Ifyakutaŋga 7
7
1Popele ŵaYawe ŵalilaŵile kuli Noa ati: Injila weŵo neŵacikoto coŵe ŵonse mubwato; pakuti weŵo nakuŵona uliluŋgeme pamenso anji mucitentekwa ici. 2Panama syonse isiliwa usalulule sisanu nasiŵili, sisanu nasiŵili, nesyalalume nesyanakasi syasisyo; kaŵili napanama isitasiliwa usalulule siŵili siŵili, neyalalame neyanakasi yaiyo; 3kaŵili napafyuni ifyamwiulu, usalulule fisanu nafiŵili, fisanu nafiwili, nefyalalume nefyanakasi fyafifyo, mukulame' fifyasi ifilaŵi pamenso pacalo ponse. 4Pakuti pasyala insiku sisanu nasiŵili, eli ŋkaloke'mfula pacalo capansi utusuŵa amakumi ane nemasiku nao amakumi ane; popele ifintu fyonse ifyamweo ifi ndeŋgele ŋkafyonala ukufifumya pamenso pamusili. 5Popele apo Noa walicitile koti nifyonse'fyo ifi ŵamufundile ŵaYawe.
6Popele Noa waliikele imyaka imyanda isanu naumo, eli bwaisile pacalo uŵuloŵe bwamenda. 7Popele mubwato mwaliinjile-mo Noa, neŵana ŵakwe aŵalalume, nemukasi wakwe, neŵakasi ŵaŵana ŵakwe pamo nakwe, pakuti pamenda aŵuloŵe. 8Panama isiliwa, napanama isitasiliwa, napafyuni, napafintu fyonse ifikalaŵa pansi, 9fyaliinjile-mo fiŵili fiŵili kuli Noa mubwato, nefyalalume nefyanakasi, koti nifyopele'fyo ifi ŵamufundile Noa ŵaLesa. 10Popele lomba, pakupite'nsiku isyo sisanu nasiŵili, amenda aŵuloŵe aliisile pacalo.
11Pamwaka uwakuleŋga imyanda isanu naumo iyamweo wakwe Noa, pamwensi waŵuiŵili, pansiku yekumi nasisanu nasiŵili iyamwensi uyo, epakasuŵa ako kopele, utuntupuntupu tonse utwamucisiŵa ico icikulu icitali twali toŵekele, kaŵili netumbeluka utwakwiulu twaliisucile. 12Popele apo imfula yalilokele pacalo utusuŵa amakumi ane nemasiku nao amakumi ane. 13Akasuŵa kantu kamo mwaliinjile mubwato Noa naSyemi naYamu naYafeti, aŵana ŵakwe Noa aŵalalume, nemukasi wakwe Noa, neŵakasi ŵatatu ŵaŵana ŵakwe aŵalalume pamo naŵo; 14aŵo, pamo nenama syonse koti mikoka yasiko, neŋombe syonse koti mikoka yasiko, nefiloŋgolo fyonse ifikalaŵa pacalo koti mikoka yafiko, nefyuni fyonse koti mikoka yafiko, efyuni fyonse ifyamikoka namikoka. 15Nafyo fyaliinjile kuli Noa mubwato, fiŵili fiŵili ifyaminefu yonse ili nekupema kwamweo. 16Kaŵili ifyo ifyainjile, fyaliinjile-mo nefyalalume nefyanakasi paminefu yonse, koti nifyopele'fyo ifi ŵamufundile ŵaLesa. Popele apo ŵaYawe ŵalimwisalile-mo.
17Popele uŵuloŵe bwali pacalo insiku amakumi ane; eli aŋgafula amenda nekuŵufumpusyo'bwato, naŵo bwalisuntucile peulu pacalo. 18Popele amenda alikoselele, nekufulo'kwakuti pacalo; popele ubwato bwaliendele peulu pamenda. 19Lomba amenda alikoselele ukwakuti pacalo; popele amapili atali onse lukoso apansi yeulu lyonse aliiŵile. 20Amenda alikoselele ukuya peulu amakubita ikumi naasanu; popele amapili aliiŵile. 21Popele ifyaminefu fyonse ifyalukwenda pacalo fyalifwile, nefyuni, neŋombe, nenama, nefiloŋgolo fyonse ifikalaŵa pacalo, neŵantu ŵonse: 22fyonse ifyali nekupema kwamupasi wamweo mumyona yafifyo, pali fyo fyonse ifyali pamutunta apomine fyalifwile. 23Kaŵili fyalionawilwe ifintu fyonse ifilaŵi ifyali pamenso amusili, neŵantu, nenama, nefiloŋgolo, nefyuni ifyamwiulu; nafyo fyalionawilwe ukufifumya pacalo: popele Noa eŋka ewasyele, pamo naŵaŵo aŵo ali naŵo mubwato. 24Kaŵili amenda alikoselele pacalo insiku umwanda umo nemakumi asanu peulu.
Currently Selected:
Ifyakutaŋga 7: AAL59
Highlight
Share
Copy
Want to have your highlights saved across all your devices? Sign up or sign in
Lamba Bible Version © United Bible Societies, 1959.