Matyu 9

Jisas nanda' anona aman lagof bo'wagah mondola'anai ambo'ona

(Mk 2:1-12; Lu 5:17-26)

1Esis sandaiwa'ma Jisas ea' nafe' nalata anota bot nafe' walemb batupa'manai lu'unai fisana ea' nataga wambel ananinai ofagama. 2Ea' anom amam mofa'ai anona aman mafi'i. Lagof bo'wagah maga' mailanai ea' tol na'oh lahis. Ea' Jisas natolom nogawa amam mombale'efana ma'i anan la'ifinai ma nigiambama aman anama aonai neataga bo'ona. Ea' na'ipa aman anama na'i, “Ine' epen ae'inai! Opaf ine'inai nepe awanena. Waf aonai ine' nanda'anai ae' akwahomenana ea'.”

3Ea' anom dambami mawalipasa mi'uli Godi ukup mandanda' na'ama manda'ipama ma'i, “Aman anama Jisas nanda' God findiwana na'ipana awagon.”

4Jisas nogawa nomonas amamumi. Ea' na'ipam na'i, “Dei' maina ipe' ukup ipe'imi mape na'ama? 5Dei' amamaga maim ipe' pa'i ahifima ae'? Ae' la'ifiwei ma i'ipa aman anama awesinai i'i, ‘Ae' ekwahomena waf aonai nanda'anai,’ o i'ipana ie'i, ‘Nehafel nefe'.’ Basef amama nohafel neafe' ipe' pa'i amama ahifima ae'. 6Ae' ataga epen endililsiwei a'i ipe' pegawa ae' la'ifiwei ma eakwahomasa waf aonai hianai amam nematawa sape etapi sanda'anai. Na'ama ae' a'i ihi'ambepa ae' la'ifiwei ma enda' amamaga amama.”

Ea' na'ipana na'i, “Ine' hafel fela lahis ine'imi fa'am nefe' ipat ine'inai.”

7Ea' anan nohafel nafe' ipat ananinai. 8Ea' amam nematawa hiesi satolona sehafel gegelalasis umbamahas kwapete' sogawa God nagiambama aman anama nase'ana pepel lu'unai. Na'ama esis safela agel Godi lu'una.

Jisas nofala Matyu nafe' nailana

(Mk 2:13-17; Lu 5:27-32)

9Ea' Jisas nohafel nakwaha wambel anama nafo'o nati ae' Matyu, anda' basefa buk anae'. Ae' ape ipat anae' mofa' takisanai. Ea' Jisas na'ipi na'i, “Ine' fi'i nila ae'.”

Ea' ae' ehafel ailana afe'.

10Ea' Jisas naloma alupufai ananifai wape ipat ae'anai wa' gwa'aimi etin, amam hiami manda' waf aonai maloma anom hiami mofa' takisi mafi'i malomafa ma' gwa'aimi. 11Ea' amam Farisi dambami mafi mati Jisas nape nalomafa wa' gwa'aimi, mahali' alupumi ananimi ma'i, “Dei' maina dembinai tisa ipe'inai nape naloma amam mofa' takisi maloma amam amama manda' waf aonai ma' gwa'aimi etifigin?”

12Ea' Jisas name'am na'ipam na'i, “Isima awes a'asi ina safe'ma dokta, owa'. Esis bu'wasi. Ea' isima awes nanda'asi etis safe'ma dokta. 13Anom basef mape buk Baibeli ma'i na'ama ma'i, God na'i, ‘Ae' andaiwa'ma ipe' peha mafis pese' ae', owa'. Ipe' piti enis amam nematawa uwahipis pigiambamas, andeande'.’

Ea' ipe' ina pegawa basef amama ofagema, owa'. Dei' pefe' pitalifam pegawam. Dei' main, ae' ina afi'i ma efala epes sanda' waf bu'unai, owa'. Ae' afi'i ma efala epes isima sanda' waf aonai etis.”

Anom nimeguf esis sakwaha gwa'aimi sape etin

(Mk 2:18-22; Lu 5:33-39)

14Jon aman anama napisi'as embel, alupisi ananisi same' basef ananimi safi'i anama Jisas napoma sahali'ana na'ama sa'i, “Anom nimeguf afa' waloma amam Farisi afa' wakwaha gwa'aimi wape etin wanda' beten. Dei' maina amam alupumi ine'imi owa' meakwaha gwa'aimi si'i afa'?”

15Ea' Jisas nagwamam na'i basef womun etin na'i, “I'i enis sonda' anom gwa'aimi lu'wami ma enis aman nemata'w bias sondase'ama, ipe' pa'i esis alupisi atuwasi sondaiwa'ma gwa'aimi nemaf anama anan naso' nemata'wi nape nalomas? Owa'etin. Ea' nemaf anama anan nokwaha esis nefe' anagon laogoma, esis sokwaha gwa'aimi.”

16“Ina andeande'ma peatopa' lowaf namunai pigundisana neloma anona lowaf apinai, owa'. Na'ama nambimb lowaf anama namunai nendatagah, nehape' apinai pele'atana negal neataga lu'una.”

Ea' na'i anom basef womun etin wapoti' na'i, 17“Embel wainim dambaimi ape' ina mowalam agwahup apinai mafinina si'i botowagof, owa'. I'i enin nenda'am na'ama, embel wain netef hianai, nohape' agwahup anama pele'etana ea' wain kolo'olana hi'ilana. Na'ama owa'. Wain dambainai mowalana agwahup dambainai atona. Ma embel moloma agwahup mola andeande'.”

Jisas nanda' nematawa biawa bo'owa wapoti'

(Mk 5:22-43; Lu 8:41-56)

18Jisas ata' nape na'ipas etin, anona aman dembinai esis Judai nafi'i nindiwa nembawa notawa na'ipana na'i, “Nogame ae'akwi felefele' kwa'i koga'. Ae' a'i ine' nefe' newamona lagel ine'inai akwa'w ambal natanimai nuwisa'w kohafel kopan.”

19Ea' Jisas nohafel naloma alupumi ananimi malomana mafe' eaf. 20Ea' ano'w nemata'w kwafi'i alafuga Jisasi kwahapila lowaf ananifi da'malififa. Awes lu'unai nanda'akwi kwape gamba la'ela'ef afagof 12-peleim. 21Ea' akwa'w okom nandanda' na'i, “I'i ae' esa lagela lowaf ananifi, ae' bo'awe.”

22Ea' Jisas nandamboma natolo'w na'ipa'w na'i, “Nogame ae'inai! Opaf ine'inai nepe la'ifina. Ine' ea' nembale'efa ae' la'ifiwei. Amama atom dei' anda'ena bo'wena.”

23Ea' Jisas nafe' ipat aman anama dembinai esis Judai nati enis amam nematawa sofapula batagwa nemata'w akwama awiawai'wi afu'w. Ea' epes hiesi salef mehip sa'i sapoma'w. 24Ea' anan na'ipas na'i, “Ipe' si'amae! Akwa'w ina kwaga' endilisi, owa'. Kwa'oh etin.”

Ea' esis sanda'iafana. 25Ea' sehafel sawis ande', Jisas nikila'as nawis nomon nahapila lagel akwa'unai nafela'w kohafel ambo'okw wapoti'. 26Ea' basefa nemata'w akwama mafe'agon hi'alagon.

Jisas nagiambama amam biam naep mase'ami

27Jisas nakwaha wambel anama nafe' etin, nati amam biam naep mase'ami magi'mana mofalana mehip ma'i, “Ine' akunamana Deviti, niti afa' uwahipifa!”

28Ea' Jisas nafe' nawis anota ipat nomon, ea', amama mafi'mai anan nahali'am na'i, “Ipe' pembale'efa ae' la'ifiwei ma enda'epa bo'wepa?”

Ea' amam ma'i, “A'e, Dembinai afa'inai.”

29Ea' nasa lagofa naep amamumi na'i, “Ae' egawepa, ipe' pa'i ae' la'ifiwei. Na'ama ae' enda' naep ipe'imi ambo'om wapoti' mondahama pembale'efa ae'.”

30Ea' dei' naep amamumi ambo'om matologon andeande'. Na'ama Jisas na'ipam basef la'ifimi na'i, “Ipe' ina pefe' pi'ipa enis amam nematawa ma anda'epa bo'wepa, owa'.”

31Ea' amam mafe' mawalapa basef ma'ipa amam nematawa hiesi ma'i Jisas nanda' naep amamumi bo'om. Ea' basef amama mafe'agon hi'alagon.

Jisas nagiambama anona aman malogel nase'anai ambo'ona

32Amam amama naep mase'ami mafe' etin, esis sofa'i anona aman malogel nase'anai. Anan ambal aonai nanda'ana, na'ama ina noga na'i basef, owa'. Ea' sofa'ana nafi'mai Jisas. 33Jisas natofa ambal anama aonai. Na'ama dei' aman anama na'i andeande'. Ea' amam nematawa hiesi ukup matamea ma aman anama sa'i, “Fowa' ape' Israel ina mati anom amamaga amama, owa'etin.”

34 # Mt 12:24; Mk 3:22; Lu 11:15 Ea' amam Farisi dambami esis Judai mambaso'am ma'i, “Anan natofa ambagof awami ma pepel anan dembinai ma ambagof awami amama.”

Jisas na'i uwahipis amam nematawa hiesi

35 # Mt 4:23; Mk 1:39 Maol Jisas nanda'anai nape na'ama. Anan nohafel nafe' wambel hiagoma na'ipasa basef bu'wami Godi. Nafe' nawis ifagw esis Juda sa'i basef sapeimi na'ipasa siowis kingdom heveni. Anan nagiambama amam nematawa hiesi awes hianai naninani nanda'asi sataga bo'wes wapoti'. 36#Mt 14:14; Nam 27:17; 1 Kin 22:17; Esi 34:5Ea' nati amam nematawa hiesi uwahipis esis ukup mololas sape umbamahas kwapete'. Ina anona aman nape numafias, owa'. Esis sape si'i sipsip owa' enin epen nimafias. Ea' nati esis uwahipis. 37#Sek 10:2; Mk 6:34; Lu 10:2Ea' na'ipa alupisi ananisi anom basef na'i, “Ipe' piti aof hianai gwa'aimi hiami maof ea'. Ea' epes sanda' maoli owa' hiase, kwawie'is. 38Ipe' pihali' Dembinai ofagonama aofi. Pihali'ana ma nosapa' epes hiesi sefe' sonda' maola sola gwa'aimi ananimi sembe'am etifigin.”

Currently Selected:

Matyu 9: aojF

Highlight

Copy