Galesia 3
3
Waf biefina, saila mi'uli fowa' God naso' Mosesanai naloma sembale'efa Kraisanai
1Ipe' Galesia ukup masi'ipei. Afa' wawalipipa basef alihima Jisas Krais naga'ma ipe' lawag usi'inai tu'wanainai, wawalipipam alihim endilisi si'i patolom naep ipe'imi. Dei' ata' emi namboma ukup ipe'imi mase'epa? 2Ae' a'i ihali'ipa ma basef etifim. Fowa' ipe' pefa' Ambal Bu'unai Godi nape opalef ipe'imi, ipe' paila waf si'i mi'uli God naso' Mosesanai na'iam pefa'ana o pame' basef bu'wami Godi atom pembale'efam pefa'ana? 3Endilisi, ae' ati ipe' ukup masi'ipei. Ipe' pafela maol panda'ana la'ifipa ma Ambal Bu'unai Godi, ea' dei' pa'i penda'ana pembefana pepel ipe'inai atona. Na'ama aom. 4Dei' amamaga amama nimanimi fowa' ipe' pefa'ama maol bu'unai Godi pefa'am na'a? Owa'. Ae' a'i amama ina matagamepa na'a, owa'.#Amam gawaimi mamboma basef mail lain 4i na'ama. Ae' a'i amama bu'wami Ambal Bu'unai Godi fowa' nanda'am mataga ipe', ipe' ukup mase'epa ma amama, o owa'? A'i ipe' ina ukup mase'epamam, owa'.
5Maina eaf dei' God nase'epa Ambal Bu'unai Ananinai nanda' ikwaf la'ifinai la'afena ipe'? Ambal Godi na'i ipe' paila mi'uli fowa' God naso' Mosesanai nanda' ikwaf anama, o Ambal Godi na'i pame' basef bu'wami Godi pembale'efam pailam nanda' ikwaf anama?
6 # Ro 4:3; Ga 3:8-9; Ap 3:5; Ro 4:16 Ipe' ata' ukup mopoma Abraham. Anan si'i anona ikwafa waf bu'unai pembale'efa God. Basef Baibelimi ma'iam alihim ma'i, “Abraham nembale'efa God. Amama atom dei' God na'i anan aman bu'unai.”
7Ea' dei' ipe' pegawa, emi egafis sembale'efa God ma basef bu'wami Ananimi, epes isima bafasana awasi endilisi Abrahami.
8Fowa' gani basef Baibelimi ma'iam alihima anona nogota owagama God nonda' esis owa' Judaisi sombale'efa anan, sotaga bo'wes ma naep ananimi. Fowa' basef Baibelimi ma'ipa Abrahama basef bu'wami Godi. Mihi'ambana ma'i, “Owagama God nonda' ine' ma nigiambama epes hiesi sape etapi sotaga bo'wes sope andeande'.”
9Abraham nembale'efa God ea' God nofalo'mana na'ipana basef bu'wami Ananimi. Dei' God nofalo'ma emi egafis sembale'efa anan ni'ipasa basef bu'wami ananimi na'ama etin si'i fowa' na'ipa Abraham.
10 # Diu 27:26 Emi egafis ukup mapoma waf saila mi'uli esis Juda sailanai dei' sape owina okom wandafunai Godi. Dei' main, basef mail Baibeli ma'i na'ama ma'i, “Emi egafis la'ela'ef owa' sila basef hiami mail mi'uli Godi hi'ilam andeande', isima sape owina okom wandafunai Godi.”
11 # Ro 1:17; Ga 2:16 Dei' basef amama mataga mandawalap alihim. Ina enin epen atitin naila mi'uli Godi nataga bo'wena naep Godi, owa'. Dei' main, basef mail Baibeli ma'iam na'ama ma'i, “Emi egafis sembale'efa Godi esis etis sataga bo'wes ma naep ananimi ma sape andeande' la'ela'ef.”
12Ea' waf ofagena saila mi'uli anama Godi ina nape atogon si'i waf sembale'efa God, owa'etin. Basef mail buk Baibeli ma'i anom basef la'ifimi ma mi'uli anama ma'i, “Emi egafis saila basef hiami mail mi'uli anama hi'ilana andeande', epen inima nape namina naila basef amama hiami hi'alam.”
13Ea' Krais natagahepa ma okom wandafunai Godi nape mi'uli ananinai. God nanda' nimanimi ma awami ape' manda'ami hiami nakolasom mafe'ma anan atona, ea' ofagema amama mapoma anan atona nofa'am. Dei' main, basef mail Baibeli ma'i, “Emi egafis saundas sahas sail lawah usi'imi tu'wanaimi, amama atom sape owina okom wandafunai Godi.”
14Krais Jisas nanda'am na'ama ma nanda' amamaga bu'wami God na'ipa Abrahamami motagama enis epes sololama basef Godi. Nanda'am na'ama ma ape' mombale'efa basef bu'wami ma mofa' Ambal Bu'unai Ananinai si'i fowa' na'i basef endilisimi atom.
Mi'uli esis Juda sailanai ina la'ifina nali'amona basef la'ifimi God na'i endilisimi atom
15Ipe' Kristen sahin owan, a'i i'ipipa anom basef womun etina waf ape' manda'anai. I'i anom amam mi'i anom basef la'ifimi endilisim atom, ina enin epen la'ifina nehape'am nowataniam, owa'. Mope la'ifim la'ela'ef. 16Fowa' gani God naloma Abraham ma'i basef la'ifim endilisimi atom bafalomana ananinai anona nemaf neataga, si'i waf ape' epes sa'i basef endilisimi atom. Basef mail Baibeli ina ma'i, “Ine' neloma bafasena ine'isi.” Owa'etin. Amama ma'i epes hiesi. Ea' basef mail Baibeli ma'i, “Ine' neloma bafalomena ine'inai.” Amama ma'i epen atotona, anan Krais. 17Basef ae' a'ipipami ofagema na'ama. Fowa' gani God na'i basef la'ifimi endilisi atom owagama mola gwa'aimi. Ea' afagof hiami 430-peleim mafe' ea', God nase'as mi'uli ananinai naso' Mosesanai. Mi'uli anama ina la'ifina nehape' basef la'ifimi amama mali'i God na'i endilisimi atom, owa'. 18Dei' main, God nanda' waf bu'unai ma ape' nofa'apa makwaha waf aonai motanimani. I'i mi'uli anama nowalapai waf anama bu'unai, dei' basef God na'i endilisimi atom owa'etin. Amama owa'. Fowa' God na'i basef endilisimi atoma waf anama bu'unai nagiambama Abraham na'a nofa'ana notanimani.
19Dei' God nase'apa mi'uli anama ma main? Fowa' gani God nali' na'ipasa basef Ananimi endilisimi atom. Nagi' nowatani mi'uli anama nihi'ambapa ofagema ma waf aonai nataga alihina. Ea' God na'i mi'uli anama nope nifi'i notambel nogota anama Abraham bafalomana neataganai. Fowa' God na'i basef amama la'ifimi endilisimi atom ma bafalomana anama. God na'ipam mi'uli anama amam ensel ea' ma'ipa epesa aman nape la'afen, anan Moses. 20I'i epen atitin nepe, aman nape la'afeni maol a'ana. Ea' i'i epes hiesi sope, anan nope la'afena esis. Ea' God anan atona nape.
Mi'uli fowa' God naso' Mosesanai nape nali'ma ape' ma mefe'ma Krais
21Ipe' pa'i basef amama mail mi'uli esis Juda sailanai ma'i mosambala basef la'ifimi God na'i endilisimi atom o owa'? Owa'etin. Dei' main, ape' hiapai mape etapi manda' waf aonai. I'i God nease'apa anona mi'uli ma mofa' ambal namunai, ape' meataga epes bu'unai mope andeande' ma mila mi'uli anama. Owa'etin. Basef mail buk Baibeli ma'i waf aonai ape' manda'anai membalo' ape' hiapai. 22Amamaga mamumami mombalo'apa mape etap anae'. Waf aonai anama nombalo'apa mapoma anona nemaf ape' mombale'efa Kraisi mofa' amama bu'wami. Amama fowa' gani God na'i basef endilisimi atom ma anona nemaf noso' esis sembale'efa Kraisi sefa'am.
23Fowa' gani waf anama sembale'efa Jisas Kraisanai ina dei' nataga, ata' owa'. Nemaf anama mi'uli esis Juda sailana nembalo'apa la'ifipa mape si'i kalabus mape mape ma dei' nemaf anama God nihi'ambapa alihima ape' mombale'efa Jisas Krais. 24Mi'uli anama si'i enin epen nimafiapa nefa'apa mafe'ma Kraisa mombale'efana ma God nofalapa epes bu'unai Ananipai. 25Dei' nemaf anama mataga ma mombale'efa Krais. Ea' mi'uli anama ina ata' nimafiapa wapoti', owa'.
Ape' mombale'efa Krais, amama atom dei' mataga awasi Godi
26Ipe' pembale'efa Krais Jisas. Amama atom dei' ipe' hipei pataga awasi Godi, pape la'ifipa paloma Krais Jisas. 27Ipe' hipei pefa' baptais ma pape la'ifipa paloma Jisas Krais. Ea' dei' pefa' waf ananinai si'i pewahe'a lowaguf. 28Dei' ina enis epes sape dambesi ma enis epesa naep Godi, owa'. Esis Juda ina sape dambesa isima owa' Judaisi, emi egafis agof a'asi ina sape owina epes agufisi, amam ina mape dambema awau nematawa, owa'. Ipe' hipei pape la'ifipa paloma Jisas Krais pataga etifipa. 29I'i ipe' epes Kraisi endilisi, ipe' awasi Abrahami pembale'efa Kraisa anona nemaf God nofa'epa pitanimani pepe andeande' si'i basef amama la'ifimi fowa' na'i endilisimi atom naloma Abraham ma'iami.
Currently Selected:
Galesia 3: aojF
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.