Ioanesi 5

Iesu Mupamaulinu Itema Vile no Kupa no Lexa ne Betesida

1Ili'i no anu Iesu mupamaulinu molomolo ne Kana mukalu, la Anu mulivu mununa ne Ielusalemu no voxo vile tila noxi'a ta Iutaia. 2No voxo ane ne, la kupa vile ilemo lexe Vetesaida no anu vaikala noxi'a ta Alamu, muxolu no nano ne Ielusalemu 'alai no aitenga vile ilemolu lexe Aitengasi'a Ta sipsip. Io no kupa ne la tani alelaxu ta'uve mitulusou muxoxosou. 3-4No kupa pa'umolu ne, la ta mitema tavu'alo lavileo iouiou mu'oxone'i a miai. Se'i no taiine'i ie'i seleveenu xe se'i tava'a mukilikalukalu xe se'i xine'i musoisoli. 5Ia itema vile no taiine'i ne, pipiena toxoxa'a muxolu noxou mumomomo loxo tauu ie mavulovexa tatalu mo muxatele tatalu (38). 6Iesu mumaisou mii e uai la mulavusou lexe pipiena muxolu noxou maxuveeni misevile. Muavuti la mutali'isou aloxo 'o, “Loxovaa nini nemasaxa lexe namauli?” 7Anu muavuti la mukolinu aloxo 'o, “Tila, itema vile sou usu'ulileli sou ulu'elailixo no kupa no mine ixiunu lexa uasi, la sou eni ano'u mauli uasi. Lexe eni atovo sou alu'elai la ane'i ane iuli noxilo ne italuxo.” 8#Mat 9:6Iesu muavuti la muvikalanu aloxo 'o, “Natulu mo nataxusou misimisine mo namuamua'i nalai.” 9Alaxu vilesisi la itema ne mumauli la mutavulenu misomisou la mumuamua'i mulai.

Ia no voxo ane ne, voxo tavuna. 10#Nee 13:19; Iel 17:21Ta tatilasi'a ta Iutaia mimaisou itema e Iesu mupamaulinu la mivikalanu aloxo 'o, “Nalavusou lexe voxo tavuna vaimomo o uasi? Nini umomomo sou natavulenu misimisine mo namuamua'i no voxo vaimomo o uasi.” 11Ia anu mukoline'i aloxo 'o, “Itema vile mupamaulileli muvikalaleli aloxo 'o, ‘Nalutu mo nataxusou misimisine mo namuamua'i nalai.’” 12Ane'i mitali'isou aloxo 'o, “Itema 'ena'ei ane mupalusine sou lexe nataxusou misimisine mo namuamua'i?” 13Itema ane ne, ulavusou itema e mupamaulinu ne uasi. Xo ta mitema tavu'alo mipita la umaisou Iesu la ua. Anu mulai. 14Ili'i la Iesu muxalisou itema ne no nano no taasou lalotu tatila noxou Lataua la muvikalanu aloxo 'o, “Namaisou, nini nemauli mukalu. Nini na'oxonu 'ili'ilixo masumasua la uasi. Loxo 'o io tu'umaxu tila vile uxali noxine la.” 15Itema ne muavuti la mulai muvikalane'i ta tatilasi'a ta Iutaia aloxo 'o, “Itema e mupamaulileli ne anu Iesu.” 16Ane'i milavu lexe Iesu mupamauli itema ne no voxo tavuna, la sou ane'i mi'oxo masuanu. 17Anu muvikalane'i ta Iutaia aloxo 'o, “Mamilo uxaxai utotomu xoo mo a muxali no voxo vaimomo. La sou eni kalumo axaxai.” 18#Mat 26:4; Ioa 7:1; 10:30Iesu umulinu lapuloto vile noxi'a ta tatilasi'a ta Iutaia sou voxo tavuna uasi mo muvikala lexe Lataua anu Momu xe anu Lataua. Tava'u aloxo ne, la sou ta Iutaia mitovo ikamuli vote'i se'i sou lexe ivau.

Lataua Mulosou 'Olu Xavi sou U'oxo Xaixai Noxou

19 # Ioa 5:30 Iesu muvikalane'i ta Iutaia aloxo 'o, “Eni avikalangengi manina musuku. Itema 'Olu anusisi la umomomo sou u'oxonu mii vile uasi. Anu u'oxonu mii ma'ia e mumaisou Momu u'oxonusi. Xo mii ma'ia Momu u'oxonu la anu 'Olu kalumo u'oxonu. 20Momu umasaxau 'Olu, la sou ulosiouxu mii ma'ia sou u'oxonu. Ili'i la Momu ulosiouxu xaixai se'i ta tatila no anu xaixai e Anu mu'oxonu tei. Ia ngingi ngamaisou la ngakuluke no anu. 21Loxo Momu utulusi'a ta mitema ane misoisoli, la anu 'Olu kalumo upamauline'i ta mitema e Anu umasaxa lexe ane'i imauli. 22#Ioa 5:27; Apo 10:42Momu molu utulusou itema vile no anu vaivaikala uasi. Anu mu'italonu xaixai ane ne noxou 'Olu. 23#Pil 2:10-11; 1Ioa 2:23La sou ane'i tavu'alo itoxonu 'Olu loxo itoxonu Momu. Ane'i ane itoxonu 'Olu uasi, la itoxonu itema e mupalusou 'Olu ne uasi. 24#Ioa 3:15-18Eni avikalangengi manina musuku. 'Ei ane ulomusou vaikala noxilo mo umulaxu tanu noxou ane mupalusilo ene'e, la uno'u mauli ane kaluxu uasi mo itulusou no anu vaivaikala uasi. Xo Anu muaulixu soli mo mumauli. 25Eni avikalangengi manina musuku. Voxo ane ta mitema misoisoli ilomusou Lataua 'Olu xolinu a unene'e. Ia voxo ane ne, a muxali vaimomo o. Ane'i ane ilomusou la imauli. 26Xo loxo mauli ane muxolu noxou Momu, a mu'italonu noxou 'Olu kalumo. 27Momu mu'italonu xaixai e sou utulusi'a ta mitema no anu vaivaikala mulai noxou 'Olu. 28Ngingi ngakuluke no anu vaikala ano 'o uasi. Xo voxo sou ta mitema miai no lulu ilomusou 'olu xolinu mo iuatu a unene'e. 29#Tan 12:2; Mat 16:27; Apo 24:15Ane'i ane mimulaxu tane'i noxou la itulu sou imauli, ia ane'i ane imulaxu tane'i uasi, la itulu sou itulu no anu vaivaikala sou 'ilixo masua noxi'a.

Ta Mitema Mose'i Kalumo Mivikala Lexe Iesu Anu 'Ena'ei

30 # Ioa 5:19; 6:38 Enisisi la eni amomomo sou a'oxonu mii vile uasi. Eni atulusi'a ta mitema no anu vaivaikala, la alomusou vaikala noxou Mamilo tei, ka sou a'oxonu xaixai noxilo. La eni a'oxonu xaixai noxilo laixesi. Xo eni a'oxonu no anu masaxa noxilo uasi, a'oxonu no anu masaxa noxou ane anu mupalusilo ene'e o. 31Lexe eni melo aa'aloxo, la ta mitema imomo sou ilomuxu vaikala noxilo uasi. 32Ia vile ane ua'aloxo a muxolu ne mo eni elavu lexe a'alo ane ne anu manina. 33-34Ia lexe anu ua'aloxo uasi, la anu mii vile no anu uasi. Ngingi ngepalusi'a ta mitema milai noxou Ioanesi, la anu mua'aloxu mii ane manina. Ia eni elemolu a'alo noxou Ioanesi sou lexe Lataua upamaulingengi.

35Ioanesi anu loxo lalamo ane mukaakaa sou mulosi'a ta mitema lamana. La ngingi nge'osasou lamana ane ne, ia 'osa'ila noxinge ne uxolu maxuvee uasi. 36#Ioa 3:2; 14:11Ia mii ane anu uaulixu a'aloxo noxou Ioanesi a muxolu ne. Mii ane ne, anu xaixai e Mamilo mulosilo sou lexe akalusou mo eni a a'oxo'oxonu, muvikala lamana lexe Mamilo mupalusilo ene'e. 37#Mat 3:17; Ioa 5:32; 8:18Mamilo ane mupalusilo Anu molu mupala'alixo. Ia ngingi ngalomusou xolinu mo ngamaisou vasimolu mo 38vaikala noxou uxolu noxinge uasi. Xo ngingi ngamulaxu tangengi noxou itema e Momu mupalusou mune'e uasi. 39#Luk 24:27Ngingi ngaitiiti lailaixe no anu Lavuku Tavuna teinu, xo ngaxavutala lexe ngano'u mauli ane kaluxu uasi no anu. Ia uasi. Kaukavu muxolu no nano ne, muvivikalasilosi. 40Ia ngingi ngamasaxa ngane'e noxilo sou ngano'u mauli ane ne uasi.

41Eni amasaxa lexe ta mitema i'itinu ualasilo uasi. 42Ia eni elavusinge, mo elavu lexe alauna noxou Lataua uxolu noxinge uasi. 43Eni ene'e sou asosovosou ualasou Mamilo, ia ngingi nga'osasilo uasi. Ia lexe itema vile une'e sou usosovosou ualasousi, la ngingi nga'osasousi. 44Ngingi nga'osasou nga'itinu ualasinge ngato'o, ia ngingi ngatovo nga'oxonu xaixai vile sou lexe Lataua anu Anusisi umaisou la u'itinu ualasinge no anu uasi. La sou ngingi ngamulaxu tangengi noxilo a loxovaa? 45Ngaxavutala lexe eni atulusinge no anu vaivaikala no iou Mamilo uasi. Itema e anu utulusinge no anu vaivaikala ne, anu Mosesi e ngingi ngaloopala noxou lexe usu'ulingengi. 46#Apo 3:22Lexe ngingi ngamulaxu tangengi noxou Mosesi, la ngingi ngamulaxu tangengi noxilo kalumo. Xo Mosesi mukaukavu lavuku noxou, la anu mukaukavu a'aloxosi. 47Ia ngingi ngamulaxu tangengi no anu kaukavu noxou Mosesi uasi, la ngingi ngamomomo sou ngamulaxu tangengi no anu vaikala e eni alelemolu o uasi.”

Currently Selected:

Ioanesi 5: ataNTpo

Highlight

Copy