LEIYENBÜ 14
14
Saklangbü Yungnyu Danbü
1Kheijinei Bunyubouei Mosa to laukei, 2“Israelbü to sepeinyu ngaian Pi Hahirot thedanga Migdol si Saklangbü Yungnyu kaanglang Baal Zefon nyangko shaiteishi dogo lenshi. 3Aieilausi Faraoei ‘Israelbü phetsen kaoei kailepan yamei mühakei’ dogo laulabü. 4#Rom 9.17 Hobaje ngei Farao maang kaangtilabü hoba haoei haoen shijung haulabü. Lausikei Farao si haoeibü sepai tan pendou thüka ngei nyenhaang haplabü; hoba Ijepbüei ngo Bunyubou ki dogo ngelabü.” Hobaje Israelbüei kho tegü kümbei.
5Ladang Ijep choba to mütshuong sada dogo lenkei, Farao si haoeibü yaangenbü shuong dambü jakshaian apbei, hoba laukei, “Senei ai kümbei? Senei Israelbü litia, hoba senei haoeneibü eik aleouko apa!” 6Hibü haoei haoeibü kailong lamlean haoeibü sepai shuong hao yoa leian haukei. 7Shanenbü kailong saongaolak hoba Ijepbü kailong pendou hoba khübü thüka leiyeibü dan yoan hao yoa haukei. 8Ijep choba Faraoeibü maangpon Bunyubouei kaangtisi haoei Israel shousi shuong phai shijung haukei; aieilausi Israel shousi shuongkei maangei omatnyu hauko kikei. 9Ijepbü shuongeibü koli sepai, hoba kailong leibü dan hoba sepai shuong khümboei Israelbü shuong shilangkei, hoba haoen Pi Hahirot si Baal Zefon nyangko Saklangbü Yungnyu yungkoa shaian kijinei laphetkei.
10Ladang Israel shousi shuongei chühangtikei, haoenei Farao Choba si Ijepbü shuong hao phainei haoen shijung louko hapbei; haoen aeibou hatkei hoba Israel shousi shuongei Bunyubou to ngekkei. 11Hobaje haoenei Mosa to laukei, “Ijepa hee aki dogo nyi kün yama haitila leian satkei sai? Ijep ka leian longan nyi aila kün ho tegü jungeida? 12‘Ijepbü khangenko kikho, kün khei ong apyoshi’ dogo ho ngüh Ijepa ka to alau lo? Aieilausi yama haibü toje Ijepbü khangenko kibü kün shanga maibou yingkhoulabü.”
13Mosaei mütshuong to laukei, “Kan tehüt! Atopeiko kishi, hoba Bunyubou khümenbü laobou kan shanga haoei tat kümlabü ki khüto chühashi; aieilausi kanei tat hapbü Ijepbü shuong kanei ladangkei ühüpmailabü. 14Bunyubouei kan shanga wapyolabü, kanje sangsembo kishi.”
15 Bunyubouei Mosa to laukei, “Aila nyi kü to ong ngekda? Israelbü to thedang aeto hauashi dogo lenshi. 16Nyi ju tonenan yungnyua ik shingan kho janyinashi, hoba Israel shousi shuong yungnyu jenyua kao ulangbüa haulabü. 17Hobaje ngei Ijepbü maangpon kaangtilabü hoba haoenei haoen phaito shilabü; hoba ngei Farao, haoeibü sepai, haoeibü kailong, hoba haoeibü koli thüka setbü sepai thüka ngeibü nyenhaang haplabü. 18Ladang ngei Farao, haoeibü kailong hoba haoeibü kolia setbü sepai thüka nyenhaang haplaje, kheijinei Ijepbüei ngo Bunyubou ki dogo ngelabü.”
19Mühghaü khuthük hangangbü laobou Israelbü shaishang thedanga haukei, kukjung hauan haoen phainei lokei. Sangmei thaonyukei thedang ka kukkei hoba haoen phainei 20Ijepbü si Israelbü kanglanga lokei. Langyang sünga sangmeiei Ijepbü la nakthühkukei hoba Israel shousi la ngesakkukei; khoei langyang sünga cheei che nyangko ohauen.
21Kheijinei Mosaei haoeibü ik yungnyu aeto shingkei, hoba Bunyubouei chaangbou yei kaangbüei langyang sünga yungnyu kho souan ngaitikei, hoba kho kao ubüla yeitikei. Hobaje yungnyu kho janyinan apbei, 22#Ibr 11.29 hoba Israelbü shuong, haoeneibü nanae maiaedang hama deiei kümthang la lean kaolina yungnyu khatkei. 23Hobaje Ijepbü haoen shijung Faraoeibü koli, haoeibü kailong hoba haoeneibü koli sepai pendou yungnyu jenyu to haoen phai semjung lotkei. 24Langnge lamto Bunyubouei wan si sangmei thaonyu ka Ijep sepai shuong to chühyantikei hoba haoen panglangtikei. 25Hobaje haoei haoeneibü kailong you hatlepsije haoenei leila aeibou khonsakkei, hibü Ijepbü shuongei laukei, “Sen Israelbü thedang ka satakho! Aieilausi Bunyubouei haoen shanga Ijepbü khulimbo wapyoda.”
26Kheijinei Bunyubouei Mosa to laukei, “Ijepbü thükto, haoeneibü kailong thükto, hoba haoeneibü koli sepai thükto dei nyibou loukoutila shanga nyi kaibü ik yungnyu thükto shingashi.” 27Hibü Mosaei haoeibü ik yungnyu thükto shingkei, hoba ngeyangje yungnyu kho nyishou tegü yeikei. Hobaje Ijepbü khüka satkei, hoba Bunyubouei haoen yungmanga phonglangtikei. 28Hobaje dei kho sepeinyu longeitian kailong, kolia setbü sepai shuong hoba Israelbü phai semjung loubü Faraoeibü lakjaibü shuong yungnyu to atbü pendou danglepbei; haoen che ongkei ajou. 29Lausikei Israelbü shuongje yungnyu jenyua kao ubüa paikei, hoba haoeneibü nanae maiaedang ham shanga yungnyu kho kümthang la lekei.
30Khünyet chaloua BunyubouYUBOUei Israelbü shuong Ijepbü ik ka khümenkei; hoba Israelbü shuongei Ijepbü haibü hapbei.
31 #
Jn 2.11 Ladang Israelbü shuongei Bunyubouei Ijepbü khulimbo seisihau yaangbüei kümbü hapbei, kheijinei mütshuongei Bunyubou to hatkei; hoba haoenei Bunyubou to hoba hao khangenbou Mosa to mailembei.
Currently Selected:
LEIYENBÜ 14: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
