MATIUS 6

Katuk neng puyan pengencai

1“Ngimet tiga le, ayen ncem uyan puyan adet cem neng juma kelunan kadoʹ apan dulu naʹat seʹ puyan ncem. Buk kem uyan puyan ina neng juma kelunan kadoʹ, ke durat bang ngkem cen Amai hem iaʹ kaʹ surga ʹo.

2“Buk koʹ mencai ca inu me kelunan kasip, ayen ncoʹ ngelahan puyan ncoʹ ina, koʹ baʹan puyan kelunan diaʹ ngaloʹ kaʹ dalem amin sebayang, pekina pe kaʹ janan bioʹ. Ida uyan pemuyan iaʹ pekina apan dulu ke pada ida. Nawai le, lepa ne ida alaʹ mung bang nte. 3Un sepuʹo buk koʹ ke naʹ inu ban ncoʹ lesau ca kelunan kasip, tiga hoʹ naʹ a ngan selem le, idi ie tuyang ngkoʹ pe abeʹ un tisen ne. 4Talan ne puyan ncoʹ ina nuyan neng ata hoʹ tengen. Ban ne Amai hoʹ iaʹ taʹan puyan ncoʹ iaʹ selem ina, ia lete iaʹ ke nyuaʹ a palaʹ ikoʹ.”

Katuk neng puyan lemameʹ

(Un te neng Lukas 11.2-4)

5“Dalau hem lemameʹ, ayen ncem koʹ baʹan puyan kelunan ngaloʹ are. Moʹ de ubaʹ ke lemameʹ mentung nte nekejeng kaʹ dalem amin sebayang, pekina pe kaʹ sangat janan, apan dulu naʹat seʹ puyan nte. Nawai tiga le, lepa ne ida alaʹ mung bang nte. 6Un sepuʹo dalau hoʹ lemameʹ, tai ne kaʹ dalem tilung ngkoʹ, ngan malet pamen ne, ngan lemameʹ ne palaʹ Amai hoʹ iaʹ linget ina. Ngan Amai hoʹ ke tisen inu iaʹ ikoʹ uyan neng ata hoʹ tengen, ia lete iaʹ ke nyuaʹa palaʹ ikoʹ.

7“Dalau hem lemameʹ, ayen ncem ti isiu iaʹ kadoʹ ngan iaʹ abeʹ un tuman, koʹ baʹan puyan kelunan diaʹ abeʹ un pengelan nte. Moʹ de kuma Allah ke ngeninga dau pengenyat de tuman ban dadoʹ dau temameʹ de. 8Ayen ngkoʹ baʹan ida are. Ban ne Amai hem tisen inu iaʹ tekep neng ikem kena hem nyat te neng ia. 9Tuman ina pekini puyan ncem lemameʹ:

‘Ahaʹ Amai meʹ iaʹ kaʹ surga:

Tekep meʹ nyelama ngadan ncoʹ iaʹ buheʹ.

10Nai ne puyan pengaren ncoʹ ngaren ameʹ kelunan.

Nuyan ne pengubaʹ koʹ kusun tanaʹ ini koʹ baʹan kaʹ surga.

11Naʹ ne penguman iaʹ senteng penguman meʹ tau ini.

12Sau ne penyalaʹ meʹ, koʹ baʹan meʹ sau penyalaʹ kelunan diaʹ un salaʹ neng ameʹ.

13Ayen ngkin ameʹ tai sihoʹ pengeten, di lareʹ menting ameʹ cen Bali Jaʹat.’

14“Ban ne Amai hem iaʹ kaʹ surga ke sau penyalaʹ kem buk kem sau penyalaʹ kelunan diaʹ un salaʹ neng ikem. 15Un sepuʹo abeʹ Amai hem iaʹ kaʹ surga ke sau penyalaʹ kem buk kem abeʹ un ke sau penyalaʹ kelunan diaʹ un salaʹ neng ikem.”

Katuk neng puyan lemalan abeʹ un uman

16“Dalau hem lemalan abeʹ un uman, ayen ncem uyan silung iaʹ pekebampa seʹ, koʹ baʹan puyan kelunan diaʹ ngaloʹ are. Tai re masat ngan laʹu seʹ silung nte, apan dulu tisen ida lemalan abeʹ un uman. Nawai tiga le, lepa ne ida alaʹ mung bang nte. 17Dalau hem lemalan abeʹ un uman, muheʹ ne silung ngkem, ngan megut puk kem, 18apan dulu abeʹ un tisen ikem lemalan abeʹ un uman. Talan ne bang Amai hem iaʹ linget ina le tisen. Idi Amai hem iaʹ tisen inu iaʹ ikem uyan neng ata hem tengen ina, ia lete iaʹ ke nyuaʹ a palaʹ ikem.”

Galen kaʹ surga

(Un te neng Lukas 12.33-34)

19“Ayen ncem pedemun galen me usa hem tengen kusun tanaʹ ini, ban ne kina buken ngan ting ke ngejaʹat te, ngan bekelau ke ngedare ngan ngelau ue. 20Pedemun ne galen me usa hem tengen kaʹ surga, kina buken ngan ting abeʹ un senteng ke ngejaʹat te, ngan bekelau abeʹ un senteng ke ngedare ngan ngelau ue. 21Ban ne kempi inu hem un, kina lete kimet cem un.”

Serema me usa le

(Un te neng Lukas 11.34-36)

22“Ban ne mata hem ina koʹ baʹan titiu iaʹ ke ngedema usa hem are. Buk mata hem ina dema, pekina lete usa hem ke tipo kuʹun serema ha. 23Un sepuʹo buk mata hem ina jaʹat, mentem ke un pa tipo usa hem. Ngan buk serema iaʹ kaʹ dalem ikem ina tai mentem, lapa laleʹ ne pengentem ina.”

Puyan inu le ngan Tuhan Allah

(Un te neng Lukas 16.13; 12.22-31)

24“Nyahut ca kelunan senteng ke ngulaʹ usa ha palaʹ dua re tuʹa ha serengan le. Atek ke ke miʹi neng ca, ngan malaʹ neng ca. Buk are, ia ke kanan dau ca ngan muau neng ca. Pekina lete nyahut cem senteng tunuk kimet cem palaʹ Allah peserengan ngan kimet cem ke tunuk palaʹ ligit.

25“Tuman ina akeʹ badaʹ mikem, ayen ncem iʹut tawai neng puyan pengudip kem, inu iaʹ ikem ke uman ngan nisep, ngan pekina pe gelam iaʹ ke mekep usa hem. Kumpin, abeʹ pengudip kem lapa bioʹ neng ʹo penguman, ngan pekina pe usa hem, abeʹ e lapa bioʹ neng ʹo gelam kem tupe? 26Naʹat ne diseʹ sui madang tai tahaʹ ina, nai tahaʹ ini. Abeʹ de mula beneʹ, ngan majau, ngan pekina pe pempun penguman kaʹ dalem lepubung nte. Un sepuʹo Amai hem iaʹ kaʹ surga un petubo ida. Kumpin, moʹ abeʹ kem tekinco bioʹ neng ʹo sui dina tupe? 27Aheʹ neng ahang ikem iaʹ senteng ke ngedadoʹ pengudip pe man puyan iʹut tawai ie tupe?

28“Moʹ inu hem iʹut tawai neng gelam kem tupe? Naʹat ne kumpin diseʹ puyan piu kaʹ dalau baʹi, abeʹ de pegayeng, abeʹ de uyan gelam me usa re. 29Un sepuʹo dau heʹ mikem, naʹ pe Suliman neng seʹ pengekayaʹ a, abeʹ e un gelam iaʹ tiga koʹ baʹan piu dina ne. 30Buk ke pekina ne Allah ke pegelam udu kaʹ dalau baʹi, iaʹ un tau ina, ngan neng kenempam me dulu pet kaʹ mpun luten, abeʹ Allah iaʹ ke tekinco ke pegelam ikem tupe? Inu tepa pengelan ncem? 31Ayen ncem iʹut tawai kuma ha: ‘Inu iaʹ akeʹ ke uman, ngan inu iaʹ akeʹ ke nisep, ngan inu iaʹ akeʹ ke un?’ 32Puyan ini ne iaʹ lemuto piʹut tawai kelunan diaʹ abeʹ un pengelan. Amai hem iaʹ kaʹ surga tisen neng mung inu iaʹ tekep ikem ke un. 33Di lareʹ iaʹ ading ikem ke mita, puyan pengaren Allah ke ngaren ilu kelunan, peging ngan pengubaʹ a neng ilu. Idi le Allah ke naʹ mung inu diaʹ ca dina mikem. 34Tuman ina, ayen ncem tai iʹut tekaʹ tawai neng puyan iaʹ ke nai nempam, uban ne nempam un pe sukat puyan iaʹ ke piʹut tawai hem. Inu tuman ncem ke ngepit te ngan puyan iʹut tawai hem tau ini.”

Currently Selected:

MATIUS 6: KNT

Highlight

Copy