MARKUS 15

Yesus neng juma Pilatus

(Un te neng Matius 27.1-2, 11-14; Lukas 23.1-5; Yaya 18.28-38)

1Neng kenempam me, laho laho nai diaʹ detaʹu lataʹ ngan diaʹ lataʹ lepoʹ, peging ngan diaʹ guru Adet Yahudi pempun ngan toʹ Mpun diaʹ Lataʹ, moʹ de busek ke peseket. Penco tai re ngkin Yesus peging ngan kaput ampit malat te palaʹ Pilatus, iaʹ ina pengebioʹ perinta. 2Un dau Pilatus lemutu Yesus: “Lan ncoʹ paren bioʹ lepoʹ Yahudi mo?”

Un dau Yesus mipa ia: “Lan, koʹ baʹan dau hoʹ ne.”

3Kun diaʹ detaʹu lataʹ dina mekem kadoʹ salaʹ mia, 4ina tuman Pilatus ubaʹ lemutu ia laʹan, un dau ue: “Moʹ inu hoʹ are un ubaʹ mipa ida tupe? Seʹ de mekem tebadaʹ iaʹ salaʹ mikoʹ.”

5Un sepuʹo ca luʹung isiu pe, Yesus are un ubaʹ pisiu, pa Pilatus salam tekaʹ.

Ukum patai neng Yesus

(Un te neng Matius 27.15-26; Lukas 23.13-25; Yaya 18.39–19.16)

6Kelayan adet Pilatus, singket tegoʹ Bunut Paska ia naʹ ca usa cen amin sepin nai kawang, mele aheʹ iaʹ kelunan kadoʹ ke nyat. 7Dalau ina un ca usa neng amin sepin, ngadan ne Barabas. Ia sihoʹ sepin peging ngan kudaʹ usa diaʹ ngan ne, moʹ de lematai kelunan tegoʹ de ngkin dulu kasing dalem lepoʹ. 8Dulu diaʹ pemung neng juma Pilatus kina, nyat iaʹ kelayan adet te cen kena. 9Sulo ho lemutu ida, un dau ue: “Kumpin tekaʹ kimet cem tupe? Un ncem ubaʹ akeʹ ke nakau paren bioʹ lepoʹ Yahudi ini miekm mo?” 10Tisen te Pilatus ban diaʹ detaʹu lataʹ dina naʹ Yesus mia moʹ de miʹet tekaʹ.

11Un sepuʹo diaʹ detaʹu lataʹ dina pekaseng kimet dulu, apan nte nyat Barabas. 12Kun Pilatus pisiu kelunan kadoʹ dina ca liwai laʹa, un dau ue: “Buk pekina, inu iaʹ ikem ubaʹ akeʹ ke uyan neng laki iaʹ ikem pisiu paren bioʹ lepoʹ Yahudi ini tupe?” 13Ngelengap dau re mipa ia: “Lematai ne ia neng kayu tecek.”

14Un dau Pilatus: “Mpi puyan ne iaʹ salaʹ tupe?”

Bioʹ kuʹo dau re ngelengap: “Lematai ne ia neng kayu tecek.”

15Moʹ Pilatus ubaʹ mayo kimet kelunan kadoʹ dina, ina tuman ne nakau Barabas mida. Sulo Pilatus cuk kelunan lemeta Yesus, ngan napek. Ia neng usun kayu tecek.

Sedadu pelunyeʹ Yesus

(Un te neng Matius 27.27-31; Yaya 19.2-3)

16Kun sedadu dina ngkin Yesus kaʹ dalem amin Gebenur Pilatus, kaʹ beluaʹ lasan ina. Kun nte mengin mung mpun sedadu dina. 17Kun nte naʹ ca sapai dadoʹ bala silem neng Yesus, ngan manyam ca tapung suhaʹ, naʹ a neng ulu ue. 18Sulo re taro dau nyelama ia, un dau re: “Dado le udip koʹ iaʹ paren lepoʹ Yahudi.” 19Kun nte alaʹ kayu man nte metung ulu ue, mentung nte nyemulaʹ ia. Ngan un pe palai diaʹ sutlep ngan muʹup kata ia. 20Ketai kuʹo puyan kelunyeʹ de ngan Yesus, kun nte sau sapai bala silem ina are, ngan naʹ gelam me tengen ngeliwet neng ia laʹa. Lepa ina sulo tai re ngkin ia kawang kaʹ ukoʹ de ke napek ia neng kayu tecek.

Ida napek Yesus neng kayu tecek

(Un te neng Matius 27.32-44; Lukas 23.26-43; Yaya 19.17-27)

21Kaʹ ahang janan ina, ida taʹan ca laki, ngadan ne Simun, dalau kenai ie cen tanaʹ coʹ, nai nyabeʹ kaʹ lepoʹ ina. Kun nte mejen cuk Simun nyuʹun kayu tecek Yesus ina. (Simun ina ca kelunan lepoʹ Kirini, iaʹ ina amai Alik-sandar ngan Rupus.) 22Sulo tai re ngkin Yesus kaʹ ca ukoʹ iaʹ ngadan ne Gulguta, sen isiu ina, “Ukoʹ Tekahing Ulu.” 23Sulo re alaʹ telang anggur pekelet ngan lisan tumu, ten ke naʹ me Yesus. Un sepuʹo abeʹ e dayo ke nisep jakan ina. 24Sulo re napek nyalet Yesus neng kayu tecek. Ngan laʹa ida nenung petulat gelam me. Kun nte nenung pelubit undi, apan nte tisen aheʹ iaʹ ke alaʹ naʹan naʹan gelam me ina. 25Kun nte napek Yesus neng kayu tecek tegoʹ jam piʹen mempam. 26Un ca surat iaʹ badaʹ isiu iaʹ pesalaʹ ia. Un dau surat ina: “Iaʹ paren bioʹ lepoʹ Yahudi.” 27Ca pemuyan nte laʹa, ida alaʹ dua re kejamun, ngan napek ida dua neng kayu tecek serengan ngan Yesus, ca usa thaʹ taʹu, ngan ca usa tahaʹ kabing. [ 28Pekini ne tai palup dau isiu dalem Kitap iaʹ kuma ha: “Dulu ke naʹ ia pemung ngan kelunan diaʹ pepuk kuʹun penyalaʹ.”]

29Dulu diaʹ tai masat lapa ia kina, ida pejaʹat dau neng ia, mentung nte miling miling ulu re. Kun dau re: “Na ina idi, ikoʹ iaʹ ke ngasing Umaʹ Palan ngan ke medeng nge dalem telu tau ʹo ina, 30nai ne kentaʹ cen kayu tecek ina naʹkini. Pudip ne usa hoʹ tengen.”

31Pekina ne seʹ puyan diaʹ detaʹu lataʹ ngan diaʹ guru Adet ngelunyeʹ Yesus. Un dau re neng ida selepeʹ: “Mencam me pudip dulu diaʹ ca, un sepuʹo abeʹ e mencam pudit usa ha tengen. 32E laki Keristus iaʹ ngkang pungu udip, Laki iaʹ paren bioʹ lepoʹ Israil, nai ne kentaʹ cen kayu tecek ina naʹkini, apan meʹ taʹan. Ina le ameʹ ke ngelan ʹo.”

Pekina pe diaʹ dua usa diaʹ sihoʹ ukum neng kayu tecek kuaʹ Yesus didai pejaʹat neng ia.

Yesus matai

(Un te neng Matius 27.45-56; Lukas 23.44-49; Yaya 19.28-30)

33Tegoʹ beluaʹ tau ina, tai mentem ne pa tipo tanaʹ ina dalem telu jam majan ne. 34Tegoʹ jam telu tetahup ina, kun Yesus ngelengap ngan bioʹ dau ue kuma ha: “Eloi, Eloi, lama sabak-tani.” Sen isiu ina: “Tuhan Allah heʹ, Tuhan Allah heʹ, moʹ inu hoʹ peterai akeʹ.”

35Un dau palai dia kenahan dau isiu ina kuma ha: “Seʹ e mengin Ilia taʹin.” 36Nai ca usa ngasa ngkin ca keruko abak, ngan mejep pe dalem telang jakan. Sulo ho netuk ke neng bulan ca kayu, ngan naʹ a kaʹ paʹ Yesus mentung kuma ha: “Ilu naʹat selu Ilia nai naʹ ia kentaʹ cen kayu tecek ʹo.”

37Sulo Yesus ngelengap ngan bioʹ dau. Lepa ina kun ne metep laset te.

38Kaʹ dalem Umaʹ Palan un tape, iaʹ pesahang amin ngan iaʹ atek buheʹ, nyahin tai pepak dua cen mpau abeʹ ntaʹ. 39Dalau laki kaptin sedadu iaʹ jeng neng ata kayu tecek ina taʹan seʹ Yesus ngelengap, ngan penco tai ie matai, sulo ho kuma ha: “Atek lan lete laki ini Anak Allah.”

40Un pe kudaʹ usa leto diaʹ naʹat seʹ puyan ina cen coʹ. Neng ahang ida un Mariam Madalina, pekina pe Mariam ueʹ Yakup iaʹ iʹut, de dua Yusis, un pe Salume. 41Malai re tai bayaʹ Yesus ngan mepo ia dalau ue un kaʹ tanaʹ Galilia. Kadoʹ pe leto diaʹ ca diaʹ ban lepa nai kaʹ Yerusalim serengan ne ading nte.

Puyan masek patai Yesus kaʹ liang

(Un te neng Matius 27.57-61; Lukas 23.50-56; Yaya 19.38-42)

42-43Dalau ketai tahup tau ina, nai Yusup lepoʹ Arimatia abeʹ kaʹ lepoʹ ina. Yusup ina kahum neng Mpun diaʹ Lataʹ. Mung dulu nyelama Yusup, ngan laʹa ia mengaʹ puyan pengaren Allah ke ngaren ilu kelunan. Yusup nai, ban tau ina tau dulu ke petenup kena Tau Kelineʹ. Tai Yusup palaʹ Pilatus, ngan makang tekaʹ kimet nyat patai Yesus neng ia. 44Salam tekaʹ Pilatus kenahan dau denga Yesus laho lepa ban matai. Penco ho mengin laki kaptin sedadu idai are, ngan lemutu ia kudaʹ majan ne ban Yesus lepa matai. 45Lepa laki kaptin sedadu ina badaʹ mung ina mia, sulo Pilatus pedayo Yusup alaʹ patai ina are. 46Kun Yusup lemeli belasoʹ puteʹ, ngan alaʹ patai ina are naʹ kentaʹ, lemino ia kedalem belasoʹ ina, sulo ho masek ia neng ca liang iaʹ lepa ban dulu mekat uyan dalem batu. Kun ne pelubit ca batu bioʹ mekep paʹ liang ina are. 47Mariam Madalina, ngan Mariam ueʹ Yusis iaʹ un mengau kina, ida taʹan kempi ukoʹ patai Yesus.

Currently Selected:

MARKUS 15: KNT

Highlight

Copy