LUK 19

Jisu si Zakhia

1Hao Jerikho to atkei hoba kho nakjung danko kikei. 2Khünei Zakhia nyenbü müt che kikei; hao khukabou khüm hebou kikei, hoba hao keibü yingan kikei. 3Haoei Jisu kho laobou yingkeije chühla shanga haujembo kikei, lausikei haoei ühüp, aieilausi khünei mütshang yaang kikei hoba hao tuibü hanbü kikei. 4Hibü hao thedangto langkei hoba hao to chühla shanga bhuklong che to nguikei, aishanga Jisu kho lam to danla hauko kikei. 5Ladang Jisu khonei sühlangkei haoei chühantikei hoba hao to laukei, “Zakhia, hali kaiyena; tat ngo ka chema sühjan.” 6Hao tongde louyenkei hoba hao olin angko sungletkei. 7Haoenei ladang kho hapbei haoen pendou nyamnyamyoko laukei, “Hao shabü müt cheeibü yen la lela haua!” 8Zakhia khünei lokei hoba Bunyubou to laukei, “Yaangbou, ngei ngeibü nyaksinam jamde shalebü la kulabü, hoba ngei müt at ka ajanbüei sungan kialonga ngei phejan leiei aeian shemngailabü.” 9Jisuei hao to laukei, “Tat khümenbü ho chem to loda, aishanga haokei Abraham shou ki. 10Aishanga Müteibü Shou maubü lamla hoba khümenla loukei.”

Namjan Ngühphatbü

(Mt 25.14-30)

11Haoenei kho ditko kitoua haoei lubü ngühphatbü che lenkei, aieilausi hao Jerusalem nyangko kikei, hoba haoenei Mühghaü Sangle khoyam haüthüklabü dogo dambei. 12Haoei laukei, “Yaangbü müt cheei choba Sangle songdak hau sungletlabü hoba longeilabü dogo kaonyek heebü che to meimeikei. 13Haoei haoeibü sambü an ngakei hoba haoen mütpem weko la mina#MINA: denari 100ei mina che onda; denari che kho heshou cheeibü eikmu che bang kukei. Haoei haoen to laukei, ‘Ngo alongei shongko nam seiteiashi.’ 14Lausikei hao kaonyek kabü mütshuongei hao to mangsenkei, hoba haoenei phainei hai lauko ngühlang künbü hautikei, ‘Künei ho müt kün thüka choba la lemang asühda.’

15“Ladang hao choba lela songdak hau sungletan longeikei, haoenei namseibü ka ku lai pailetkeije ngela shanga haoei sambü shuong aoyou la nam jankukei khübü dan hao jungto ngabala haoei ngühkhüm kukei. 16Shaangbou loukei hoba laukei, ‘Yaangbou, kaibü mina khoei mina an paileda.’ 17Haoei hao to laukei, ‘Thumai sambü maibü! No kümsilei hanbü chenei maang lanan kikeibü, sangnyu an thüka songdakshi.’ 18Nyiboubü kho loukei hoba laukei, ‘Yaangbou, kaibü minaei ngao aeila paileda.’ 19Haoei haotokei laukei, ‘Hobaje nokei sangnyu ngao thüka songdakshi.’

20“Lubü che loukei hoba laukei, ‘Yaangbou, kaibü mina, laobou ngei neiei sholepan phokei, kho ho yingkei. 21Ngo kato hatko kikei aieilausi no maangpon thotakbü müt yingkei; nyi lanei apho khüka nyi sungda hoba nyi lanei awen khüka nyi latda.’ 22Yaangenbou khoei hao to laukei, ‘Müt amaibou, ka sembung ka ngei ka mat jembho. Ngo maangpon thotakbü müt, khei ngei awenbü ka latda, dogo nyi ngo ngekei laushi lo? 23Kholongaje nyi ngeibü nam thanshanga aila aphoku? Khei yingsije ngo longeijinei phobnam yoan hapbhoulabü.’

24“Haoei nyangko loan kibü shuong to laukei, ‘Hao ka mina kho hiashi hoba mina an kibou khola kuyoashi.’ 25Haoenei hao to laukei, ‘Yaangbou, haoei mina an kia!’ 26‘Ngei kan to lenda, aoyouei ki haoen la aei kuyolabü, hoba aoei ai haoei ai ki khokei hao ka ngailanglabü. 27Lausikei ngeibü dangbou shuong, aoyouei ngo haoen thüka choba la lemang asüh, haoen kho hato leiba hoba kü thedanga haitiashi!’ ”

Jerusalem to Thük Hapbo Atbü

(Mt 21.1-11; Mk 11.1-11; Jn 12.12-19)

28Jisuei kho lauan phaia, hao Jerusalem to thedangto hauteikei. 29Ladang hao Bethfage si Bethani nyangko Oliv shongh dogo laubou shuipem chenei sühlangkei, haoei haoeibü eik nyi hautiko 30laukei, “Kasi thedang kabü sang khüto atashi. Kasi khüto atsi kasiei, ladangkei müt setan achühbü gadu shoushou che phenan haplabü. Kho sengashi hoba sungba. 31Hobaje müt atei kasi to, ‘Aila kasiei kho sengletda?’ dogo phesije, kasiei hai laujan: ‘Bunyubouei khamakei.’ ” 32Ngühlang künbü shuong haukei hoba ajanjan pendou haoei haosi la lenbü tegü kikei. 33Haosiei gadu shoushou sengletko kijinei kho bunyuei haosi to laukei, “Kasiei aila ho sengda”? 34Haosiei laukei, “Bunyubouei khamakei.” 35Haosiei Jisu jungto kobakei, hoba ladang haoenei kho gadu shoushou thüka nei imbukei, Jisu kho thüka settikei. 36Hao hauko kijinei haoenei haoeneibü neisimei lama imbukei. 37Ladang hao sangnyu nyangshangko Oliv shonghshui ka louyenko kikei, eikshuong tan pendouei haoenei hapbü maangpanglabü kümsilei pendou shanga olinangko Mühghaü la nyensang kula khangko 38laukei, “Bunyubou nyena Choba tegü ao louada hao haülabou yingshi; khuthüka sangmai, khuthük suokboua soneikangbü.”

39Shuong yo ka Farisibü atei hao to laukei, “Lenbou, ka eikshuong to hakashi.” 40Haoei jongaikei, “Ngei kan to lenda, haoen semele kialonga habü laang shuongei ngekyolabü.”

Jisuei Jerusalem shanga Haapbubü

41Ladang hao chunga nyangko loukei hoba sangnyu kho hapbei haoei haapbo 42laukei, “Nyi, khei, tat sangmai shangabü ho ongkei ngean kiteikei yingma! Lausikei khübü kho ka nyek ka huletan kia. 43Aishanga ka jungto chalou shuong loulabü, laobounei kaibü labou shuongei no shilabü, laangbaei leleplabü hoba kaoen pendou ae jembo khinleplabü; 44haoenei no hoba ka shousi shuong kaoa yeptiko shemtilabü, hoba kala laang che thüka che üpyokulabü, aieilausi nyi Mühghaü no pean chühla loubü jih ashen.”

Jisu Lembüchem to Haubü

(Mt 21.12-17; Mk 11.15-19; Jn 2.13-22)

45Hao lembüchem to atkei, hoba namseibü shuong shian sattiko, 46haoen to laukei, “Laishibaei lenda, ‘Kü chem kho welaushang chem yinglabü’; lausikei kanei ho kokbü shuongeibü laangpob la yeitia.”

47Haoei chalou angbüa lembü- chema lenkei, lausikei thükkabü ungshedbü shuong, hoba Ngühkhüm lenbou shuong hoba mütshuongeibü khukabü shuongei hao haitilabü lam lambei. 48Lausikei, ai kümlaje haoenei alamen, aishanga mütshuong pendouei maangtakko hao to ditko kikei.

Currently Selected:

LUK 19: CHANGBSI

Highlight

Copy