Genesis 26

Aisak Gerar dayom

1Anukka Abraham nug wan amuppa oiyeye amu, enug haen beum. Aria, Aisaknu haenppa amu, enug haen baula be, amu Aisak nug Abimelek toppa ukkom. Abimelek nug Pilistia dilag king; Gerar aabppa dayom. 2Nug Gerar dayeye amu, Yawe nug Aisak gumitta na, amegppa aum. “Na Isip aib gome. Da na wan adeppa daakkutnu appi amu, na amuppa daakkut. 3Na wan imuppa nakok daye! Anam amu, da na ele daaɗa, da na itidkkul. Da Abraham amegppa dahil nai ɠagattag qetten ami, amubia, da na, amu na buɗunad ele wan imu oh madakkul. 4-5Abraham nug da oɗel, ɗo iɗu iɗu dahil, dahil haknunab anak ele dim lamittom amunu, da heppi, na buɗunad ag kuɗumnab, hoɗoppai bia daan oippeg, wan imu oh da ag madakkul; amu da heppi, na buɗunppa wan ohppan danab ag itittak ena aoglag,” awa aum. 6Nug anam a amu, Aisak nug Gerar appa dayom.

7Nug Gerar dayeye, appanu danab ag Aisak, Rebekanu oɗ medappig. Haen ag oɗ mettaeg amu, Aisak nug Rebekanu, “Nug am da waal,” akkunu baɗom amunu, nug Rebekanu, “Nug amu da appinal,” awa aum. Rebeka nug ah iɗu tuqak ele amunu, Aisak nug amu dabmaama, appan danab ag nug Rebeka aoglagnu nug qeppeg mauhmanu, nug Rebekanu, “Da waal,” ii aum. 8Aisak, Rebeka ele haen elab appa daaeh ukke, deɗ laa Abimelek, Pilistia dilag king, nug gililppa ulah ibuppa daya, neekke ukke, Aisak wau ele aa ewau kobol laa heya daaeheh anatom. 9Anata amu, nug Aisak onigppa e uɗie, amegppa aum. “Ah amu, nug na waat! Aɗinu na, ‘Nug am da appinal,’ ame?” Anam a amu, Aisak nug aum. “Da nuhignu mauhpanu baɗami amunu, da anam ami,” awa aum. 10Anam a amu, Abimelek nug aum. “Na aɗinu ihinignu anam heme? Na anam ame amunu, danab laa nug nahip ahnu oo ii maitta, wagai ma eeɗeb niilop. Anam helo amu, nahip hipuninppa, ig beɗunigppa aab ele daalo,” awa aum. 11Abimelek anam anan amu, nug ɗo ɠagattag inam meum. “Danab laa nug kobol eheɗ laa Aisak, wau ele dilahppa hekku amu, nug mauhkkuoittenab,” awa aum.

12Nug anam a, dimppa Aisak wan amuppa dayeye, Yawe nug itittom amunu, Aisak nug keeke laala eppa, maɗ amu ooppa nug eppomnu meu kuɗumnab awom. 13Aria, Aisak nug enub danab ba, deɗ laala ele keeke kuɗum ele awawa, nug danab enub okkainab ele ba, 14nug makau, sipsip, maɗi nid maɗi ah ele daye, amu Pilistia danab anidna amelag qe oolag elele ii dayom. 15Amelag qe, anukka Abraham nug le moɗ buualattom amu, Pilistia ag eɗun qelakkatteg, 16Abimelek nug Aisak amegppa aum. “Na ig eɗigttem amunu, ahan ukke!” awa aum.

17Abimelek anam a amu, Aisak nug aha ukka, oolnu noak onig Gerar, appa haen tutu dayaknu aab kala dayom. 18Amu Abraham le moɗ buualattowa mauhe, Pilistia danab ag wanppa keldoatteg, Aisak nug eɗua buualatta, onilag nug mameg ataɗattom, amuib baula ataɗattom.

19Ataɗatte amu, Aisaknu maɗi nid ag oolnu noak amuppa le moɗ baula buueg, le aakku dayom, 20amge Gerar makau gumattak danab ag Aisaknu doɗ gumattak danab ele ag le amunu nug mehqak hena, Gerar danab ag appig. “Le imuam ihinig,” aon appig. Ag nai anam heppig amunu, Aisak nug le amu onig Esek ataɗom. 21Aria, Aisaknu maɗi nid ag le moɗ baula buueg, danab laa ag le moɗ amunu ele nug mehqak heeg, Aisak nug onig Sitna ataɗom. 22Ataɗa, nug aha nakok uua ukke, maɗi nid nuhig ag le moɗ laa buuppig. Buueg amu, danab laa ag nug mehqak ii heppig amunu, Aisak nug onig Rehobot ataɗom. Ataɗaɗa amu, nug aum. “Yawe Nug aben elele imu mekkom. Ig wan imuppa elelenab daagnig,” awa aum.

23Dimppa Aisak nug aha, wan amu uua, Berseba ukke, 24tuqan amuppa Yawe Nug Aisak gumitta na, amegppa aum. “Da am na mamen Abrahamnu Kayak. Da na ele daattep amunu, na aib baɗame. Da Abraham, nug am maɗi nid dahil amu, da nuhignu dabmak anuqak aottem amunu, da na itidkkul. Da heppi, na buɗunad ag kuɗum bekkulag,” awa aum. 25Yawe Nug anam a amu, Aisak nug qaɗab nuhig qa, Yawe unuqittowa, peh lag nuhig qappe, maɗi nid nuhikkud ag le moɗ laa buuppig.

26Aisak laih uppa dayeye, Abimelek, Ahusat, amu Pikol ele ag Gerarnu ahan, Aisak gumidna goppig. Ahusat nug Abimeleknu ulum mettak danab, amu Pikol nug am nuhig ban daup ikki anuqak. 27Ukkaeg, Aisak nug aum. “Anukka ag aiɗna lamiɗeg uɗimi, amu diig aɗinu ag dagattolppa uɗippig?” awa aum. 28Nug anam a amu, Abimelek aɗi ag appig. “Iitta. Ig Yawe na ele daattep miagib anidmut amunu, ig na ele nug tituanta nai qakkak laa ig oh dim lamidkkunignu nai ɠagattag qeta akkunig am ena dabmemut. Anam amunu ig na ele tituanak inam hekkunignu oonig daatte. 29Haen na ihinig wanppa daame amu, ig nahip-ppa eheɗ laa ii hemut. Ig nahip-ppa kobol enaib heta, dimppa uug be, ig heut, na maɗoɗ ele ahan uɗime. Amu tituanak nai am inam. Ig nahipnu hemut amu, na ihinignu anamib hekkut,” aon appig. Ag amu awona, ag appig. “Gemu Yawe na itidtte,” appig. 30Ag anam aeg, Aisak nug ee okkai he, ag ee, le ele lawona, 31wagɗe buttuanab ag ahan, Pilistia, aria Aisak ele ag nai ɠagattag qa anak ahilag qakkona, Aisak a, ag eɗun maɗoɗ ele goppig.

32Ag ukkaegeg, Aisaknu maɗi nid ag uɗin, Aisak amegppa appig. “Ig le moɗ laa buuta, le anidmut,” aon appig. 33Anam aeg, Aisak nug onig Siba ataɗom amunu, ag gemu, ⌊nai imu yaak haenppa⌋ ele aab amu onig am Berseba daatte.

34Aisak bekka Esau nug maɗ 40 dayaya, nug Hit ah aɗit, laa Beri aɗeg onig Judit, laa Elon aɗeg onig Basemat, nug ah aɗit amu oh diiatom. 35Diiate amu, Aisak, Rebeka ele ahilahnu oolah guittak doopiɗ.

Currently Selected:

Genesis 26: NB

Highlight

Copy