KAHTAMYENGHAN 29

Laban Nokte Jacob Ngoi

1Tüophei me Jacob yelakpe yoi lamme kemme tai, hüyange wanghe ongjing mepu kahtalan kahtok te pei. 2Hüyange lye nganne leiwante, kahjee me yengnung ja, hüyange tüome nyee-ükhong lüm tüopa ü-o me lamyange ngoh. Hangjingne tüopa yengnung mepu iman-e nyee ükhong te yeng yingne tam. Hüyange yengnung üshapong mepu longa yeonge khaowe ngoh. 3Hüyange aope tüome nyee ükhong khongkümpu jem, nyee yompalan-e longa yengnung mepu nowe yahyange, nyeelante yeng yingne tam-e, longa nishe yoi ngohpu yengnung üsha pongme ang.

4Jacob-e nyee yompalante i, “Üjei hei naolan, numan ü-mepu peipu?” Iman-e jan, “Toman Haran mepu.”

5Iye tong, “Numan-e Nahor üha Laban shingya?”

Iman-e jan, “Toman-e I shingnang.”

6Iye iman phei ngaowe i, “I meiye ngohya?” Iman-e i, “Meiye ngohnang ja, hüyange leitüoh, Iha naoyhanyu Rachel nyeelan phei peiküpu!”

7Iye i, “Leitüoh, sha-a nyih ning ne ngohnang, yinmoklan ünjemlak hipak manngoi; Nyeehalante yeng yingyange heei uh ne muh yahtei tüoh.”

8Hüpoi iman-e i, “Nyeehalan khongkümpu jamshe manjem manjem, hüyange yengnung mepu long nowe winyange nyeelante yeng manying manying toman-e ye-oklak.”

9Aope iman phei I yelakpe ngaowe ngoh, yhawe yomme ngohpu Ipa nyeelan phei Rachel peingoi. 10Aope Jacob-e Inyu Ijei Laban üha Rachel, Iküo nok nyeekhong phei nge, Jacob iman shongte wenne yengnung üsha mepu long nowe winne, Iküo Laban nyee ükhongte yeng yingne tam. 11Hüyange Jacob-e Rachel te omhüp, hüyange mongmei puwe ngao ngaiye shap. 12Jacob-e Rachel te i, “Taowa nangpa pheipu Rebekah üha.”

Hüwante yhawe phette wenne Ipate i. 13Aope Labanne yoi nao üha jeng ngaolan jai, Iye I pongte phette yuwe I me kenyange omhüp, hüyange lye yoi nokte woi in. Jacob-e Labante ngaolan khongkümpu i. 14Hüyange Labanne Ite i, “Ütingme nang ü-jat ü-li!” Hüyange Jacob I phei lekeng ja nyippe nyoi.

Jacob-e Rachel Hei Leah Ni Jingne Laban Shaoshan

15Hüwante Laban-e Jacobte i, “Nang üpheipu kheima she, nange jajang jawe ü-shaoshanlak a? Nange nanmee ne hanghe yahhu nangki?”

16Sha-a Laban üha naoyha ni ngoh; nyayongnyu min Leah, hüyange naolinyu min Rachel. 17Leah mük lahnyik lakpane ngoh, hüpoi Rachel naoyha meiye hüyange yahhukei-e ngoh.

18Jacob-e Rachel te ken, tüokhei Iye i, “Nange üte Rachel pha ne ima-a Taowe wangpeng nyit nang shao shanlakei.” 19Laban-e janne i, “Taowe yha eihate phaleima nangte phapupa shemei; ü-phei ngoh tüoh.” 20Tüokhei Jacob-e Rachel jingne wangpeng nyit shaoshan; tüoyangpoi I jingne tüopa hipak-a nyih üten ja linpu kih hei ling, hangjingne ima-a lye yhate yeonge ken.

21Tüophei me Jacob-e Labante i, “Ü-sheko üte yahkei, hangjingne tao yha tangte peilak nyih ngoiteki.” 22Tüokhei Labanne tüome ngohpu kahta khongkümpu jemne tamyange naoyha poipu mo hah. 23Hüpoi tüoya Rachel nanleiye Leah Jacob tangte peine tam, hüyange Jacob yhaphei shi. 24(Hüyange Labanne yoiha Leahte shaoshannyu ne yoi rhanyu Zilpah pha.) 25Hüyange napning leiwante nakshih, hatüowa Leah ne ngoh; hüyange Jacob-e Labante i, “Nange üte jonpu hatüowa hanghe shi? Taowe nang phei Rachel jingne shao yeshan a? Hangne nange üte lowelampu?” 26Laban-e janne i, “Nyayongnyu shaome naolinyu phawe teilak toman kahtok me wanglam yenang ja. 27Tüopa naoyha yahpu hat üshao ngoine tamtüoh, hüyange toman-e nangte Rachel yahpha ning; hanghepa jingne nange üne-o ü-phei wangpeng nyit shaoshan lak.”

28Jacob-e hüke monge tüopa hat sho ne tam; hüyange Labanne yoiha Rachel Jacob shekonyu ne Ite pha. 29(Hüyange Labanne yoiha Rachel te shaoshannyu ne yoi rhanyu Bilhah pha.) 30Tüokhei Jacob-e Rachel phei shi hüyange Iye Leah phei-a Rachel te ünyei ken, hüyange lye üne-o wangpeng nyit Laban shaoshan.

Jacobte Hayimlan Ngai

31Aope Leah phei-a Rachel te shekenpu Youngwanpawe nge Iye yha naonyoi eppe tam; hüpoi Rachel heelangne menge tam. 32Hüyange Leah püm yekengpe ngai, hüyange yhawe netan moija pai, hüyange yhawe Ite Reuben she min. Hangjingne yhawe i, “Youngwanpawe ü-shaoshi pute lei; sha-a pa-a ü-netanpawe üte kenkülak.” 33Yha üne-o nishe püm yekengpe ngai, hüyange netan moija pai; hüyange yhawe i, “Hangjingne üte nuteki she Youngwanpawe jai, lye üte hatüo netan naha-o phateki.” Hüyange yhawe I min Simeon she nyik. 34Üne-o yha püm yekengpe ngai, hüyange netanha ja puh; hüyange i, “Shaapa-a ü-netanpawe üte ünyei kenkülak, hangjingne taowe Ite netan naha lüm puhtam teki.” Tüokhei I min Levi she nyik. 35Hüyange üne-o yha püm yekengpe ngaiye, netan ja puh, hüyange yhawe i, “Tenyihpa-a taowe Youngwanpa min yongnang;” tüokhei yhawe I min Judah she nyik; tüophei me yhawe nao puhpu lak.

Currently Selected:

KAHTAMYENGHAN 29: KONYBSI

Highlight

Copy