Genesis 49

Jakop nug bekkod, ahilagppa aɗi bekkunu aum

1Aria, deɗ laa Jakop nug bekkod onilagppa e uɗieg, nug aum. “Dimppa keeke aɗi aɗi ahilagppa bekku amu, ag amu dooglagnu da noolppa qagmeppeg, da appi dooglag.

2Ag da, Jakop, ag da bekkalad, ag qagmen, nai dahil doyeg!

Ao, da Israel, ag mamelag amu, ag dahil nai doyeg!

3Ruben na am dahil nid naanaeg.

Ao, na am matunu amunu, na da abenal aon daakkutnu daame.

Da danab memi amu, keeke amunu na at daattem.

Ao, na binan okkai, ɠagattag ele.

4Anam aakku, amge nahip dabmak am ɠagattag iitta amunu, na kobol dubuttid ele hee, na da, na mamen, na da waal amge waalnab iitta, na nug ele niipiɗ amunu, na onin attan dayaknu elele iitta.

5Aria, Simeon, Lewi ele aa am eamag. Amu aa ɗo tutukku ii dim lamidya, ban eheɗ hepiɗ.

6Ahilah nai mattiakppa da ii daapa.

Ao, da ahilah qagmakppa ii gopa.

Aɗinu?

Aa oo nauhakppa danab aqaeh mauhppig.

Ao, aa oo hak ahilah dim lamidya, makau okkai ebehi ele beɗulag hamu heeh nauhppig.

7Ahilah oo nauhak am eheɗ nau, am eheɗ laa awaknu anak waappa daakkunu ool daatte.

Ao, ahilah oppoɗi bak ameg kokoɗ eppak ele am naunab dayeye, aa laa guittak mattaglahnu uug ii doopiɗ. Anam amu, oppoɗi bak amuam eheɗ laa awaknu anak waappa daakkunu ool daatte.

Anam amunu, da heppi, aa buɗulti ag da, Jakop, ag da buɗulad oolagppa matatun daan oiglag.

Ao, da heppi, aa buɗulti am da, Israel, ag da buɗulad oolagppa piɗe piɗe oiglag.

8Juda, nahipnu amu, na awanad amapad ele, ag na onin humappeg, attan tekku.

Na kekeɗ nahipad tappaladppe nokkulag.

Ao, na mamen bekkod ag na noomppa dup nokkulag.

9Juda, na laion bau bia ɠagattagnab daattem.

Ao, Juda, da bekkal, na laion doɗ laa qa lawowa, eɗua teɗuppa uɗitte bia, na anam hettem.

Laion niikkunu haaha, beɗu taietta niitte, Juda na anambia hettem.

Yo, laion anig niiebeb, laa nug maɗedakkunu baɗakku amu, laa Judanu anam dooglag.

10Juda nug hanhan kingnu qakun aɗa daakku.

Ao, Juda buɗub laa ag hanhan king daan oiglag.

Ag anam daappeg ukkebeb, dimppa laa nug kingnu qakun mamegnab nug uɗia aweb batakku.

Nug uɗieb amu, wan laalappan oh ag nuhig nai dim lamidkkulag.

11Juda nug keeke kuɗum ele amunu, nug danab nug donki nuhig muɗi grep diigppa qakkalo, nug amubia hekku.

Ao, nug danab nug donki nag nuhig muɗi grep enanagnab, amuppa qakkalo, nug anambia hekku.

Danab nug keeke kuɗum ele, wainnu am keeke hamu bia doya, lamen elab aguppa ihalo, Juda nug anam daakku.

Ao, danab nug keeke kuɗum ele, lamen nuhig grep lebuppa ihalo, nug amubia daakku.

12Juda nug danab beɗuppa oɗe laa iitta, nug amubia daakku.

Ao, nug danab beɗuppa enanag dootte, nug anambia daakku.

13Seblon, nahipnu amu, na yu ihippa daakkut.

Ao, na uub uɗia eeɗa daatte, na aben amu gumadkkut.

Ge, nahip wannu tom am ukka, Saidon guguittak daakku.

14Isakar, nahipnu amu, na uɗat haknu danab ebehi ele.

Ge, na donki aab ilak aɗit gamagppa niitte bia daattem.

15Na wan nahip am wan ena anidkkut.

Ao, na wan amu, am keeke ena ena kuɗum na medakkunu elele dookkut.

Anam amu, na uɗat hekkutnu wagai mekkut.

Ao, na wan buuak uɗat ɠagattag hekkut.

16Dan, nahipnu amu, na heppe, Israel dilag huu okkai laa ag nai doya mala hettoɗia epeɗia elele mettak kobol dooglag.

Ag doon, dim lamidkkulag.

17Mat nau ib giginppa daatte amu, na amubia daakkut.

Ao, na makkai ib daugppa daatte bia daakkut.

Mat anam daatte amu, nug hos baeg emale, hos he, danab gomeppanu na qette amu,

Dan na amubia hekkut.

18O Yawe, na da ehaniɗkkutnu, da na amen mettem.

19Gad, nuhignu amu, danab ag ban hena, danab aqadna, ahilkad keeke aotteb amu, danab amu ag nug baneb uɗiglag.

Anam amge, nug eɗua lamatta, ban hekku.

20Aser, nuhignu amu, nug ee enanag eppa meu aokku.

Ao, nug ee enanag, king latte, nug amubia eppa meu aokku.

21Naptali, nuhignu amu, nug am dia anig uhuqak awom bia.

Ao, dia anig amu nug nakkud enanag menuadtte.

22Josep, nuhignu amu, nug am muɗi grep laa meu otte, nug amubia.

Ao, nug muɗi grep, le qeppuɗia betteppa dayaya, ebekkud elab ukkaeg, meu huana otte bia.

23Josep nug nid dayeye amu, nuhig kekeɗ ag nuhigppa eheɗ heppig.

Ao, ag nug kekeɗ mettan, baneb daan, nuhigppa eheɗ nau heppig.

24Amge nuhig lat ii hahaɗom.

Ao, nug eppeg laih laih oh am enaib daapiɗ.

Laa Ɠagattag Okkai Ele, nuhignu amu, da, Jakop, da Nug binag mettem amu, Nug nug ehanidtte.

Ao, Sipsip Gumitta Danab Ena, Nug kekeɗ nuhikkud danab aqamnanu ehanittak daatte, Nug nug itittak ena medatte.

25Kayak, Nug da, Jakop, dahil Kayak, Nug na, Josep, Nug na ehanidtte.

Ao, Laa Nukka Ɠagattag Oh Ele, Nug na itidtte.

Josep, nahipnu amu, Kayak Nug na hab waappanu itittak ena na mettatta, gu medatte.

Ao, Nug wan unuqagppanu itittak ena na mettatta he, nahip wanppa le qeppuɗia bette.

Am genab, Nug itittak ena na mettatta he, na nid, doɗ ele kuɗum ele daattem.

26Na mamen nug itittak ena okkai okkai awom.

Ao, nug itittak ena huanak awom.

Amu itittak ena amu oh ag na, Josep, ag nahip-ppa daaglagnu ool daatte.

Ao, Josep, na, na awanad, amap ele oolagppa, na okkai daanna, itittak ena amu oh aokkutnu ool daatte.

27Benyamin, nahipnu amu, na am doɗ wulp, enug eheɗ qette ele, na amubia daattem.

Buttua na ban henana, kekeɗ eɗadttem.

Ao, tueb na banppa keeke aome amu, na keeke amu paniadttem.”

Jakop nug anam awa aum.

28Amuam Israel dilag huu okkai 12, amu ag mamelag itittak ena mattom, am anam. Ag itittak ena piɗe piɗe, anen anen, ag diilag bia elele aoppig.

Jakop nug mauhomnu nai

29-33Jakop nug bekkod itatta mala amu, nug ⌊baula⌋ aum. “Anukka Abraham nug wan laa, men oɗe ele, Hit danab Epron, nuhigppanu daden meum. Wan amu onig Makpela, Kanan wanppa Mamre guguittak daatte. Ag Abraham, nug wau Sarah ele, amu Aisak, nug wau Rebeka ele appa boumadppig. Da waal Lea ele appa boummi. Amu gemu da mauhkkul hettem amunu, da ele appa boumiɗkkulag. Abraham nug wan amu, men oɗe ele Hit danab, nuhigppan awom,” awa aum.

Jakop Nug anam awowa amu, nug eɗua, nuhig niiak abenppa niiaya, nug mauhom.

Currently Selected:

Genesis 49: NB

Highlight

Copy