Jon 8

1Danab ah ag aben aben ukkadppig, amge Jesus Nug Olipnu Qaukoppa ukkom.

Ah laa nug ewau pakkua gappai heumnu nai

2Jesus Nug Olipnu Qaukoppa ukka dayeye, wakkaɗe buttuanab Nug eɗua uɗia, Kayaknu mettid lag ooppa no, danab ah kuɗum nug gumidna uɗieg, Nug heɗep na daya, nai ippuanattom. 3Nug anam ippunittak nai madette, Juda dilag ɗo mehuqak danab amu ɗo gumak danab-Parasia ele ag ah ⌊gamu ele⌋ laa ewau pakkua gappai hak kobol heehe anidppig ele, aon dona, danab ah kuɗum noolagppa meeg hibaitta dayom. 4Anam dayeye ag Jesus amegppa appig. “Ippunittak danab, ah imu nug ewau pakkua gappai hak kobol he anidppig. 5Mosesnu ɗo nug ig ah imubia menppa makkuɗkkunignu ippunigtte. Am na aɗi attem?” aon appig. 6Ag nai amuppa Jesus nai eheɗ laa ab amu ag heppeg, ɗo danab ag Nug aɗan aon, hettoɗiakppa mena, nai beɗuppa yaaglagnu ib madippig. Ag anam appig, amge Jesus Nug gomela, eppeg hiqalppa digma wanppa yaaya dayom. 7Anam dayom, amge ag eɗunna oɗmak amunu baubau heppig. Anam heeg amu Nug eɗua tutukku dayaya, ag neekkattatta aum. “Ag oolagppa aun laa nug hipunin iitta daatte amu, nug tatam menppa ah imu menppa makkuɗaɗ!” awa aum. 8Jesus Nug anam awowa, Nug baula gomela, eppeg hiqalppa eɗua wanppa yaaya dayom.

9Aria, danab nai anam doona, ag laippu laippu dimittim gona malappig. Kaino ag tatam anuqna dimittim waeg, laala dim goppig. Ukkaeg Jesus Nugib dayeye, am ah nug ele Jesus noobppa hibaitta dayom. 10Nug anam dayeye, Jesus eɗua tutukku dayaya oɗ mettom. “Ah, nahipnu nai yaappig amu, ag adeppa goppig? Laippu laa na nob nau aokkutnu iite heum?” awa aum. 11Anam a amu ah nug aum. “Naɗi, laippu laa anam ii heum,” awa aum. A amu Jesus aum. “Da ele na nob nau aokkutnu ii apa; na gona hipunin baula aib heme,” awa aum.))

Jesus am wanppanu amahlak

12Aria Jesus haen laappa baula danab ah amelagppa nai mattiaya aum. “Da am wanppan amahlak daattem. Aun laa nug da dim lamiɗkku amu, nug gatatuppa ii oima. Iitta. Nug bauklelnu amahlak ele daakku,” awa aum. 13Jesus anam mattie amu, ɗo gumak danab-Parasia ag appig. “Na nakka nahipnu nai mehuqttem amunu, nai nahip am genab iitta,” aon appig. 14Aon aeg am Jesus Nug aum. “Am genab, da dahil nai madittem, amge dahilnu nai amu genab. Aɗinu? Da adeppanu uɗimi amu, da doottem, amu da eɗue gokkulnu amu, da amu ele doottem. Amge ag da adeppanu uɗimi, adeppa eɗue gokkul amu, ag ii dootteb. 15Ag amu wannu kobolppa danabnu hak epeɗitteb. Da am epeɗiak uɗat laa ii hettem. 16Amge da danab laa epeɗidlom amu, da tutukkunab epeɗidlom. Aɗinu? Da dakka ii hettem, Mame, Nug da meiɗe uɗimi ele, Nug da ele oh daattep. 17Ahilag ɗoppa amu nai inam yaak daatte. ‘Danab aɗit aa nai diig laippu attep amu, nai ahilah am genab’. Yaak anam niitte. 18Da dakka da dahilnu nai madittem, Mame, Nug da meiɗe uɗimi ele amu, Nug ele dahilnu nai maditte,” awa aum. 19Anam a amu ag Nug oɗ medappig. “Na Mamen am adeppa daatte,” aon appig. Aon aeg amu Jesus Nug aum. “Ag am da ii dooiɗtteb, da Mamel ele ag ii dootteb. Ag da dooiɗnalob, amu da Mamel ele doolob,” awa aum. 20Nug nai amuam Kayaknu mettid lag nuhig tomppan keeke oh ele ooppa, men doɗonu kunup guguittak dayaya ippuanattom, amge Nug mauhkkunu haen ii malom amunu, laa Jesus aɗakkun ii heum.

21Amu Jesus baula ag amelagppa aum. “Da gokkulnu hettem, amu ag tuɗidna oiglag, amge hipunin ahilag am ag tonatteb mauhkkulag. Aben da gottem ele, amuppa ag gokkulagnu elele iitta,” awa aum. 22Nug anam a amu, Juda ag akka akka nug oɗ mettan appig. “Nug nukka Nug beɗu qa mauhkkute? Diig amunu Nug, ‘Ag da gokkulppa amu, ag gokkulagnu elele iitta,’ attete?” aon appig. 23Aon aeg am Jesus Nug nai tuɗitta aum. “Ag am honapnu, da amu attannu. Ag am wan imuppanu, da amu wan imuppanu iitta. 24Diig amunu da ag amelagppa tatam ami. ‘Ag hipunin ahilag amu ag tonadppeg mauhkkulag.’ Am genab, ag da am Kayak Bekka oolagppa genab ii dooglag dayeb amu, ahilag hipunin genab tonadppeg mauhkkulag,” awa aum. 25Jesus anam a amu ag Nug oɗ medappig. “Na am aun?” appig. Aeg am Jesus Nug aum. “Da tatam ai dooppig ele, da am anamnab aakkuib. 26Da epeɗiak danab nug danab hettoɗiakppa epeɗitte, amubia da ag epeɗiadkkulnu nai kuɗum madikkulnu elele, amge laa Nug da meiɗe uɗimi ele, Nug genabib maditte, da nuhigppa nai aomi amu, da wanppan danab ah amelagppa amuib madittem,” awa aum. 27Nug anam aum, amge ag Jesus Nug Mameg Kayaknu aum amu, ag oolag ii maittom. 28Amunu Jesus Nug ag amelagppa aum. “Dimppa ag Danab Bekkalag da ad emaitakppa atuliɗona amu, ag da am Kayak Bekka dooglag. Amu ele, da dahil dabmakppa keeke ii hettem. Iitta. Mame Nug da ippuniɗom amu, da amunuib madittem, ag amu ele dooglag. 29Am laa Nug da meiɗe uɗimi ele, Nug da ele daattem. Nug da ii uuiɗe, dakka ii daattem. Aɗinu? Da haen oh keeke Nug oo niitte ele, da amu hettem,” awa aum. 30Jesus anam mattieye, danab ah kuɗum ag nuhignu oolagppa genab dooppig.

Laa ag, “Ig am Abraham bekkod,” appig

31Juda danab ag Jesusnu oolagppa genab dooppig ele amu, Nug ag amelagppa aum. “Ag ippunittak nai dahil dim lamidtteb dayeb amu, ag am genab ippunittak awak danab dahiladnab daaglag. 32Ag geha doyak diig genabib dooglag, amu doyak diig genabib amu heeb, ag uhuqak enappa daaglag,” awa aum. 33Jesus anam a amu ⌊laala nuhignu oolagppa genab ii dooppig amu⌋ ag appig. “Ig am Abraham bekkod, am ig haen laa wanppanu danab laanu begbeg maɗi nid ii daamut. Am attem hena, na ig uhuqak ena aognignu attem?” aon appig. 34Anam aeg am Jesus Nug aum. “Da genabnab genab ag amelagppa attem. Aun laa nug hipunin hette amu, nug am hipuninnu begbeg maɗi nid daatte. 35Laa nug danab okkainu begbeg maɗi nid daatte ele, nug okkai amu nuhig nid ii daatte, nug baekkudppan laa, hanhan anam daakkunu ii daatte, amge danab okkai bekka, nug amu nug mameg baekkudppa haen oh daatte. 36Anam amunu Danab Bekkalag da, da ag uhuqak madakkul dayeb, ag genab uhuqak enappa daaglag. 37Da doottem, ag Abraham buɗuppud, amge nai dahil amu ahilagppa ii daatte amunu, ag da iuppeg mauhkkulnu hetteb. 38Da nai imu madittem ele amu, da Mame ele daaɗɗa anidmi, da amu madittem, amge ag am ag mamelag a dooppig hetteb,” awa aum. 39Nug anam a amu, ag appig. “Ig mamenig am Abraham,” aon appig. Aeg amu Jesus amelagppa aum. “Ag genab Abraham buɗuppudlob, ag nug kobol heum bia helob. 40Da doyak diig genabib Mame toppanu aomi amu mattiyi dooppig, amge ag da niɗaglag hetteb. Abraham nug anam ii heum. 41Ag am ag mamelagnu kobol hetteb,” awa aum. Jesus anam a amu ag appig. “Ig aninig nug ib imuagppa danab kuɗum ele ii oiyona menuikkom. Ig mamenig laippu, Kayak aakkuib,” aon appig.

42Aeg am Jesus amelagppa aum. “Ag Mamelag genab Kayaklob, ag dahilnu oolag mauhlo. Aɗinu? Da Kayak ele daaɗa uɗimi. Da dahil maittakppa ii uɗimi. Iitta. Kayak Nug da meiɗe uɗimi. 43Am aɗinu ag dahil nai tutukku dab-ii-medatteb? Amunu diig am ag dahil nai ii doon aotteb. 44Ag mamelag am Satan; ag nug bekkod daatteb amunu, ag mamelag oo niitte amu, ag dim lamidkkulagnu wagai metteb. Nug wannu digmak haenppanu danab aqe mauhtteb. Ag mamelag nug doyak diig genabib ii dim lamidtte. Aɗinu? Doyak diig genabib amu nuhigppa ii daatte. Nug hambuppuak nai mattiaya amu, nug nuhig diig aakkuib dim lamidtte. Aɗinu? Nug nai hambuppuak maditte, nug nai hambuppuak mamegnab ele daatte. 45Ag Satan bekkod daatteb amunu, da nai genab madittem amu, ag dahil nai amu oolagppa genab ii dootteb. 46Danab laa nug genab dahilnu, ‘Nug hipunin heum,’ akkunu elele iitta amunu, da nai genab madittem imu amu, aɗinu ag oolagppa genab ii dootteb? 47Laa ag Kayak bekkod daatteb ele, ag Kayak oɗe dim lamidtteb. Ag amu Kayak bekkod ii daatteb amunu, ag nai ii doon aotteb,” awa aum.

48Awa a amu Juda ag Jesus oɗeppa aon appig. “Ig nahipnu genab attem. Na Samaria ted, ootppa hahail ele,” aon appig. 49Aeg am Jesus oɗelagppa awa aum. “Da oolppa hahail iitta. Da amu, da Mamel binag humattem, amge ag da binal qeeg nette. 50Da dakka da binal amahalak oppiaawak ele daakkulnu ii hettem. Iitta! Laa, amuam Kayak, Nug da amu ele daakkulnu hette. Nug da epeɗila, eheɗ laa ii anidtte. 51Da genabnab genab ag amelagppa attem, laa nug dahil ippunittak nai awa dim lamidkku dayeb amu, nug iinab mauhma,” awa aum. 52Awa a amu ag Nug amegppa appig. “Gemu ig genab doottem, na ootppa hahail ele! Abraham nug mauhom, amu propet ele mauhppig, amge na attem, ‘Laa nug nahip nai awa dim lamidkku dayeb, nug am iinab mauhma.’ 53Na nahipnu aɗi doottem? Na ig mamenig Abraham eɗittakte? Nug amu propet laa oh ele ag oh mauhppig, amge danab ag na dim lamidtteb ele, ag ii mauhmananu attem. Na nakka nahipnu aɗinab doottem?” aon appig. 54Aon aeg amu Jesus oɗelagppa awa aum. “Da dakka da binal amahlak oppiaawak ele daakkulnu hekkul dayeb amu, dahil binal amahlak oppiaawak ele amuam hamu. Amge da Mamel, ag nuhignu, ‘Nug am ihinig Kayak,’ oɗelagib atteb amu, Nug da binal amahlak oppiaawak ele daakkulnu hette. 55Ag Nug ii dootteb, amge da Nug doottem. Da nuhignu, ‘Da Nug ii doottem,’ alom amu, da ag bia hambuppuak mattiak danab daalom, amge da Nug doottem, nuhig nai ele dim lamidttem. 56Ag mamelag Abraham nug dahil uɗiak haen anidkkunu maɗoɗppan gamag ahak doyaya, ameg ma dayom. Nug antta, nug oo gamag ahom,” awa aum. 57Awa a amu ag Nug amegppa appig. “Na nahip maɗ am 50 iitta. Na Abraham ii anidme. ⌊Na hambubuttem,⌋” aon appig. 58Anam aeg, Jesus ag oɗelagppa awa aum. “Da genabnab genab ag amelagppa attem. Abraham ii dayom haenppa da daami, gemu daattem, butti aɗi daakkul,” awa aum. 59Nug anam aum amunu, Juda ag Nug makkuɗkkulagnu men agappig, amge Jesus Nug danab kuɗum oolagppa beɗu lokkumittatta, Kayaknu mettid lakkanu aha ukkom.

Currently Selected:

Jon 8: NB

Highlight

Copy