KAOBAK 49

Jakobei Hao Shousi Haükubü

1Kheijinei Jakobei hao shousi shuong ngaan laukei, “Kan yoshaiashi, khei ngiet phaia kan jungto ai loula kho ngei kan la lenkho.”

2“Jakob shousi shuong, liko yoshaian ditashi:

kaneibü bou Israeleibü ngüh ditashi.

3“Reuben, küshou jaishoubou,

ngeibü hau, tetsida khangbü.

No soumoa haangenbou, hoba no seia sonenbou.

4No küp ajembü dei tegü,

no jaila leko ühanglabü,

aishanga no kaboueibü shen to nguikei;

No ngeibü thangnyu shuong to jambei,

hoba nyi kaboueibü shen shatikei.

5“Simeon si Levi tükdebü jaisina ki.

Haosiei ik shatyobü kaangbüsekbü shanga insiaubu jungeikei.

6 # Efe 5.11 Haosi kok shakyobüa ngo ayolabü,

ayingsi haosi sangkuphelambüa ngei phejan alelabü,

Aishanga haosiei khauanga mütshuong haitikei,

hoba haosiei louyola masu pongsu yaküp thettikei.

7Haosi khauanga shedsikhau yingshi,

aishanga kho kaangbü sekbü.

Hobaje haosi khau lotbüa shedsikhau yingshi,

aieilausi kho onou akak.

Ngei haoen Israel kaonyu pendoua aatilabü.

Israel mütli yoa ngei haoen lintilabü.

8“O Jihuda, noje kaibü jaisinasi shuongei sanglabü.

Nyi kaibü ikei kaibü dangboueibü ngüma nyatlabü.

Kaboueibü shousi shuongei ka to khüpetlabü.

9O Jihuda, no molosaonyu shoushou tegütham.

Küshou, no mei taketshang ka longeida;

hao molosaonyu hima leketnyu lengakei,

aoei hao pitila?

10Hao yemsang to alou shongko

Jihuda ka Chobaeibü songdak julo,

hoba hao you jungka songdak-julo akuklabü,

hoba mütshuongei haoeibü ngüh ditkulabü.

11Semlühlonga haoeibü gadu phenan,

hoba semlühlong maibouthama haoeibü gadu shoushou phenan;

Haoei haoeibü neisimei ihei,

hoba haoeibü neisimei sii hima sakbü semlüha saklabü.

12Ihei haoeibü nyek saklanglabü,

hoba sendeiei haoeibü hauh thupailabü.

13“Zebulun yungnyu yungkoa kilabü;

hoba hao yungkoa longchem yaangbü phoshang yinglabü.

Sidon kaodak to hao leilang khümlabü.

14“Issakarje sekokbü gadu che

onkün penyi kanglanga shingetnyu yepbü him.

15Haoei haksoshang maibü che hapda,

hoba kaonyu kho chühsebü maibü ki.

Hibü on künla haoeibü taak thokuda,

hoba aao che la yeiko kümtileitida.

16“Danje Israelbü yoa mütli che tegü,

jembü mütli shanga mat jembulabü.

17Dan lamkhonga kibü pinyu,

lamnyua kibü kom kibü pinyu,

Haoei Kolieibü youa püpda,

khei yingbüei khonei setbü taakphai to atlabü.

18“O Bunyubou, ngei kaibü leiyenbü chüheida.

19“Gadje koklaklakbü danei shieilabü.

Lausikei phailaje haoei haoen youdema japbo shilabü.

20“Ashereibü kaonyu ka haabü shausiyung longlabü.

Hobaje Chobaei shaula mubü jemoubü shausiyung kümenlabü.

21“Naftali meishi hima wenbou ki.

Haoei ngühang ngühlam ngean lauda.

22“Josefje maihekbü semlüh,

yungko kabü shenmaibü semlühlong phatkei.

Haoeibü bhek kümthanga khuida.

23Lau jungbü dangbou shuongei hao amaiko komda,

hoba lau si laujin jungan kipbo hao shida.

24Lausikei haoeibü lau maietnyu kikei;

Jakobeibü Yaangenbou phak danko,

Israeleibü Sanlombou hoba Laangnyudak danko,

haoeibü phem shoulotham yeikei.

25Kaboueibü Mühghaüei ka to thuida,

Thükenbou Mühghaüei müh ka lang yantikuko no haükuda.

Hobaje kaonyu maang ka haübü dei,

shatsinam hoba shisi shousi juongnyu haülabü.

26Kaboueibü haülabü shuong kho,

shangiedbü shongh shuongeibü haülabü tokei yaangbou.

Khübü haülabü pendou Josefeibü khua,

khei haoeibü jaisinasi shuong yo ka

phangche shanenboueibü khüngjaa baulabü.

27“Benjamin yamkabü sholou phatko ki;

ngeyang haoei mei taketda,

hoba chasem soletbü phet janda.”

28Habü ho pendou Israel phang anthüknyi ki, hoba lulu to paplepbü haülabü shanga lenko haoeneibü bouei haülabü kukei.

Jakob Haibü hoba Khünbü

29Kho phaia haoei haoen to ngüh maisho lenkei: “Touje ngo haibüa kü mütli yoa yolabü chalou süha. Hibü, Hitbü Efron sekphaia kibü heelaaka ngeibü pisibousi shuong yoa, 30Kanana Mamre nyangko, Hitbü Efron ka heelaak shanga Abrahamei sekphai thonan phoubü Makpela sekshui laangkhün khonei ngo khünshi. 31Khonei Abraham si haoyak Sara khünkei; Isak si haoyak Rebeka khünkei hoba khünei ngei küyak Lea khünkei. 32Kho sekshui hoba khünei kibü laangkhün kho Hitbü ka jekngaikei.” 33Ladang Jakobei hao shousi shuong to joyokhümbei, haoeibü you yepshanga thopbei hoba thonbü hak hinan haikei, hoba hao mütli shuong yoa yokei.

Currently Selected:

KAOBAK 49: CHANGBSI

Highlight

Copy