Yoane 11

1Lomba kwali umuntu uwalukulwala, Lasalo uwakuBetania, kumusi kwaŵo Maliya naMalita umukwaŵo. 2Uyo-Maliya ewopele uwasufisye ŵaSikulu amafuta anuncile bwino, nekuŵasumala amakasa kumisisi yakwe: uyo, indume yakwe, Lasalo, yalukulwala. 3Eli syatumine umuntu iŋkasi kuli ŵo ukulaŵila ati: MweŵaSikulu, umfweni, uyo umutemenwe alukulwala. 4Sombi ŵaYesu, pakumfwe'fyo, ŵalilaŵile ati: Ukulwalo'ku takuli kwakufwa koku; sombi nipakuti paŵuleme bwaŵaLesa, ati Umwana waŵaLesa acindikwe pakuti pali ko.

5Naŵo ŵaYesu ŵalukutemwa Malita nemukwaŵo naLasalo. 6Lomba ŵo, pakumfwa ati uyo alukulwala, ŵaciikele lukoso insiku siŵili kopele uko uku ŵali. 7Peŋka pakusila insiku isyo, ŵalilaŵile kuŵasambile ati: Katuyeni, tubwelele liŵili kucalo caludiya. 8Naŵo aŵasambile ŵalilaŵile kuli ŵo ati: MweŵaLabi, niŵukumo lukoso aŵaJuda ŵalukufwayo'kumwipayeni kumabwe; lomba uko eko mulukuya liŵili? 9ŴaYesu nekwasuka ati: Kansi pakasuŵa kamo tapali impindi ikumi nasiŵili? Peŋka kani umuntu alukwenda pakasuŵa ve tekulitutula, pakuti alukuŵona ukusweta ukwapacalo cino icapansi; 10sombi kani ende umuntu uŵusiku alalitutula, pakuti tamuli ukusweta muli ye.

11Ifyo-fintu efi ŵalaŵile, eli ŵaŋgaŵaŵula ati: Lasalo, iciŵusa cesu, aliile mutulo; sombi ndukuya mukumuŵusya. 12Pakuti pali fyefyo aŵasambile ŵalilaŵile kuli ŵo ati: MweŵaSikulu, kani aliile mutulo, ciweme akalwaluka. 13Sombi ŵa Yesu ŵalilaŵile ifyakufwa kwakwe; sombi ŵo ŵalukulaŋguluka ati ŵalukweŵa ifyakulala lukoso mutulo. 14Pakuti pali fyefyo lomba ŵaYesu ŵalilaŵile kuli ŵo apaswetele ati: Lasalo alifwile; 15peŋka ndukusaŋgalala pakuti pali mweŵo ati neŵo nsinali-ko, ati mukacetekele. Sombi ŵukumo katuyeni kuli ye. 16Peŋka Tomasi, uwilicilwe ati niDidumo, alilaŵile kuŵasambile aŵaŵyakwe ati: Ŋgatuye nafweŵo, ati tukafwile pamo naŵo.

17Lomba ŵa Yesu, ili ŵaisile, ŵalisanjile ati kale alala insiku sine mucilende. 18Lomba umusi waBetania wali apepi nanajelusalemi umusinso koti wamasitalyo ikumi naasanu; 19peŋka aŵaJuda aŵenji kale ŵaŵutucila kuli Malita naMaliya, mukuwasaŋgalasya pakuti pandume yaŵo. 20Peŋka'po Malita, pakumfwa ati ŵa Yesu ŵalukwisa, ŵalimucinsisye, sombi Maliya aciikele muŋanda, 21Naye Malita alilaŵile kuli ŵaYesu ati: MweŵaSikulu, mweŵo ŋgeko mwali kuno, nendume yanji ŋga taifwile-po: 22sombi naŋgawa ati niŵuŵuno-ŵukumo, ndiisi ati fyonse'fyo ici muŋgalomba kuli ŵaLesa, ŵaLesa ŵaŋgamupeleni. 23Kumfwa ŵaYesu ŵamweŵa ati: Indume yoŵe ikaŵuka. 24Naye Malita nekuŵaasuka ati: Ndiisi ati akaŵuka, pakuŵuka ukwapakasuŵa ako akakupela-ko. 25ŴaYesu ŵalilaŵile kuli ye ati: Neŵo eneKuŵuka, eneMweo; uyo ulukupema-mo muli neŵo, naŋgawa ati akafwe, akalukuli nemweo: 26kaŵili ŵonse uli nemweo, nekulukupema-mo muli neŵo, taakafwa-po insiku syonse lukoso. Ulukucetekele'fyo? 27Naye nekuŵaasuka ati: Inya mweŵaSikulu, ndicetekele akale ati mweŵo niŵaKlistu, Aŵana ŵaŵaLesa, aŵasimicilwe ati ŵakesa mucalo capansi. 28Peŋka pakulaŵile'fyo, alikumbulucile, nekumwita Maliya umukwaŵo, kumpelo, ati: Aŵasambisi ŵaisa, ŵalukukwita weŵo. 29Naye Maliya, pakumfwe'fyo, aliimine bwaŋgu, nekuya kuli ŵo.

30(iyo-mpindi lomba ŵaYesu taŵaŋgafika mumusi, ŵacili kopele uko uku ŵakumanine naMalita.) 31Lomba aŵoŵaJuda aŵaikele muŋanda naMaliya, awalukumusaŋgalasya, pakuŵona ati aima bwaŋgu, afuma, ŵalimulondele, ukweŵa ati alukuya kucilende mukulila kopele uko. 32Peŋka, pakufika Maliya uko uku ŵali ŵaYesu, nekuŵaŵona, aliwilile pansi muceni caŵo, nekulaŵila kuli ŵo ati: MweŵaSikulu, mweŵo ŋgeko mwali kuno, nendume yanji ŋga taifwilepo. 33Lomba ŵaYesu, pakumuŵona alukulila, newaJuda aŵo aŵo aisile naŵo ŵalukulila, ŵalisisimine lukoso mumutima, nekulemuke'cine; 34peŋka nekwipusya ati: Mbamwalimuŵicile kulipi? Naŵo nekuŵeŵa ati: MweŵaSikulu, twendeni, mukaŵone. 35Lomba ŵaYesu ŵalukulila. 36Pakuti pali fyefyo, aŵaJuda ŵalilaŵile ati: Ŵoneni, cine ŵalimutemenwe! 37Sombi ŵambi naŵo ati: Uyu-muntu, uwasibwile impofu amenso, kansi taesiŵile ye ukukanya ukufwa nawuyu-Lasalo?

38Peŋka ŵaYesu, ili ŵasisimina liŵili mumutima, nekufika nakucilende; icocilende cali ceceŋgo, nebwe kaŵili lyalisincilwe-ko. 39ŴaYesu ati: Siŋkuleni-ko ibwe. Lomba Malita, iŋkasi yawoyo uwafwile, alilaŵile kuli ŵo ati: MweŵaSikulu, pano afuka; pakuti insiku syapita sine. 40ŴaYesu ŵalilaŵile kuli ye ati: Kani neŵo nsililaŵile kuli weŵo ati—Kani ulicetekele, wakuŵono ŵuleme bwaŵaLesa? 41Peŋka'po ŵaJisiŋkwileko nebwe. Naŵo waYesu nekulolesya amenso mwiulu, nekulaŵila ati: Tata, ndukumutoteni mweŵo, pakuti mwanumfwa neŵo; 42neŵo icine ndiisiŵile ati mulanumfwa insiku syonse; sombi nalaŵilila amasiwi aya pakuti peŵumba lyaŵantu aŵeminine kuno; ati ŵo ŵacetekele'cine ati nimweŵo emwemwantumine. 43Lomba, pakulaŵile'fyo, ŵaliŵilicisye nesiwi'likulu ati: Lasalo, fumamo! 44Newafwile alifumine, umwakacilwe kumolu nakumaŵoko nensalu isyapamfwa; napamenso palikacilwe-po necitambala. ŴaYesu ŵalilaŵile kuli ŵo ati: Mukakululeni, alukuya!

45Pakuti pali fyefyo aŵo-ŵaJuda aŵaisile kuli Maliya, pakuŵona ifyo ifi ŵacitile ŵaYesu, ŵambi aŵenji ŵalicetekele kuli ŵo. 46Sombi ŵambi naŵo ŵaliile kuŵaFalisi nekuŵaŵula ifintu ifyo ifi ŵacitile ŵa Yesu.

47Pakuti pali fyefyo aŵapapatilisi aŵakulu neŵaFalisi ŵaliŵuŋgenye icilye ukulukwalika ati: Mbapo fweŵo tucite syani? pakuti uyu-muntu alukucita utwisiŵilo utwinji. 48Kani tumuleke lukoso fyopele'fi, aŵantu ŵonse ŵakacetekela muli ye; lomba neŵaLoma ŵakesa nekutupokolola umupunda wesu nemusyoŵo wesu wonse! 49Sombi umbi uwapali ŵo, isina lyakwe niKayafa, uyo uwaikele ati mupapatilisi umukulu umwako'yo, alilaŵile kuli ŵo ati: Tamwisi-po neli kantu mweŵo; 50neli kulaŋguluka ati ukumwelelweni ati umuntu umo akafwile aŵantu, wiŋgesa-konalwa umusyoŵo wonse. 51Sombi taalaŵilile' fyo umwine eŋka, koku; sombi pakuti ye ali mupapatilisi umukulu umwako'yo, alisimicile ati ŵaYesu waŋgautwilo'musyoŵo uyo; 52kaŵili tewoyo-musyoŵo weŋka, sombi ati ŵakaŵuŋganisisye pamo ŵonse aŵana ŵaŵaLesa awapalaŋgene. 53Peŋka, ukufuma kukasuŵa ako, walukuwaalicila ati tuŵepaye.

54Pakuti pali fyefyo ŵaYesu taŵae'ndele liŵili apaswetele paŵaJuda, sombi ŵalifumine-ko uko, nekuya kucalo icipalamine kumpanta, kumusi uwilicilwe ati niEfilayimi; lomba ŵaliikele kopele uko neŵasambile. 55Peŋka'po kwalipalamine umuciluko waŵaJuda; lomba tauŋgafika umuciluko, aŵantu aŵenji aŵafumine kumitala yonse ŵaliile kuJelusalemi mukuliswesya. 56Naŵo ŵalukuŵafwaya-fwaya ŵaYesu; nekwipusyansyanya apo ŵaimakene mwitempuli ati: Mbamweŵo mulukulaŋguluka syani? Kani teti ese kucitenje? 57Lomba aŵapapatilisi aŵakulu pamo neŵaFalisi kale ŵafundile aŵantu ati—Kani umbi esiŵe ukuli Yesu, ŋgaatuŵule, ati twisiŵe ukumwikata.

Currently Selected:

Yoane 11: AAL59

Highlight

Copy