MATIUS 5

Katuk Yesus kusun mudung

1Dalau Yesus taʹan kelunan kadoʹ dina, sulo tai ie neng usun ca mudung ngan madung kidi. Mung nte diaʹ bayaʹ dau katuk ke pempun teliling ia. 2Sulo ho nading pekatuk ida:

Pengebangen iaʹ lan

(Un te neng Lukas 6.20-23)

3“Bangen ne kelunan diaʹ tisen ida kasip tekaʹ neng berua re;

ban ne ida iaʹ ke kahum dalem puyan pengaren

Tuhan Allah ke ngaren ilu kelunan.

4“Bangen ne kelunan diaʹ nange;

ban ne Allah iaʹ ke niga kimet de.

5“Bangen ne kelunan diaʹ ngelibaʹ kimet de;

ban ne ida ne diaʹ ke alaʹ inu iaʹ Allah lepa

petuket ke naʹ milu.

6“Bangen ne kelunan diaʹ lemuto bayaʹ dau pengubaʹ Allah;

ban ne ida ne diaʹ ke tisen tekaʹ pengebeso

kuʹun peniga Allah.

7“Bangen ne kelunan diaʹ un pengelesau neng dulu diaʹ ca;

ban ne Allah iaʹ ke un pengelesau neng ida lete.

8“Bangen ne kelunan diaʹ telit kimet de;

ban ne ida lete diaʹ ke taʹan Allah.

9“Bangen ne kelunan diaʹ uyan tiga neng ahang ikem kelunan;

ban ne Allah ke pisiu ida diaʹ anak ke.

10“Bangen ne kelunan diaʹ dulu nyakit tuman

pemuyan nte bayaʹ pengubaʹ Allah;

ban ne ida iaʹ ke kahum dalem puyan pengaren

Allah ke ngaren ilu kelunan.

11“Bangen ne ikem buk dulu ke pejaʹat dau neng ikem, ngan nyakit ikem, ngan pekabi ikem man naʹan naʹan isiu palo, ban tuman ncem bayaʹ akeʹ. 12Bangen ne ikem ngan tiga ne saheʹ kem, ban ne bioʹ ne bang kem iaʹ lepa tenup kaʹ surga. Kumpin puyan dulu nyakit pegawa Tuhan cen naʹaʹ, pekina lete puyan dulu neng ikem naʹkini.”

Usen ngan serema

(Un te neng Markus 9.50; Lukas 14.34-35)

13“Kumpin seʹ usen tekep un neng penguman le, pekina lete ikem un neng usun tanaʹ ini. Buk usen ina ke tai jeling, kumpin seʹ le ke pelaʹit te ne laʹa. Abeʹ un ca inu iaʹ bang nge. Ina le dulu ke pet te ngan cut te.

14“Kumpin seʹ puyan serema ngedalau ntem, pekina lete ikem ne iaʹ sereket dema neng usun tanaʹ ini. Lepoʹ iaʹ un neng usun ca mudung, abeʹ e ke suhuk. 15Abeʹ ca kelunan iaʹ pejiget peritaʹ a sulo ho mekep pe man ca tukaʹ, di lareʹ ia ke mahung nge neng usun padung peritaʹ ina, apan serema ina ke ngedema mung dulu diaʹ un kaʹ dalem amin ina. 16Pekina lete tekep serema hem ke ngedema kelunan apan nte taʹan mung seʹ pemuyan ncem un tiga, sulo re pempau Amai hem iaʹ un kaʹ surga.”

Katuk neng puyan Katuk Adet

17“Ayen ncem kuma akeʹ ke nai mesau Katuk Adet Musa ngan katuk diaʹ pegawa Tuhan cen naʹaʹ. Akeʹ nai ne, abeʹ uban nceʹ ke mesau dina, di lareʹ akeʹ nai ke pedaʹam me. 18Nawai tiga le. Ngajan langit ngan usun tanaʹ ini un, peletoʹ-letoʹ Katuk Adet abeʹ un senteng ke pesau ne, di pe ca bute iʹut le, pekina pe ca keruek kalung le, nyahut te senteng ke pesau ne pa kenai tau bioʹ kuʹo udip kusun tanaʹ ini. 19Tuman ina, aheʹ iaʹ ngesa katuk ukum, naʹ pia iʹut le, ngan sulo ho pekalai dulu diaʹ ca uyan pekina, kelunan ina dulu ke pisiu iʹut le tegoʹ ke nai puyan pengaren Allah ke ngaren ilu kelunan. Un sepuʹo, aheʹ iaʹ ke ngkang Katuk Adet ngan pekalai dulu diaʹ ca uyan pekina, kelunan ina dulu ke pisiu bioʹ tegoʹ nai puyan pengaren Allah ke ngaren ilu kelunan. 20Ini dau heʹ mikem, ikem senteng kahum neng puyan pengaren Allah ke ngaren kelunan buk kem tangen bayaʹ dau pengubaʹ Allah, pelapa cen ʹo penangen diaʹ guru Katuk Adet ngan diaʹ Perisi bayaʹ dau pengubaʹ a.”

Katuk neng puyan iʹa

21“Ikem lepa ngeringa dau katuk kelunan cen naʹaʹ iaʹ kuma ha: ‘Ayen ncem lematai kelunan. Aheʹ iaʹ lematei kelunan, dulu ke ngkin ia tai palaʹ diaʹ pebetep ukum.’ 22Naʹkini akeʹ badaʹ mikem, aheʹ iaʹ buseʹ neng cenganak ke, dulu ke ngkin ia tai palaʹ diaʹ pebetep ukum. Ngan pekina pe iaʹ kuma cenganak ke apaʹ seʹ, dulu ke ngkin ia tai palaʹ Mpun diaʹ Lataʹ diaʹ ke pebetep ukum. Ngan pekina pe iaʹ kuma cenganak ke untau, abeʹ pesau ia iaʹ un kuʹo ho dalem ukum luten. 23Tuman ina ne, buk kem tai naʹ pengencai hem palaʹ Tuhan Allah, sulo hem petawai cenganak kem sakit saheʹ neng ikem, 24mahung ne pengencai hem ina kena kaʹ juma padung pengencai ina, tai ne ikem ading uyan tiga saheʹ neng ahang ikem ngan cenganak kem. Uʹo ina hem nai ngeliwet ngan naʹ pengencai hem ina palaʹ Tuhan Allah.

25“Buk un ca usa iaʹ ubaʹ ke ngadu ikem kukoʹ dulu pebetep tiraʹ, uyan ne tiga ngan ne jinan un seʹ awang nge lepe, kena dulu tai ngkin ikem kukoʹ dulu pebetep tiraʹ. Buk ne ikem lepa abeʹ kina, seʹ kelunan ina ke naʹ ikem palaʹ diaʹ pebetep ukum, ngan diaʹ pebetep ukum dina ke naʹ ikem palaʹ pulis, penco pulis ke naʹ ikem kaʹ dalem amin sepin. 26Ini dau heʹ mikem, ikem ke ngelineʹ kaʹ dalem amin sepin ina pa hem kuʹo nyuaʹ ukum ngkem.”

Katuk neng pemung nyelem

27“Ikem lepa ngeringa isiu diaʹ pekini dau: ‘Ayen pemung nyelem.’ 28Naʹkini akeʹ badaʹ mikem, aheʹ aheʹ iaʹ naʹat leto mentung nge ngimet ke ngan ne, lepa ne ia pemung nyelem dalem kimet te. 29Buk mata hem iaʹ tahaʹ taʹu ke ngkin ikem uyan penyalaʹ, tiga pulang ngkem miluk mata hem ina ngan pet te. Ban ne tiga pulang ngkem sau ca sangat usa hem, neng ʹo mung usa hem tai kedalem ukum luten. 30Buk ujoʹ kem tahaʹ taʹu ke ngkin ikem uyan penyalaʹ, netek ne ia ngan pet te. Tiga pulang ca sangat usa hem pesau, neng ʹo mung usa hem tai kaʹ dalem ukum luten.”

Katuk neng petat

(Un te neng Matius 19.9; Markus 10.11-12; Lukas 16.18)

31“Cen kena dulu badaʹ: ‘Aheʹ iaʹ petat ngan leto ho, tekep laki ina naʹ ca surat iaʹ badaʹ ia petat ngan leto ho.’ 32Naʹkini akeʹ badaʹ mikem, aheʹ iaʹ petat ngan leto ho, ngan leto ina abeʹ e petaro neng diaʹ laki ie, un sepuʹo laki ina are, atek ke salaʹ lete uban ne uyan taro me leto ho tegoʹ leto ho alaʹ laki mading. Ngan laki mading iaʹ ke alaʹ leto ina laʹa, atek ke petaro lete ina.”

Katuk neng puyan santet

33“Lepa ne ikem kenahan kumpin dau katuk dulu cen naʹaʹ iaʹ kuma ha: ‘Ayen ncem lepo isiu iaʹ ikem lepa ban petuket. Kanan ne isiu iaʹ ikem lepa ban patek neng juma Tuhan.’ 34Un sepuʹo iaʹ akeʹ ke badaʹ mikem naʹkini, ayen peletoʹ uyan santet neng inu inu buk kem ke patek isiu hem. Ayen ncem nyantet man ngadan langit, ban langit ina adan pengaren Allah; 35pekina pe man ngadan tanaʹ, ban tanaʹ ina senap taket te; ngan pekina pe Yerusalim, ban Yerusalim ina lepoʹ paren bioʹ. 36Ngan pekina pe ayen ncem nyantet man ngadan ulu hem tengen, ban abeʹ kem senteng uyan ca uhat puk kem tai puteʹ, ngan pekina pe tai saleng. 37Talan ne ikam kuma ha ‘Ahaʹ’ neng iaʹ ahaʹ, ngan ‘Naʹun’ neng iaʹ naʹun. Mung isiu diaʹ lapa neng ina, cen Bali Jaʹat kenai ie.”

Katuk neng puyan nyuaʹ

(Un te neng Lukas 6.29-30)

38“Lepa ne ikem ngeringa isiu iaʹ pekini dau: Mata saliu mata, ngan jipen saliu jipen.’ 39Un sepuʹo iaʹ akeʹ ke badaʹ mikem naʹkini, ayen ncem nyuaʹ kelunan diaʹ un salaʹ neng ikem. Di lareʹ buk aheʹ iaʹ ke nepap pinga hem tahaʹ taʹu, talan ne ia nepap pinga hem tahaʹ kabing laʹa. 40Buk aheʹ iaʹ ke ngadu ikem tai kaʹ juma diaʹ pebetep ukum, ban ne ubaʹ ke alaʹ sapai hem, talan ne ia alaʹ sapai dadoʹ kem pe laʹa. 41Buk ca usa sedadu lepoʹ dulu ke lemejen ikem baʹ mpin ne ca batu coʹ o, tiga hem baʹ mpin ina ca batu tekinco ho laʹa. 42Buk ca kelunan ke nyat inu neng ikem, tiga hem naʹ mia. Ngan buk ca kelunan ke kanan inu hem kena, naʹ ne mia kena.”

Malaʹ neng bunoʹ

(Un te neng Lukas 6.27-28, 32-36)

43“Lepa ne ikem ngeringa isiu iaʹ pekini dau: ‘Malaʹ ne neng tuyang ngkem, ngan miʹi neng bunoʹ kem.’ 44Un sepuʹo iaʹ akeʹ ke badaʹ mikem naʹkini, malaʹ ne neng bunoʹ kem, ngan lemameʹ ne me kelunan diaʹ ke petuyen ikem, 45apan ncem tai nuyan anak Amai hem iaʹ kaʹ surga. Ban ne Allah petadan serema tau ue neng usun kelunan diaʹ tiga, ngan pekina pe neng usun kelunan diaʹ jaʹat. Ia naʹ ujan neng usun kelunan diaʹ menco puyan iaʹ teneng, ngan pekina pe neng usun kelunan diaʹ menco puyan iaʹ jaʹat. 46Nyahut un ca bang ngkem cen Tuhan Allah ne, buk kem bang ke malaʹ neng kelunan diaʹ malaʹ neng ikem tuaʹ le. Idi pe kelunan diaʹ alaʹ pupu, ida ti pekina lete. 47Buk kem bang kejahi ngan diaʹ tuyang ngkem tuaʹ le, inu tekinco ho neng seʹ puyan pengalai dulu. Kelunan diaʹ abeʹ un pengelan pe uyan pekina. 48Tekep kem dadoʹ kimet koʹ baʹan Amai hem iaʹ kaʹ surga un dadoʹ kimet.”

Currently Selected:

MATIUS 5: KNT

Highlight

Copy