MATHI 2
2
Chaang Aeka Pean Chühbü shuong
1 #
Mik 5.2 Ladang Herod Choba jiha Bethlehema Jisu bukkei, Jerusalem to chaang aeka songngedongebü shuong louan 2#Jer 23.5 phekei, “Jihudabüeibü haanbü bukbü Choba kho lanei ki? Aishanga künei haoeibü khanshoulitshou longan hapbei hoba kün hao to lemla louda.” 3Ladang Herod Chobaei kho ditkei, hao hoba hao yoa kibü Jerusalem kabü mütshuong pendou phenyembei. 4Haoei ungshed jaishou shuong, Ngühkhüm lenbou shuong hoba mütshuong pendou huishaian Messia kho lanei buklabü kije kho haoen ka phekei. 5Haoenei hao to laukei, “Jihuda kabü Bethlehema, aieilausi thuseibü danko ho doakei:
6‘No Jihuda kaoa Bethlehem,
no Jihuda kabü songdakbü yoa ai hangeilameikei
hanbouthamje aying,
aishanga ka mütli Israel songdakla
ka ka leiyeibü che longlabü.’”
7Kheijinei Herodei huphangshoua songngedongebü shuong ngakei hoba khanshoulitshou kho ladang longkei kho shangashatko haoen ka ditletla haujembei. 8Haoei haoen Bethlehem to hai lauko hautikei, “Hauashi, hoba nashou shangabü kho maangsangko pheashi, hoba ladang kanei hao haplaje ngeikei louan hao to lemlabü lele kütokei lenshi.” 9Chobaei lenbü kho ditan haoen bangkei, hoba khanshoulitshou laobou haoenei longjineithama hapbei, kho haoen nashou kibü kaoen sühlangan athak shongko haoen thedanga haukei. 10Ladang haoenei khanshoulitshou kho hapbei haoen olinbüei shenkei; 11#NC 72.10-11 hoba haoen chem to atkei hoba nashou kho haonyu Mari yoa hapbei. Haoen kaoa khüpetkei hoba hao to lembei, hoba haoeneibü neimok sengan haoenei hao la hon, ponlem hibü hoba jen jongsak la kukei. 12Haoen Herod jungto angaila shanga mangha lenkei hoba haoeneibü kaonyek to lubü lam aeka ngaitikei.
Ijep to Satetlangbü
13Ladang haoen ungkei Bunyubou hangangbüei Josef la mangha longan lenkei, “Pienashi, shou hoba haonyu leiashi, hoba Ijep to satashi, hoba ngei ka la alenngai shongko khünei kiashi, aishanga Herodei nashou kho haitila lameida.” 14Hao pikei, hoba shou si nyu ham leian metu- phanga Ijep to satkei, 15#Hos 11.1 hoba Herod ühai shongko khünei kikei, kho thuseibü danko ai laukei kho loushedlabü lele, “Ijep ka ngei kü shou ngaankei.”
Nashou Hanbü shuong Haitibü
16Ladang Herodei songngedongebü shuongei hao huonettia dogo ngekei, hao aeibou khau angkei, hoba haoei songngedongebü shuong ka ditletbü jihsiphai ka tetenbü tegü haoei hautian, Bethlehem hoba kho kaijembo kibü kabü po nyi kanglang kabü nashou pendou haitikei. 17#Jer 31.15 Kheijinei Jeremia thuseibü danko ai lenkei kho loushedkei,
18“Ramaa manghaapbü
hoba haapyoweyobü
yaang ditkei;
Rachelei jembü shousi shanga haapbo,
hoba maang athonenko kikei;
aieilausi haoen akitei.”
Ijep Ka Longeibü
19Herod haijinei Ijepa Josef la Bunyubou hangangbü mangha hai lauko longan 20lenkei, “Pienashi, na hoba haonyu leiashi, hoba Israel kaodak to hauashi, aishanga aoyouei nashou kho haitila lameikei haoen haikhüma.” 21Hao pikei, shou si nyu ham leikei, hoba Israel kaodak to haukei. 22Ladang haoei Arkheloei Jihuda thüka haobou Herod Choba jeila songdakda dogo ditkei, hao khüto ngaila hatkei, hoba mangha lenan hao Galil kaodak to ngaikei. 23Hao haukei hoba Nazaret dogo nyenbü sangnyu chenei kikei, kho ai thuseibü danko hai lenan ki kho loushedtila kiteikei: “Hao to Nazaretbü dogo laulabü.”
Currently Selected:
MATHI 2: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.