KAOBAK 45

Josefei Hao Jaisishuong la Khuokan Lenbü

1Kheijinei Josefei hao yoa loan kibü shuong thedanga haoeibü maangpon senyühashembo thepetla athüksije haoei laukei, “Kü jungka müt pendou kukashi!” Hibü Josefei hao jaisi shuong la haoeibü the ngetijinei müt aokei akitei. 2Kheijinei hao aeibou haapbü Ijepbü hoba Farao chemdang kabü mütshuongei ditkei. 3Hobaje Josefei hao jaisi shuong to laukei, “Ngo Josef, kübou tou sühko lang kiakaoba lo?” Lausikei jaisishuong aeibou mangan apbei hoba haoenei jongaila athükko apbei. 4Kho phaia Josefei jaisi shuong to laukei, “Sanoudambo kü jungto nyangko kaishima.” Hibü haoen hao nyangko hausi haoei laukei, “Kanei ao Ijepbü la yaakkei kho kaneibü na Josef ngo! 5Lausikei kanei ngo yaakbü shanga kan lolo maangto teshat, ayingsi temangpokyo; aieilausi langkei püetla shanga Mühghaüei ngo kan thedangto hautikei. 6Aishanga tou po nyi kaodaka mühda; hoba toukei po ngao sühko sek amoulabü, latkei alatlabü. 7Lausikei Mühghaüei kaodaka kan joubü shuong shanga langkei püetla hoba khümenla shanga kan to shaang ngo hautikei. 8#Rom 8.28 Khoei, kanei ngo hato hautikei aying, Mühghaüei hautikei. Hobaje ngo Farao aenei bou che, haoeibü chema hoba Ijep kaodak khümboa bunyubou yeitikei.

9“Kan kübou jungto panteiko ngaiashi, hao to lenashi, kashou Josefei hai lauda: ‘Mühghaüei Ijep kaodak khümboa bunyubou yeitia. Kü jungto aphaiko panteiko kaiyena. 10No Goshen kaonyeka kiashi, hibü no, kaibü shousi hoba shisi shuong hoba nyi aiong ki, pendou kü junga nyangko kilabü. 11Khünei ngei no samlabü; aieilausi toukei po ngao mühlabü. Khei ayinglonga aingenyu no, kan chempen hoba ajanjan pendou, nyi kibü khümboei kongan aaplabü.’

12“Chühashi, ngei kü sembungei lenbü kanei jembü nyekei hapda. 13#Ykj 7.14 Toukei Ijep kaodaka ngo yaangenbü pendou hoba kanei jembü nyekei hapbü ajanjan ngühli pendou kübou la lenshima. Hobaje kübou hato tongde leiyenba.”

14Kheijinei haoei haona Benjamin ngüma haoeibü ikei shenan haapbei, hoba Benjaminei haoeibü ngüma aapan haapbei. 15Kho phaia haoei jaisinasi shuong pendou to sembung shepan haoen to haoeibü ikei souan haapbei. Kho phaiaje jaisinasi shuongei hao to ngühsong wanyokei.

16Ladang Josefeibü jaisi shuong louakei dogo Farao choba chema ngühlang ditkei, Farao hoba hao phanga yaangbü shuong olinkei. 17Hobaje Faraoei Josef to laukei, “Kaibü jaisi shuong to lenashi, ‘Kanei hai kümshi: Kaneibü shatsinam la künlekuashi hoba Kanan kaodak to ngaiashi; 18hoba kaneibü bou hoba chempen pendou hato kü jungto leiba; hoba Ijep kaodaka pendou to maibou kaophei ngei kan la kulabü hoba khünei kanei haabü kaodak ka longbü shaulabü.’ 19Tokei kanei haoen to ho lenashi, ‘Hai kümshi: Kaneibü shousina, nashou hanbü hoba lulueibü yaksi shuong shanga Ijep kaodak ka kailong jungan hauan kaneibü bou leibama. 20Kanei kaneibü peisilei shanga ai tedam, aieilausi Ijep kaodaka kibü peisilei maibü khümbo kho kaneibü yinglabü.’ ” 21Kheijinei Israeleibü shousi shuongei kho ditkei. Hobaje Faraoei laubü tegü Josefei haoen la kailong kukei, hoba lama shaula shausiyung kukei. 22Toukei haoei haoen mütpem weko la nei jeilabü kukei, lausikei Benjamin laje haoei chandinam saongao sem hoba ngaonei jeiyolabü neisimei kukei. 23Hobaje haoei bou jungto peisilei ho hai künan hautikei; Ijep kaodak kabü peisilei maibü gadu an manko, hoba haobouei lama shaula shaubu hoba wen hoba lubü shausiyung gadu pi an manko künan hautikei. 24Kho khei haoen jaisi shuong hautikei hoba haoen ungjinei haoei haoen to laukei, “Lama tüoyoma no!”

25Hibü haoen Ijep kaodak ka ungkei hoba Kanan kaodaka kibü haoeneibü bou Jakob junga sühkei. 26Haoenei hao to lenkei, “Josef kho toukei lang kia! Ijep kaodak pendou thüka hao bunyu yingkei!” Jakob maangkou shembei; aishanga haoeneibü ngüh to haoei maialem.

27Lausikei ladang Josefei lentibü ngüh khümbo hao la lenkei hoba hao leila hautibü kailong hapbei, kheijinei Jakob maang sinngaikei. 28Hobaje Israelei laukei, “Hoei soua! Küshou Josef toukei lang kia! Ngo mohaitoua hauan hao to chühlabü.”

Currently Selected:

KAOBAK 45: CHANGBSI

Highlight

Copy