LEIYENBÜ 17

Laang ka Dei

(Wej 20.1-13)

1Israel mütshang pendou Sin yamlamang ka meimeian Bunyubouei sakkubü tegü kaoen che ka che to kukkei hoba haoen Refidima shaikei; lausikei khonei mütshuong shanga yunglabü dei akitei. 2#1 Kor 10.9 Hibü haoenei Mosa to oyoko laukei, “Künla yunglabü labü.” Mosaei jongaiko laukei, “Kan kü to aila oyoda? Aila kanei Bunyubou takteida?”

3Lausikei khonei mütshuong deiei aeibou mühkei; hoba mütshuongei Mosa khulimbo nyamnyambei. Haoenei laukei, “Deilaei kün, küneibü shousi shuong hoba samkeisamuk shatsinam shuong haitila Ijep kaodak ka aila nyi kün leijung loukei?”

4Hibü Mosaei Bunyubou to ngekko laukei, “Habü mütshuong to ngei ai kümla? Haoenei kü to laangei tetlabü lele ong lamleakei.”

5 Bunyubouei Mosa to laukei, “Ka yoa Israelbü jaishou shuong at leian mütshuong thedangto hauashi, hoba kaibü ju laobouei yungnyua ngümbei kho kaibü ika jungan hauashi. 6#1 Kor 10.4 Chühashi, Horeba ngo ka thedanga laang thüka lolabü. Nyi laang to ngümashi, hoba mütshuongei yunglabü lele kho laang ka dei longlabü.” Mosaei Israelbü jaishou shuong thedanga kho tegü kümbei.

7Hobaje kho kaoen to Massa hoba Meriba dogo nyenkei, aieilausi Israel shousi shuongei oyokei hoba Bunyubou takteiko laukei, “Bunyubou sen yoa kiasi aki?”

Amalekbü to Wapyobü

8Kheijinei Amalekbü louan Israelbü to Refidima wapyokei. 9Mosaei Joshua to laukei, “Sen shanga müt pienashi hoba Amalekbü to wapyoashi. Ngiet ngo shongh khua Mühghaüeibü ju ngeibü ika jungan lolabü.” 10Hibü Mosaei lenbü tegü Joshuaei kümbei hoba Amalekbü to wapyokei, hoba Mosa, Aron hoba Hur shongh khu to angkei. 11Ladang Mosaei haoeibü ik tuokkei, kheijinei Israelbüei thükkei, hoba ladang ong haoeibü ik yanlaje kheijinei Amalekbüei thükkei. 12Lausikei ladang Mosa ik noukei, haoenei laang che sungjung louan hao phanga phokei, hoba kho thüka hao setkei; hoba Aron si Hur haosi hamei cheei jinei, cheei jinei dogo jungan haoeibü ik tuokan kitikei; hoba chanyu anepshongko haoeibü ik akukko kikei. 13Hibü Joshuaei Amalek hoba haoen mütshuong haoeibü inlouei thükenkei. 14Kheijinei Bunyubouei Mosa to laukei, “Damenlabü shanga ho le chenei doashi, hoba Joshuaeibü nouei ditko nyibou wean chühashi; aieilausi mühnyu phanga mütei ho adamenlabü lele ngei Amalek haman aplabü.” 15Hobaje Mosaei laangshongei lemshang che yaükei, hoba khoeibü nyen “Bunyubou kho ngeibü Nisan” dogo nyenkei. 16Hobaje haoei laukei, “Bunyubouei thebülanbü lea. Bunyubouei Amalekbü to meten meten wapyolabü.”

Currently Selected:

LEIYENBÜ 17: CHANGBSI

Highlight

Copy