Matyu 4

Satan Jesus oo eeɗom

1Haen amuppa Kayak Ouɗi Nug Jesus omala, atu taɗakppa, amuppa Satan nug Jesus eheɗ hekkunu oo eeɗkkunu, nug appa ukkom. 2Nug omala ukke, Jesus Nug deɗ 40, tuqan amun ele, ee ohnu kud ma dayowa, Nug enug qeum. 3Enug qeeqe amu, eheɗ haknu oo eeɗak danab nuhigppa beum. Ba amu nug aum. “Na Kayak Bekka daattem dayeb amu na appe, men imu eɗua bret baɗ!” awa aum. 4Nug anam aum, amge Jesus Nug inam aum. “Kayak naippa yaak inam daatte. ‘Danab ah eeppaib bau daanna ii oitteb. Iitta. Danab ah ag Kayak nai ohppa bau daan oitteb,’ ” awa aum.

5Nug anam a amu, Satan nug Jesus omala, Jerusalem ukka, Kayaknu mettid lag attan tak batakppa ta he dayeye, amegppa aum. 6“Na Kayak Bekka daattem dayeb, na ippanu oolna honap no! Aɗinu? Kayak naippa yaak inam daatte. ‘Nug engel nuhikkud amelagppa nahipnu haknunab ab, na baen men yaamanu, ag geha ag eppelagppa aɗaidna ehanidkkulag,’ ” awa aum. 7Nug anam a amu, Jesus Nug aum. “Kayak naippa, nai laa ele inam daatte. ‘Na Naɗi, nahip Kayak, na Nug ma anttak aib mettame,’ ” awa aum.

8Jesus anam a amu, Satan baula Jesus awa ukka, qauko okkainab igippa meum. Mewowa, nug wanppan wan oh, ahilag gumak aben aben ele, amu ahilkad binag amahlak oppiaawak oh ele ippunattatta aum. 9“Na da noolppa gaten qaun ona, dup nona da binal meppe amu, da keeke imu oh medakkul,” awa aum. 10Awa a amu, Jesus Nug Satan amegppa aum. “Satan, na qe me! Kayak naippa yaak inam daatte. ‘Na Naɗi, nahip Kayak, na Nug noobppa dup nona binag me! Na Nugib waappa daanna, Nug oɗe dim lamitte!’ ” awa aum.

11Jesus Nug anam a amu, Satan Jesus uuittom. Uuitte, amu engel ag nena, Jesus ehanidppig.

Jesus Galili uɗat digma heum

12Amu Jesus Nug Jon maniguittakppa meppig doya, Nug aha, Galili ukkom. 13Nug ukkom, amge Nug Nasaret ukka daakkunu uua Nug ukka, aab onig Kaperneam, appa ukka dayom. Kaperneam am le ameg Galili ihippa laih Seblon, Naptali buɗulti daadppigppa dayom. 14Jesus appa oiyeye, Nug propet Aisaia Kayak oɗe awa, nai mattiom, nai amu elele mettom. 15Propet Aisaia nug inam aum. “Seblon wan, Naptali wan ele, aa ib laa yuppa ukkak amu, ib amuam aa oppatata gotte. Aa Jodan leppanu qaban uɗitteppanu daattep. Aa am Galili wan, aa oolahppa danab laihnu uɗiak kuɗum daatteb.

16Danab ah ag gatatu naɗi ooppa daan oippig amu ag amahlak okkai anidppig!

Ao, danab ah ag gatatu abenppa daan oippig amu, amahlak ahilagppa amahalom!”

17Haen amuppa Jesus Nug Galili appa digma nai mehuqom. Nug nai inam mehuqaqa aum. “Kayaknu ɗo maɗoɗ aakku miag doum daatte amunu, ag oolag eɗuaɗ!” awa aum.

Jesus danab waɗele onilagppa e, ag Nug dim lamidppig

18Jesus Nug anam nai mehuqak dim lamitta, Galili le ameg ihippa oiyaya, Nug Saimon, onig laa Pita, Andru ele, aa am eamag, Nug aa ahilah uhui eeheh anatom. Aa am kakai awak danab amunu, aa uhui epiɗ. 19Jesus anata amu Nug amelahppa aum. “Doya, da dim lamiɗeɗ! Aa anam hepeɗ, da aa danab diiaknu uɗat ippuanatkkul,” awa aum. 20Nug anam a, aa pahanab ahaya, uhui uuadya, Nug dim lamidpiɗ.

21Dim lamitteheh amu, Jesus Nug nakok laa ele le ihi matta wana, nug Sebedi bekoɗ Jems, Jon ele anatom. Jems, Jon ele aa ele am eamag. Aa amu aa mamelah Sebedi ele, ag uub attan uhui bappaladnana daappig. Daaegeg Jesus Nug aa onilahppa e, 22aa pahanab uub uuya, mamelah ele uuidya, Jesus dim lamidpiɗ.

Jesus Nug nai mehuqaqa, oɗe danab kuɗum ele bappalattom

23Jesus Nug danab amu onilagppa ewowa, Nug Galili wan ohppa oiyaya, Nug Juda dilag nai doyak lakka nai ippuanatta, Kayaknu ɗo maɗoɗnu Nai Ena mehuqa, Nug oɗe oh, aria keeke nau danab ah beɗulag heeg nauhom, Nug amu oh danab ah aqappig ele bappalattom. 24Bappalattette, ag Jesusnu Siria wan ohppa mattieg, danab ah oɗe digdig ele diin uɗippig. Laala ag beɗulagppa guittak okkai dooppig, amu aria, laala ag beɗu mauhak ele, amu laala ag ebehilag mauhak ele. Anam amu, Nug amu oh bappalattom. Aria, laala ag ouɗi nau ele amu, Nug ouɗi nau amu lamattom. 25Jesus Nug anam heehe, danab ah huanak Galilinu, Dekapolisnu, Jerusalemnu, Judanu amu Jodan le laih wan atu oh elenu Nug dim lamidppig.

Currently Selected:

Matyu 4: NB

Highlight

Copy