Mak 12

Dad gumak danabnu nai

1Jesus Nug anam awowa amu Nug digma, keeke danab ag dootteb ii dootteb ele ouaqata ippuanittak nai laala inam aum. “Danab laa nug grep dad eppowa, aɗ ita, dad ooppa grep meu tappa leppu awaknu aben laa ha, nug neekkeb ukkeb, aɗi uɗitteb anttaknu lag attan ta ukkak laa ele heum. Aria, nug uɗat amu oh ha mala, nug dad uɗat danab eppelagppa mewowa, nug aha, atu laih umanab ukkom. 2Ukka dayeye amu grep meu awak haen be, nug maɗi nid nuhig me, grep meu laih nuhig aokkunu dad uɗat danab gumatta ukkom, 3amge dad uɗat danab ag aɗana, makkuɗna meeg, eɗua hamu ukkom. 4Eɗua ukke amu dad mameg nug maɗi nid laa me ukke, dad uɗat danab ag danab amu ikki ona, kobol eheɗ laala ele nuhigppa heppig. 5Anam heeg amu dad mameg nug maɗi nid laa ele me ukke, dad uɗat danab ag nug qeeg mauhom. Mauhe amu dad mameg nug kuɗum laa ele maatte ukkaeg, dad uɗat danab ag laala makkuɗadna, laala ag aqaeg mauhppig.

6Dad mameg nug anam ha mala amu nug bekka, nug bekka laa iitta, laippuib, nug nuhignu oo mauhttom ele amu, nug inam dabmaama me ukkom. ‘Da bekkal amu ag nuhignu ena elele dooglag,’ dabmakppa anam awa aum. 7Nug anam a, nug bekka ukke, amu dad uɗat danab ag anidna, ag akka akka appig. ‘Nid imu nug dimppa mamegnu keeke oh aokku amunu ahappeg, ig nug qepput mauheb, dad imuam ihinig daakku,’ aon appig. 8Ag anam awona amu ag ahan gona, nid amu aɗan qeeg mauhe, ag nug gaɗa buɗieg, grep dad dimittim ukkom.” Jesus Nug anam mattiom. 9Jesus Nug anam ana amu, Nug nai tuɗitta oɗ mattom. “Ag anam heppig amunu, dad mameg nug ahilagnu aɗi hekku? Nug inam hekku. Nug aha ukka, dad uɗat danab amu oh aqeb mauhppeg, nug grep dad amu eɗua awa, danab laala eppelagppa mekku,” awa aum. 10Jesus Nug anam ana, Nug tuɗitta aum. “Ag nai laa Kayak naippa daatte ele, ag iite ebqeppig. Nai amuam inam. ‘Men laa, lag hak danab ag men amu uuppig, amge lag mameg nug men amu awa me, lagnu men anuqak daatte. 11Naɗi Nug men amu he, men amu anuqaknab dayeye, ig amenigppa anidta, ig enanag doot, dabmak kuɗum aottem,’ ” awa aum. 12Jesus Nug anam a amu, Juda danab okkai ag Jesus Nug keeke danab ag dootteb ii dootteb ele ouaqata ippuanittak nai amu ag eheɗ hak ahilag anidkkulagnu mattiom dooppig amunu, ag Jesus aɗaglagnu ib madippig. Madippig amge ag danab ah kuɗum ⌊appa daappig⌋ ele baɗadppig amunu, ag Jesus uuidna goppig.

Takis Sisar mettaknu nai

13Anam amu dimppa ag ɗo gumak danab-Parasia laala, amu Herotnu ehanittak danab oolagppanu ele laala ele maatteg gona, ag Jesus takisnu oɗ medappeg, Nug eheɗ ab, ag Nug aɗaglagnu goppig. 14Ag gumidna gona amu ag appig. “Ippunittak danab, ig doottem, na am danab tutukku. Na danab okkai onig ele, o danab onig iitta, na amu ohnu dab-ii-mettem. Iitta. Na doyak diig genabib, na nai amuppanuib mattin, danab ah Kayaknu kobol ippunadttem amunu, na keeke imunu appe doognig. Na attem doottem? Ig takis Sisar mettagnig am kobol tutukku, o kobol tutukku iitta? 15Ig mettagnig o iitta?” aon appig. Ag anam appig, amge Jesus Nug ag hambuppuak danab dilag kobol heppig doya, Nug aum. “Aɗinu ag heppeg, ɗo danab ag da aɗailkkulagnu hetteb? Ag men doɗo laa onig danarius aon doppeg, da anttei!” awa aum 16Awa a amu ag men doɗo amu laa aon doeg, Jesus Nug ag oɗ mattom. “Men doɗo imuppa am aun onig, dottog ele daatte?” awa aum. Awa a amu ag, “Sisarnu,” aon appig. 17Ag anam aeg amu Jesus Nug aum. “Aria, ag Sisarnu keeke Sisar mettaglag, amge Kayaknu keeke ag Kayak metteg!” awa aum. Awa a amu ag dabmak kuɗum aoppig.

Eɗua hibaittaknu nai

18Aria, ɗo gumak danab-Sadyusi ag Jesus toppa uɗippig. Danab amu ag, “Danab mauhtteb amu ag eɗun ii hippaidmana,” aon adappig amunu, ag Jesus oɗ mettan appig. 19“Ippunittak danab, Moses nug ihinignu nai laa inam yom. ‘Danab laa nug nid iitta ele mauheb amu, nug amag nug awag wau aweb, nid menuglah, amge aa nid menuglah amu, nid amuam danab amunu iitta, awagnu daakku.’ 20Aria, haen laa eamakkud eblaih aɗit ele ag daappig. Ag anam daanna, awalag tatamnu nug ah awa, nid iitta mauhom. 21Mauhe amu nug amag nug dimugppanu nug ah amu awa, nug ele nid iitta mauhom. Mauhe nug dimugppanu ele anamib. 22Aria, laa oh ele anam ah amuib aona mauheg, dimppa ah amu nug ele mauhom. 23Aakku, eamakkud amu oh ag ah amu aakkuib aoeg, nug ag waalag dayom amunu, eɗua hibaittak haenppa ah amu nug eamakkud eblaih aɗit amu oolagppa aunnab wau daakku?” aon appig.

24Ag anam aeg amu Jesus Nug aum. “Ag Kayaknu nai ii doonna, Kayaknu ɠagattag ele ag ii dootteb amunu, ag madittebnu diignu doyak tutukku iitta ele daan, nai maditteb. 25Eɗua hibaittak haen dimppa amu danab ag ah ii diimna, ah ele ag danab ii diimna. Iitta. Ag engel hab aabppa daatteb bia daaglag. 26Amge danab mauhna, eɗun hibaittaknu, keeke amunu amu ag Moses nug Kayak naippa nai laa yom amu ag iite ebqeppig? Haen amu aab ewewe, ad nakok ewa iitta ii meeme, Moses nug andette, Kayak Nug Moses amegppa a, nug Kayak oɗe inam yom. ‘Da am Abrahamnu Kayak, Aisaknu Kayak amu Jakopnu Kayak ele,’ awa aum. 27Kayak Nug danab mauhppig dilag Kayak ii daatte; Nug danab bau daatteb dilag Kayak daatte. Ag ɗo gumak danab-Sadyusi, ag eɗua hibaittaknu ag ootot okkai aqe hetteb,” awa aum.

Ɗo atten anuqak daatte

28Jesus Nug anam a amu ɗo mehuqak danab laa nug ag nai amu mattin aeg ona aeg do doya, Jesus Nug nob ena meum ele doya amu, nug Jesus inam oɗ mettom. “Ihinig ɗo atten amu nug anuqak daatte?” awa aum. 29Nug anam a amu Jesus Nug oɗeppa awa aum. “Ɗo anuqak am inam. ‘O Israel danab ah, ag daulag human doyeg! Naɗi Nug ihinig Kayak daatte; Nug nukka Kayak daatte. 30Na Naɗi, nahip Kayak, na nuhignu na meut ohppa, oot ohppa, dabmak nahip ohppa, amu nahip ɠagattag ohppa ele oot mauhaɗ!’ 31Aria, ɗo amu dimugppa amu inam. ‘Na nakka nahipnu oot mauhtte, amubia na laipad dilagnu ele oot mauhaɗ!’ Ɗo laippu laa amu aɗit imu ii eɗat-tte,” awa aum. 32Jesus Nug anam a amu ɗo mehuqak danab nug aum. “Ippunittak danab, na ena ame! Na ame am genab. Kayak Nug ihinig Kayak daatte; Nug nukka Kayak daatte, laal ii daatte. 33Amu na nuhignu na meut ohppa, nahip dabmak ohppa, nahip ɠagattag ohppa ele oot mauhkku, amu na nakka nahipnu oot mauhtte, amubia na laipad dilagnu oot mauhkku, keeke aɗit amu aa manaknu ofa oh, mana mettak laa oh ele eɗidttep,” awa aum. 34Danab nug anam a amu, Jesus Nug nob nuhig am ena antta, nug amegppa aum. “Na Kayaknu ɗo maɗoɗ ooppa gokkutnu amu, na ib amu oɗeppa daattem!” awa aum. Awa a amu, laa ag haen amuppa digmak ag Jesus baula keeke laanu oɗ mettaglagnu baɗana, oɗ ii medattappig.

Jesus am aun bekkanu nai

35Aria, Jesus Nug Kayaknu mettid lag ooppa dayaya, danab ah ippuanattatta amu, Nug ag oɗ mattom. “Ɗo mehuqak danab ag, ‘Kristus, Nug am Dawit bekka,’ aon atteb, amge attem doona, ag anam atteb? 36Aɗinu? Kayak Ouɗi Nug he, Dawit nug inam aum. ‘Yawe Nug dahil Naɗi amegppa inam aum. “Na da eppel naɗiap-ppa daappe ukkeb, da nahip kekeɗ na waatppa maadkkul.” ’ 37Ag iikkud antteg! Danab nug, nug bekkanu, ‘Naɗi’ ii atte, amge Dawit nug nukka, nug Kristusnu, ‘Naɗi,’ aum amunu, ig attemun Kristusnu, ‘Nug am Dawit bekka,’ akkunig?” awa aum. Awa a amu aabppan danab ag nuhig nainu enanagnab dooppig.

38Jesus Nug danab ah amelagppa anam anana amu, Nug nai baula tuɗitta ag amelagppa aum. “Ɗo mehuqak danab ag lamen elab enanag takkan, danab ah noolagppa oiglagnu oolag he, ee oɗiak abenppa danab ah ag humadkkulagnu, 39ag nai doyak lakka, hobul haenppa ele ag aben anuqakppa daaglagnu oolag mauhtte, amge ag dahilad amu, ag ahilag kobol amubia hemananu dabmeig! 40Ɗo mehuqak danab ag anam henana, ag ah qab hambuppualadna, ag laulkad yab aotteb. Ag yab awona, ahilag hipunin amu danab ah amelagppa lokkumkkulagnu ag unuqittak elab hetteb amunu, epeɗiak haenppa geha ag uug okkainab aoglag,” awa aum.

Ah qab nug men doɗo Kayak mettom

41Jesus nai amu mattiom dimppa amu Nug men doɗo mak aben guguittak dayaya, Nug danab ah kuɗum ag men doɗo kolekta kunup-ppa meegeg anattom. Laala, ag enulag kuɗum ele amu, ag kuɗum meppig. 42Meegeg amu ah qab daɗek nug appa ukka, men doɗo aɗit, wan toea bia, kunup-ppa meum. 43Me amu Jesus Nug nuhikkud ippunittak awak danab onilagppa e doeg, Nug ag amelagppa aum. “Da genab ag amelagppa attem. Ah qab daɗek imu nuhig men doɗo kunup-ppa meum amu, amuam danab laala meppig ele oh eɗadtte. 44Aɗinu? Laa oh ag men doɗo kuɗum amu, ag laih nakok amuppan aon meppig, amge ah imu nug men doɗo nakoknab nuhig, nug ehanidkkunu dayom, nug amu oh meum,” awa aum.

Currently Selected:

Mak 12: NB

Highlight

Copy