Genesis 45

Josep nug nukka miag atiom

1Aria, Juda anam a amu, Josep nug gayak ooppa ambeum amunu, nug nuhikkud ehanittak danab amelagppa aum. “Ag oh dimittim ukkeg!” awa aum. Nug anam a amu, ag oh goppig. Ukkaeg, haen Josep nug amag awakkud ele amelagppa, “Da am Josep,” aum amu, laa nug appa ii dayom; nug, amu nug amag awakkud ele aakkuib. 2Josep nug huana gayeye, Isip danab ag doon, laa Paro laugppa daappig ele amunu dooppig.

3Anam gayowa, Josep nug awakkud amag ele ag nailagppa ag amelagppa aum. “Da am Josep.” Anam ana amu, nug ag oɗ mattom. “Da mamel nug genab uma daattete?” Nug anam oɗ mattom, amge Josep awakkud, amag ele ag eheɗ nau baɗappig amunu, ag nai laa ii appig; toettan daappig. 4Anam daaegeg amu, Josep nug aum. “Ag gumiɗna doig!” awa aum. A amu, ag nug gumidna waeg, Josep nug baula aum. “Da am ag lailag Josep. Anukka ag heeg, Isip danab daden meiɗom. 5Ag anam heppig, amge kobol amunu ag uug aib aqom. Ag agakka aib nug aidppig. Aɗinu? Kayak Nug he, da danab ah bau daaglagnu anuqen uɗimi. 6Aɗinu? Maɗ aɗit imu enug haen ba daya, enug haen maɗ tanig ele baula ele daakku. Maɗ amu oh ooppa laa ee bau awaknu am iitta. 7Anam daakku amunu, Kayak Nug he, Kayaknu ehanittak okkaippa da heppi, ag, ag baelkadppa ele bau daaglagnu, ag wanppa iitta memananu, da anuqen uɗimi. 8Anam aakku amunu, ag heeg, da ii uɗimi. Kayak Nug he, da uɗien, ippa Paro mameg bia daattem. Da nug laugppanu keeke oh gumen dayeye, Isip ohnu gawana ele daattem. 9Amunu ag ahan, paha Kanan wanppa gona, mam inam appeg doyaɗ! ‘Nai imu amu, na bekkat Josepnu. ⌊Da am na bekkat Josep.⌋ Kayak he, da Isip oh mamelag daattem amunu, na appa aib daame. Paha ippa uɗie! 10Uɗippe amu, na, na baenadppa ele, amu doɗ nahip oh ele, amu nahip keeke oh Isip ippa, wan atu onig Gosen, appa da gukkuiɗna daaglag. 11Enug haen maɗ tanig ele laa ele daakku amunu, ag wan atu onig Gosen appa daappeg, da heppi, ag elele daaglag. Ag anam ii heppeg amu, na, na baenadppa, amu nahipad laa oh ele, ag oh am daɗeknab daaglag,’ ” awa aum.

12Josep nug ag nai amu ag mamelag amegppa akkulagnu aum amu, nug nai baula tuɗitta aum. “Ag aniɗna dootteb. Benyamin ele aniɗa dootte. Da am Josep. Da iikku ag ele nai madittem. 13Amunu ag gona, ig mamenig amegppa, keeke oh anidppig, amu da Isip wanppa ippa binal okkai ele daattem, ag amu appeg doyaɗ! Appeg doyeb amu, paha omalppeg uɗieg!” awa aum.

14Nug anam a amu, nug Benyamin ele nug oɗakkia daayya gaapiɗ. 15Gayoya amu, Josep nug awakkud oh ootuqattatta gayom. Anam hena malona, ag nai ena nug ele madippig.

16Aria, Paro, nug nuhikkud ehanittak anuqak danab ele ag, “Josep awakkud, amag ele, ag Isip wanppa uɗippig,” nai amu doona, ag ena dooppig. 17Ag ena doon, Paro nug Josep amegppa aum. “Na awanad amap ele amelagppa inam appe dooglag. ‘Ag ahilag keeke doɗ ahilag qaɗelagppa maadna, eɗun Kanan wanppa gona, 18ag mamelag, amu ag baelkadppa ele diin, eɗun dahilppa uɗippeg, da ag Isip wan laih laa enanagnab madappi, ag Isip wanppanu ee enanag lakkulag,’ ” awa aum. 19Paro nug nai amu Josep amegppa awowa, nug tuɗitta aum. “Na laa ele appe, doyeg! ‘Ag Isipnu uɗatnu karis diiadna gona, ag waalkad, ahilkad nid naunau ele karis amuppa diin, mamelag ele aon uɗiglag. 20Ag ahilag keeke Kanan wanppa daatte amu, ag amunu oolagppa aib uug dayom. Aɗinu? Da ag wan imuppan keeke oh ena madakkul,’ ” awa aum.

21-24Paro nug anam a amu, Israel bekkod ag inam heppig. Josep nug a, nuhikkud maɗi nid ag Isipnu keeke ena ena donki eblaih tanig ele qaɗelagppa maadna, Josep awakkud amag ele, ag mamelag, ag baelkadppa ele diin, Isip wanppa uɗiglagnu ee aelkad, bret, amu ibppanu ee laala ele donki anig eblaih tanig ele qaɗelagppa maatteg, Josep nug keeke amu oh, amu uɗatnu karis ele, Paro hekkununab aum bia mattom. Aria, nug awakkud anen anen oh lamen bau laib laib ele mattom, amge nug Benyamin lamen bau tanig ele, amu 3.5 kilogram silwa ele mettom. Ibppanu keeke laa ag Kanan wanppa gokkulagnu ele mattowa, nug ag amelagppa, ag ibppa gonana, akka akka nug mehqak ii hemananu anana, nug a, ag ahan, Paro aumbia hekkulagnu goppig.

25Ag anam bappaidna, Josep awakkud amag ele ag ahan, Isip wan uuna, ag mamelag Jakop toppa Kanan wanppa goppig. 26Gona tena amu, ag Jakop amegppa appig. “Josep nug ii mauhom! Nug Isip wanppa bau daatte. Am genab, am laa ele amu, nug wan amu ohnu gawana daatte,” aon appig. Ag anam aeg amu, Jakop nug huan ottaia, ahilag nai amu ooppa genab ii doyom. 27Nug ooppa genab ii doyom, amge haen nug bekkod ag Josep aɗi aɗi aum nug amegppa amu madippig, amu haen Jakop nug Josep uɗatnu karis maatte goppig, nug karis amuppa Isip gokkunu anatta amu, nug ooppa genab doya, nug eɗua, ɠagattag dayom. 28Nug eɗua, ɠagattag daya, nug aum. “Genabnab! Josep nug Isip wanppa bau daatte. Da ahen ukken anttoya, dimppa da mauhkkul,” awa aum.

Currently Selected:

Genesis 45: NB

Highlight

Copy