Madiu 26

'Inapwanao nuwanuwadi be Yesu siloemwawasi

(Maki 14:1-2; Luke 22:1-2; Yoni 11:45-53)

1Yesu 'ina ona getedi 'ilosalonidi, ga 'ina tononoyao 'ieonedi, 2#Sia 12:1-27; Md 20:18'igwae, “Wamwalatonina 'asiyata 'eluwa be Ataona Sagalina taguinuwe, be 'enega 'agu tosipupu 'ida 'ebwayaegu 'agu talauwalao 'ediya, be kelose 'ena sida loemwawasigu, Tomota Natuna 'abo'agu.”

3'Enega totaliyao sinabwadi be me Isileli 'idi 'inapwanao sideli egogonama Kaiyapa 'ina anuwa sinabwana 'enaya, tauna totaliyao 'idi 'inapwana sinabwana. 4'Enega 'inapwanao nidi taudimo siloina be 'aene kaboega Yesu sida giyai be sida loemwawasi, 5ta sigwae, “Geya'abo sagali solanaya Yesu tagiyagiyai, 'abona nai tomota sigamwasowaleda be silosaiya 'edaya.”

Waine Yesu 'ieoloina 'asa Betani 'enaya

(Maki 14:3-9; Yoni 12:1-8)

6Tuta nina Yesu Betani 'ena 'imiyami, Saimoni 'ina anuwaya. Tauna lowa tolepelo 'ebweu. 7'Enega 'ebweu waine ma ina bunama 'imai, ta bunama nina 'ana maisa sinabwana, ta botolo bobo'ana wawasae 'enaya 'isiwena. Yesu 'etamo anuwaya 'i'e'ai, ta waine nina 'imai ga bunama nina Yesu debanaya 'isiwena.

8Ta Yesu 'ina tononoyao si'itena ga waine silomugiyena, sigwae, “To'ase manuna bunama 'imudalina? 9'Ilobwenena be bunama nina 'igimwaneye be maisa sinabwana 'i'ewa be 'ieguyaiye togomabeso 'ediya.”

10Ta Yesu 'idi ona nina 'imwalatonina ga 'ieonedi, 'igwae, “Geya'abo waine gete walomulomugiyei, manuna 'ina lema gete 'eguya bobo'ana wawasae. 11Togomabeso nidi waoneonediya tuta maibo'ana selabemiya simiyami, ta 'abo'agu esi nigeya tuta dudulana ma'emi tamiyami. 12#Yo 19:40Waine gete ni'atu 'ieoloigu bwalagu 'ana sa'u'ali'ali manuna. 13Ta ona'ai'aila, ma'etamo teteligu 'ana loguguya tomota sinoonoi bale'u maibo'ana 'enaya, ta waine gete 'ina guinuwa 'eguya tetelina sida emwasali wate.”

Yudasa 'itagwala be Yesu 'ida telesipupuye

(Maki 14:10-11; Luke 22:3-6)

14Ta Yesu 'ina tonono 'ebweu 'ana esana Yudasa Isikaliota 'itauya totaliyao sinabwadi 'ediya, 15ga 'ieonedi, 'igwae, “'Eisa maisa wa'ebwa'egu 'abo Yesu 'emiya yatelesipupuye?” 'Enega mani siliba 'ana yau teti si'ebwa'ena. 16'Enega Yudasa tuta bobo'ana 'iyamwena be 'aene Yesu 'ediya 'ida telesipupuye be sigiyai.

Ataona masulina siguinuwena

(Maki 14:12-21; Luke 22:7-14, 21-23; Yoni 13:21-30)

17 # Sia 12:14-20 Ataona masulina beledi daisina, nigeya gieseseinamo sie'ani. Ga Ataona masulina 'ana 'asiyata nugana 'ena Yesu 'ina tononoyao 'aidi 'enaya simai ga sigwae, “'Inapwana, mane 'ena nuwanuwayo be Ataona masulina manuyo 'agibubu?” 18'Enega Yesu 'iona, “Watauya Yelusalema be 'igu sida 'ebweu tai 'ena wasimane, wagwae, ‘'Ima toe'ita 'ina ona gete nadigega 'aene “'Igu tuta ni'atu 'iapwesama ta nuwanuwagu be 'imu anuwaya Ataona masulina ma igu tononoyao 'a'a'ani.” ’ ” 19Ga tonono nidi Yesu 'ina ona nina siematamatanena ga tai nina 'ina anuwaya Ataona masulina sigibubuna.

20'Enega 'asuinuwanuwaya Yesu ma ina tononoyao site tuwelo nidi silugu ga masula nina si'enina. 21Ta 'idi 'e'ai solanaya Yesu 'igwae, “Gosegwao, yaona 'ai'aila 'aene 'ebweu 'emiyega 'iabe 'itelesipupuyegu.” 22Ta Yesu 'ina ona gete manuna sinuwamwau 'ai'aila, ga 'ebweuna 'ebweuna Yesu 'ena 'ienaida, 'igwae, “'Inapwana, yaita tauna? Nai 'abo'agu?”

23 # Sam 41:9 Ta Yesu 'ieonedi, “Tai nina tauna ma'iyagu gaeba 'ebweuna 'enega 'a'e'ai, tauna 'iabe 'itelesipupuyegu. 24'Abo'agu Tomota Natuna ma'etamo yatatauya 'eda nina lowa Buki Tabu 'ena 'igimisimanena, ta esi 'agu tosipupu nina nuwa'ole'olena sa'i, ta bobo'ana 'abo lowa sinana geya'abo 'ida enaenatune.”

25'Enega 'ana totelesipupu Yudasa 'ieonena, “'Inapwana, to tai tauna? Nai 'abo'agu?” Ga Yesu 'igwae, “Ni'atu 'uona saba.”

'Inapwana 'ina 'e'ai

(Maki 14:22-26; Luke 22:15-20; 1 Kolinita 11:23-25)

26 # Yo 6:54-56 'Etamo si'e'ai ta Yesu masula 'i'ewena ga manuna 'iona oboboma ta 'igitomwena ga 'ina tononoyao 'i'ebwa'edi, 'igwae, “Gete oogu wa'ewa be wa'a'ani.”

27 # Sia 24:8; 1 Ko 10:16 Ta oine makeigana wate 'i'ewena ga manuna 'ilokagutoki Yaubada 'ena ga 'i'ebwa'edi, ta 'igwae, “Maibo'ami wanunuma. 28Gete lalagu, loina auwauna manuna, 'idaudau tomota yaumi 'imi to'umalinao 'adi 'ebe nuwatau manuna. 29Ta yaeonami tuta gete be mulinaya oine gete geya'abo 'enega yanumanuma limana ga 'ana laba 'omi ma'egwao oine auwauna tanunuma Tamagu 'ina senaya.”

30'Enega wali 'ebweuna siwaliyena ga siapwesa ta situ'e 'Oya Olibe 'enaya.

Yesu 'isimana apwesa 'aene Pita 'ida eyaseyaseye

(Maki 14:27-31; Luke 22:31-34; Yoni 13:36-38)

31 # Yo 16:32; Sak 13:7 Ta Yesu 'ieonedi, 'igwae, “Batuwa boiboiya maibo'ami wada denasinegu, nadigega Buki Tabu 'ina simana, 'igwae,

‘To'ita'i'ita sipi yaloemwawasi be sipi maibo'adi sida 'elelewana.’

32 # Md 28:7 Ta 'igu toololimana mulinaya Galili 'ena yatatauya be 'omi muliguyega wawawai.”

33'Enega Pita 'ilolagata ga 'igwae, “'Iabe maibo'adi sidena sineyo ta tebweugu ma'iyayo.”

34 # Md 26:69-75 Ta Yesu Pita 'ieonena, “Yaona 'ai'aila boiboi batuwa, muliyega be kakaleko 'igwagwane ta 'oyo matoi 'ueyaseyaseyegu.”

35Ta Pita 'igwae, “'Inapwana, geya'abo sa'i yaeyaseyaseyeyo! 'Eguma siloemwawasiyo 'abo'agu wate ma'iyayo siloemwawasida.”

Tomuliyao maibo'adi wate nadigega sionaona.

Sena Gedesemani 'ena Yesu 'isidasida Tamana 'ena

(Maki 14:32-42; Luke 22:39-46)

36'Enega Yesu 'ina tononoyao ma'enao sitauya 'ebweu sena 'ana esana Gedesemani 'ena, ta 'ieonedi, 'igwae, “Gete 'ena wamiyami, ta 'abo'agu yaalaga be yasisida Yaubada 'ena.” 37Ta site toi 'i'au'ewedi, Pita be Sebedi natunao 'eluwa. 'Enega Yesu ma ina 'ateuyauya ta ma ina nuwamwau 'ieonedi, 38#Yo 12:27'igwae, “'Ategu 'iuyauya sinabwana, nai 'iabe yamwamwawasa, 'enega bada wamiyami ta walomata'i'ita, be 'enega walemegu.”

39 # Ib 5:7-8 Ta Yesu 'ialaga tupwana ga bale'uya 'ibe'u sanamwa'uta ta 'isidasida, 'igwae, “Tamagu ye, 'eguma kapekapeyana 'elouya keigana gete 'eguyega 'u'ewayaulei, ta geya'abo 'abo'agu 'igu nuwena 'enega, ta 'oyo esi 'imu nuwena 'enega 'uda guinuwa.”

40'Enega 'iila ga 'ina tononoyao site toi nidi 'ilobedi ni'atu si'eno mwataya, ga Pita 'ilowanowanona ga 'igwae, “Pita, nigeya sawesawemuya be 'umatapa'ala be 'ulemegu tuta gidalina namo manuna, aga?” 41Ga wate 'ieonedi maibo'adi, 'igwae, “'Ilobwenemi be wamatapa'ala be wasidasida, be 'enega geya'abo Seitani 'itootoomi. Ona'ai'aila yaluyaluwami nuwanuwana, ta tuga manuna oomi sitaba.”

42 # Ib 4:15 'Enega Yesu 'ilaga limana ga 'isidasida, 'igwae, “Tamagu, keiga gete geya nuwagu be 'enega yanunuma, ta 'abo 'imu nuwena nadigega, ta nigeya 'ebweu wate 'eda 'imiyami, bobo'ana yanunuma tuga.”

43Ta Yesu wate 'iila 'ina tononoyao 'ediya ga 'ilobedi wate si'eno mwataya, manuna matadi ni'atu si'eno'eno. 44'Enega wate 'ipilisinedi ga 'ina sidasida 'etonina 'enaya 'ina sidasida 'eluwena nadigega.

45Ta 'iila limanama ga 'ina tononoyao 'ilowanowanodi, ga 'igwae, “Mwa'adega, ma'etamo wa'eno'eno ta waeyaeyawai'ata, aga? Ta wa'ita 'abo'agu Tomota Natuna 'igu tuta ni'atu 'iapwesa be sida sipupuyegu toto'umalidi 'ediya. 46Watoolo be tatatauya, manuna 'agu totelesipupu nina ni'atu gete 'imeema.”

Yesu sigiyaina

(Maki 14:43-50; Luke 22:47-53; Yoni 18:3-12)

47Yesu 'etamo 'ionaona ta 'ebweu 'ina tonono, Yudasa, tolosaiyao ma'enao siapwesa. Totaliyao sinabwadi be me Isileli 'idi 'inapwanao tolosaiyao nidi sietunedi Yudasa ma'edi, Yesu sabi giyaina, ta boda nidi ma idi sisisaiyao be wepasiyao wate simai. 48Ta Yudasa we'iwe'iyaya ni'atu 'ediya 'isimanena, 'igwae, “'Abo yaita ya'atubwaili, nate tauna Yesu, be wagiyai.” 49'Enega 'itauya palupaluna Yesu 'ena ga 'ilokagutokiyena ta 'i'atubwailina. 50Ta Yesu 'igwae, “Gosiyagu, to'ase manuna 'umai?” 'Enega boda nidi siapwesama ga Yesu sigiyaina.

51 # Yo 18:26 Ta Yesu 'ina bodao 'ebweuna 'ediyega 'ina sisisaiya 'ilisilolona ga totaliya sinabwana 'ina toguinuwa tenana 'iupwa yaulena.

52Ta Yesu tai nina 'ieonena, “Tuwa! 'Imu sisisaiya 'usa'uile 'ina senaya, manuna tolosaiyao taudi losaiya 'enega simwamwawasa. 53'Uda mwalatoni 'aene 'abo nuwanuwagu Tamagu 'ena yasisida 'agu lema manuna, 'iabe gete tuga aniloseyao mabodadi tomoyauyau 'ietunedima. 54Ta nigeya! 'Eda gete 'enega Buki Tabu 'ina simanao manugu sida apwesa.”

55Gote 'ena Yesu boda 'ieonedi, 'igwae, “Sana 'abo'agu to'ipwala, ga 'enega ma imi sisisaiya be ma imi wepasi wamai sabi giyaigu! Ta to'ase 'alena ga 'enega nigeya wagiyagiyaigu 'asiyata nidi yaudi Anuwa Tabu 'ena yamiyami ta yae'ie'ita tomota 'ediya? 56#Md 26:31; Yo 16:32Ta yage getedi sida apwesa be 'enega palopitao 'idi gimisimana Buki Tabu solanaya sida apwesa.” 'Enega Yesu 'ina tononoyao maibo'adi sidena sinena.

Yesu 'ina etala 'inapwanao matadiya

(Maki 14:53-65; Luke 22:54-55, 63-71; Yoni 18:12-14, 19-24)

57Boda nidi ni'atu Yesu sigiyaina ga si'au'ewena totaliyao 'idi 'inapwana, 'ana esana Kaiyapa, 'enaya. Ta Kaiyapa 'ina anuwaya loina 'ana toe'itao be 'inapwanao ni'atu sideli egogonama ga simiyami. 58Ta Pita 'edasolega Yesu 'imuliyena ga 'imai totaliya sinabwana 'ina 'asaya, ga 'ilugu anuwaya ta to'ita'i'itao ma'ediya simiyatowa be 'aene Pita nina Yesu 'ana loina 'ida nono.

59Ta totaliya sinabwadi be 'inapwanao nidi nuwanuwadi Yesu 'ana toe'ewa kabokabo sida loba be 'idi e'ewa 'enega Yesu sida loemwawasi. 60#Yo 2:19-20'Enega toe'ewa kabokabo yaudi simai, ta esi 'idi e'ewa nigeya palupaludi. Ta muliyega 'eluwa tai simai 61ga sigwae, “Yesu lowa 'iona, 'igwae, ‘Sawesaweguya be Yaubada 'ina anuwa yalige yaulei, be 'asiyata 'etoi 'ediya yada 'abilima.’”

62'Enega totaliyao 'idi 'inapwana sinabwana 'itoolo, ga 'igwae, “Nigeya 'imu e'isamo, aga? Tomota gotedi 'idi e'ewa 'emuya ni'atu 'unononaya?”

63 # Ais 53:7 Ta Yesu tuga 'i'alaenono.

'Enega totaliya sinabwana Yesu 'ieonena, “'Uona 'ai'aila Yaubada matanaya, mwa'adega 'oyo To'etoseyana niyo, ta Yaubada natuna, nai nigeya?”

64 # Dan 7:13; Md 24:30 Ta Yesu 'igwae, “Ni'atu nate 'uona saba, ta wate yaeonami 'aene 'abo'agu Tomota Natuna be ma'etamo wa'itagu Toewaiwai sana 'atainaya yamiyami be wate galewa pwananao debadiyega yamama.”

65 # Yo 10:33, 19:7; 1 Loi 24:16 'Enega totaliya sinabwana nina 'igamwasowala 'ai'aila ga taunamo 'ana 'oama 'isabuna ta 'igwae, “'Ina ona to'umalina wanononaya? Ona'ai'aila, tai gete Yaubada 'isinalina. Tuwa! Geya'abo wate toe'ewao sionaona 'ina loegesiyao manudi. 66Mwa'adega 'imi nuwanuwa Yesu manuna?”

Ga taudi sigwae, “'Ilobwenena be 'imwamwawasa.”

67 # Ais 53:5 'Enega maninina sigiwalina ta siunu dadanena, ta wate 'aidi sisapina, 68ta sigwae, “'Eguma 'oyo To'etoseyana nina 'uona apwesa 'emaya 'aene yaita tauna 'isapimu? Manuna 'uona 'aene 'oyo palopita.”

Pita Yesu 'ieyaseyaseyena

(Maki 14:66-72; Luke 22:56-62; Yoni 18:15-18, 25-27)

69Ta Pita ma'etamo 'etauluya 'imiyami ga toguinuwa gomagweine 'ebweuna 'iapwesama ga 'ienaidena, 'igwae, “Lowa goma Galili Yesu nina 'oyo ma'iyayo wamiyami, aga?” 70Ta tomota yaudi matadiya Pita 'ieyaseyase, 'igwae, “Yage nina 'uonaonae nigeya yamwalamwalatoni.”

71'Enega Pita 'idena ga tupwana 'iaapwesa. Ta 'ebweu wate gomagweine Pita 'i'itena ga tomiya nidi 'ediya 'igwae, “Tai gote lowa Yesu goma Nasaleta ma'iyana.”

72Wate Pita 'ieyaseyase ta 'isawa tamatamana ga 'igwae, “'Inapwana 'imwalatonina 'aene tai nina 'abo'agu nigeya yamwalamwalatoni.”

73Tuta kukupana namo mulinaya toyo'o nidi Pita 'enaya simai, ta sigwae, “Ona'ai'aila 'ukabo! 'Oyo Yesu 'ina boda 'ebweu, manuna 'imu lewa 'atuwa me Galili 'enadi.”

74'Enega Pita 'isawa tamatamana ta ona to'umalina 'enega 'ibwautu'e, 'igwae, “Tamada! Tai nate nigeya yamwalamwalatoni.” Ta tuta gote 'ena kakaleko 'igwane.

75 # Md 26:34 'Enega Pita Yesu 'ina ona 'inuwa'i'isina 'aene “Muliyega be kakaleko 'igwagwane ta 'oyo matoi 'ueyaseyaseyegu.” 'Enega Pita nuwana 'imwau sinabwana ga 'iapwesa 'atamanaya ga 'idedoi.

Currently Selected:

Madiu 26: dob

Highlight

Copy