Matyu 10

Amam Aposel 12-peleim Jisasi agof amamumi amama

(Mk 3:13-19; Lu 6:12-16)

1 # Mk 6:7; Lu 9:1 Ea' Jisas nofalai alupumi 12-peleim ananimi mafi'mai anan nase'am agof lu'wami nanda'am mataga la'ifima meatofa ambagof awami ea' monda' hiesi awes hianai naninani nanda'asi sataga bo'wes.

2Amam amama Aposel 12-peleim Jisasi, agof amamumi amama. Nali'i Saimon agel wa'ana Pita, owalomana ananinai Andru. Ea' Jems Sebedi nogalomana naloma owalomana Jon, 3ea' Filip naloma Bartolomyu, Tomas naloma ae' Matyu anda' basef amae' efa'asa takis. Ea' Jems Alfius nogalomana, Tadius, 4ea' Saimon anan epes hiesi Seloti.#10:4 Amam Selot anona wambota sandaiwa'ma esis Rom sumafi esis Juda. Anom nimeguf amam Selot mapa' maloma esis Rom. Ea' aman anama Judas nawalapa Jisasa amam naumbih ananimi.

Jisas nase'ama maol Aposel ananimi 12-peleim

(Mk 6:7-13; Lu 9:1-5)

5Jisas nasapa' amam amama 12-peleim mafe', nase'ama basef amam na'i, “Ipe' ina pefe'ma epes isima owa' sogawa Godi, owa'. Ea' ina pefe' piwis anona wambel etap esis Samariainai, owa'. 6Ipe' pefe' ma esis epes hiesi Israel etisi sape si'i sipsip higilalam. 7Pefe' pewalapa basef na'ama pi'i, ‘Nemaf bu'unai nafi'i felefele' ea' ma ipe' piowis kingdom heveni.’ 8Ipe' penda' awesisi bo'wes pefala saga'i sope namis wapoti', penda' isima awes aonai nanda' alop asasinai nambu'wi sotaga bo'wes. Ea' petofa ambagof awami mapeisi. Pepel Godi ipe' pefa'anai, anama ipe' pefa'ana etin, ina patalana otamba, owa'. Ea' na'ama etin ipe' pese'asana etin esis ina sotaloma ipe', owa'etin.

9Ipe' ina pelo' otamba gol silva moloma kapa poket isalef ipe'imi, owa'. 10Ipe' ina pefa' roksak o siaogw biam atom, o su moloma bandefah pandahe'amon pafi'iami, owa'. Dei' main, epes sanda' maoli, andeande'ma sofa' gwa'aimi asasimi.

11I'i ipe' pefe' piowis anona wambel, ata' petologon pegawagon andeande'. Aman wambel anamainai emi egafuna bu'unai nie'i awima ipe', pepe peloma anan atona pefe' ma nemaf anama pekwaha wambel anama pefe'.

12Nemaf anama ipe' pefe' piowis anona ipat, pi'ipa esis amam nematawa sape ipat anama pi'i, ‘Ipe' pepe opalef awanem.’ 13I'i enis sape ipat anama bu'wasi senda'mepa waf sie'i a'e ma ipe', nambimb basef ipe'imi opalef awanemami mopomas. I'i owa', hapaimi, basef amama bu'wami motanimani mopomepa la'ela'ef. 14I'i enin epen nendaiwa'ma nease'epa opafa nefa'epa pefe' piowis ipat ananinai ma nindaiwa' ma neame' basef ipe'imi, pehafel pekwaha ipat anama o taun anama ea' pindilamam nombol sopof mail bo'wagah ipe'imi, ma sitilipa sogawa waf aonai asasinai ofagena asasinai atona.

15Ae' a'ipipa endilisi, nemaf anama lu'unai anona nemaf God nowaloga epesanai, niti esis fowa' gani sape Sodom Gomora uwahipis andeande'. Ea' epes isima wambel anamaisi ina niti uwahipis, owa'. Nimanimi awami endilisi anona nemaf motagamas.”

Jisas na'ipasa nimanimi nambimb meataga

16Ea' Jisas na'ipam wapoti' na'i, “Ipe' peme', ae' esapa'epa pefe' si'i sipsip pefe' la'afena nombagw wandafumi aolupumi. Na'ama ipe' ukup mondanda' andeande' pefe' pila gawa si'i iguf mafe'. Ea' pila waf bu'unai si'i anona amil ma'unai, ipe' ina ukup mope aoma penda' waf aonai, owa'. 17Ipe' pindumafuma andeande'ma anom amam. Anona nemaf sonda' kotimipa ma amam dambami Juda ea' sehepa nomon ifagw esis Juda sa'i basef sapeimi. 18Amam mogawa ipe' panda' maol ae'anai ea' mondaiwa'mepa, ea' mofa'epa pefe' pitu naep kinga gavman dambami ma peawalapa basef ae'ami bu'wami ma amam moloma esis amam nematawa ina sogawa Godi pi'ipasam. 19Nemaf anama esis sowalapepa ma basef, ipe' ina umbamehepa pi'i, ‘Nambimb ape' mogwa basef mi'iam mi'imama?’ Owa'. Nogota anama atona God nihi'ambepa maim basef ipe' pewalapam pi'iam. 20Amama ina ipe' etipa pi'iam, owa'. Ambal Bu'unai Ahalomepa Godi atona nowalapa basefa malogof ipe'imi.

21Nemaf anama esis hiesi sahin owan sonda' basefa enis sohas soga'. Ea' ahapas sonda'am na'ama etina esis nogamas batawiamas asasisi. Ea' nogamas batawisas wapoti' sonda' masa basefa mamasas asasisi enis sohas soga'. 22Anona nemaf epes hiesi wambel hiagoma siti ipe' pila basef ae'ami, ea' opalef aoma ipe' endilisi. Ea' emi egafis sembale'efa Ae' la'ifis situma seatagama nemaf akutainai, anona nemaf God nefa'as sotanimani. 23I'i esis sape anona taun sonda' waf aonaima ipe', pefa' pefe' anona wambel. Ae' a'ipipa endilisi, ae' ataga epen endillisiwei. Ipe' ina pefe' pembefa maol ae'anai wambel anama Israeli hiagoma, ata' owa', ipe' piti ae' iefi'i.

24Epes sanda' skul etin ina sape dambes sikila' tisa asasinai, owa'. Ea' epen inima agel a'an nanda' maol etini enin ina nape ilifa dembinai ananinai, owa'. 25I'i esis sanda' skuli sope na'ama etin si'i tisa asasinai, esis ukup mi'i andeande'. Ea' i'i enin epen agel a'an nanda' maol etini nepe si'i dembinai ananinai, isima wapoti' andeande'. Ae' Dembiwei Ahalomepa ma wambota ae'anai esis sa'i basef awami ma agel ae'anai sa'i ae' Belsebul.#10:25 Belsebul anona god esis Kenan sa'i anan dembinai ma god baso'amunai hianai. Ea' amam Juda mandaiwa'ma Jisas mase'ana agel anama. Ea' mofalana ma'i anan aman aonai Satan wapoti'. Niti Matyu 12:24. Na'ama anona nemaf esis si'ipipa sonda'mepa agof awami endilisi mikila' agel Belsebul sanda'meana ae'.

Epes umbamohasa God atona

(Lu 12:2-7)

26 # Mk 4:22; Lu 8:17 Na'ama ipe' ina umbamehepa ma amam, owa'. Amamaga hiami mape mandambahi'i anona nemaf motaga alihim hiesi sotolom sogawam. Ea' amamaga hiami ata' sambaho'am mapani anona nemaf motaga mondawalap, hiesi sogawam. 27Basef amae' ambahe'am owamb a'ipa ipe' etipami, amama pewalapam pi'iam alip. Ea' basef pame'am sa'iam so'uso'umbili, amama petoma ifagw ilif pewalapam pi'iama amam nematawa some'am. 28#Je 4:12Ipe' ina umbamehepama esis soha alop atona neaga'i, ea' anona nemaf esis ina la'ifisa soha ambagof ipe'mi, owa'. Ea' ipe' umbamehepama aman anama la'ifinai ma noha alop si'ina noloma ambagof ipe'imi ma wambel aonai hel.

29Ipe' pegawa epes satala amiguf sa'umi biam ma moni owap wa'anai atotona. Ea' Ahalomepa ipe'inai ina nati anona amil atotona nowai etin, owa'. Numafiam andeande'. 30Ea' neambam auf malo balagah ipe'imi dende' hi'alam. 31#Mt 6:26, 12:12Na'ama ipe' ina umbamehepa. Anan okom napoma ipe' pikila' amiguf hiami amama.”

Waf ape' mowalapa agel Jisasi alihina

(Lu 12:8-9)

32Ea' Jisas na'ipas na'i, “Emi egafis sowalapa agel ae'anai ma amam nematawa hiesi, anona nemaf ae' wapoti' ewalapa agof epes isima ma naep Ahalome Godi gani heven. 33#Mk 8:38; Lu 9:26; 2 Ti 2:12Ea' emi egafis sowa' alafuga ae' sindaiwa'me ma owa' sowalape si'ipas naep amam nematawai, na'ama etin anona nemaf ae' wapoti' ewa' alafugahas ma naep Ahalome Godi gani ilif heven.”

Jisas nafi'i ma nonda' wandaf netaga ma ape'

(Lu 12:51-53, 14:26-27)

34Ea' Jisas na'i anom basef wapoti' na'i, “Ipe' ina pi'i ae' afi'i etap anae' ma eakolasa ipe' peape opalef awanem, owa'. Ae' efa'i bainat hi'elinai afi'i ma nambimb enis epes sohafel sepa' sealoma enis. 35Ae' afi'i ma enda' waf anama lopa' fitapanai neataga, si'i basef ma'iam ma'i,

‘Anona nemaf anona aman noloma ahalomana ananinai mondawaloga biefim, ea' ano'w nemata'w koloma mama'wakw ondawaloga biefiwa, ea' mefi'ma'w akwo'ukwi koloma ma'makw kwandagi'mokwi ondawaloga biefiwa.

36Ea' esis sape ipat atotona nambimb esis wambota aman anama sondawaloga seataga naumbih.’

37Emi egafis ukup maimaila ahapas mamasas asasisi etis ma owa' ukup mimila ae', epes isima ina setaga alupisi ae'asi endilisi, owa'. Ea' emi egafis ukup asasimi mohafel mimila awasi asasisi, ma owa' ukup mimila ae', isima ina setaga alupisi ae'si, owa'. 38Ae' efa' nimanimi awami anda' maol Godi sehe ega' lawag usi'inai tu'wanainai. Emi egafis owa' senda'am na'ama etin si'i ae' ma sieli, epes isima ina la'ifis setaga alupisi ae'asi, owa'. 39Emi egafis ukup mopoma ambagof asasimi atom si'i sihapilam tatala'im sigiambama ambagof asasimi, anona nemaf ambagof asasimi higililam. Ea' emi egafis ukup mopoma ae' ma sesambala ambagof asasimi etap anae', anona nemaf God nofa' ambagof asasimi sotanimani sope andeande' la'ela'ef hihif.

Jisas na'ipa epes ananisi ma anona nemaf seafa' amamaga bu'wami

(Mk 9:41)

40Emi egafis sese'epa opalefa sie'i ipe' ae'ipai, esis sase'e opalef ae' wapoti'. Ea' emi egafis sase'e opalefa ae', esis sase'ana opalef God nasapa'e afi'i. 41Ea' emi egafis sieti anona aman profeta sie'i, ‘Aman anama profet nanda' maol Godi. Ape' mose'ana opalef migiambamana,’ epes isima anona nemaf sefa' amamaga bu'wami si'i profet anama nefa'ami. Ea' emi egafis sieti anona aman bu'unai nifi'i ma esis sie'i, ‘Ape' ma'i anan aman bu'unai. Ea' migiambamana mese'ana opalef.’ Epes isima anona nemaf sefa' amamaga bu'wami si'i aman anama bu'unai neafa'ami. 42I'i emi egafis sieti enis epes falafisi wafisi o agufisi ma esis sietilis ukup mimila epes isima Jisasi sigiambamas sese'asa embel maim, ae' a'ipipa endilisi, anona nemaf epes isima sefa' amamaga asasimi bu'wami ina higililam, owa'.”

Currently Selected:

Matyu 10: aojF

Highlight

Copy