LEIYENBÜ 19

Israelbü shuong Sinai shongha

1Israel shousi shuongei Ijep kaodak apyoan phaia lit semboua shaangbounyet haoen Sinai yamlamang to loukei. 2Hobaje ladang haoenei Refidim ka meimeian Sinai yamlamang to loukei, haoen yama shaikei; hoba khonei Israelbü shongh thedanga shaikei.

3Hobaje Mosa Mühghaü jungto shongh to angkei, hoba Bunyubou shongh ka hao ngakei hoba laukei, “Nyi Jakob thensilen, Israel shousi shuong to lenashi; 4‘Ngo Bunyubouei Ijepbü to ai kümbei hoba ailai auluei jembü kaaka shoushou tonda, kho maimai ngei kan kü jungto tonbakei kho kanei hapa. 5Hibü tou kanei ngeibü ngüh ditko laualonga, hoba ngeibü thesilan jungeikho laualonga phang pendou yo ka kan ngeibü nyaksinam yinglabü. Kaonyu pendou ngeibü yingasikei 6#1 Pet 2.5-9 kan kü shanga ungshedbü sangle che hoba saopobü phang che kilabü.’ Habü ngüh nyi Israel shousi shuong to lenjan.” 7Hibü Mosaei mütshuong ka leiyeibü jaishou shuong ngakei hoba Bunyubouei hao la lenbü ngüh pendou lenkhümbei. 8Hobaje müt pendouei jongaiko laukei, “Bunyubou lenbü pendou kho künei kümlabü.” Hibü Mosaei mütshuongeibü ngüh kho Bunyubou la ngetikei.

9 Bunyubouei Mosa to laukei, “Ngei ka to joyojinei mütshuongei ditlabü, hoba haoenei ka to ponpendou mailemlabü lele ngo ka jungto sangmei shangtüngbüa loulabü.” Kheijinei Mosaei mütshuongei jongaibü Bunyubou to lenkei. 10Hobaje Bunyubouei Mosa to lenkei, “Mütshuong jungto hauashi, hoba tat si ngieta haoen saüenan phoshi. Haoen neisimei saktiashi, 11hoba sembounyet shanga lamlean kishi; aieilausi sembounyet müt pendou thedanga Sinai shongh to Bunyubou louyenlabü. 12Mütshuong shanga nyi takletbü kaijembo phojan hoba ho lenashi: ‘Kan shongh khüto üanglabü hoba leilang khün ameitila kan lulu lolo maangsangashi; aoei shongha meitilaje hao tükde haitilabü; 13#Ibr 12.20 hao to aikei ikei ameitilabü, lausikei hao maimaitham laangei tetetlabü ayingsi laujinei kipettilabü. Meisiau yingsikei müt yingsikei, hao lang akitilabü.’ Ladang teklaang lounyu metlaje kheijinei ong haoen shongh to anglabü.”

14Hibü Mosa shongh ka louyenan mütshuong saüenkukei, hoba haoenei haoeneibü neisimei sakkei. 15Hobaje Mosaei mütshuong to laukei, “Sembounyet shanga lamlean kishi, hoba siisiphe tejam.”

16 # Ibr 12.18-19 Sembounyet ngeyang, langmak langpon phaukei, hoba shongha shangtüngbü sangmei shangkei, hoba teklaang langh yaang ditkei. Shaishang kabü mütshuong pendou hatbüei lühkei. 17Mühghaü to haüyola Mosaei mütshuong shaishang ka leian longkei, hoba haoen shongh youa lokei. 18Sinai shongh khümbo wankhükei khuilepbei, aieilausi kho thükto Bunyubou wana louyenkei. Hobaje wankhük kho wanang kabü wankhük tegü angkei, hoba shongh pendou kho aeibou nyaakeikei. 19Ladang teklaang langh aei aei kaangbou yeikei, Mosaei joyokei hoba Mühghaüei langmakei jongaikei. 20Bunyubou Sinai shongh to shongh khu sühko louyenkei hoba Mosa shongh khu to ngakei. Hibü Mosa angkei, 21hoba Bunyubouei Mosa to lenkei, “Mütshuongei nuyoko Bunyubou to chühjinei leikhüm tuyetan haoen juong shembula, yanashi hoba mütshuong to maangsanglabü lenashi. 22Ungshedbou shuong mangkei aoyou Bunyubou nyangko loulaje Bunyubouei ik ashattila haoen lolo saüentishi.”

23Mosaei Bunyubou to laukei, “Mütshuongei Sinai shongh to alongenlabü; aieilausi nyi künla shongh kaijembo leilang jala sakkukei hoba kho saüenla lenkei.”

24 Bunyubouei jongaiko laukei, “Yanashi, hoba ka yoa Aron leiba. Lausikei Bunyubou haoen khulimbo alolabü lele ungshedbou shuong si mütshuong kü jungto leilang danko telongti.” 25Hibü Mosa mütshuong jungto yanan haoen to lenkei.

Currently Selected:

LEIYENBÜ 19: CHANGBSI

Highlight

Copy