Genesis 34

Jakop bekkod ag Sekem, Hamor ele buppualadppig

1Aria, anukka Jakop wau Lea nug aɗeg Daina menuom. Jakop aɗi ele ag Sekem appa daanna amu, Daina nug wan amuppanu ah laala anadkkunu aha ukkom. 2Ukke, Hiwi danab onig Hamor, nug am wan amu dilag okkai, nug bekka Sekem nug Daina antta, ameg qe haaha amu, nug nuhigppa kobol eheɗ heum. 3Sekem anam ha amu, nug Jakop aɗeg Daina ii uuittom. Iitta! Nug nuhignu oo mauhom. Amu ele, nug Daina amegppa nai enaib madittom. 4Sekem nug Dainanu oo mauhom amunu, nug mameg Hamor amegppa aum. “Mama, na ah umu aoppe, dahil ah dayaɗ!” awa aum.

5Aria, Jakop bekkod ag dad okkaippa Jakopnu doɗ gumadnana oiyegeg, Jakop nug Sekem, nug Daina, nuhigppa eheɗ heumnu nai doyom amunu, nug nai amu nukka dabmaama daya, bekkod eɗun lakka uɗiglagnu amelag meum.

6Anam daye amu, Sekem mameg Hamor nug aha, aab uua, Jakop anidkkunu ukkom. 7Nug ukka, Jakop toppa te, haen amuppanab Jakop bekkod ag doɗ gumadppigppanu uɗin, nai doon, ag oolagppa guittak doonna, oppoɗilag be amelag kokoɗ eppom. Aɗinu? Sekem nug heehe, Daina ele niipiɗ, amuppa nug Israel oolagppa kobol eheɗ heum; kobol Israel oolagppa ii belo amu, nug heum. 8Anam aakku, amge Hamor nug ag amelagppa aum. “Dahil nid danab Sekem, nug Daina aokkunu oo naɗi daatte. Anam amunu, da ag Daina, nuhig ah daakkunu Sekem mettaglagnu oɗ madattem. 9Ig ag ele ewau matulak awaknu layam batatta, ag ihinig ah bau diippeg, amu ig ahilag ah bau ele diignig. 10Ag ihinig wanppa ig oonigppa daanna oippeg daagnig; ag amu hekkulagnu od matulakib daatte. Ag ig ele wan imuppa daappeg, ig daden mak uɗat hetata, wan imu laih laih aoglag,” awa aum.

11-12Hamor nug anam a amu, Sekem nug Daina mameg, awakkud ele amelagppa aum. “Ag oolag dahilnu ena daakkunu ool daatte. Ag Daina meɗona, ag nuhignu ennu aɗi appeg amu, da madakkul. Ag en okkainu akkulagnu amu, aib uug aqom. Keeke laippu aakkuib am da oolppa anuqak daatte. Amuam ag ah amu dahil ah daakkunu da meɗaglag,” awa aum.

13Sekem nug anam aum, amge nug Jakop bekkod appinlag, nug nuhigppa kobol eheɗ heum amunu, Jakop bekkod ag nai hambuppuak eɗun, Sekem, amu nug mameg Hamor ele amelahppa madippig. 14Ag appig. “Ig appinanig danab gaɗa ii otaɗak mettagnignu elele iitta. Ig anam ii hemata. Aɗinu? Ig anam hekkunig amu, ig Kayak noobppa ena ii daamta. 15Anam daatte amunu, ig na ah amu aokkutnu ɗo laippu inam mettem. Aa, ahilti danab ele amu, ag oh gaɗalkad otaɗna, ig bia daaglag. 16Ag anam heppeg amu, ig aɗenkad ag diippeg, ig ag aɗelkad diipput, ig ag ele oh oitta, diig laippu bekkunig. 17Amge ag nai ig gemu attem imu uuna, gaɗalkad ii otaɗkkulag amu, ig aɗenig imu eɗut aot, ahat gokkunig. Ippa ii daamta,” aon hambuppun appig.

18Ag anam aeg amu Hamor, nug bekka Sekem ele, aa nai amu ena doopiɗ. 19Ena doya, Sekem, nug mameg baekkudppa laa oh amelagppa anuqak dayom, nug Jakop aɗeg Dainanu enanagnab doyom amunu, nug paha Jakop bekkod appig bia hekkunu ahom. 20Ahe amu, Sekem nug mameg ele aa ahilah aab okkaippa ikki danab dilag qagmak aben aab odppa daatte, aa appa aa lailti ele nai mattiglagnu gopiɗ. 21Aa goya amelagppa apiɗ. “Danab umu ag ig ele layam batagnignu oolag daatte amunu, antteg! Ig wanenig am okkai, ag ig ele daagnignu elele. Ig apput, ag ig wanenigppa daappeg, ag ig ele daden mak uɗat hekkunig. Ig ag aɗelkad diipput, ag ig aɗenkad diiadkkulag. 22Anam aakku, amge ag ig anam hekkunignu ɗo laippu meppig. Ig ag hettebbia, ig gaɗankad otaɗpput, aria ig ag ele, elele laippu oignig. 23Ag dabmena antteg! Ig anam hekkunig amu, dimppa doɗ ahilag, enub ahilag, makau ahilag ele am ihinig daakku amunu, ag appig bia ig anam hepput, ag ig ele oignig,” aoya apiɗ. 24Hamor, Sekem ele anam mattieh, danab qagmakppa daappig amu, ag doona appig. “Ena, ig anam hekkunig,” aon appig. Awona, ag ahan, danab ahilkad amu oh gaɗalkad otaɗppig.

25Anam heeg, deɗ ewam dimppa danab gaɗalkad otaɗppig amu, ag ihilag guattette, Jakop bekoɗ Simeon, Lewi ele, aa Daina awakuɗ, aa ahaya, qep elab aɗuatya, banelag goya, aab mattaya oieheh, aab okkai amuppan danab ag uug laa bekkunu dab-ii-mena daaegeg, aqaglahnu oiya, danab amu oh aqadpiɗ. 26Aa Hamor, amu nug bekka Sekem ele aqateh mauheh, aa Daina, Sekem laugppanu aoya gopiɗ. 27-29Appinlah aoya ukkaeheh, Jakop bekkod laa ag uɗin, danab mauhppig ele amu, ag ahilag keeke oh diin goppig. Ag sipsip, makau, donki, ag waalkad, amu nid naunau ele, ag enulag oh, laulagppanu amu omelagppanu ele, ag amu oh diin goppig. Aɗinu? Sekem nug ag appinalagppa eheɗ heum.

30Anam heeg amu, Jakop nug Simeon, Lewi ele amelahppa aum. “Aa heeh, da onil ippa Kanan, Peres ele danab amelagppa nauha autanab awom. Da dahil daup kuɗum iitta amunu, ag banenig uɗiglagnu qagmena, uɗin iqappeg, ig oh padal mekkunig,” awa aum. 31Nug anam aum, amge nid aɗit aa apiɗ. “Danab amu nug ii appinanihppa ib baag oiyak ah bia kobol heum am, keeke amuam ena iitta,” aoya apiɗ.

Currently Selected:

Genesis 34: NB

Highlight

Copy