Mak 4
4
Basef womun etina anona aman nowaha olelemb si'i rais anona aof
(Mt 13:1-9; Lu 8:4-8)
1-3Anona nemaf Jisas nasefela opeh wapoti' nanda'am nawalipa amam nematawa hiesi felefele'ma walemb batupa'manai lu'unai Galili. Ea' esis hiesi safi'i salipana sape. Ea' nalata natoma anona bot nala embel walemb batupa'manai anama, ea' esis saitu akata felefele'ma walemb anama. Ea' nase'asa basef hiami womun etin na'ama na'i, “Ipe' peme'! Anona aman nafe' nowaha olelemb witim si'i rais anona aof. 4Anan nowahom nafe', anom mowa eaf safe'ma ea' amiguf mufia' mafi'i ma'am. 5-6Ea' anom mowa etap otambaiguma, etap ina lu'una, owa'. Kwaie'una. Natoma ilif atogon ina nowala owin, owa'. Ea' olelemb witim mataga mehip ea' masilimb ina mowala etap, owa'. Ea' owaf naluwi naham, otamba maofam alim. 7Anom mowala la'afena mandelef wandafumi mataga malomam maofenia wit, ea' ina malo andeande' mail mola gwa'aimi, owa'. 8Ea' anom mowa mafe' etap bu'unai, ea' mataga malo mail mola gwa'aimi. Anom mola 30-peleim, anom 60-peleim ea' anom mola 100-peleim.”
9Ea' Jisas na'ipas na'i, “Ipe' aligah magalipei peme' basef amama andeande' ukup mopomam.”
Jisas na'i basef womun etin
(Mt 13:10-17; Lu 8:9-10)
10Jisas atona nape, alupumi 12-peleim ananimi maloma enis sape salomanai safi'i sahali'ana ma basef amama womun etin. 11Ea' nagwamama basef na'i, “God nihi'ambepa basef ofagema mape mandambahi'i ma epes siowis wambota Ananinai numafias. Dei' God nihi'ambepa basef amama ofagema alihim. Ipe' pame'am pegawam ea'. Esis isima sololama Godi owa'. Esis same' basef womun etin. 12Ama anom basef mape Baibeli mandawalap ma'iam ma'i,
‘Esis nimeguf hiami sotologon, ea' ina sati anom amamaga, owa'. Ea' esis some' basef aligah asasimi, ea' ina sogawa ofagema, owa'. I'i sogawam ofagema, esis somboma opalef ma ae' ekwaha waf aonai esis sanda'anai. Owa'etin.’ ”
Jisas nawalapa basef ofagema ma aman nowaha olelemb
(Mt 13:18-23; Lu 8:11-15)
13Ea' Jisas nahali' esis na'i, “Ipe' owa' pegawa basef amama womun etin dei' apipami? Ea' nambimb ipe' pegawa basef womun etin hi'ilam pi'imama? Owa'etin. 14Dei' aman anama nowaha olelemb, anan si'i anona na'ipasa basef Godi. 15Olelemb mowa eafi amama si'i epes same' basef amama, ea' Satan nagi basef amama God nase'asam mape opalef asasimi nakwahom nafe'. 16Ea' anom mowa mafe' anagon otambaiguma, amama si'i enis epes same' basef Godi sofa'am mehip sandanifelamam. 17Epes isima si'i masilimb ina malo mowala etap owin. Esis sembale'ef nogota bandana etin ea', nambimb nimanimi matagamas enis amam nematawa sandaiwa'ma sembale'am basef Godi sanda'as findiwas sahas, sanda'masa waf aonai ea' satanima safe'. 18Ea' anom mowala mandelef wandafumi la'afen, amama si'i enis epes same' basef Godi sailam safe', 19ea' amamaga hiami nimanimi maloma amamaga hiami esis satolom kowalasami baso'maimi maloma moni wiga maima esis sa'i sofa'ami hiami mape etapi, amama mataga maofenia basef Godi. Ea' ina sombale'ef sanda' waf bu'unai la'ifis, owa'. Sowa si'i gwa'aimi owa' molo andeande'. 20Ea' anom mowa etap bu'unai si'i epes isima same' basef bu'wami sembale'am sanda' waf bu'unai. Enis si'i mola gwa'aimi 30-peleim, enis si'i mola 60-peleim, ea' enis si'i mola 100-peleim.”
Enis sambaho' lamifah ma'oh owina baket
(Lu 8:16-18)
21Ea' Jisas na'ipas basef womun etin na'i, “A'i epes sakata lamifah sopalo'am ma'oh owina balatagw o sopalo'am mandambaho' ma'oh baket? Owa'. Esis sawamonam balatagw ilif. 22Amamaga hiami mandambahi'i, anona nemaf motaga alihim epes hiesi sotolom sogawam. Ea' amamaga hiami ata' sambaho'am mapani, anona nemaf motaga mondawalap, epes hiesi sogawam. 23Ipe' aligah magalipei pame' basef, peme'am andeande'.” 24Ea' na'ipam wapoti' na'i, “Basef ipe' pame'ami, amama pegawam andeande'. Maim basef maloma maina waf ipe' panda'masam enis epes, ikwaf anama atona anona nemaf God nogwamepana ipe', ea' nowatanimipa anom wapoti'. 25Emi egafis sembale'efa basef Godi, nambimb God nowatanimasam wapoti'. Isima owa' sembale'ami, nambimb basef kwawie'im amama esis sembale'ami, God nondalombasam esis ea' sopan etin.”
Basef womun etina aman nowaha olelemb
26Ea' Jisas na'ipas basef womun etin na'i, “Epes siowis wambota Godi numafias, si'i anom basef womun etin dei' ae' a'ipipami. Anona aman nowaha olelemb gwa'aimi aof ananinai. 27Ea' nafi'i nape wambel na'oh owambeh hiami nape nimeguf hiami mafe' ea' olelemb amama nawami mataga malo lu'um ma'imama? Anan ina nogawa mataga ma'imama, owa'. 28Etap atona nanda' olelemb amama mataga malo mola gwa'aimi bu'wami mail. Soh atom mali', ea' afis mataga ea' gwa'aimi mandanda' lu'um mail. 29Ea' matagama lu'um akom andeande' ea' maof. Nemaf anama sala' gwa'aimianai nataga, aman anama nanda' maol naloma nogwatop.”
Basef womun etina nalelef mastetim
(Mt 13:31-32; Lu 13:18-19)
30Ea' Jisas na'iam wapoti' na'i, “Epes siowis wambota Godi numafias na'ama etin si'i main? Ae' indila'wifam si'i maim basef wamon etin? 31Nalelef mastetim so'uso'umi. Ina lu'um si'i su'utip gwa'aimi lawah hiami mawam etapi, owa'. Nalelef so'uso'um endilisi. Anona aman nawam etap 32ea' mataga malo lu'um mikila' gwa'aimi hiami mape aofi. Amam mataga si'i lawag lu'unai, agof mandalana mafe'agon ganigani. Ea' amiguf mafi'i mala alagah mandambaho'ma owaf mail agof.”
Jisas na'i basef hiami womun etin
(Mt 13:34-35)
33Ea' Jisas na'ipas basef womun etin si'i nali' na'ipasami. Na'ipas nendala'wifa amamaga hiami nagi'ma gawa asasinai nafe' netambel. 34Anan ina na'ipasa anom basef alihima esis, owa'. Na'iam womun etin. Ea' nambimb alupumi ananimi atom malomana mape, na'ipam alihima ofagema basef womunaimi.
Jisas ninifala embel maloma uf faso'mam mapan
(Mt 8:23-27; Lu 8:22-25)
35Nemaf anama atona, wambomota felefele'ma owamb, Jisas na'ipa alupumi ananimi na'i, “Afa' ofe' anama walemb lu'unai batupa'manai anama gani fisana.”
36Ea' amam makwaha esis amam nematawa hiesi mafe' bot anama Jisas natumanai mofa'ana mafe'. Enis epes sofa' anom bogw maloma bot anama mafe'. 37Ea' anona uf lu'unai naluwi, naoh manda'am fepoh, mafe' mawis bot nomon ea' na'i si'inama embel. 38Ea' Jisas na'oh nalola bot nagi'ma nola komboto'w na'oh.
Ea' amam mafe' minimbalona ma'ipana ma'i, “Tisa dembinai, afa' wa'i a' owala. Ine' negawafa, owa'?” 39Ea' Jisas nohafel ninifala uf na'ipa embel naoh na'i, “Uf neloma embel ipe' petah.” Ea' uf faso'mana, embel ina ata' manda' fepo. Tol motah.
40Ea' na'ipa alupumi ananimi na'i, 'Ipe' umbamahepa ma main? Ipe' pembalo'a basef Godi pa'i Ae' la'ifiwei, owa'?
41Ea' amam mati na'ama, umbamaham kwapete'am endilisi, ea' manda'ipama ma'i, “Anan emi egafuna? Na'ipa uf naloma embel mame'ana mowala.”
Currently Selected:
Mak 4: aojF
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
