Matyu 13

Yesus a na saga yago breiyqa yawo anjam tamo uŋgasari naŋgi minjrej

1Bati deqa Yesus a tal uratosiqa alile aisiq ya agu qalaq di awoej. 2Onaqa tamo uŋgasari tulaŋ gargekoba naŋgi bosib aqa areq di koroonabqa a sasalosiqa qobuŋ goge di awoej. Awesonaqa tamo uŋgasari kalil naŋgi alile di tigelesoqneb. 3Tigelesonabqa a na yawo anjam gargekoba minjroqnej. Ariya yawo anjam bei endegsi minjrej, “Niŋgi quiye. Tamo bei a gilsiqa aqa iŋgi wauq di saga yago breiyeleŋej. 4Breiynaqa saga yago qudei gam qalaq aieleŋeb. Onaqa qebari naŋgi bosib uyekriteb. 5Ariya saga yago qudei mandam lanjaq di aieleŋeb. Mandam di guma meniŋ ti. Gogeq di mandam kiñala. Deqa saga yago aieleŋosib urur oqoqujateb. 6Naŋgo jirim tulaŋ guma aiosai deqa seŋ oqsiq kaŋkaŋonaqa naŋgi laosib moreŋeb. 7Ariya saga yago qudei sil luwit ambleq di aieleŋeb. Dena oqeb qaji sil luwit na dego dauryosiq oqsiq kabutnjrnaq geitosai. 8Ariya saga yago qudei mol mandam boledamuq di aieb. Di aisib oqoboledamuysib gei tulaŋ gargekoba ateleŋeb. Qudei 100. Qudei 60. Qudei 30. 9Tamo a dabkala ti sqas di a ijo anjam endi geregere quem.”

Yesus a kiyaqa tamo uŋgasari naŋgi yawo anjam segi minjroqnej?

10Onaqa Yesus aqa aŋgro naŋgi aqa yawo anjam di qusibqa naŋgi aqa areq bosib nenemyeb, “Ni kiyaqa tamo uŋgasari naŋgi yawo anjam segi minjreqnum? Ni utru babtosaieqnum.” 11Onaqa Yesus na kamba minjrej, “Qotei a tamo uŋgasari naŋgo Mandor Koba sosiq naŋgi taqatnjreqnu. Anjam di aqa utru uliejunu. Di e na babtitqa ijo aŋgro niŋgi segi utru qalieqab. Ariya Qotei na tamo uŋgasari naŋgi di yawo anjam aqa utru osornjrqasai. 12Tamo a powo ti sqas di Qotei na powo olo yimqa a powo koba oqas. Ariya tamo a powo ti sqasai di powo kiñala aqaq di unu qaji di Qotei na olo yaiyimqa a laŋa sqas. 13Utru deqa e na tamo uŋgasari naŋgi yawo anjam segi minjroqnqai. Yimqa naŋgi ŋam atoqnsib ijo kumbra laŋa unoqnsib utru poinjrqasai. Naŋgo dabkala na ijo anjam laŋa quoqnsib di dego utru poinjrqasai. 14Naŋgi degsib sqab deqa anjam bei Qotei aqa medabu o tamo Aisaia nami marej qaji di aqa damu brantqas. A endegsi marej, ‘Niŋgi bati gargekoba ijo anjam quoqnsib utru poiŋgwasai. Nuŋgo ŋamdamu na bati gargekoba ijo kumbra unoqnsib di dego utru poiŋgwasai. 15Tamo uŋgasari di naŋgo areqalo geteŋnjrejunu. Naŋgo dabkala na ijo anjam quqwajqa asginjreqnu. Naŋgi ŋam bruŋejunub. Deqa naŋgo ŋamdamu na ijo kumbra unqasai. Naŋgo dabkala na ijo anjam qusib aqa utru poinjrqasai. Naŋgi are bulyosib ijoq babqa e na naŋgi boletnjrqasai dego.’ Qotei a nami degsi marej.

16“Ariya niŋgi ijo segi aŋgro unub deqa niŋgi tulaŋ areboleboleiŋgem. Di kiyaqa? Nuŋgo ŋamdamu na ijo kumbra uneqnub. Nuŋgo dabkala na ijo anjam queqnub. 17Niŋgi quiye. E bole merŋgwai. Nami Qotei aqa medabu o qaji tamo naŋgi ti tamo naŋgi kumbra bole bole yoqneb qaji naŋgi ti tulaŋ gargekoba kumbra niŋgi bini uneqnub qaji di unqajqa are koba soqnej. Ariya naŋgi unosaioqneb. Anjam niŋgi bini queqnub qaji di dego naŋgi quqwajqa are koba soqnej. Ariya naŋgi quosaioqneb.”

Yesus a na sago yago qa yawo anjam aqa utru babtej

18Osiqa Yesus a olo anjam endegsi minjrej, “Saga yago qa yawo anjam maronum di aqa utru e na babtitqa niŋgi quiye. 19Saga yago qudei gam qalaq ainabqa qebari naŋgi bosib uyekriteb qaji di aqa utru endegsi unu. Qotei laŋ qureq di unu qaji a tamo uŋgasari naŋgo Mandor Koba sosiq naŋgi taqatnjreqnu. Anjam di tamo qudei naŋgi qusib naŋgo are miligiq di esoqnibqa ariya naŋgi anjam di aqa utru poinjrosaiamqa Satan a bosim anjam Qotei na naŋgo are miligiq di atej qaji di olo yainjrqas. 20Saga yago qudei mandam lanjaq di aieb qaji di aqa utru endegsi unu. Tamo qudei naŋgi Qotei aqa anjam qusib tulaŋ areboleboleinjrimqa anjam di oqujatosib naŋgo areq atqab. 21Ariya anjam di naŋgo are miligiq tulaŋ guma aiosai. Deqa naŋgi sokiñalayibqa bunuqna Qotei aqa anjam gotraŋyo qaji tamo qudei naŋgi bosib naŋgi gulube enjrsib ugeugeinjrqab. Yimqa naŋgo areqalo Yesus qa siŋgilateqnub qaji di naŋgi olo ulontqab. 22Saga yago qudei sil luwit ambleq aieb qaji di aqa utru endegsi unu. Tamo qudei naŋgi Qotei aqa anjam qusibqa naŋgo areqalo miligiq di esoqnibqa ariya bunuqna naŋgi olo mandam qa iŋgi iŋgi qa are koba qaloqnsibqa silali koba oqnqajqa are prugnjroqnqas. Yimqa naŋgo areqalo dena naŋgi wala walainjrsim Qotei aqa anjam naŋgo are miligiq di tentimqa di loumqas. Deqa a gei boletosai. 23Ariya saga yago qudei mol mandam boledamuq di aieb qaji di aqa utru endegsi unu. Tamo qudei naŋgi Qotei aqa anjam qusib geregere poinjrimqa naŋgo are miligiq di siŋgilatesqab. Deqa Qotei aqa anjam di naŋgo are miligiq di saga bul utru segi segi boleosim tulaŋ kobaqas. Qudei 100. Qudei 60. Qudei 30.”

Pilagiŋ yago breiyqajqa yawo anjam

24Yesus a na naŋgi yawo anjam degsi minjrsiqa olo yawo anjam bei endegsi minjrej, “Qotei laŋ qureq di unu qaji a tamo uŋgasari naŋgo Mandor Koba sosiq naŋgi taqatnjreqnu. Kumbra di tamo bei a gilsiqa aqa iŋgi wauq di wit yago yageleŋej dego kere. 25Wit yago yageleŋonaqa qolo tamo kalil ŋereŋesonabqa jeu tamo bei na bosiqa wit yago ambleq dia pilagiŋ yago dego breiyej. Breiysiq ulaŋej. 26Ariya bunuqna wit oqsib geiteleŋonabqa pilagiŋ na dego dauryosiq oqej. 27Deqa wau tamo naŋgi na bosib unsibqa wau lanja minjeb, ‘O Tamo Koba, ni wit yago pilagiŋ ti turtsi yagem e? Ni une. Wit oqsib geitonubqa pilagiŋ dego daurysi oqonub.’

28“Onaqa wau lanja na kamba minjrej, ‘Jeu tamo bei na bosiq pilagiŋ yago breiyej.’ Degsi minjrnaqa wau tamo naŋgi na minjeb, ‘O Tamo Koba, ni na marimqa iga pilagiŋ di otoreleŋqom.’ 29Onaqa minjrej, ‘Niŋgi pilagiŋ otoraib. Niŋgi otorqab di wit ti turtosib otoro uge. 30Deqa niŋgi uratib soqneb. Wit ti pilagiŋ ti koba na oqsib geiteleŋabqa e na ijo wau tamo naŋgi minjrqai, “Niŋgi pilagiŋ otorosib ruwoeleŋosib ŋamyuoq di koitiye. Ariya niŋgi wit osib ijo talq di ateleŋiye.” ’”

Sis yago qa yawo anjam

31Yesus a na naŋgi yawo anjam degsi minjrsiq koboonaqa olo yawo anjam bei endegsi minjrej, “Qotei laŋ qureq di unu qaji a tamo uŋgasari naŋgo Mandor Koba sosiq naŋgi taqatnjreqnu. Kumbra di tamo bei na sis yago osiq aqa wauq di yagej dego kere. 32Sis yago naŋgi tulaŋ kiñilala qas yago bul. Iŋgi iŋgi qudei naŋgo yago kokba yala. Sis yago naŋgi tulaŋ kiñilala. Ariya tamo bei na sis yago osiq aqa wauq di yagonaqa bunuqna a oqsiq tulaŋ kobaqujaej. Osiqa ŋam qudei tulaŋ buŋnjrsiq dani kokba ateleŋej. Onaqa qebari naŋgi bosib aqa daniq dia simi ateleŋeb.”

Bem tiyeqnu qaji sum qa yawo anjam

33Osiqa olo yawo anjam bei endegsi minjrej, “Qotei laŋ qureq di unu qaji a tamo uŋgasari naŋgo Mandor Koba sosiq naŋgi taqatnjreqnu. Kumbra di bem tiyeqnu qaji sum bul. Uŋa bei a bem tiyeqnu qaji sum kiñala osiqa bem sum laŋaj ti turtsiq web kobaqujaq dia bulyonaqa bem kalil tiyekritej.”

Yesus a na tamo uŋgasari naŋgi yawo anjam segi minjroqnej

34Yesus a na tamo uŋgasari naŋgi yawo anjam gargekoba deqaji minjroqnej. A anjam bei minjrosaioqnej. Yawo anjam segi minjroqnej. 35A kumbra di yej deqa anjam bei Qotei aqa medabu o tamo bei nami marej qaji di aqa damu brantej. A endegsi marej,

“E na niŋgi yawo anjam merŋgoqnqai.

Tulaŋ nami yawo anjam di aqa damu uliesoqnej.

Sosi sosiq agi bini uliejunu.

Deqa yawo anjam aqa damu di e na boleq atsiy niŋgi saiŋgwai.”

Pilagiŋ qa yawo anjam aqa utru

36Ariya Yesus a na tamo uŋgasari naŋgi uratnjrsiqa tal gogetsi sonaqa aqa aŋgro naŋgi aqa areq bosib minjeb, “O Tamo Koba, ni na pilagiŋ qa yawo anjam di utru geregere plaltsim merge.”

37Onaqa Yesus na minjrej, “Tamo wit yagej qaji di agi e segi. E Tamo Aŋgro. 38Wit wau di agi mandam endi. Wit yago di agi tamo uŋgasari naŋgi Qotei na taqatnjreqnu qaji. Ariya pilagiŋ yago di Satan aqa segi tamo uŋgasari naŋgi. 39Jeu tamo pilagiŋ yago breiyej qaji di Satan. Wit geiteleŋo bati di agi diŋo bati. Ariya wau tamo naŋgi wit otoreleŋeb qaji di agi laŋ aŋgro naŋgi. 40Deqa niŋgi quiye. Wau tamo naŋgi bosib pilagiŋ otorosib ŋamyuoq di koiteleŋeb qaji naŋgo utru endegsi merŋgwai. Diŋo batiamqa laŋ aŋgro naŋgi degyqab. 41Bati di e Tamo Aŋgro na ijo laŋ aŋgro naŋgi qariŋnjritqa aisib iŋgi uge uge kalil tamo naŋgo areqalo ugetetnjreqnub qaji naŋgi ti tamo kalil kumbra uge uge yeqnub qaji naŋgi ti pilagiŋ bul breinjrqab. Deqa Qotei na naŋgi olo taqatnjrqasai. 42Naŋgi breinjrib ŋamyuo kobaq aisib dia akamkobayoqnsib pailoqnsib naŋgo jaqatiŋ qa qalagei anjam atoqnqas. 43Ariya bati deqa tamo uŋgasari kumbra bole bole yeqnub qaji naŋgo Abu Qotei na naŋgi taqatnjrsim naŋgo Mandor Koba sqas. Deqa naŋgi seŋ bul tulaŋ suwaŋesqab. Tamo a dabkala ti sqas di a ijo anjam endi geregere quem.”

Silali osib subq di ulitqajqa yawo anjam

44Osiqa Yesus a olo yawo anjam bei endegsi minjrej, “Qotei laŋ qureq di unu qaji a tamo uŋgasari naŋgo Mandor Koba sosiq naŋgi taqatnjreqnu. Kumbra di tamo qudei naŋgi na silali kobaquja osib ŋam moŋgum miligiq di atsib nañu agu beiq di sub bogsib sub miligiq di uliteb dego kere. Onaqa tamo bei na bosiq ŋam moŋgum di itosiq tulaŋ areboleboleiyej. Deqa a ŋam moŋgum di olo subq di mororyosiq gilsiq aqa iŋgi iŋgi kalil qariŋyosiq dena silali osiq nañu agu di awaiyej.”

Kolilei qa yawo anjam

45Osiqa Yesus a olo anjam endegsi minjrej, “E olo yawo anjam bei endegsi merŋgwai. Qotei laŋ qureq di unu qaji a tamo uŋgasari naŋgo Mandor Koba sosiq naŋgi taqatnjreqnu. Kumbra di silali wauo qaji tamo bei a kolilei qa ŋamoqnej dego kere. 46A gilsiq ŋamosiq kolilei tulaŋ boledamu itosiq olo puluosi bosiq aqa iŋgi iŋgi kalil qariŋyosiq dena silali osiq kolilei di awaiyej.”

Kakaŋ waiyqa yawo anjam

47Osiqa Yesus a olo anjam endegsi minjrej, “E olo yawo anjam bei merŋgwai. Qotei laŋ qureq di unu qaji a tamo uŋgasari naŋgo Mandor Koba sosiq naŋgi taqatnjreqnu. Kumbra di tamo naŋgi yuwalq di kakaŋ waiyosib qe gargekoba utru segi segi eleŋqab dego kere. 48Kakaŋ maqamqa tamo naŋgi na titosib bosib ululq di goge atsib awoosib qe kalil peginjrqab. Qe bole bole gumbaq di jigeleŋqab. Ariya qe uge uge uratosib qalaq di breinjrqab. 49-50Kumbra deqaji diŋo bati qa brantqas. Laŋ aŋgro naŋgi bosib tamo bole bole naŋgo ambleq dena tamo uge uge naŋgi eleŋosib breinjribqa ŋamyuoq aiqab. Ŋamyuo koba dia naŋgi akamkobayoqnsib pailoqnsib naŋgo jaqatiŋ qa qalagei anjam atoqnqas.”

51Yesus a na aqa aŋgro naŋgi anjam degsi minjrej. Osiqa nenemnjrej, “Yawo anjam kalil merŋgonum qaji endi niŋgi utru poiŋgwo e?” Onaqa naŋgi na minjeb, “Od.” 52Onaqa Yesus na olo minjrej, “Qotei laŋ qureq di unu qaji a tamo uŋgasari naŋgo Mandor Koba sosiq naŋgi taqatnjreqnu. Anjam di dal anjam qalie tamo qudei naŋgi poinjreqnu. Poinjreqnu qaji naŋgi tal aqa abu bul unub. Deqa naŋgi naŋgo talq dena ñoro bunuj ti ñoro namij ti eleŋoqnsib oqeq ateqnub.”

Yesus aqa qure utru naŋgi aqa anjam quetosai

53Yesus a yawo anjam di kalil marsiq koboonaqa a sawa di uratej. 54Osiqa aqa segi qure utruq gilej. Gilsiq di sonaqa yori batiej. Deqa a Juda naŋgo Qotei tal miligiq gilsiqa tamo uŋgasari gargekoba sonabqa tigelosiqa Qotei aqa anjam palontosiq minjroqnej. Minjreqnaqa tamo uŋgasari naŋgi aqa anjam qusibqa naŋgi tulaŋ prugeleŋosib maroqneb, “Yesus a powo qabe na osiqa anjam siŋgila endeqaji palontosiq mergeqnu? A kiersim maŋwa endeqaji babteleŋeqnu? 55Iga qalie, aqa siqali a laŋa tal gereiyo qaji tamo. Aqa aniqali Maria. A Jems na Josep na Saimon na Judas na naŋgo was. 56Aqa nawi kalil naŋgi agi iga koba na endi unum. Deqa a kiersim maŋwa endeqaji babteleŋeqnu?” 57Naŋgi degsib yomu anjam marsib Yesus qa ugeeb. Onaqa a na minjrej, “Qotei aqa medabu o qaji tamo bei aqa segi qure utruq gilsim anjam minjroqnqas di naŋgi aqa anjam quetqa asginjrqas. Deqa a ñam saiqoji sqas. Aqa segi talq dia dego a ñam saiqoji sqas. Ariya a qure bei beiq giloqnsim anjam minjroqnqas di naŋgi aqa anjam quetoqnsib aqa ñam soqtoqnqab.” 58Yesus a na naŋgi degsi minjrej. Osiqa aqa segi qure utruq dia a maŋwa gargekoba yosai. Di kiyaqa? Naŋgi a qa naŋgo areqalo siŋgilatosai deqa.

Currently Selected:

Matyu 13: bojNT

Highlight

Copy