MARK 16

Langngaibü

(Mt 28.1-8; Lk 24.1-12; Jn 20.1-10)

1Ladang Nounyet dankei, Mari Magdalin, Jakob nyu Mari si Salomeei hao la naangkula loula ponlem onang jekkei. 2Balea ngeyang shaangbounyet, ngeyang ete chanyu phambüsi haoen hee to loukei. 3Haoen si haoen, “Sen la aoei heekhün ka laang kho yühan apbula?” dogo lauyokei. 4Ladang haoenei chüh- antikei, haoenei laang kho yühan sattian hapbei; kho aicheküman yaangan kikei. 5Hee maangto atsi haoenei heshou che neisimei thupaibü lean mae aenei müt che setan hapbei, hoba haoen aeibou maangpangkei. 6Haoei haoen to laukei, “Maang tepang. Kanei peiseia thüngbü Nazaretbü Jisu lameida. Hao langngeia. Hao hanei aki. Chühashi, haoenei hao khünshang ho yingkei. 7Lausikei hauashi hoba hao eikshuong si Peter la, ‘Hao kan to shaang Galil to hauda. Haoei kan to lenbü tegü, khünei kanei hao haplabü’, dogo lenashi.” 8Haoen longkei hoba aeibou lühko hoba hatenan hee ka satkei. Haoenei aolakei ai alen, aieilausi haoen hatkei.#Shangiedbü dobü ataje Mark 16.9-20 kho youdanga ong kuan haplabü

Jisu Mari Magdalin Jungto Longbü

(Mt 28.9-10; Jn 20.11-18)

9Tou balea shaangbounyet enyu hao langngeian phaia, haoei shabü sou nyet shian sattikunyu Mari Magdalin to shaang longan lenkei. 10Sao haukei hoba hao yoa kibü dan to, haoen mang haapbo hoba haapyoko kijinei lenkei. 11Ladang haoenei hao laang kia hoba Mari Magdalinei hapa dogo laukei, haoenei kho maialem.

Jisuei Eik Nyi la Longan Lenbü

(Lk 24.13-15)

12Kho phaia haoen yokabü müt nyi sangto hauko kijinei, haoei phangcheei haoen la longan lenkei, 13haoen ngaikei hoba lubü shuong to lenkei. Haoenei haosi tokei maialem.

Jisuei Anthükche la Longan Lenbü

(Mt 28.16-20; Lk 24.36-49; Jn 20.19-23; Ykj 1.6-8)

14Hobaje Anthükche kho shaula yungla setan kijinei, haoei haoen la longan lenkei, hoba haoenei maialembü hoba maang- pon kaangbü shanga hakkei, aishanga hao langngeian phaia hapbü shuong to haoenei maialem.

15Haoei haoen to laukei, “Kaodak pendou to hauashi hoba khunak shousi pendou la Ngühlang Maibü songlenashi. 16Aoei maileman baptida hao khümenlabü, lausikei aoei maialemda hao la shedbü kulabü. 17Hobaje aoyouei mailemlaje haoen shanga habü amaaphilabü kilabü: kü nyena haoenei shabü sou shian sattilabü, haoenei ngühyem haanbüei laulabü 18hoba haoenei ikkei pinyu jungeilabü, hoba haoenei hailabü denche yungasikei, khoei haoen la ai khon akulabü; haoenei shatbü to ikei shanglabü hoba haoen mailabü.”

Jisu Khuthük to Anlangbü

(Lk 24.50-53; Ykj 1.9-11)

19Hibü haoen to lauan phaia Bunyubou Jisu khuthük to anlangkei, hoba Mühghaü maenei setkei; 20lausikei haoen haukei hoba pendou aenei songlenkei, hoba Jisuei haoen yoa kümsilei kümbei hoba hao ngüh amaaphilabüei aukabü loushadtikei.#Shangiedbü dobü shuong ateije Mark 16.8 phainei ho doyokuda.

(9 Yaksa shuongei Peter si hao jambou shuong to heshoubouei lenbü pendou tuibouei ngetikei. 10 Kho phaia Jisuei chaang ka chanep sühko saopobü hoba thon akibü khümenbü aleilubü ngühlang haoen danko hautikei.)

Currently Selected:

MARK 16: CHANGBSI

Highlight

Copy