Tavaꞌu 24

Aisaki Ilee Liveka

1Avalaamu mumaulixu tauu ie piena xoo mole, anu aululu mukalu. Mimii piepiena ane anu mu'oxonu ne, IAUE mualusouxu no anu mukalusi. 2Xe muavuti la mu'avalou itema sou xaixai noxou vile. Anu itema ane ne anu itema tila kena. Anu sou usaxisaxila'u mimii noxou Avalaamu mukalusi. Muvikalanu aloxo 'o, “Namuxaxu avone vaxa no laaxu poxo'ilo mo navikalaleli manina. 3Eni emasaxaine lexe navikala manina no ualasou IAUE anu Lataua sou loxotolo mo lia, lexe mamu nini nasosovosie sema vile iu 'alixeni noxi'a ta mitema lai ne Kanani 'o. 4Laixe nini nalivu ulai no tuala noxilo mo nano'e sema vile iu 'alixeni Aisaki noxi'a ta milemileli lai ne.”

5Xe anu itema ne muavuti la mutali'isou Avalaamu, “Lexe eni alai xe axalisie sema vile iu 'iline xe eni avikalane, xe imulileli ine'e 'o uasi la ane ne loxovaa? Eni apalusou Aisaki ulivu ulai no tuala nini ne'umesou?”

6Avalaamu muavuti la mukolinu aloxo 'o, “Mamu nini napalusou 'alixeni ulivu ulai ne, naxavutalanu ane ne laixe. 7IAUE Lataua sou opo loxotolo muno'ilo no tualasou mamilo mo no lia liaxa'a ta milemileli mo anu muvikala manina lexe lialia ano 'o ne anu ulosi'a ta 'ali'alixe ilo'a ta xasixasilo mo ta 'ilu'ilusuleli. Anu molu upalusou angelo noxou sou uulaxuneni sou nini naxalisie sema vile iu 'alixeni. 8Lexe nini naxalisie sema vile, xe imulineni sou ngongou ngane'e uasi, la vaikala eni evikalanenixu ne umomomo sou utaluxene uasi. Ia nalailixu 'alixeni ulivu ulai no tuala noxilo ne uasi.” 9Ioxe, anu itema sou xaixai noxou ne muavuti la mumuxaxu avolu vile ne no laaxu Avalaamu poxo'u sou muvikala manina lexe anu umulinu aloxo anu Avalaamu mulemolu ne.

10Xe itema sou xaixai noxou anu Avalaamu muavuti la muno'a ta kameli mavulovexa noxou anu Avalaamu ne, xe muno'u mimii piena lailaixe kalumo. Muno'u mimii ane ne mukalu, la sou anu mulutu sou mulai noxou Naola ne Mesopotamia. 11Mulai xe muxali, la muta'olune'i ta kameli 'alai no lexa iou no ale no tuala ne sou mita'olu no lia. Anu asou 'olo'olovoxo mole ta sema ane'i sou ine'e itau lexa. 12Xe muta'olune'i ta kameli mukalu, la sou anu mulinga, “IAUE, nini Lataua noxou tatila noxilo Avalaamu. Nini menesi na'oxo mii ano 'o manina noxilo vaimomo 'osi. Mo namaxa'u alauna noxine noxou itema tila noxilo Avalaamu. 13Namalei, eni ane atutulu no pa'umolu lexa iou 'o, mo ta mitema no tuala 'o, ta 'ili'ili'a ta vuanga ane inene'e sou itau lexa. 14Ia lexe eni avikalane vile aloxo 'o, ‘Eiseo, namuxaxu lexaxene netau ne no lia mo eni aie.’ Xe ane ivikala lexe, ‘Ioxe, amula 'o, ka sou naie. Xe naie ukalu, la sou eni aiene'i ta kameli kalumo.’ Eni emasaxa lexe ane sema ane nesi ane nini mene nesosovosie lexe itema sou xaixai noxine Aisaki semau. Lexe anu masaxa ane ne uxali manina, la eni alavusi lexe nini nemaxau alauna noxine noxou itema tila noxilo.”

15Anu a ulilinga mo ukalu uao, ia Liveka mitavulenu lexaxe vexasou no laxasie mine'e mixali. Liveka ne Betueli 'olu sema. Betueli ne momu ane Naola, eiae Avalaamu vimou. Xe semau ne Milika. 16Liveka ne vuanga 'o, iei ne lailaixe misevile mo ilou mulu vile iai uao. Mine'e la milai avile no lexa iou sou mitau lexa, xe mukalu la milivu mitelo.

17Xe itema sou xaixai noxou Avalaamu ne mupasipaa 'o la muiave mulai noxie la muvikalane aloxo 'o, “Naiele no anu lexaxene mo aie sevile.”

18Xe ane miavuti la mivikalanu aloxo 'o, “Ioxe, Naie.” La sou ane mitaloxolixu lexa vexasou mititilonu ne mulu'e mitetelisou sou mitelixu sou muie. 19Xe muie mukalu la ane mivikalanu aloxo 'o, “Neie mukalu, ia eni alai mo aiene'i ta kamelimeni mo ane'i iie kalumo.” 20Xe ane miavuti la milai minixi'u lexa pa'usou no lupexa'a ta kameli io milai sou mitauxa'a lexa la. Miiene'i xoo mole, ta kameli tavu'alo ne mikalusi'a. 21Ia itema ne anu iou a ulalai noxie sou uutiei, ia uvivikala uasi. Anu umasaxa lexe umaisou Lataua IAUE uxaxai no anu mii ane ne mo lexe uxali maninasou loxo mulingau mulai noxou.

22Xe ane miiene'i mukalu, la anu muno'u suva xoulu vile ne tu'umaxu muxali loxo gramu ta'uve sou mulilixu no kusinei xe mukalanu lasa xoulu tamei tu'umaxu muxali loxo gramu itemaxu ta'uve (100) no avole. 23Xe mukalu la mutali'isie aloxo 'o, “Maula se, navikalaleli, mamine 'ena'ei? Mo lovoxaa tani noxou ne tila sevile sou nexi noxi'a ta mitema noxilo noxi'a taai no anu maasi?”

24Xe ane miavuti la mikolinu aloxo 'o, “Mamilo ne ualasou lexe Betueli, eiae Naola ilee Milika 'ili'a. 25Mo nexi ta kameli taasi'a lailaixe a uxolu mo la'ilalixa'a kalumo piena misevile a uai sou i'ou mo tani a uxolu sou ngaxolu no anu.”

26Xe itema ne muavuti la muxola'u tava'u vo'uxu sou mutulu no anu sou mutangatulu mulu'elai sou mulotu mulai noxou IAUE. 27Muvikala aloxo 'o, “Eni a'iti ualasine IAUE, nini Lataua noxou tila noxilo Avalaamu. Nini nemaxau alauna noxine noxou itema tila noxilo mo nini ne'oxo maninasou vaikala noxine ane nini nevikalanu no anu. Vaimomo 'o, nini menesi neoleleli mole ane eni emuamua'i elapu ene'e noxi'a ta minuminu 'o.”

28Xe sema miavuti la miiave alaxu vilesisi milai noxie nenie taasie sou mia'aloi'a ta minemine. 29Liveka vimoe vile mulu ualasou lexe Lavani, anu mulomu la muiave muatulai no ale sou mulai avile no lexa iou e itema sou xaixai noxou Avalaamu mune'e muxalisie vimou no anu. 30Lavani mumaisou suva noxie vimou kusinei xe lasa no avole, xe mulomusou vaivaikala e itema sou xaixai noxou Avalaamu muvikalanexu, la anu mulai noxou. Anu itema ne a ilo'a ta kameli itutulu no lexa iou pa'umolu. 31Lavani mulai xe muxali noxou, la muvikalanu aloxo 'o, “Nane'e mo nengei talai no tani. Lataua IAUE tanuxene mo mualusine. Ia loxovaa ane nini natutulu loxo 'o? Eni epaipou taasine no taasilo mukalu, mo ta kameli ne taasi'a kalumo a muxolu.”

32Xe itema sou xaixai noxou Avalaamu mulomu aloxo ne xe mukalu la mumulinu Lavani mulai no tani. Ilou milai xe mixali no tani, la Lavani muvikalane'i ta mitema sou xaixai noxou sou misu'uline'i sou milu'enu mimii ne no latane'i ta kameli, xe mukalu la miitixa'a ia'eia'e mo la'ilali sou mi'ou. Xe mukalu la mino'u lexa mulai noxou itema sou xaixai noxou Avalaamu ilo'a ta mitemau sou i'uinu tava'a. 33Mino'u la'ilali mine'enu sou i'ou, la anu itema sou xaixai noxou Avalaamu ne muvikala aloxo 'o, “Eni umomomo sou a'ani palea uasi, lexe eni avikala lamana no anu mii ane eni ene'e lexe alemolu lamana noxinge, la sou eni a'ani.” Xe Lavani muavuti la mukolinu vaikalau aloxo 'o, “Ioxe, navivikala.”

34Xe anu muavuti la muvikala musokou aloxo 'o, “Eni itema sou xaixai noxou Avalaamu, 35IAUE Lataua mualusou tatila noxilo Avalaamu misevile, mo mu'oxonu muxali itema sou lavuluti. Muitiu ta sipsip mo ta mee mo ta kau, siliva mo xoulu. Ta mitema ane sou upalulapusi'a, ane'i ane ta sema xe ta mulu. Muitiu ta kameli mo ta donki kalumo. 36Sala e tatila noxilo semau, ane aululu, ia ane mivo'onu 'ilie vile mulu. Tatila noxilo Avalaamu muitiu mimii noxou latala ne mukalusi. 37Anu muvikala pekia'u noxilo aloxo 'o, ‘Eni axoxoo lai 'o ne Kanani, ia mamu nini nasosovosie sema vile noxi'a ta Kanani lexe 'alixe semau, uasi. 38Nini nalai noxi'a mamilo ta temanu tuala sou mo nakamuli iu 'alixeni sema ane.’ Anu muvikala aloxo ne la sou eni evikala lamana manina lexe eni amulinu vaikala anu muvikalalelixu ne. 39La sou eni evikalanu tatila noxilo aloxo 'o, ‘Lexe sema ane ne, imasaxa lexe imulileli ine'e uasi, la ane ne loxovaa?’ 40La anu muvikala aloxo 'o la, ‘Eni amitema sou alolomu mo amulinu vaikala noxou IAUE. Anu molu upalusou angelo noxou sou umulineni sou mii e nini nalai na'oxo ne, anu uxali laixesi. La sou nini namomomo sou nano'e iu 'alixe sema vile noxi'a ta mitema noxou mamilo. 41Lexe nini na'oxo aloxo, ne la vaikala ano 'o umomomo sou utaluxene la uasi. Mo lexe nini nalai noxi'a ta milemileli xe, ilomuxu vaikalameni uasi, la anu aloxo nesi, vaikala eni evikalanenixu ne umomomo sou utaluxene uasi.’

42Vaimomo 'o eni ene'e exali no lexa iou la elinga aloxo 'o, ‘IAUE, Lataua noxou tatila noxilo Avalaamu, nini mene na'oxo xaixai ane eni ene'e lexe a'oxonu 'o mo uxali manina. 43Eni a axoxoo 'alai no lexa iou, ia lexe sema vuanga vile ine'e itau lexa, la eni avikalane aloxo 'o, “Eiseo, natauxenixo lexa une'e mo aie.” 44Xe ane imasaxa, xe imasaxa sou iiene'i ta kameli xe kalumo, la ane sema e nini nesosovosie lexe tatila noxilo 'olu semau ane.’ 45Eni akalusou lingalinga noxilo uao, ia Liveka mine'e mixali. Mitavulenu lexa vexasou no laxasie milu'elai no lexa iou sou itau lexa. Xe eni eavuti la evikala aloxo 'o, ‘Eiseo, natauxenixo lexa sevile une'e mo aie.’ 46Xe ane mipasipaa 'o la milu'enu lexa vexasou no laxasie la mivikala lexe naie. La sou mitelixu sou eie. Xe miavuti la mivikala lexe eni alai mo aiene'i ta kamelimeni kalumo. 47Xe eni elutu vaxa la etali'isie, ‘Mamine 'ena'ei?’ Ane miavuti la mikolinu tali'ixeni lexe, ‘Eni mamilo ualasou lexe Betueli, eiae Naola ilee Milika 'ili'a.’ Eni elomu aloxo ne, xe eavuti la eno'u suva vile ka ekelelixu no kusinei xe lasa no avole tamei. 48Xe eavuti la exola'u tava'ilo vo'uxu sou etulu no anu sou elotu mulai noxou IAUE. Evikala laixe mo e'iti ualasou Lataua IAUE, anu Lataua noxou tatila noxilo Avalaamu. Anu molu mupaamuxale mune'e noxou tatila noxilo vimou mole ane eni ene'e exalisie sema vuanga 'o sou i'uluxu tatila noxilo 'olu. 49Ia ngingi alalae 'osi ne lexe ngingi ngamaxa'u alauna ulai noxou tatila noxilo mo nga'oxo 'ilixo laixe ulai noxousi, la ngavikala lamana noxilo, xe uasi la ngavikala lamana kalumo, mo sou eni atovo xavutala vile la.”

50Xe Lavani ilou Betueli miavuti la mikolinu vaikalau itema ne aloxo 'o, “Nexi telavusou lexe mii ano 'o molu noxou IAUE Lataua, la anu umomomo sou nexi tamuli xavutala vile la uasi. 51Ia Liveka ano, nano'e mo nalailixe sou tatila noxine 'olu u'uluxe aloxo masaxa noxou IAUE.”

52Xe itema sou xaixai noxou Avalaamu mulomu aloxo ne la mutangatulu mulu'elai sou mulotu mulai noxou IAUE. 53Xe muavuti la mulaasou lavuluti ane anu mutaataa no tivaxu sou mulosie Liveka. Muno'u mimii se'i loxo siliva ilou xoulu mo lavalava sou mulosie Liveka xe mulosou vimoe ilee nenu lavuluti se'i ane lailaixe kalumo.

54Ilo'a mivikala mo mulosi'a mimii ne mukalu, la sou anu ilo'a ta mitemau mi'ani mo miie. Xe mukalu la milai miai. Xe mitulu no kakau, la anu muvikala lamana noxi'a aloxo 'o, “Eni emasaxa lexe alivu ulai noxou tatila noxilo.”

55Xe Liveka vimoe ilee nenu miavuti la mivikala aloxo 'o, “Ngingi ngongi'a ta mitema noxine ngalai, ia Liveka ne lexe ixolu voxo mavulovexa vile, ka sou ilai.”

56Ia anu muavuti la muvikala aloxo 'o, “Mamu nga'oxonexi sou taxolu la. IAUE molu musu'ulileli mo xaixai noxilo ane munene'a 'o. Ia nga'apixo mamu, nga'italoleli mo alivu ulai noxou tatila noxilo.” 57Xe ane'i miavuti la mivikala lexe, “Ta'avalie ine'e mo tatali'isie 'o.” 58La sou mi'ava Liveka milai sou mitali'isie lexe, “Loxovaa, nemasaxa lexe namulinu itema 'o?” La ane mikolinu lexe, “Ani, eni emasaxa lexe alai.”

59La sou nenie ilou vimoe mipalusie ilee sema tila milai sou mimulinu itema sou xaixai noxou Avalaamu ilo'a ta mitema noxou. 60Xe miavuti la mialusie no anu vaivaikala ano 'o, “Vivixe sema, ulai ili'i la tavu'alo misevile neni'a ane nini. Ulai aso vile la ta xasixasine ilo'a ta 'ilu'ilusuneni italoxolixa'a ta uluai'a.” 61La sou Liveka ilo'a ta sema sou xaixai noxie mitaxusou mi'ami'a sou mimulinu itema sou xaixai noxou Avalaamu ilo'a ta mitema noxou sou milai.

62No voxo ane ne, Aisaki mu'umesou xalee lia vile, ia no nano no xalee lia ane ne lexa iou vile a uxolu. Ilemo lexe, “Lexa Noxou Lataua Ane Mauli Muxolu Noxou Mo Umamaisilo”. Xe anu muxoxoolu ne Nexevu. 63No 'olo'olovoxo no voxo ane ne, la anu mulutu sou mukilaka no tani tatatexa xe iou mulai la iou mutukumusi'a ta kameli inene'e loxo noxou. 64Xe Liveka mimaisou la mitaloxo noxou kamelie milu'e no lia, 65xe miavuti la mitali'isou itema sou xaixai noxou Avalaamu, “Itema 'ena'ei e uaalanenge umumuamua'i unene'e ne?” Anu muxiu vaxa la muvikalane lexe, “Ua, tatila noxilo ane.” Xe ane milomu aloxo ne, la ane mipasipaa misu'asou iei no anu lavalava sou kisie.

66Aisaki mune'e muxali noxi'a la sou itema sou xaixai noxou mua'aloxu muamua'i noxou mo mimii ane muxali no anu muamua'i noxou. 67Aisaki muavuti sou muno'e mi'unalai no taasie nenu Sala, la sou anu mu'uluxe semau ne. Anu umasaxaie misevile mole tanutanuxe nenu la ua.

Currently Selected:

Tavaꞌu 24: ataNTpo

Highlight

Copy