KAHTAMYENGHAN 35

Bethel Te Jacob Leihye

1Kahwange Jacob te i, “Bethel te yayonge taitüoh, hüyange tüoken me chingnyoi tüoh. Tüoken me Tao, Kahwang aohipa nangjei Esau sheshao mepu nang phette taiwante nang tangte ngaiyangki, tüopate wümjong ja lingtüoh.”

2Tüokhei Jacob-e yoi noksalan hüyange I phei ngohpu khongkümpu te i, “Numan yo me ngohpu mihjat kahwanglan phei yantüoh, numan nying nyingke jao shayah, hüyange inkhek jeilei yah. 3Teman tüo mepu yayonghah hüyange Bethel te tailak, ümeken me taowe Kahwang aowe tao shaoshi wante üte jam pong hüyange aohipa ümeken te tao tailakei tüoken üshei me ü-phei ngoh, Ite taowe wümjong ja linge tamlak.” 4Tüokhei iman-e Jacob te iman yak me ngohpu mih jat kahwanglan üshei hüyange iman na me ngohpu naju shaiye pha. Hüyange Jacob-e tüolan-a Shekhem ü-o me ngohpu longkhampee phang me muwe tüoh.

5Aope Jacob hüyange I hayimlan yayonglak jingne ükong wang, neikonne ngohpu chingshao kahtalan khongkümpu te Kahwang mepu nyampu üyong ja peine tam, hüyange chingshao kahtalan-e imante jange yewoi. 6Jacob yoi kahtalan khongkümpu phei Kanan kahtok me ngohpu Luz, hanghepa te shaawan Bethel she nyik tüote peingoi. 7Hüyange Iye tüome khümjing ja lingyange, tüopa kahmükte El-bethel she nyik; hangjingne Iye Ijei mepu phette taiwante tüoken me Kahwang I phei ütahte ngai. 8Hüyange Rebekah te paonyu Deborah li, hüyange yha Bethel heye phang me ngohpu longkham pejüng me mu. Tüokhei tüopa te “Shappe yoongpu Longkhampee”#Shapyoongpu Longkhampee yejema-a Allon-bacuth she min.

9Aope Jacob Mesopotamia#Paddan-aram she-o tüolak. mepu leihye, Kahwange nishe I tangte ngai, hüyange Ite moiman tam. 10Kahwange Ite i, “Nang minna Jacob she ngohyangki; hüpoi sha-a me peiye nangte-a Israel she minnang. Tüokhei Kahwange I min Israel she nyik. 11Hüyange hayimlan maawe ngaitüoh; jatlan nang mepu jalunlak, hüyange nanga ahnglan pajeiyong ne menglak. 12Taowe hanghepa kahmük Abraham hüyange Isaac nite pha, nangte phanang, hüyange taowe hatüowa üne-o nang phei me nangjing huhayim lante phalak.” 13Tüophei me Kahwang I phei ngao ngohpu taimah. 14Jacob-e I phei Kahwange ngaopu nyoi me teihtüolak jingne long shongnyu ja yonge ang; hüyange tüopa tangme Iye wuwüngti hei olive minnga shokke jaowe tam. 15Tüokhei Jacob-e tüopa nyoite Bethel she min.

Benjamin Puhpu Hüyange Rachel Lipu

16Jacob hüyange Inok noksawe Bethel tüoh, hüyange aope iman üne-o Ephrath ngoine ütenja nanjing ngohwante, nao wangngai ngelak jingne Rachel te hipak ngoipei, hüyange yha yeonge shaoshi. 17Aope yhate dak ongpu loishe yemeipe tayapeih, naopainyuwe yhate i, “Rachel, nyamme tahteih; hatüowa üne-o naoshe ja ngaiküki.” 18Hüpoi yha nyai-e ta hüyange nahate Benoni she min pha-e tüohyange yha lüomah; hüpoi Ipawe nao min-a Benjamin she nyik.

19Aope Rachel li hüyange Ephrath te taipu lamnah me yha mang mu. 20Hüyange Jacob-e yha mangjong ken me teihtüopu longja yonge tam; hüyange tenyih ngoiye tüopa-a Rachel mangjong long she ngoh nang. 21Jacob yelakpe yayonge tai, hüyange Eder daonok jayekao me yoi lakjing nok ling.

Jacob Hayimlan

(1 Put 2.1-2)

22Aope Jacob (Israel) tüopa kahtok me nyoi ngoh yapeih, Bilhah, Ipa phongphe nyulan yo me ja phei Reubenne toimeng ling. Jacob-e tüopa jeng jai, hüyange yeonge mongshih ngai.

Sha-a Jacob-e Iha pen me ni-a hüke tüoyangki. 23Leah kaiye puhtampulan: Reuben (Jacob-e üwangne puhpu ha) Simeon, Levi, Judah, Issakhar, hüyange Zebulun. 24Rachel hayimlan, Joseph hei Benjamin. 25Rachel shaoshannyu Bilhah hayim: Dan hei Naphtali. 26Leah shaoshannyu Zilpah hayim: Gad hei Asher. Tüolan-a Jacob hayim, aoyin Mesopotamia kahmük me Ite puhtam.

Isaac Lipu

27Hüyange Jacob, Ipa Isaac tangte Hebron ü-o me ümeken me Abraham hei Isaac nyoingoh, tüoken Mamre te tai. 28Sha-a Isaac nyupuh wangpeng gho ja phei me detet ngoh yangki. 29Hüyange puyong wupa ne menge li; hüyange Iha Esau hei Jacob niye I mang mu.

Currently Selected:

KAHTAMYENGHAN 35: KONYBSI

Highlight

Copy