HECHOS 11

Pedro imiari Jerusalén pegua oporogüɨrovia vae reta pe

1Jayave temimondo reta jare ïru oporogüɨrovia vae Judea rupi ñogüɨnoi vae reta, oikuaa kërai judiombae vae reta güɨrovia vi Tumpa iñee. 2Jayave Pedro ou ye oväe Jerusalén pe yave, judío oporogüɨrovia vae reta omboeta chupe. 3Jei reta:

—¿Maera pa reike judiombae vae reta jo pe? ¿Maera pa rekaru jae reta ndive?

4Jayave Pedro omboɨpɨ imiari kavi chupe reta opaete mbaembae oyeapo vae re. Jei chupe reta:

5—Che ayerure aï yave tëta guasu Jope pe, chekera jare aecha metei asoya tuicha vae rami vae ogüeyɨ ou che aïa kotɨ. Kuae oyembogüeyɨ ara güi oñeapɨti reve irundɨ ekina reta pe. 6Amae jese yave, aecha mɨmba irundɨ ipɨ vae reta, pochɨ vae jare ipɨtía re oguata vae jare güɨra reta. 7Jare aendu vi metei ñee jei cheve: “Pedro, epüa eyuka jeu.” 8Ërei che jae: “Ngaraa, cheYa. Mbaetɨi ko jau mɨmba oyeumbae vae jare ikɨa Tumpa jóvai vae.” 9Ërei ñee ou ara güi vae jei cheve: “Tumpa oitɨo vae, agüɨye eröɨro.” 10Kuae mboapɨ ye oyekuaa güire, jókuae asoya rami vae oyereraja ye ara kotɨ. 11Jare jupiveiño yogüeru oväe o che aïa vae pe, mboapɨ kuimbae Cesarea güi yogüeru chereeka vae. 12Jare Espíritu Santo jei cheve aja vaerä jae reta jupíe cheäteɨmbae reve. Jare kuae ova oporogüɨrovia vae reta vi yogüɨraja cherupíe, jare roike jókuae kuimbae jo pe. 13Jare jókuae kuimbae imiari oreve kërai oecha metei araɨgua oyemboɨ oï jae jo pe, jare kërai araɨgua jei chupe: “Emondo kuimbae reta Jope pe, güeru vaerä metei kuimbae Simón jee vae, oyeero Pedro pe vae.” 14Jae omombeuta ñee ndeve, jare opaete nerëta pegua reta pe peyemboasauka vaerä. 15Jayave che amboɨpɨ chemiari chupe reta yave, Espíritu Santo ou jese reta, yanderé tenonde yave ou rami. 16Jayave chemaendúa yandeYa jei yandeve vae re. Echa jei: “Juan oporombobautisa ɨ pe. Ërei pe reta peyembobautisaukata Espíritu Santo#Hch 1.5. pe.” 17Tumpa ko omee chupe reta Espíritu Santo yande yarovia yandeYa Jesucristo re vae pe omee vae rami yave, ¿kia pa che amboavai vaerä Tumpa oyapo vae?

18Jayave Pedro jei chupe reta vae oendu yave, mbaetɨ mbae jei reta, jare omboete reta Tumpa, jei reta:

—¡Tumpa omee vi yepe judiombae vae reta pe oeya vaerä iyemongeta ikavimbae vae ipɨa pe oï vae, güɨnoi vaerä tekove opambae vae!

Oporogüɨrovia vae reta Antioquía pe

19Esteban oyuka güire, tovaicho reta oiporarauka oporogüɨrovia vae reta pe. Jare oporogüɨrovia vae reta opa oñemoai vae yogüɨraja oväe ɨvɨ Fenicia, Chipre jare Antioquía pe.#Hch 8.1-4. Jare jae reta imiari judío reta peño Tumpa iñee. 20Ërei jae reta ipɨte pe ñogüɨnoi amogüe kuimbae Chipre jare Cirene pegua. Kuae reta oike Antioquía pe, imiari vi judiombae vae reta pe, omoërakua ñee ikavi vae yandeYa Jesús regua. 21YandeYa omborɨ reta, jare jeta vae güɨrovia jare oyerova yandeYa kotɨ.

22Jare kuae jërakua oporogüɨrovia vae Jerusalén pe ñogüɨnoi vae reta pe yave, omondo reta Bernabé Antioquía pe. 23Jare jae ojo oväe yave, oecha jókuae oyeapo Tumpa ipɨakavi rupi vae, jare oyerovia. Jayave jae omboarakuaa opaete vae reta oguata kavi vaerä opaete ipɨa reve yandeYa ndive. 24Echa Bernabé ko jae kuimbae jupi vae, oporogüɨrovia kavi jare tɨnɨe Espíritu Santo pe vae. Jare jeta vae oñemoïru oporogüɨrovia vae yandeYa re.

25Kuae jaɨkue rupi Bernabé ojo Tarso pe, oeka vaerä Saulo. Jare oväe chupe yave, güeru Antioquía pe. 26Jare joko pe yogüɨreko metei año oporogüɨrovia vae reta ndive, jare omboe jeta vae. Jare Antioquía pe omboɨpɨ ombojee oporogüɨrovia vae reta “Cristo güɨrovia vae reta” pe.

27Jókuae ara reta rupi amogüe ñeemombeúa reta yogüeru oväe Jerusalén güi Antioquía pe. 28Jare metei chugüi reta Agabo#Hch 21.10. jee vae opüa oyemboɨ, jare jei Espíritu Santo rupi oimeta ko karuai guasu opaete ɨvɨ rupi. Kuae oyembopo mburuvicha guasurä Claudio oiko yave. 29Jayave metei ñavo oporogüɨrovia vae reta, oime güɨnoi rupi oyemongeta omondo reta vaerä omborɨ oporogüɨrovia vae reta Judea rupi ñogüɨnoi vae reta. 30Jökorai oyapo reta. Omondo reta oporogüɨrovia vae reta itenondegua reta pe Bernabé jare Saulo ndive.

Currently Selected:

HECHOS 11: GUABD

Highlight

Copy