MATTHEU 22

Naoyha Poipume Ngaolep

(Lk 14.15-24)

1 # Lk 14.16-24. Jesuwe üne-o ngaoleppu me imante i: 2“Wangdang ahngching ahngpa jawe I ha jingne naoyha poipu mo tümpu ja lenang. 3#Mt 21.34.Iye aoyin mo jingne nanpheng yangki iman nyiklak jingne yoi shaoshanpalan shontei, hüyangpoi iman yepeihu. 4Üne-o Iye ülao shaoshanpalan shonne teiye hüke i, ‘Aoyin nanpheng yangki imante itüoh, hüowü, taowe hahying tümme shoteki, Ü-mahu üpong hüyange tamme angpu yinmok shenüt pulan toiteki, hüyange üshei tümteki. Naoyha poi mo te jemkei.’ 5Hüyangpoi iman-e imante mong yepha hüyange yoi yoi lamte yanmah, sheja Inok kahte, hüyange ülao ja pheeileihpu lamte yanmah. 6Hüyange towe ngohpalan-e I shaoshanpalan pho, shette tee hüyange toi. 7Ahngpa yeonge mongmeng; Iye yoijing nyahponglan shontei, toipalan mahne tam, hüyange iman chingnyu vünme jakke win. 8Tüophei me Iye yoi shaoshanpalante i, ‘Naoyha poipu mo tümyangki, hüyangpoi aoyin nanpheng yangki iman yewang. 9Tüokhei numan lampong üshei yete taitüoh, hüyange numan-e kahta aoshin ngelakei tüolan lili naoyha poipu mo te nyiktüoh.’ 10#Mt 13.47.Shaoshanpalan lampong üshei yete yan, hüyange iman-e tüopu khongkümpu, ümeng hüyange ümei woipei; hüyange naoyha poipu nok yinpalan-e maa.

11“Hüpoi aope peipu yinpalante leine Ahngpa pei, hüyange kahta ja naoyha poipu o yeyahpe nge. 12#Mt 20.13; 26.50.Iye Ite i, ‘Shümpa, naoyha poipu o yeyahpe nang tüome hangke ongpu?’ Hüyangpoi I hango yengao okpe ngoh. 13#Mt 8.12; 13.42,50; 24.51; 25.30; Lk 13.28.Tüophei me shaoshanpalante Ahngpawe i, ‘I ya hei yak me shatüoh, hüyange I nokshao wangnyak me shüptüoh.’ Tüome shappu hüyange fa ngaopu ngohlak; 14hangjingne iman maawe nyiknang, hüyangpoi üjingha hei lenang.”

Kahngin Phapu Tongpu

(Mk 12.13-17; Lk 20.20-26)

15 # Mk 12.13-17; Lk 20.20-26. #Mk 3.6; 8.15.Tüophei me Phariseelan tai hüyange I ngaotün me hangke litamlak tüopa kon yam. 16Iman-e yoi pinlan Herod pinlan phei jamme I tangte shon, hüyange iman-e i, “Konnyüopa, nanga üting she, hüyange ütingpa me Kahwang lam nyüonang, hüyange aote-o hangko yeteih, hangjingne nange kahtalan sheta yelei she toman-e shingnang. 17Tüokhei nange hangke teih, tomante itehu? Kaisar te kahngin phalak toman shupu jeya?” 18Hüyangpoi iman-e hanghe teih Jesuwe shing hüyange i, “Jutok meipalan, hangne numan-e üte toknangki?” 19Shaipu kahngin üte hüopha. Iman-e Ite adholi ja yahpei; 20hüyange Iye imante i, “Hatüo ao min nyan hüyange ao lenangki?” 21#Rom 13.7.Iman-e jan, “Kaisar.” Tüophei me Iye imante i, “Hanghepa Kaisar jing Kaisarte phatüoh, hüyange hanghe Kahwang jing Kahwangte phatüoh.” 22Aope iman-e tüopa jai iman yashan, hüyange iman-e I tüohyange yanne tai.

Lipu Mepu Yange Yepujeng Tongpu

(Mk 12.18-27; Lk 20.27-40)

23 # Mk 12.18-27; Lk 20.27-38. #Lam 4.1-2; 23.6-10.Tüonyih Sadduceelan aoyinne yange yepu yenangja she i, I tangte pei hüyange Ite tonge i, 24#Hin 25.5.“Konnyüopa, Mosawe hüke i, ‘Kahta jawe hayim yetüohpe lima-a, Iye tüopu sheko Inaowe yahlak, hüyange Ijei üli ngaiye tamlak.’ 25Sha-a toman yo me jeihei nao nyit ngoh yangki. Jeiyongpawe yah, hüyange üli yetüohpe li; Iye yoi sheko Inao me tüoh. 26Hükemuh ni shepupa hüyange lüm shepupa Inao ni, hüyange naolan nyit shepupa ngoiye hükemuh yah hüyange liye küm. 27Üküm ne tüopa shekonyu-o li. 28Tüokhei, yange yewante, shekonyuwa naoshe nyit yo me aohipa sheko ne menglak shi? Hangjingne moilanne yha iman sheko ne yah.”

29Jesuwe imante janne i, “Numan-e laingao yejema-a Kahwang üngan yeshingpu kaiye numan ünyong yete tainang. 30Hangjingne nishe yange yewante kahtalan-e naoyha yepoilak yejema-a toitaine yetamlak, hüyangpoi wangdang me iman wangdang shongmokpalan kih ngohlak. 31Hüyangpoi, litepulan yange yelak jeng, Kahwange numante hanghe i, iye yelei a? 32#Woi 3.6.‘Tao Abraham Kahwang, Isaac Kahwang hüyange Jacob Kahwang!’ I lipu Kahwang ja yeje hüyangpoi üyin Kahwang.” 33#Mt 7.28.Aope ükhonge tüopa jai Iye nyüopu konte iman üshei yashan.

Ngaokeng Phapu Üyong

(Mk 12.28-34; Lk 10.25-28)

34 # Mk 12.28-34; Lk 20.39-40; 10.25-28. Hüpoi aope Jesuwe Sadduceelan ngao lakne tam she Phariseelan-e jai, iman jamshe pei. 35#Lk 7.30; 11.45; 14.3.Iman yo mepu ngaokeng nyüopa jawe, Ite hatüo ngaophei tokke i, 36“Konnyüopa, ngaokeng yo me, Üjengpa ngaokeng hanghepa shi?” 37#Hin 6.5.Iye Ite i, “Nange nang Youngwanpa Kahwangte nang mongjang üsheiye, nang yaha üsheiye, hüyange nang kenmong üsheiye kentüoh. 38Üjengpa hüyange üwangpa ngaokeng hatüo üja. 39#Lev 19.18; Mt 19.19; Gal 5.14; Rom 13.9; Jas 2.8.Ni shepupa ngaokeng Üjengpa hatüo: Nange nang yupite nangkih kenyah. 40Tüopa ngaokeng ni me ngaokeng hüyange hipalan khongkümpu yafün lingnang.”

Messiah Jeng Tongpu

(Mk 12.35-37; Lk 20.41-44)

41 # Mk 12.35-37; Lk 20.41-44. Aope Phariseelan jamshe jemme ngoh Jesuwe imante tong. 42“Messiah jeng numan-e hangke teih nangki? I ao shi?” Iman-e Ite i, “David üha.” 43Iye imante i, “Hümma-a hangke, Yaha woipu phei David-e, Ite Youngwanpa she nyik-e hüke i.

44 # Tüo 110.1; Lam 2.34-35; Heb 1.13; 10.13. “ ‘Youngwanpawe Ü- Youngwanpa te i, Taowe nang wepalan nang yaphang me man ang man ang Ü yakjah yeme shot tüoh.’

45Davidte Ite Youngwanpa she nyikma-a, I hangke I ha ne menglak?” 46#Mk 12.34; Lk 20.40.Aowe-o Ite ngaopha ja nehoi yejan, hüyange tüo nyih me peiye aowe-o Ite ngao yamlak mongme yetom.

Currently Selected:

MATTHEU 22: KONYBSI

Highlight

Copy