LEIYENBÜ 22

Shemngaibü Ngühkhüm

1“Müt cheei masu che ayingsi sanlon che koksi hoba kho haitisi ayingsi yaaksi haoei masu che shanga masu ngao hoba sanlon che shanga sanlon lei kujan. 2-4#Mt 24.43 Haoei kokbü shanga haoei shemjan. Haoei ai akilonga, hao kokla haubü shanga hao aao che tegü yaakjan. Kokbü shatsinam kho lang kian hapalonga masu yingsikei, gadu ayingsi sanlon yingsikei, haoei phejan penyi ngaingoulabü.

“Kokbü che chemto atan kian lapsi hoba hao ngümettisi hao haitibü shanga hao shedbü akilabü. Lausikei kho changea yingalonga hao haitisi haitibou kho shedbü.

5“Müt cheei sek ayingsi semlühlaaka haoeibü shatsinam lamshautialonga hoba khübü aatian müeibü shaukualonga, haoei haoeibü sek ayingsi semlühlaak maiboutham ka shemngaijan.

6“Wan angan jakbaa wan bauan youman thep ayingsi yeman kibü youlong ayingsi sek lonan apsi, aoei wan angtikei haoei tükde angngaikujan.

7“Müt atei hao lepboueibü ika peisilei phokusi hoba kho haoeibü chem ka koklangsi kho hapenalonga kokbouei kho phejan penyiei shemngaijan. 8Lausikei kokbü alapenlonga chem Bunyubouei lepboueibü peisileia ik atasi ütje ngela shanga hao Mühghaü lemshang to leian loujan.

9“Oyophetyobü weko, masu shangabü yingsikei, gadu shanga yingsikei, sanlon shanga yingsikei, neisimei shanga yingsikei, khei ai maubülebü shangabü yinglaje yingasikei, atei ho yingkei dogo lenalonga, tan nyieibü ngüh kho Mühghaü lemshang to loujan. Mühghaüei ao yuktilaje haoei jembü lepbou la phejan nyi thüngei ngaitikulabü.

10“Müt atei haoeibü lepbou la gadu yingsikei, masu yingsikei, sanlon yingsikei, shatsinam at phokusi, hoba aoeikei ühüpbo haian apsi, ayingsi mou lesi, nanglangan kisi, 11#Ibr 6.16 haoei hao lepboueibü peitoleito ik atasi üt, Bunyubou thedanga thelalanlabü; hoba bunyuei kho sungletlabü hoba müt khola ashemngaitilabü. 12Lausikei kho hao ka koklangan kialonga, haoei Bunyubou la kho shemngailabü. 13Shatsinam kho yamyangei taketnyu shauan kialonga, haoei aukabü shanga netshou sungbajan, hoba taketbü mei kho hao la ashemtilabü.

14“Müt atei lepbou ka denche lotsi hoba Bunyubou kho akijinei leilusi ayingsi haian apsi, tükde haoei shemjan. 15Lausikei Bunyubou kiteialonga, haoei ashemlabü. Kho longche shanga munam kuan phobü yingalonga kho munamei noa.

Shuongsiphang hoba Songle Ngühkhüm

16“Hobaje müt atei tokei akanko kibü saosüngbü medei suletan sao to asangalanbü kümalonga haoei tükde khümmu kujan hoba yakla ngajan. 17Lausikei saoeibü bouei sao hao jungto hautila lothedalonga, haoei medei shuong shanga kuyobü hima yaknga mu kujan.

18“Nyi seibüyaübü yaksa aokei akitijan.

19“Aoyouei meisiau to yeplaje hao tükde haitijan.

20“Aoyouei Bunyubou to liman lubü mühghaü to lemlaje hao lemailela mautijan.

21“Yenbou to amaibü ajungeilabü ayingsi hao khon akutilabü; aishanga kan Ijep kaodaka yenla lean kikei. 22Kanei latnyu ayingsi bou akibü teshitekoe. 23#Lk 8.7 Kanei haoen shieikoealonga hoba haoenei kü to ngekalonga maimaitham ngei haoenei ngekbü ditkulabü, 24hoba ngo khau anglabü hoba kan wapyoa inei haitilabü. Kaneibü yaksi shuong latnyu la yeilabü, hoba kaneibü shousi shoujit yeilabü.

25“Ka yoa kibü ngeibü mütli shalebü at la nyi nam lotkusi hao to namlot kubouei tegü ajungeilabü; ayingsi kanei hao ka phobnam ahijan. 26Nyi kaibü lepboueibü neisimei thesilan che tegü sungalonga nyi hao la chanyu anepjineitham kungaijan; 27aieilausi hao mang lemabü mangnei kho ong ki. Hao ainei yepla? Ladang haoei kü to ngeklaje ngei hao la ditkulabü, aieilausi ngo üeisanou ki.

28 # Ykj 23.5 “Nyi Mühghaü la tenyiku ayingsi kaibü mütli thüka songdakbou to tekhüktuok.

29“Nyi kaibü shaangbü langle kesiong ka, ih ka hoba oliv onang ka kü to lemla tephai.

“Kaneibü shaangbü shou kü la kujan. 30Kho tegü kaibü masu si sanlonei nyi kho khei kümjan; chalou nyet nyu yoa kilabü; setbounyet nyi kho kü la kujan.

31“Kan kü shanga saopobü kilabü. Hibü yama meisiauei taketbü phe kanei aikei ashaujan; kho kanei keila okashi.

Currently Selected:

LEIYENBÜ 22: CHANGBSI

Highlight

Copy