MATIUS 8

Yesus paget ca laki iaʹ sakit bekayen

(Un te neng Markus 1.40-45; Lukas 5.12-16)

1Dalau Yesus nai puno ca mudung, kadoʹ dulu nai bayaʹ ia. 2Sulo nai ca kelunan iaʹ sakit bekayen muʹup palaʹ Yesus. Un dau ue: “Ahaʹ Amai, buk koʹ ubaʹ, senteng ngkoʹ paget akeʹ.”

3Kun Yesus mencai ujoʹ o ngan man ia. Un dau ue: “Ubaʹ te akeʹ paget ikoʹ. Maget ne ikoʹ.” Dalau ina lete pesau ne sakit bekayen ne, penco ho maget. 4Un dau Yesus neng ia: “Nawai tiga le, ayen ncoʹ badaʹ puyan ini me dulu diaʹ ca. Di lareʹ tai ne ikoʹ, penco tai palaʹ diaʹ detaʹu diaʹ ngkang adet Allah, apan nte nugen diseʹ puyan ncoʹ lepa maget. Uʹo ina hoʹ naʹ pengencai ngebayaʹ dau Musa cuk, apan ne ina uyan ca tedanaʹ me dulu mung, iaʹ badaʹ ban ikoʹ lepa maget.”

Yesus paget ulaʹ kaptin sedadu Rum

(Un te neng Lukas 7.1-10)

5Dalau nai Yesus kaʹ lepoʹ Kapernaum, un ca kaptin sedadu Rum petegoʹ ngan Yesus, penco ho lemameʹ palaʹ ia. 6Un dau ue: “Ahaʹ Amai, un ca ulaʹ keʹ sakit. Bang meken ne ia kaʹ amin. Kenyarem laleʹ seʹ e, ngan abeʹ e senteng ke ngala.”

7Un dau Yesus neng ia: “Tiga pesedeʹ, nai te akeʹ paget iaʹo.”

8Un dau kaptin ina mipa ia: “Ahaʹ Amai, ayen ne ikoʹ titin nai kaʹ amin nceʹ, ban ne abeʹ tekep keʹ ke ngkin ikoʹ nai kamin nceʹ. Tiga hoʹ bang pisiu tuaʹ le, ina ulaʹ keʹ ne kenai maget lete. 9Ban ne akeʹ ca kelunan tahaʹ ntaʹ pengecuk dulu, ngan pekina pe un sedadu diaʹ tahaʹ ntaʹ neng akeʹ, diaʹ akeʹ cuk. Akeʹ cuk ca usa: ‘Tai,’ sulo ketai ie. Ngan akeʹ cuk ca usa: ‘Nai,’ sulo kenai ie. Ngan akeʹ cuk ulaʹ keʹ: ‘Uyan ne ini,’ sulo ho uyan ne.”

10Salam kaʹ Yesus kenahan dau ue, sulo ho pisiu ida diaʹ nai bayaʹ ia are: “Ini dau heʹ mikem, neng ahang kelunan diaʹ kaʹ lepoʹ Israil, nyahut ceʹ un taʹan pengelan iaʹ pekini bioʹ lepe. 11Petawai le ini, kadoʹ dulu kenai cen sek tau ngan cen tau maya, ngan ke kahum neng puyan pengaren Allah ke ngaren ilu kelunan, pemung madung ngan Ibrahim, Isak, ngan Yakup ʹo. 12Un sepe kelunan diaʹ tekep kahum neng puyan pengaren Allah dina, ida iaʹ dulu ke pet kawang dalau ntem. Kina ne ida nange ngan dau taret jipen nte.” 13Sulo Yesus pisiu ngan kaptin sedadu ina: “Tai ne ikoʹ uleʹ. Ban tuman iaʹ ikoʹ ngelan, ke nuyan lete palaʹ ikoʹ.”

Dalau ina lete ulaʹ kaptin sedadu ina maget.

Kadoʹ kelunan sakit diaʹ Yesus paget

(Un te neng Markus 1.29-34; Lukas 4.38-41)

14Tai Yesus kamin Peterus. Kina ha taʹan ueʹ leto Peterus meken kaʹ tilung nge, uban ne dadem. 15Sulo Yesus man ujoʹ o, to beliʹau maget ne ia. Sulo nai ie beteʹ, penco tai mana mia.

16Dalau tai tahup, kadoʹ nai dulu ngkin kelunan diaʹ bali nelasek nai palaʹ Yesus. Sulo ho pekarap bali jaʹat dina man isiu ue iaʹ nyingan, ngan paget mung kelunan diaʹ sakit dina. 17Ia uyan pekini apan ne tai palup dau isiu pegawa Yesaya iaʹ pekini dau: “Ia tengen ne iaʹ ke baʹ penuyen le, ngan ke ngkin mung penyakit le.”

Kelunan diaʹ keloʹ ketai bayaʹ Yesus

(Un te neng Lukas 9.57-62)

18Dalau Yesus taʹan kadoʹ kelunan teliling ia, kun ne cuk diaʹ bayaʹ katuk ke tai kaʹ dipa leteng ina. 19Un ca guru Katuk Adet Musa nai palaʹ Yesus. Un dau ue: “Ahaʹ guru, kempi kempi tai hoʹ, ina heʹ ke nai bayaʹ ikoʹ lete.”

20Un dau Yesus mipa ia: “Idi pe lencau, ina un lubang nte lete, ngan pekina pe sui, ina un sala re lete, un sepuʹo Anak Sio ini, abeʹ un ukoʹ o ke penteng nyara ha.”

21Un dau isiu ca mida diaʹ bayaʹ dau katuk ke: “Amai, kudaʹ koʹ mawang akeʹ tai uyan liang amai heʹ ading baʹan le.”

22Un sepe dau Yesus mipa ia: “Nai ne ikoʹ bayaʹ akeʹ. Talan ne kelunan diaʹ matai berua re uyan liang me diaʹ matai udip de.”

Yesus penceng bahiu kasa

(Un te neng Markus 4.35-41; Lukas 8.22-25)

23Yesus tai kaʹ alut ina peging ngan diaʹ bayaʹ katuk ke. 24Beliʹau kenai kasa bahiu neng leteng ina, pekece kesangan ne alut de kuʹun luyak. Dalau ina Yesus luntoʹ. 25Sulo diaʹ bayaʹ katuk ke dina tai palaʹ Yesus ngan naga ia. Un dau re: “Ahaʹ guru, lesau ne ameʹ ading. Tai meʹ ke matai ne ini.”

26Un dau Yesus mipa ida: “Inu tuman ncem takut? Adeʹ iʹut pengelan ncem.” Sulo nai Yesus beteʹ, penco ho cuk bahiu ngan luyak dina pekenaʹ. Beliʹau pelenteng ne bahiu ngan luyak dina are.

27Tai salam ne tekaʹ kimet de dina. Un dau re: “Ca kelunan kumpin ini taʹin? Inu pabeʹ bahiu ngan luyak pe iaʹ bayaʹ dau pengecuk ke.”

Yesus paget dua re kelunan iaʹ bali nelasek

(Un te neng Markus 5.1-20; Lukas 8.26-39)

28Tai abeʹ Yesus kaʹ dipa leteng ina, kaʹ dale Gadara. Kina un dua re kelunan diaʹ bali nelasek, nai petegoʹ ngan ne. Kelunan dua dina nai cen dalem lubang liang. Abeʹ un aheʹ iaʹ makang ketai lapa ukoʹ de dua, uban nte dua minget laleʹ. 29Un dau re dua ngelengap: “Inu ke pengubaʹ koʹ neng ameʹ, e Anak Allah? Un ncoʹ ke ngukum ameʹ kena tai sukung tuket meʹ?”

30Abeʹ kumpin coʹ kata kina, un ca aba buʹin, dalau re uman. 31Un dau bali jaʹat dina nyat neng Yesus: “Buk koʹ ubaʹ ke cuk ameʹ tai kawang cen kelunan dua dini, tiga hoʹ cuk ameʹ tai kaʹ dalem aba buʹin dina.”

32Kun dau Yesus: “Tai ne.” Sulo tai bali jaʹat dina kelap cen kelunan dua dina, ngan penco tai kedalem buʹin dina. Ketoʹ aba buʹin dina are petuhun cen ulu bila, ngan laboʹ kaʹ dalem leteng, penco re matai menyet.

33Mung dulu diaʹ nubo buʹin dina are, tai ngasa kaʹ lepoʹ. Sulo re badaʹ ketoʹ puyan ina, ngan inu iaʹ lepa nuyan neng kelunan diaʹ bali nelasek didai. 34Ketoʹ kelunan diaʹ neng lepoʹ ina tai nuʹa Yesus. Dalau re taʹan Yesus, sulo re nyat ia tai kelap cen dale re kina.

Currently Selected:

MATIUS 8: KNT

Highlight

Copy