LEIYENBÜ 12
12
Püetbü
1 Bunyubouei Mosa si Aron to Ijep kaodaka lenkei, 2“Kan shanga ho lit ho khangbü kilabü; ho poa shaangbou lit kilabü. 3Israel mütshuong pendou to lenashi, ho lit anbounyet haoen mütpem wekoei jembü shanga san shoushou chebang lelabü, kho haoeneibü chemdang thüngthüng, chemdang che shanga san shoushou che kilabü. 4Hobaje chemdang che kho san shoushou che khümbo lela yongko hanalonga, chemdang kabü mütshang tetan, haoenei lepbou to hamjan. San shoushou kho müt wekoei shauthüng kanei takteian kümashi. 5Kaneibü san shoushou kho nali athebü hoba kap anakbü, po che onbü shou yingjan, kanei kho san shuong ka ayingsi lon shuong ka lelabü. 6Hobaje ho lit chalou anthük leibounyet asühshongko kanei kho phojan; hoba takshatbü Israel mütshang pendouei kho chasemlamto haitilabü. 7Hobaje kho shaubü chema haoenei sii at sungan koukhün nanae maeae hama hoba koukhua naangan phojan. 8Khüyoutham haoenei phe kho wana kangan pikyik khaubü yoa hoba tokai ajinbü wentek yoa shaulabü. 9Kho phe sang ayingsi deikonga athungshaujan, lausikei khu, yousiik hoba sensimaang khümbo yoan wana kangan shauashi. 10Hobaje kho ngeyang sühko tejouti; ngeyang sühko ai joulaje kho kanei jikan apashi. 11Kanei ho hai kümjan: kan shembe kaian, kaneibü youa nguok lonan kaneibü julo ika jungan, kanei panteiko shaujan. Ho Bunyubouei Püetbü lem ki.
12“Khüyoutham ngo Ijep kaodak pendoua shoonglabü hoba shaangbü shou si shaang shatbüsitbü pendou haitilabü; hoba Ijep mühghaü shuong pendou thükto matjem sungbalabü. Ngo Bunyubou ki. 13Hobaje sii naangbü koukhu shuong kho kan kibü chem shensinge kilabü. Ladang ngei sii haplaje ngei kan koletlabü hoba Ijepbü to limsilang kayangei ngümjinei kan to ameitilabü. 14Hobaje ho chalou kan shanga damen-nou che kilabü; loulabüa meten meten kanei ho Bunyubou to lemlinou che kilabü.”
Tokai ajinbü Wentek Lem
15“Chalou nyet kanei tokai ajinbü wentek shaulabü. Shaangbounyet kanei kaneibü chem ka tokai sungan apjan; aishanga shaangbounyet ka nyetbounyet sühko aoei tokai jinbü shaulaje kho müt Israel ka wapan aplabü. 16Shaangbounyet kanei saopobü kamshai che, hoba nyetbounyet saopobü kamshai che huiashi. Khübü chaloua kanei ai akümaleijan, lausikei müt wekoei ai shaujan kho ong kanei lamlela thükkei. 17Hobaje kanei tokai ajinbü wentek lem noulabü; aishanga kho chaloua Ijep kaodak ka ngei kan mütshanga leiyenkei; hibü kho chalou kanei meten sünga ngühkhümei ponpen shanga nou noulabü. 18Shaangbou lit chalou anthük leiboubü chasem ka kho lit saoto chebounyet chasem sühko kanei tokai ajinbü wentek shaulabü. 19Chalou nyetnyet kanei chema tokai ühüptijan; aieilausi aoyouei tokai jinbü shaulaje kho müt yenbou yingsikei, bukmüt yingsikei, Israel shuong yoka wapan aplabü. 20Tokai jinbü aikei kanei ashaujan. Kan kishang pendoua kanei tokai ajinbü wentek shaulabü.”
Shaangbou Püetbü Lem
21 #
Ibr 11.28 Kheijinei Mosaei Israelbü jaishou shuong pendou huishaikei, hoba haoen to laukei, “Kan chemdang chemdang thüng san shoushou pienan Püetbü lembü haitiashi. 22Kanei hisop shen che jungjung louan phaua kibü siia hamashi hoba phau kabü sii kho koukhua hoba kouthung jijihama naangan phoashi. Kan aokei ngeyang asühshongko jembü chem koukhün ka üanglabü. 23Ladang Bunyubou Ijepbü haitila danjung haulaje, hoba koukhua hoba kouthung jijihama sii kho haplaje, Bunyubouei koukhün kho koletan satlabü, hoba Haitibou Hangangbü kan chemto lotan kan haitila haoei asakkulabü. 24Hobaje kan si kaneibü thensilen shanga song ho ngühkhüm tegü ponpen shanga kanei jungeilabü. 25Hobaje Bunyubouei thekubü tegü, ladang kan haoei kan la kula thekubü kaonyek to loulaje, kanei ho haangsong jungeilabü. 26Ladang kaneibü shousi shuongei, ‘Ho haangsong tetlabü ai?’ dogo laulaje, 27kheijinei kanei lenlabü, ‘Ho Bunyuboueibü Püetbü lembü ki, hoba haoei Ijepbü haitijinei, Ijepa Israel shousi shuongeibü chemje koletkei hoba seneibü chem shuongje amenkei.’ ” Kheijinei mütshuongei khu ngomjung kouan lembei. 28Israel shousi shuongei hauan Bunyubouei Mosa si Aron la sakkubü tegü haoenei kümbei.
Shaangbü Shou Haibü
29Saotometuphanga Ijep kaodaka choba setshanga setbü Faraoeibü shaang bukbü ka laangpoba thüngdanga kibü müteibü shaang bukbü shou sühko hoba shatsinam hoba samkeisamukei shaang shatbüsitbü pendou Bunyubouei haitikei.
30Hobaje Farao hoba haoeibü khangenbü pendou hoba Ijepbü pendou nangnak pienkei. Hobaje Ijepa haapbü yaang kikei; aieilausi chem chenei ongkei ühaibü akitei. 31Nangnak Faraoei Mosa si Aron ngaan laukei, “Meimeiashi, ngeibü mütli apyoan Israel shousi shuong leian hauan nyi laubü tegü kaneibü Bunyubou to lemashi! 32Kanei laubü tegü kaneibü sanshuong, masu shuong, leian satashi, hoba ngokei haütibü!”
33Ijepbüei Israelbü panteiko, kaonyek ka tongde sattila shanga haoen thungeikei; aishanga haoenei laukei, “Kün pendou haian aplabü!” 34Hibü mütshuongei tokai ajinbü wen jungan hoba wen nyatbü phauyaang haoeneibü neiei shoan phak to tonan jinkei. 35Hobaje Mosaeibü ngüh tegü Israel shousi shuongei kümbei; hoba Ijepbü ka hon yak, chandinam yak hoba neisimei hikei. 36Bunyubouei mütshuong la onou kusije haoenei hibü haoen la letikei, hoba kho tegü haoenei Ijepbü nyaksinam solangkei.
Israelbüei Ijep Apyobü
37Israel shousi shuong Rameses ka Sukot sühko haukei. Nashou yaksa aweko bousu shuong hajar saongao lak youei paikei. 38Toukei haoen yoa kheiyobü mütshang yaang, san si lon shuong, masu shuong, hoba samkeisamuk juong yoan haukei. 39Ijep ka wennyat künan loubüei haoenei tokai ajinbü wentek kangshaukei. Aishanga kho tokai ajinko kikei; aieilausi haoen Ijep ka thungan sattisije ühaien hoba haoen shangakei shausiyung alamleen.
40 #
Ykj 7.6 Tou Israel shousi shuong Ijep kaodaka kibü po saongao leito khujin kikei. 41Po saongao leito khujin thonlama tükde khünyet kho Bunyuboueibü mütshang pendou Ijep kaodak ka meimeijung haukei. 42Ho haoen Ijep kaodak ka leilangla Bunyubouei lombü langyou che kiteikei; hoba Israel shousi pendouei meten meten Bunyubou shanga chüheitaiko kilabü langyou che ki.
Püetbülem shangabü Ngühkhüm
43 Bunyubouei Mosa si Aron to laukei, “Püetbü lem ngühkhüm ho ki: Küksithang aoeikei ho ashaujan; 44lausikei namei jekngaibü aaomüt, nyi hao la kipbuan kialonga haoei ho ka shauenakei. 45Pensiyen hoba mulambü mütei ho ka ashaulabü. 46#Jn 19.36 Kho chem chenei ashaujan, nyi phe kho danga khonga jungan apaijan; hoba khoka lo che ongkei aleilujan. 47Israelbü shuong pendouei kho jungeijan. 48Hobaje ladang yenbou che ka junga otan kilaje hoba Bunyuboueibü Püetbü lema yomang sühlaje, haoen bousu pendou kipan apbuashi, hoba kheijinei hao nyangko louan yolabü; hoba hao sangbüshou che tegü kilabü; akipbü aoeikei ho ka ashaujan. 49Sangbüshou hoba kan yoa louan kibü yenbou shanga ngühkhüm che kilabü.” 50Bunyubouei Mosa si Aron to lenbü tegü Israelbü pendouei khei kümbei. 51Khünyettham Israel shousi shuong mütshang yaang Ijep ka Bunyubouei leiyenkei.
Currently Selected:
LEIYENBÜ 12: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
