Genesis 47

Jakop baekkudppa ele Isip wanppa aben laa onig Gosen, ag appa daappig

1Aria, Josep nug anam ana amu, nug aha, Paro gumitta ukka, amegppa aum. “Da mamel, da awalad, amu da amal ele ag ahilkad doɗ, amu ag enulag laa oh ele Kanan wanppanu diin uɗin, gemu wan atu onig Gosen appa daatteb,” awa aum. 2Josep anam ana, ⌊nug mameg, eamakkud ele uɗiglagnu nai me ukke uɗieg,⌋ nug eamakkud oolagppanu danab tanig ele tituanatta, diia uɗia, Paro noobppa ta maatte daappig. 3Josep nug anam he daaegeg, Paro nug Josep eamakkud amu oɗ maattom. “Ag aɗi uɗat hetteb?” Nug anam oɗ maatte amu, ag appig. “O naɗi, ig, nahipad maɗi nid, ig ihinig uɗat amu, ig mamenkad aɗi heppig ele, amuib ig hettem. Ig doɗ gumadttem,” aon appig. 4Ag anam ana amu, ag baula ele appig. “Kanan wanppa appa amu, enug haen okkai daatte; doɗ ihinkad appa ee iitta amunu, ig ippa nakok daagnignu uɗimut. Anam amunu na appe, ig, nahipad maɗi nid, ig wan atu onig Gosen appa daagnignu oɗ medattem,” aon appig.

5Ag anam aeg amu, Paro nug Josep amegppa aum. “Na mamen, awanad, amap ele ag nahip-ppa uɗippig. 6Antte! Isip wan aakku daatte. Isip wan laih adekku am enanagnab amu, na appe, ag appa daaglag. Ag wan atu onig Gosen appa ena daaglag dayeb amu, ag appa dayeg! Amu laa ele, laa ag oolagppanu doɗ gumattak uɗat tutukku dootteb ele amu, na appe, ag doɗ dahil gumadkkulag,” awa aum.

7Aria, dimppa Josep nug mameg Jakop omala, Paro gumitta ta, noobppa meum. Ukka me amu, Jakop nug Paro itittak mettom. 8Itittak mette amu, Paro nug Jakop oɗ mettom. “Maɗ nahip am gane?” awa oɗ mettom. 9Oɗ mette amu, Jakop nug Paro amegppa aum. “Dahil maɗ amu, da mamelad aɗi dilag maɗ bia iitta. Dahil amu 130 aakkuib. Da wanppa oiyeye amu, da uug kuɗum anidmi,” awa aum. 10Jakop anam ana amu, nug baula Paro itittowa, nug eɗua ukkom.

11Anam amu Josep nug nug mameg, awakkud, amag ele ag Isip wanppa aben enanagnab daaglagnu matte, ag aguppa daappig. Aben amuam wan atu onig Gosen, onig laa Rameses. Paro aum, amubia Josep nug heum. 12Ag appa daaegeg amu, Josep nug mameg, awakkud, amag amu laa oh ag ele daappig ee ahilag elele lakkulagnu otia madattom.

Enug haen he, danab qagaiettak daappig

13Haen amuppa enug haen naunab dayom amunu, Isip appa, wan laala ohppa ele datta ee ele ii beeg, ee iitta meum. Isip, amu Kanan ele ooppa, danab oh ebehilag bodoettom. 14Isip danab, Kanan danab ele ag ee aeg daden meegeg, men doɗo ahilag iitta me, Josep nug men doɗo amu awa ukka, Paronu lag enanagnab, amuppa meum. 15Aria, haen men doɗo Isipnu, Kanannu ele iitta me amu, Isip danab oh ag Josep gumidna gona, nug amegppa appig. “Ihinig men doɗo iitta meum amunu, ig nahip neekkakppa daat mauhmatade, ee mekke!” aon appig. 16Ag anam aeg amu, Josep nug aum. “Ahilag men doɗo iitta meum amunu, ag doɗ ahilkad diin uɗippeg, amunu nob am, da ee madakkul,” awa aum. 17Josep anam a, Isip danab ag doɗ ahilkad diin, Josep noobppa ukkaeg, Josep ee matte, ag maɗ amu ee elele daappig. Ag doɗ diin goppig amu, amuam hos, sipsip, meeme, makau, amu donki ele.

18Aria, maɗ amu uue, ag eɗun Josep toppa gona, amegppa appig. “Ig daattemnu diig amu, na, ihinig naɗi, na doottem. Ig uug amuam ii tonamta. Men doɗo ihinig iitta meum. Aria, doɗ ihinig ele na eppenppa daatteb. Ig beɗunig, ig wanenig ele aakkuib na aokkutnu ig ele daattem. 19Amunu ig mauhmatanu, wan ihinig ele nauhmanu amu, ig beɗunig, ihinig wan ele na aona, ee mekke! Na anam heppe, ig Paronu maɗi nid daagnig; wan ihinig ele nuhig daakku. Keeke laippuib am anuqak daatte. Ig bau daagnignu, wan ele hele-ettak daamanu, na ee tumu mekke!” aon appig.

20Akku Isip danab oh ag wan ahilag meppig amunu, Josep nug Isip wan oh Paronu daden meum. Aɗinu? Enug haen naunab aakku dayom. Josep anam he, ahilag wan amu, Paro awom. 21Amu ib amuppa Isip danab oh ag Paronu maɗi nid daappig, 22amge mana mettak danab aakkuib ahilag wan amu, Josep daden ii meum. Paro nug ag ee madattom amunu, ag ee amuppa ee aon ladappig. Ladappig amunu, ag wan ahilag meeg, Josep nug daden ii meum.

23Amu Josep nug danab amelagppa aum. “Da gemu, ag beɗulag, ahilag wan ele Paronu daden memi amunu, ee tumu imu wanppa eppaglagnu aon ukkeg! 24Amge dimppa ag ee eppan, haen ag meu aona amu, ag laih tanig ele oppatna, laih laippu Paro metteg! Waɗele laa amu, ahilag tumu eppaknu, amu ag lakkulagnu ele aweg!” awa aum. 25Josep nug anam a amu, ag appig. “Naɗi ihinig, na ig ehanikke, ig ii mauhmut. Na ig enaib ehanigme amunu, ig Paronu maɗi nid daagnig,” aon appig. 26Anam beum amunu, Josep nug ɗo inam ma aum. “Ag Isip danab ag ahilag lanaknu oh maɗ ohnu laih tanig eleppa oppatnana, laih laippu Paro mettana, laih waɗele amu ag aweg!” awa aum. Ɗo amu gemu ele ⌊nai imu yaak haenppa⌋ Isip wanppa daatte. Amge mana mettak danab dilagnu amu, Paro nug wan ahilag ii awom amunu, ag ɗo amu waappa ii daappig.

27Aria, Israel danab ag wan atu onig Gosen appa wan aona appatnana, enulag kuɗum ele aona, kuɗum daappig. Wan atu onig Gosen am Isip wanppa daatte.

28Ag wan atu onig Gosen aon daanna, Jakop nug maɗ 17 baula appa Isip wanppa daye, maɗ nuhig oh am 147 dayom. 29-30Amu haen Israelnu mauhak haen miag uɗiom amu, nug bekka Josep onigppa e uɗie, nug aum. “Na oot dahilnu ena daatte dayeb, na ihinig kobol hena, na eppen da tuɗil waappa mena, nai nahip anan qakkan, na dahilnu oo mauhaknab kobol, oo metta ii uuak kobol ele dim lamidnana, da mauhppi amu, na da gaɗal ippa Isip wanppa ii boummana, na aon gona, da mamelaɗ boumatppigppa, appa da ele boumiɗkkutnu oɗ medattem,” awa aum. Nug anam a amu, Josep nug aum. “Na ame bia amu, da anamib hekkul,” awa aum. 31Awa a amu, Israel nug oɗeppa awa aum. “Aria, na nahip nai amu ɠagattag qena, appe dookkul,” awa aum. Nug anam a amu, Josep nug anam nuhig nai ɠagattag qa mattiom. Nug anam ha male, Israel nug dudqaknu hokkat nuhig ikki aɗe ehanitte dayaya, Kayak noobppa dup noa binag meum.

Currently Selected:

Genesis 47: NB

Highlight

Copy