KAHTAMYENGHAN 11
11
Babel Daonok
1Sha-a chahwannyu nopu me ngaolam ja hüyange ngao ja hei ngaopu ngoh yangki. 2Hüyange kahtalan heong yekao me kem taiwante, iman-e Shinar kahmük me kahjee ja nge, hüyange iman tüome nyoi. 3Hüyange iman hei imanpa me teingaowe i, “Kei, teman-e jaklong meimei-e jak hah;” hüyange iman-e long nanleiye jaklong yah, hüyange kümp (sham) nanleiye wüalüng yah. 4Tüophei me iman-e i, “Kei, teman nying nyingke chingnyu ja linghah, hüyange daonok wang ngoiye daowe weyange, hüyange teman jingne teman nying nyingke min ja anghah, hüke yelingma-a chahwannyu khongkümpu yete teman yankülak yang.”
5Hüyange Youngwanpawe kahta ühalanne lingpu chingnyu hüyange daonok leine pei. 6Hüyange Youngwanpawe i, “Leitüoh, iman jat ja, üne-o iman-e ngao ja hei ngao nang; sha-a iman-e hatüo toi linge hei wangnang; tüokhei iman jingne iman hanghe linglak jingne mong yapheih, iman-e ye-oklak hango yengoh külak yang. 7Kei, teman yu hah, hüyange iman pa me ngao tei yeshing oklak ne ngaolam püohne tamhah.” 8Hüke Youngwanpawe iman tüoken mepu chahwannyu üshei yete yanne tam, hüyange iman-e chingnyu lingpuwa lakke mah. 9Tüokhei tüopa chingnyu min Babilon#Babel she nyik, hangjingne Youngwanpawe tüokenme chahwannyu nopu jing ngao püohne tam; hüyange tüomepu Youngwanpawe iman chahwannyu üken phe te yanne tam.
Shem Huhayimlan
(1 Put 1.24-27)
10Hatüolan-a Shem huhayimlan ngoh nang. Aope Shem nyupuh wangpeng gho ja ngoi, muleam phei me wangpeng ni shepupa me Arpachshad puh. 11Hüyange Arpachshad puhyang phei me Shem wangpeng gho nga üyin me ngoh, üne-o sheko hei netan hayimlan tüo.
12Aope Arpachshad wangpeng delüm phei me nga ngoi, I Shelah üpa ne meng; 13Hüyange Shelah puhyang phei me Arpachshad wangpeng gho peli me lüm üyin me ngoh-e netan hei sheko hayimlan tüo.
14Aope Shelah wangpeng delüm ngoi, I Eber üpa ne meng. 15Eber puh phei me Shelah wangpeng gho peli phei me lüm üyin me ngoh-e netan hei sheko hayimlan tüo.
16Aope Eber wangpeng delüm phei me peli ngoi, I Peleg üpa ne meng. 17Hüyange Peleg puh phei me Eber wangpeng gho peli phei me delüm ngoh-e netan hei sheko hayimlan tüo.
18Aope Peleg wangpeng delüm ngoi, I Reu üpa ne meng. 19Hüyange Reu puh phei me Peleg wangpeng gho ni phei me tu ngoh-e netan hei sheko hayimlan tüo.
20Aope Reu wangpeng delüm phei me ni ngoi, I Serug üpa ne meng. 21Hüyange Serug puh phei me Reu wangpeng gho ni phei me nyit ngoh-e netan hei sheko hayimlan tüo.
22Aope Serug wangpeng delüm ngoi, I Nahor üpa ne meng; 23hüyange Nahor puh phei me Serug wangpeng gho ni ngoh-e netan hei sheko hayimlan tüo.
24Aope Nahor wangpeng da phei me tu ngoi, I Terah üpa ne meng; 25hüyange Terah puh phei me Nahor wangpeng gho ja me pen me tu ngoh-e netan hei sheko hayimlan tüo.
26Aope Terah wangpeng denyit ngoi, I Abram, Nahor hei Haran lan üpa ne meng.
Terah Huhayimlan
27Sha-a tüolan-a Terah huhayimlan ngoh nang. Terah-a Abram, Nahor hei Haran üpa, Haran-a Lot üpa. 28Haran-a Ipa Terah shaote I nyupuh kahmük Chaldea mepu Ur me li. 29Abram hei Nahor ni-e sheko yah. Abram shekonyute Sarai she min, üne-o Nahor shekonyute Milcah she min. Yha-a Haran üha hüyange Haran-a Milcah hei Iscah ni üpa ne ngohyangki. 30Sha-a Sarai-a heelang ne ngoh, yha hayim yenangpe ngoh.
31Terah-e Iha Abram hei Ihu Lot, Haran üha, hüyange I nyemnya Sarai, Iha Abram shekonyu woiyange iman üshei Kanan kahmük te tailak jingne, Chaldealan Ur chingnyu mepu yayonge tai; hüyangpoi aope iman Haran ngoi, iman tüome nyoi. 32Hüyange Terah nyupuh wangpeng gho ni phei me nga ngoh yangki, hüyange Terah Haran me li.
Currently Selected:
KAHTAMYENGHAN 11: KONYBSI
Highlight
Share
Copy
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
