Isaias 41

Edtevangan te Megbevayà is menge Israilihanen

1Migkaǥi is Nengazen te, “Sikiyu is menge etew ziyà te meziyù he menge lugar, kenè kew megurub ne pemineg kew kedì. Sikiyu is menge meǥinged diyà te menge nasyun, mebpekelig-en kew ne uvey kew kayi te kediey, ne keǥiya niw is menge riklamu niw. Edtiǥum kiw ne edhusayen tew heini. 2Hentei is mid-umew zin is metazeng wey mezeeǥen puun te edsilaan para mekepenilbi kandin? Hentei is mibeǥey ziyà te kandin te meǥinged diyà te menge nasyun wey te menge hadì kayi? Ebpendezeetan din sikandan pinaaǥi te ispada zin wey panà; neiring sikandan te eliyavuk wey ukap he inlayap te keramag. 3Edel-asen din sikandan ne wazà ebpekevelavag kandin, minsan diyà te menge lugar he sikan din pa meveyai. 4Hentei man is mibaal kayi te langun? Hentei man is mibayàbayà te langun he nehitavù puun pa te nehuna he lapis te kevuwazan? Kenè be iyan a, is Nengazen he zaan en puun pa te kebpuunà te kelibutan ne kemulu gihapun taman te kegketapus te kelibutan.

5“Is menge etew ziyà te meziyù he menge lugar, minsan is diyà te kinemeziyuan he vahin te kelibutan, nekaahà te menge vaal ku, ne migkerker sikandan te kegkahandek. Midtiǥum sikandan 6ne mibpetebtevangè dan wey midinesiǥà. 7Is menge pandey, menge platiru, wey zuma pa he menge terebahanti he ebpemaal te menge ed-ezapen midinesiǥà, he ke sikandan te, ‘Meupiya is terebahu tew.’ Ne idransang dan haazà is menge ed-ezapen diyà te selevukà duen su para kenà mepiley.

8“Piru sikew Israel, is suluǥuen ku wey pinilì, he iyan menge etew nu is menge kevuwazan ni Abraham te emiǥu ku, 9midtawag ku sikew wey migkuwa puun te utew meziyù he vahin te kelibutan, ne migkeǥiyan ku sikew te iyan ka suluǥuen ku. Mibpilì ku sikew ne wazè ku sikew iselikwey. 10Kenè ka mahandek su iyan a zuma nu. Kenè ka meipeng su iyan a Megbevayè nu. Edlig-enan ku wey edtevangan ku sikew. Ebpengelangan ku sikew pinaaǥi te gehem ku he iyan daan ebpekeluwas kenikew. 11Is langun he egkepeukan ke zan ne kenà duwazuwa he egkepeel-elezan wey egkeliveǥan. Ebpematey is langun he zuen dan pauk kenikew. 12Minsan ebpen-ahaan nu pa is menge kuntada nu ne kenè nu en sikandan egkaahà. Su is nekidtebek kenikew egkehimu he wazè dan pulus. 13Su siak, is Nengazen he Megbevayè nu, midlig-enan ku sikew wey migkeǥiyan te, kenè ka mahandek su edtevangan ku sikew. 14Minsan deisey ka wey meluya, kenè ka mahandek su iyan a mismu edtavang kenikew. Iyan a, is Nengazen, is migkaǥi kayi. Iyan a menluluwas nu, is waǥas he Megbevayà te Israel. 15Pemineg ka! Edhimuwen ku sikew he iring te gelemiten te kegunas he veǥu wey zuen din mahabet wey meǥarang he menge ngipen. Egunasen nu wey edrunteken is menge vuntud, ed-iringen nu te ukap is menge vuvungan. 16Ed-ukapan nu haazà ne idlayap te keramag, ne ibpedsusuwey te eribpures. Piru sikew mulà igkelipey nu is Nengazen; edeliǥen nu is Waǥas he Megbevayà te Israel.

17“Emun ebpen-ahà te wahig is pubri he menge etew ku, ne wazè dan egkaahà ne ebmemaze en is bekereng dan tenged te kegkemezahi, ne siak is Nengazen iyan edtavang kandan; siak is Megbevayà te Israel kenè ku sikandan idselikwey. 18Ibpetudè ku is dekelà he menge wahig diyà te zemilag he menge vuvungan wey ibpelepew ku is menge serebseb diyà te menge suǥud. Edhimuwen ku he wehiǥen is disirtu, ne is memaza he tanà edhimuwen ku he zuen dutun teheb. 19Ibpetuvù ku ziyà te disirtu is menge kayu he sidru, ekasya, mirtu, ulibu, pinu, inibru, wey sipris, 20para maahà, metueni, wey mesavut te menge etew he iyan a is Nengazen, Waǥas he Megbevayà te Israel, ne iyan a midlimbag kayi.”

Wazè Pulus te zuma te menge Ed-ezapen

21Migkaǥi is Nengazen, he hadì te Israel ziyà te menge ed-ezapen te, “Sigi, riklamu kew en wey mebpengetezengan! 22Uvey kew ne keǥiya niw kenami ke hengkey is huziyan he egkehitavù. Keǥiya niw kenami is migkaǥi niw zengan su para metimbangtimbang dey ke netuman be heini. 23Keǥiya niw kenami ke hengkey is egkehitavù keuzemà su para metueni zey he menge megbevayà kew. Baal kew te meupiya etawa mezaat su wey key meinuinu ne egkahandek key keniyu. 24Piru iyan tutuu is, wazè niw pulus, ne wazè niw egkehimu. Is menge etew he mibpilì kew zan he iyan ed-ezapen dan ne utew lalung. 25Mibpilì ku he edumala is sevaha he etew he ziyà ebpuun te zizaya. Midangep sikandin kayi te kediey; ne ǥuntaan ebpekeuma sikandin puun te edsilaan. Edezeetan din is menge ebpemendumala iring te kedtekutaki te mendiziyun te vasak he ebeelan din he ziniyun. 26Hentei keniyu is mibpezayag he egkehitavù heini su para metueni zey ne ebpekekaǥi key he hustu is impezayag din? Wazè minsan sevaha keniyu he mibpezayag mehitenged kayi, ne wazà nekezineg te migkaǥi niw mehitenged kayi. 27Iyan a, is Nengazen nehuna he migkaǥi kayi ziyà te Zion, is inged he Jerusalem. Impehendiyè ku is sevaha he menunudtulà su wey zin metudtul is meupiya he tudtul he zuen en edtavang kandan. 28Mid-ehè ku ke zuen be selakew en he ed-ezapen he ebpekesambag, iyan, wazè ku naahà. Wazà minsan sevaha kandan he ebpeketavak te menge insè ku. 29Pudu zan wazà pulus, ne kenà sikandan ebpekehimu. Iring dan te keramag he edlavey zà.”

Currently Selected:

Isaias 41: mbbOT

Highlight

Copy