KAHTAMYENGHAN 7
7
Muleam Üyong
1Tüophei me Youngwanpawe Noah te i, “Nang hüyange nenok noksa khongkümpu ghonu te ongtüoh; hangjingne tüopa jin me khakshupuwa nang ja shing she Taowe ngeteki. 2Nang phei jaoshepu yinmok ülam lili mepu üpi hei üpong nishep nyitpong yahtüoh; hüyange yejao yeshapu yinmoklan mepu nipong üpong hei üpi; 3hüyange wang awhalan mepu-o nishep nyit pong, üpong hei üpi, kahtoknyu üshei me üli üyin anglak jingne yahtüoh. 4Tüolan nyih nyit shepupa me Taowe nyih deli hüyange pha deli kahtoknyu me wai keine tamlak; hüyange üyin ngohpu üshei, hangheyin Taowe lingengai, Taowe kahtoknyu mepu mah-e tamlak.” 5Hüyange Youngwanpawe Ite ngao phapu kih-e Noah-e khongkümpu ling.
6Aope kahtoknyu te yeng muleam pei Noah wangpeng gho wok lwngmei ne ngoh yangki. 7#Mt 24.38; Lk 17.27.Hüyange Noah hei I halan, I sheko hei nyemnyalan yeng muleam pu mepu yinlak jingne I phei ghonu te ong. 8Üjao yinmok yo mepu, hüyange yejao yeshapu yinmok yo mepu hüyange awhalan yo mepu, hüyange kahtok me leh-e kempu üshei mepu, 9nini, üpong hei üpi, Kahwange Noahte ngao phapu kih-e Noah phei ghonu te ong. 10Hüyange nyih nyit linyang phei me kahtoknyu te muleam.
11Noah jin hipak wangpeng gho wok, leat ni shepupa, nyih pen me nyit shepupa me, tüonyih yengpeiwo ülu-üyonglan phüppe ngai, hüyange wang tawolan ep. 12Kahtok te nyih deli hüyange pha deli wai kei. 13Tüonyih muh Noah hüyange I halan-Shem, Ham hüyange Japheth, hüyange Noah sheko, hüyange iman phei nyemnyalan lüm-a ghonu te ong; 14iman hüyange phao yinmok üshei ülam lili, hüyange ching yinmok üshei ülam lili, hüyange chahwan me leh-e kempu üshei ülam lili, hüyange awhalan üshei ülam lili, üyang nyimpu üshei ülam lili, 15üyin lüohe ngohpu mei üshei nini iman Noah ghonu te ong. 16Hüyange iman ongpulan, mei üshei üpong hei üpi Kahwange Ite ngaophapu kih-e ümongte ong, hüyange Youngwanpawe I-a ümong me küp.
17Muleampu chahwannyu me nyih deli ngoh; hüyange yeng-a loi-e ngai hüyange ghonu-a phoonge in, hüyange hatüowa chahwan mepu daowe nowe in. 18Hüyange yeng loishe yonge chahwannyu tangme ngai, hüyange ghonu-a yeng tangme phoong. 19Hüyange chahwannyu dangme yeng loishe yonge ngaipuwe wangphang me ngohpu kahtang üdaolan khongkümpute lüm. 20Kahtanglan kaiye ongpu yeng yakkong pen me nga luwe#kahtok mepu yeng nyei-e ongpu tüolante lüm. 21Hüyange chahwan tangme powe kempu yinmok mei üshei, awhalan, ching yinmoklan, phao yinmoklan, chahwan tangme shom-e kempu üshei li; 22hüke kahmük üwan tangme ngohpu nateang me lüohe üyin üshei li. 23Iye kahtok me ngohpu üyin üshei mahne tam, kahta hei yinmoklan hüyange shom-e kempu hei wang awhalan üshei; iman-a chahwan tang mepu mahtam. Noah hüyange Iphei jamshe ghonute ongpulan shaha towe tüoh. 24Hüyange chahwan tangme yeng muleampu nyih ghoja denga ngoi-e ngohyangki.
Currently Selected:
KAHTAMYENGHAN 7: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.