KAHTAMYENGHAN 21

lsaac Puhpu

1Iye ngaoyangpu kih-e Youngwanpa Sarah dangte pei, hüyange Iye janyangpu kih-e Youngwanpawe Sarahte ling. 2Hüyange yha püm yekengpe ngai, hüyange Abrahamte Kahwange Ite ngaopu hipak me I wutei-e netanha puhtam. 3Abraham-e Ite Sarah kaiye puhtampu nahate Isaac she min, 4#Lam 7.8.hüyange aope Isaac nyih tet ngoi yapeih, Ite Kahwange ngaowe tampu kih-e Abraham-e Ite shokhüppe tam. 5Aope Ite Isaac puhtam yapeih, Abraham wangpeng gho ja lwngmei ne mengteiye ngoh yangki. 6Sarah-e i, “Kahwange üte mongmei hüyange nyipu peitam nang. Aoyinne tüopa jeng jailakei moilan-e ü-phei nyilak.” 7Hüyange yhawe jam i, “Sarahwe naha tamlak she Abraham te aowe ine no? Hünyi I wu te phei te taowe netanha ja puh tamnang.”

8Hüyange naha-a jong, hüyange düam hah pu lak; hüyange Isaac-e düam hahpu lakpu nyih me Abraham-e mo üyong ja tümme uhying yangki.

Hagar Hei Ishmael Ni Shonne Tei

9Hüpoi nyih japu hipak me Egypt sheko Hagar üha Ishmael, yhawe aohipa Abraham te puhtam, Sarah üha Isaac phei wonne ngoh. 10#Gal 4.30.Sarah-e tüopa ngeyange Abraham te i, “Tüopa rhanyu hüyange yha üha ni jange teitüoh. Tüopa sheko ühate, ü-ha Isaac-e tüolak nang jing mothlei meitam hango yepha tamlak.” 11Tüokaiye Abraham yeonge mongshangne tam, hangjingne Ishmael-o I ha ne muh ngoh. 12#Rom 9.7; Heb 11.18.Hüpoi Kahwange Abraham te i, “Naha jeng me hüyange nang rhanyu jeng me nang mong shange tah ngoh. Sarah-e nangte hangke i, hüke ling tüoh. Hangjingne Taowe nangte janpu nang huhayim lanna Isaac kaiye nange tüolak. 13Hüyange Taowe rhanyu üha kaiye-o hayimlan üngang phalak, tüokaiye iman-o jat ja ne menglak. Hangjingne I-o nangha muh.”

14Ünenap sheshong she Abraham-e Hagar te hahying ütam hüyange meisho nyekhok ja me yeng maawe tüm-e pha. Iye naha-a yha tok me puhne tamyange taine tam. Yha yayong hüyange Beersheba phaonyu jongme wa-e kem. 15Aope meisho nyekhok mepu yeng khongküm kümme yüoyapeih, yhawe naha-a phümtümp phang ja me ange tüoh; 16hüyange weanglah-han yüojing shin-e (yejema-a phak denga nanjing) jaiye taiye shot, yhawe yoi nying nying te i, “Üha lipu te taowe leiye ngohne yenün oklak yang.” Aope yha tüoken me I phei janhüowe shot, naha-a#Lai ütamme Inyu shap, she ngelak. üngwünne shap.

17Kahwange naha shappu jai, hüyange Kahwang shongmokpawe wangdang mepu Hagar te ngaowe i, “Nang hangte shangpu, Hagar? Tahnyam, hangjingne Kahwange naha shappu jaiteki. 18Yongtüoh wen-e naha loi yah-e nang yak me paiyah, hangjingne taowe I-a jatnyu ne ling tamlak.” 19Hüyange Kahwange yha mük eppetam, hüyange yhawe yeng ngohpu yengnungja nge; hüyange yha wenne meisho nyekhok maawe yeng shao hüyange naha te yingnetam. 20Hüyange Kahwang naha phei ngoh, hüyange naha jong; Iya wanwüng nyoi me jong hüyange Iya wenglah kepmanpa ne meng. 21Iya Paran wanwüng nyoi me nyoi, hüyange Inyu-e I sheko ne Egypt mepu yah pei.

Abraham Hei Abimelech Nipa Me Teijanpu

22Tüopa nyih hipak me yoi nyahpong woipa Phikol woiyange Abimelech pei hüyange Abraham te i, “Nange lingpu toi üshei me nang phei Kahwang ngoh nang. 23Tüokhei sha-a Kahwang sheshao me nange üte, ühayimlan te, yejema-a ü-huhayimlan te lowelamme yelinglak she jiengpu ja yahtüoh. Taowe nangte meimawe jonyangki, tüokhei üte, hüyange ümeken me nang nyoinang tüopa kahmükte-o meimawe jonlak she nange-o jantüoh.”

24Abraham-e i, “Taowe jannang.”

25Aope Abraham-e Abimelech shaoshanpalan-e yengnung nyieye yahpu jeng yemeipe ngao, 26Abimelech-e i, “Hatüo ao lingpu, taowe yeshing; nange-o üte tüopa jeng ye-i, hüyange taowe tüopa ngao jaipu tenyih üwangpa ngohnang.” 27Tüophei me Abraham-e nyee hei mahu ütam yah peiye Abimelech te pha, hüyange imniye teijanpu yah. 28Hüyange Abraham-e yoi nyee ükhong mepu nyeeha nyit yanne khatte ang. 29Hüyange Abimelech-e Abraham te tong, “Tüolan nyeeyhalan nyit, nange leye angpu tüote leppu hanghe shi?”

30Hüyange Abraham-e janne i, “Taowe tüopa yengnungshao she, üte saki phalak jingne, tüolan nyeeha nyit nange ü-yak mepu yah tepha.” 31#Kaht 26.33.Tüokhei tüopa nyoite Beersheba she nyik, hangjingne tüoken me imni moiniye jiengpu yah.

32Beersheba me iman-e tüopa teijanpu yahyang phei me, Abimelech hei Phikol ni Philistiate leih ye. 33Tüophei me Abraham-e Beersheba me tamarisk#Tamarisk-manna she minpu hahying ngainang she teihpu pee ja. pee dei, hüyange üküm yenangpu Kahwang, Youngwanpa te yoppe khüm. 34Hüyange Philistia me Abraham hipak laowe nyoi.

Currently Selected:

KAHTAMYENGHAN 21: KONYBSI

Highlight

Copy