Genesis 30

Jakop nid laa ele menuattom

1Haen Rahel nug ah mattoi oiya, Jakop nid ii metta antta, nug Leanu, dahilppa anam daalon dabmak aɗa daya, nug Jakop amegppa aum. “Na nid meɗe! Iitta amu, da mauhkkul,” awa aum. 2Anam a amu, Jakop oo nauhe, nug Rahel amegppa aum. “Da Kayak abenab aokkulnu elele iitta. Nug nukka na oot qakkom amunu, na nid ii menuttem,” awa aum.

3Jakop anam a, Rahel nug aum. “Maɗi ah dahil Bilha iikku daatte, aa ⌊ewau matulya⌋ oiyya, nid dahil menukku. Da nuhigppa nid ele daakkul,” awa aum. 4Nug anam ana, nug maɗi ah nuhig Bilha, Jakop wau daakkunu Jakop mette oiyya, 5nug oo ele daya, nug nid danab menue, 6Rahel nug aum. “Kayak Nug he, tutukku hak dahil aakku miag atiom. Nug dahil unuqittak doya, nid danab meɗom,” awa aum. Nug anam aum amunu, nug nid onig Dan ataɗom.

7Aria, Jakop nug Rahelnu maɗi ah Bilha ele baula oiyya, nug oo ele daya, nug nid danab baula menue, 8Rahel nug aum. “Da apai ele i nug okkai mehqeɗa, amu da nug eɗidmi,” awa aum. Anam anana amu, nug nid onig Naptali ataɗom.

9Aria, haen Lea nug baula ii menua antta, nug nuhig maɗi ah Silpa awa, nug Jakopnu ah daakkunu Jakop mettom. 10Mette, nug Jakop ele oiyya amu, Silpa nug nid danab menue, 11Lea nug aum. “Imu enanag,” awa aum. Aum amunu nug nid onig Gad ataɗom.

12Amu Leanu maɗi ah Silpa nug nid danab baula menue, 13Lea nug aum. “Da ool gamag ahatte. Ah laa oh ag dahilnu, ‘Gamak ahak ah,’ akkulag.” Anana amu, nug nid onig Aser ataɗom.

14Dimppa wit aeg awak haenppa Ruben nug dad okkaippa oiyaya, muɗi laa onig mandrek, nug muɗi amu antta awa uɗia, nug anig Lea mettom. Mette, Rahel antta, nug Lea amegppa aum. “Na bekkat nug mandrek awom ele amu, laa meɗakkutnu oɗ medattem,” awa aum. 15Rahel anam a amu, Lea nug oɗeppa awa aum. “Na danab dahil yab aome amu, na amunu keeke hamute anana, na da bekkal keeke awom ele imu aokkutnu attem?” awa aum. Nug anam a, Rahel nug aum. “Na keeke nid nahip awom ele meɗakkut amu, na Jakop ele tuqan imuppa niiglah,” awa aum. 16Aa nai anam qakkaeh, haen Jakop dad okkaippanu uɗieye amu, Lea nug gumitta ukka, amegppa aum. “Tuqan imuppa da na ele niignih. Aɗinu? Keeke da bekkal awom onig mandrek, amuppa da na daden meidmi,” awa aum. Anam a, nug Jakop ele tuqan amuppa niipiɗ. 17Niipiɗ amu, Kayak Nug Leanu unuqittak doya he, Lea nug oo ele daya, nug nid danab laa menua, 18nug aum. “Da maɗi ah dahil da gamul mettami amunu, Kayak Nug da nob ena meɗom,” awa aum. Anana amu, nug nid onig Isakar ataɗom.

19Jakop, Lea ele baula oiyya, Lea nug oo ele daya, nug nid danab laa ele menua, 20nug aum. “Kayak Nug keeke enanag da meɗom. Da gamul bekkod eblaih laippu ele menuadmi amunu, nug da binal meɗakku,” awa aum. Nug anam anana, nug nid onig Seblon ataɗom.

21Dimppa amu, nug nid ah ele menua, nug onig Daina ataɗom.

22Aria dimppa, Kayak Nug Rahelnu dabmak awa, unuqittak nuhig ele doya, Nug he, Rahel nug nid menukkunu elele dayom. 23Anam dayeye amu, nug Jakop ele oiyya, nug oo ele daya, nug nid danab menua, nug aum. “Kayak Nug dahil uɗa nak nau guittak ele he, iitta meum,” awa aum. 24Nug baula ele aum. “Yawe Nug nid danab laa ele meɗakkunu ool daatte,” awa aum. Nug anam anana amu, nug nid onig Josep ataɗom.

Jakop keeke kuɗum awom

25-26Rahel nug Josep menue, Jakop nug Laban amegppa aum. “Da ah diiatkkulnu nahip uɗat elele hemi amunu, na appe, da ah, nid ele diiatte, na uuitte, da appalppa gokkul. Na da nahip uɗat okkainab hemi doottem,” awa aum. 27Jakop anam a amu, Laban nug oɗeppa awa aum. “Na oot dahilnu ena daatte dayeb amu, na gokkutnu aib heme. Na da ele ippa daagnih. Aɗinu? Da dahil emanppa Yawe Nug nappa da itiɗom anidmi. 28Na nob gane aokkutnu oot daatte amu, na appe doyen medakkul,” awa aum. 29Nug anam a amu, Jakop nug aum. “Na dahil uɗatnu kobol doottem. Da hei, doɗ nahip attem daappig, amu ele na doottem. 30Na amu doottemnu diig am, anukka na enun kuɗum iitta, amge dahil uɗat ohppa Yawe Nug ititte, na gemu enun kuɗum ele daattem. Anam aakku, amge gemu dahilnu am attemun? Da ganeb dahilad dilagnu keeke digmein aokkul?” awa aum. 31Jakop anam a amu, Laban nug aum. “Da na aɗi medakkul?” awa oɗ mettom. Oɗ mette amu, Jakop nug aum. “Na men doɗo meɗakkutnu ool ii daatte, amge na elele doon appe, da sipsip ameg nahip, meeme ameg nahip ele tuɗitten gumadkkulnu 32da gemu doɗ ameg nahip oolagppa oiyeye, meeme beɗulag otultul ele, o geɗaɗa ele, amu sipsip beɗulag otultul ele, o geɗaɗa ele, o sipsip nakkud ag beɗulag qamuhak ele, amu oh da diien laih meppi, ag dahil nob daaglagnu aokkul. Na keeke amunu, ‘Yo,’ appe amu, da doɗ ameg nahip gumadkkul. 33Aria, anam dayeb, dimppa haen na dahil nob anidkkutnu uɗikkut amu na anidkkut. Aɗinu? Haen amuppa na meeme beɗu otultul iitta, o beɗu geɗaɗa iitta, o sipsip nag laa beɗu qamuhak iitta dahil doɗ ameg ooppa anidna amu, na dookkut, da yab aomi,” awa aum. 34Jakop anam a amu, Laban nug aum. “Ena, na ame amu, i anam hekkunih,” awa aum. 35Nug anam ana amu, deɗ amuppa nug ukka, meeme dawai, ag beɗulag geɗaɗa ele, o ag beɗulag geɗaɗa elab ele oh, meeme anig ag beɗulagppa hakkab dayom, amge ag beɗulag otultul ele, o ag beɗulag geɗaɗa ele, amu sipsip nakkud ag beɗulag qamuhak ele oh diiatta, bekkod eppelagppa me, gumadppig. 36Laban anam ha amu, nug aha, Jakop uuitta, nug uma ugekke, deɗ ewam uue, aben amuppa ta dayeye, Jakop nug Labannu doɗ ameg laa oh gumattom.

37Nug gumattatta, nug ad ewam, ad popla, ad alman, amu ad plen ele eppeg bau diiatta, gaɗa gamag gamag maakkatte, ooppa ad hakkab amu miag atie, geɗaɗlak dayom. 38Ad maakkatta amu, nug doɗ le latteb, aben amuppa leppa maatte, doɗ ag le amu lakkulagnu gona, le lanana, doɗ anig hiɗe qak doona, 39ag ad eppeg anttegeg, haen amuppa dawai anig pappalatteg, anig ag nakkud beɗulag geɗaɗa elab ele, o ag beɗulag otultul ele, o ag beɗulag geɗaɗa ele menuadppig. 40Dimppa, Jakop nug sipsip nakkud amu diia, piɗe maatte daappig, amge doɗ laa oh nug he, ag Labannu doɗ beɗulag geɗaɗa elab ele, amu beɗulag qamuhak ele neekkadppig. Aakku Jakop nug anam ha, nug amuppa he, nuhikkud doɗ ameg ag piɗe daappig. Nug ag Labannu doɗ ele ii maattom. 41Laa ele, haen Jakop nug doɗ anig beɗu ena, ɠagattag ele upine antta amu, nug ad eppeg leppa me, dawai nug anig ad amu guguittak pappalom. 42Meeme o sipsip beɗulag ena iitta amu, Jakop nug anam ii heum amunu, Jakopnu doɗ ag beɗulag ena, ɠagattag ele, amge Labannu am ena iitta. 43Ib amuppa amu, Jakop enub kuɗum ele dayom; sipsip, meeme, kamel, donki ele, amu nuhikkud maɗi nid maɗi ah ele, ag ele am kuɗum.

Currently Selected:

Genesis 30: NB

Highlight

Copy