Genesis 43

Jakop, onig laa Israel, nug he, nug bekkod baula eenu Isip goppig

1Aria, enug haen okkai ba, anamib dayeye, 2haen ee tatam Isipnu aoppig am iitta me amu, Jakop nug bekkod amelagppa aum. “Ag eɗun Isip gona, ee bau aon uɗippeg lakkunig,” awa aum. 3Jakop anam aum, amge Juda nug mameg amegppa aum. “Isip danab amu, nug ig amanig aot ii gota amu, ig nug anidkkunignu elele iitta, nug nai amu ɠagattag aum. 4Nug anam aum amunu, na Benyamin megappe, ig nug ele oh gota, ee nahip aognig. 5Amge Isip danab okkai nug ig Benyamin ele ii gopput, ig nug baula ii anidmatanu aum amunu, na Benyamin ii megappe, ig ii gomata,” awa aum. 6Juda nug anam a, Israel nug aum. “Ag aɗinu danab okkai amu, ‘Ig amanig uma daatte,’ aeg doyom? Ag anam appig amunu, da uug imu doottem,” awa aum. 7Israel anam a, ag nug amegppa appig. “Danab amu nug ihinignu, amu ig baenkadppa elenu oɗmak huan haaha inam aum. ‘Ag mamelag mauhomte? O iitta, nug daattete? Ag amalag yuɗ laa elete?’ Nug anam oɗmak heum amunu, ig nuhig oɗmak amu nob meta amut aakkuib. Nug ig amanig aot gokkunignu akku amu, ig attem heta doognig. Ig ii doomut.” Ag anam aon appig.

8Ag anam ana, Juda nug nai ahilag tuɗitta, Israel amegppa aum. “Na, ig, ihinkad nid naunau ele ig enugnu mauhmatanu, ig bau daagnignu, na Benyamin da eppelppa meppe, ig paha Isip wanppa gokkunig. 9Da dakka, da nid amu nug gumappi gokkunig. Uug imu amu, am na noomppa dahil daakku. Da eheɗ hein amu, da nob maokkul. Da nid amu awe eɗuen ii uɗien medappi, da na noomppa hanhan beɗulppa aab ele daakkul. 10Gemu na ig ii qakkiglom amu, ig haen aɗit gowot uɗilom,” awa aum.

11Anam awa a amu, ag mamelag Israel nug aum. “Ig ib laa iitta amunu, ag inam hekkulag. Ag wan imuppanu keeke ena ena laa, amuam marasin, uppuh leppu, spais digdig, mir, amu ad aɗit onilah pistasia, almon ele, amu meulti lanaknu ele laa aon, bek ahilkadppa inona gona, Isip danab amu, nuhig daakkunu hamu mettaglag. 12Aria, laa ele, ag anukka silwa men doɗo aon ukkaeg, eɗun bek ahilkad oɗelkadppa meeg, ag aon eɗun uɗippig amu, ag aona, bau amubia ele aona qagmena, aon gokkulag. Isip danab ag anukka ootottai aqe, henana meeg, aon uɗippig. 13Ag amalag ele aon, Isip danab toppa paha gokkulag,” awa aum. 14Nug anam ana amu, nug nai tuɗitta aum. “Kayak inam hekkunu amu, da ool daatte. Ag gona, danab amu noobppa teppeg, Kayak Nukka Ɠagattag Oh Ele Nug ag ehanatteb, danab amu nug ahilagnu oo gai-iitta doya oo matta ehanatta heeb, Simeon, Benyamin ele aa, ag ele eɗun uɗiglag. Da ib laa iitta amunu, oo guittak beeb amu, da anamib daakkul,” awa aum.

15Jakop nug anam a amu, ag ahan, keeke ena ena amu akkan, silwa men doɗo tatam aon goppig, amu aakku aon, bau amubia ele aona, Benyamin ele omalna, aakku paha Isip wanppa, Josep gumidna goppig.

Josep Benyamin anttom

16Ukkaeg amu, haen Josep nug Benyamin ele uɗippig anatta amu, nug maɗi nid nuhig, nug laug gumom ele, nug nug amegppa aum. “Na danab imu diin, da laulppa gona maadna, doɗ laa qeppe mauheb, tuqana, ee laa ele he! Aɗinu? Da danab imu ele ig amun ee lanak haenppa ee lakkunig,” awa aum.

17Josep anam a amu, nug laug gumak danab nug Josep amag, awakkud ele omalatta, Josep laugppa ukkom. 18Ukke, ag baɗan, akka akka nai madippig. “Anukka ag silwa men doɗo ihinig eɗun, ihinig bekppa inaeg aot gomut, diig amunu ag omaikkeg uɗimut. Ippa ag oigna, donki ihinig aona heppeg, ig begbeg maɗi nid daagnig,” aon appig. 19Ag akka akka anam ana amu, ag ahan, Josep laug odppa gona, appa Josep laug gumak danab amegppa appig. 20“O naɗi, na ihinig nai dookkutnu oonig daatte. Anukka ig ee daden mekkunignu uɗit, ee aota, silwa men doɗoppa daden meta, 21ig eɗut gotata, ibppa niignignu hetata, ig bek uhuqta, silwa men doɗo ihinig anidmut. Silwa men doɗo ee daden memut amu, ig anamnab anidmut. Anam anidta amu, ig silwa men doɗo aot gota, aabppa daatta, gemu eɗut aot uɗimut. 22Gemu ee aognignu amu, ig silwa men doɗo baula aot ele uɗimut. Amu aun silwa men doɗo ihinig tatamnu eɗua, bek ihinigppa inom amu, ig ii doottem,” aon appig. 23Ag anam aeg amu, Josep laug gumak danab nug aum. “Ag maɗoɗ doonna, aib baɗappig. Kayak ahilag, Nug ag mamelagnu Kayak, Nug ahilagnu nob ena mattom. Da silwa men doɗo ahilag tatam aon uɗippig amu, da aomi,” awa aum. Anam ana amu, nug ukka, Simeon omala uɗie, oh daappig.

24Daaeg amu, laug gumak danab nug ag omalatta, Josep laug ooppa noa, le baelag ihaglagnu matta, nug ahilag donki dilag ee ele awa, donki mattom. 25Matte amu, Josep awakkud, amag ele ag keeke ena ena Josep, nuhig daakkunu hamu mettaglagnu aon goppig amu, ag keeke amu bappaidppig. Aɗinu? Ag Josep ele amun ee lanak haenppa ee lakkulagnu amu tatam dooppig.

26Daaegeg, Josep uɗie amu, ag keeke ena ena aon uɗippig amu, ag Josep, nuhig daakkunu hamu mettan, ag nug noobppa gatelag qaun ona, gomelna, iɗulag wanppa meppig. 27Ag anam heeg, Josep nug ag amelagppa nai ana, oɗ mattom. “Ag ena daattebte? Ag mamelag kaino daattenu anukka amelppa appig amu, nug ena ana daattete, o iitta mauhomte,” awa oɗ mattom. 28Nug anam oɗ matte amu, ag appig. “Ig mamenig, nahip maɗi nid amu, nug uppa uma ena daatte,” aon appig. Anam ana amu, ag Josep binag mettaglagnu, ag gatelag qaun ona, gomelna autna aona, iɗulag wanppa meppig. 29Iɗulag wanppa meppig amu, Josep nug neekke ukke, nug amagnab Benyamin antta, nug aum. “Ag anukka amalagnu aeg doomi amu, nug uukkute?” awa oɗ mattom. Awa oɗ matte amu, ag, “Yo,” aon appig. Anam aeg, Josep nug aum. “O da bekkal, Kayak na itidkkunu ool daatte,” awa aum. 30Anam awowa, nug amag anttomnu oo huan doyeye, gaakkunu paha aha, nug ag uuatta, lagnu oo laappa noa, lokkuma gayom. 31Gayowa, nug iɗu iha, eɗua gumatta ukka, gayak ooppaib dayeye, nug nuhikkud maɗi nid ag ee balalppa mekkulagnu aum.

32Amu Isip danab ag Hibru danab ele laippu ee lanak amu ɗo ele amunu, ag Josepnu ee balal laappa mena, nug awakkud amag ele dilag balal laappa mena, Isip danab laala ag Josep ele hanhan ee ladappig ele, ag ahilag ee am balal laappa ele meppig. Aɗinu? Isip danab ag Hibru danab ele ee lakkulagnu amu, ag oolagppa uuaknab dootteb. 33Aria, Josep awakkud amag dilagnu ele amu, ag ee lakkulagnu dayak aben anen anen madappig. Nid naanaeg, ag nuhigppa digmena daaeg ukke, huh bieg, nuhigppa batak. Ag anam heeg amu, Josep awakkud amag ele ag anidna ag ottaina dabmak kuɗum aoppig. 34Ag anam daaegeg amu, Josep nug awakkud oh anen anen ee nuhig balalppanu tappiɗ laippu ag noolagppa paniom, amge Benyamin nug nuhig tappiɗ tanig ele noobppa meum. Nug anam heum amunu, ag ee, le ele aon elelenab lappig.

Currently Selected:

Genesis 43: NB

Highlight

Copy