jayave Pablo jei chupe:

—Mbae mona Tumpa oipota jarembae ani ɨma pe, nde jare opaete ïru añave oyeapɨsaka cheré vae reta peyeapo vaerä che rami, ërei agüɨye kuae nunga karena ndive.

30Jare Pablo jökorai jei ma yave, oyemboɨ mburuvicha guasu Agripa, mburuvicha guasu Festo, Berenice jare jae reta ndive oguapɨ ñogüɨnoi vae reta; 31jare osɨrɨ reta imiari ïkotɨa, jei oyoupe:

—Kuae kuimbae oyapoä mbae omano vaerä ani oï vaerä tembipɨɨrɨru pe.

32Jare Agripa jei Festo pe:

—Yayorata tëi kuae kuimbae, mbaetɨ yave oiporu oñejäauka vaerä mburuvicha guasu César pe.

Currently Selected:

HECHOS 26: GUABD

Highlight

Copy