Matyu 1

Jesus memetappud onilag

1Imuam Jesus Kristus memetappud buɗulkad dilag nai. Jesus Nug am Dawit buɗub, Dawit nug Abraham buɗub. 2Abraham bekka am Aisak. Aisak bekka am Jakop. Aria, Jakop bekkod am Juda, nug awakkud amakkud ele. 3Juda bekoɗ am Peres, Sera ele. Aa anilah am Tamar. Aria, Peres bekka am Hesron. Hesron bekka am Ram. 4Ram bekka am Aminadap. Aminadap bekka am Nason. Nason bekka am Salmon. 5Salmon wau Rahap ele, aa bekkalah am Boas. Aria, Boas wau Rut ele, aa bekkalah am Obet. Obet bekka am Jesi. 6Jesi bekka am King Dawit.

Amu Dawit wau Batseba ele, aa bekkalah am Solomon. Batseba nug tatam Uria wau dayom. 7Solomon bekka am Rihoboam. Rihoboam bekka am Abaiya. Abaiya bekka am Asa. 8Asa bekka am Jehosapat. Jehosapat bekka am Jehoram. Aria, Jehoram bekka am Usia. 9Usia bekka am Jotam. Jotam bekka am Ahas. Ahas bekka am Hesekaia. 10Hesekaia bekka am Manase. Manase bekka am Amon. Amon bekka am Josaia. 11Josaia bekkod am Jekonia, nug awag amakkuɗ ele. Ahilag haenppa, ahilag tappe naknu Israel ag diia ukka laih me dayak danab ah Babilon appa gona daappig.

12Israel ag Babilon appa diia ukka laih me dayak danab ah daaegeg, ag oolagppan laa Jekonia, nug Sailtiel menuom. Sailtiel bekka am Serubabel. 13Serubabel bekka am Abiut. Abiut bekka am Eliakim. Eliakim bekka am Asor. 14Asor bekka am Sadok. Sadok bekka am Akim. Akim bekka am Eliut. 15Eliut bekka am Eleasar. Eleasar bekka am Matan. Matan bekka am Jakop. 16Jakop bekka am Josep. Josep amu, nug Maria gamu. Maria nug Jesus menuom. Jesus Nug am Kristus.

17Anam aakku amunu, Abraham buɗub buɗub uɗiak Dawit batak, amuam ebqak 14. Aria, Dawit uɗiak Babilon appa diia ukka laih me dayak batak, amu ele buɗub buɗub uɗiak ebqak 14. Aria, Israel ag diia ukka laih me dayak danab ah Babilon appa gona daappig uɗiak, Kristus doum batak, amu ele buɗub buɗub uɗiak ebqak 14.

Maria Jesus menuom

18Anam amu, Jesus Kristus, nuhig menuaknu nai am inam. Josep nug Maria aokkunu baeg aɗaeg daye ukkom, amge aa ewau matulak ii aopiɗppa Maria nug Kayak Ouɗinu ɠagattagppa oo ele dayom. 19Daye amu Maria gamu Josep nug am genab tutukku hak danab, ⌊oo doyak ele⌋ amunu, nug heeb, danab ah dilag neekkakppa Maria uɗa nak guittak ele dookkunu uua, nug lokkumakppa Maria uukkunu dabmeum.

20Josep nug amunu dabmak awewe, tuqan tulppa Naɗinu engel nug gumitta neum. Na amu nug aum. “Josep, Dawit bekka, na Maria ah nahip daakkunu, na nug aokkutnu aib baɗame. Doye! Kayak Ouɗi Nug nukka nid amu mettom. 21Nug geha nid danab aokku, amu na Nug onig Jesus ataɗkkut. Aɗinu? Nug nuhikkud danab ah, ag ahilag hipuninnu padal ii memananu ehanadkku,” awa aum.

22Keeke amu oh am propet laa Naɗi oɗe awa, nai mattiom, nai amu elele medakkunu beum. Propet nug inam aum. 23“Doyeg! Ah makkun laa nug oo ele daya, geha nug nid danab menukku. Menueb, ag nid onig Imanuel ataɗkkulag.” Onig amu diig am, “Kayak ig ele daattem.”

24Aria, Josep nug niiom aha, Naɗinu Engel haknunab aum, amubia nug ha, nug Maria nuhig ah daakkunu awom. 25Awe, nug ele nakok laa ii niipiɗ ukke ukke, nid danab awom. Awe amu, Josep nug nid onig Jesus ataɗom.

Currently Selected:

Matyu 1: NB

Highlight

Copy