MATIUS 18

Aheʹ iaʹ pengebioʹ le

(Un te neng Markus 9.33-37; Lukas 9.46-48)

1Dalau ina nai diaʹ bayaʹ katuk Yesus palaʹ ia, mentung nte lemutu ia: “Neng puyan pengaren Allah ke ngaren ilu kelunan, aheʹ iaʹ ke nuyan iaʹ pengebioʹ le tupe?”

2Sulo Yesus mengin ca anak. Kun ne cuk ia nekejeng neng juma re. 3Penco dau Yesus kuma ha: “Nawai tiga le. Nyahut cem ketai kedalem puyan pengaren Allah ne, buk kem abeʹ un ke ngaliu seʹ puyan ncem koʹ baʹan puyan ca anak are. 4Aheʹ kelunan iaʹ ke ngelibaʹ tawai ie koʹ baʹan puyan anak ini are, ia lete iaʹ ke nuyan iaʹ pengebioʹ dalem puyan pengaren Allah ina. 5Ngan aheʹ iaʹ ke nyelama alaʹ ca anak koʹ baʹan ini are dalem ngadan nceʹ, ia lete iaʹ nyelama alaʹ akeʹ.”

Pengeten iaʹ ngkin penyalaʹ

(Un te neng Markus 9.42-48; Lukas 17.1-2)

6Un dau Yesus laʹa: “Buk un aheʹ iaʹ ke nyalaʹ pengelan me ca anak iʹut dini neng akeʹ, tiga pulang kelunan ina nelu ca lesung batu neng batuk ke, ngan lemenca ia kaʹ dalem banget iaʹ dalem le. 7Siʹau pe dulu diaʹ kusun tanaʹ ini, moʹ kadoʹ puyan nte iaʹ ke pelaboʹ kelunan neng puyan iaʹ salaʹ. Sematu pemuyan iaʹ pekini lemuto un lete. Un sepuʹo siʹau ne kelunan diaʹ uyan ukoʹ kelunan ke laboʹ neng penyalaʹ.

8“Buk ujoʹ koʹ, ngan pekina pe taket coʹ, iaʹ ke ngkin ikoʹ uyan penyalaʹ, tiga hoʹ netak ke ngan pet te. Tiga pulang ngkoʹ tai kaʹ dalem udip surga abeʹ un ujoʹ ngan taket ceng bese, neng ʹo dulu ke pet ikoʹ peging ngan dua re ujoʹ koʹ ngan dua re taket coʹ kaʹ dalem ukum luten, iaʹ are tisen ketai pataʹ. 9Ngan laʹa buk mata hoʹ iaʹ ke ngkin ikoʹ uyan salaʹ, tiga hoʹ miluk ke ngan pet te. Tiga pulang ngkoʹ tai kaʹ dalem udip surga ngan mata hoʹ ceng bese tuaʹ le, neng ʹo dua re mata hoʹ peging usa hoʹ dulu ke pet kaʹ dalem ukum luten.”

Kata katuk neng pun dumba iaʹ lingu

(Un te neng Lukas 15.3-7)

10“Ngimet tiga le, ayen ncem peletoʹ ke panyi neng ca anak iaʹ dumit dini. Lan dau heʹ badaʹ mikem, melikat de lemuto un kaʹ juma Amai heʹ kaʹ surga. [ 11Anak Sio ini nai apan ne ke pudip kelunan diaʹ lingu.]

12“Kumpin baʹan ncem? Buk ca kelunan un ca ato pun dumba, inu iaʹ ia ke uyan buk ca neng ahang ida ketai lingu? Atek kelunan ina ke mecin lete piʹen puloʹ piʹen pun dumba diaʹ ngujau kaʹ bake mudung, ngan penco tai pita pun dumba iaʹ tai lingu idai are. 13Lan dau heʹ mikem, tegoʹ o taʹan pun dumba ina, atek banget laleʹ le tekaʹ tawai ie uʹo ho alaʹ pun dumba iaʹ tai lingu ina, neng ʹo diaʹ piʹen puloʹ piʹen pun dumba diaʹ abeʹ un tai lingu dina. 14Pekina lete Amai hem iaʹ kaʹ surga, iaʹ abeʹ un ubaʹ ca anak dumit dini ketai lingu.”

Cenganak le iaʹ uyan penyalaʹ

15Buk cenganak koʹ uyan penyalaʹ neng ikoʹ, tai ne ikoʹ palaʹ ia ngan badaʹ penyalaʹ a. Uyan ne puyan ini selem le neng ata hem dua tengen. Buk ke mayo dau hoʹ, seʹ koʹ lepa alaʹ tawai cenganak koʹ ngeliwet ne ina. 16Buk ke abeʹ un ke mayo dau hoʹ, tiga hoʹ mengin ca usa buk are dua usa pe ngan ncoʹ, ban ne koʹ baʹan dau isiu dalem Kitap iaʹ kuma ha: “Singket luʹung isiu iaʹ mekem penyalaʹ, tekep lete un dua buk are telu usa pe diaʹ ke petugen ne, ngan diaʹ senteng ke peteneng isiu ina. 17Buk ke are un mayo dau re telu, tiga hem badaʹ puyan ina palaʹ mpun sidang. Ngan buk ke abeʹ un mayo dau mpun sidang, tiga hem naʹ ia koʹ baʹan kelunan diaʹ abeʹ un pengelan are, ngan koʹ baʹan kelunan diaʹ alaʹ pupu are, diaʹ tekep ke alaʹ denga Injil.”

Puyan mulen ngan puyan pedayo

18“Lan dau heʹ mikem, inu iaʹ ikem mulen neng usun tanaʹ ini, ia lete iaʹ Tuhan ading mulen kaʹ surga. Ngan inu iaʹ ikem pedayo kaʹ usun tanaʹ ini, idi lete iaʹ Tuhan ading ke pedayo kaʹ surga.

19“Un pelaʹa akeʹ ke badaʹ mikem, buk un dua usa neng ahang ikem kusun tanaʹ ini, ke lemameʹ ngan ca lem kimet neng ca puyan, mele puyan inu dalem temameʹ kem, Amai heʹ iaʹ kaʹ surga lete iaʹ ke uyan ne mikem ʹo. 20Tuman ina, kempi un dua, buk are telu usa pe ke pempun ngan pebulung dalem ngadan nceʹ, kina lete akeʹ ke un neng ahang ida.”

Kata katuk neng ca ulaʹ iaʹ abeʹ un lesau kelunan

21Nai Peterus palaʹ Yesus ngan lemutu ia: “Ahaʹ Amai, ke kudaʹ liwai cenganak keʹ senteng ke uyan penyalaʹ neng akeʹ, ngan ke kudaʹ liwai heʹ tekep ke sau penyalaʹ a neng akeʹ tupe? Pa tujoʹ liwai mo?”

22Un dau Yesus mipa ia: “Abeʹ e tujoʹ liwai le, un sepuʹo tujoʹ liwai tujoʹ puloʹ. 23Uban puyan pengaren Allah ukoʹ baʹan puyan ca laki paren iaʹ ngimet ke peteneng surat utang nge ngan panyen ne. 24Dalau ue nading ke peteneng surat utang ina, nai dulu ngkin ca usa neng ahang panyen dina palaʹ ia. Un utang nge kudaʹ kudaʹ juta ligit. 25Moʹ panyen ina kasip, abeʹ un inu man ne ke nyuaʹ utang nge are. Ina ukoʹ laki bioʹ ina cuk dulu tai matu panyen ina, tai ulaʹ dulu, peging ngan leto ho ngan diaʹ anak ke, ngan ketoʹ galen ne, man ne nyuaʹ utang nge. 26Sulo panyen ina muʹup sutlep ngan nyat lesau neng laki bioʹ ina. Un dau ue: ‘Kudaʹ pe ikoʹ denaʹ tawai neng akeʹ ading. Atek keʹ ke nyuaʹ lete utang ngkeʹ ne mung.’ 27Tai un saheʹ ne tekaʹ laki bioʹ ina neng ia, sulo ho lematai surat utang nge, ngan cuk ia tai uleʹ ngan tiga.

28“Dalau tai panyen ina kawang, sulo ho petegoʹ ngan ca diaʹ tuyang nge iaʹ ban un utang kediʹut de ligit neng ia. Kun ne ngkang ia, mentung nge lemengen batuk ke. Un dau ue: ‘Nyuaʹ ne utang ngkoʹ are neng akeʹ.’ 29Sulo tuyang nge are, muʹup sutlep ngan nyat lesau neng ia, un dau ue: ‘Kudaʹ pe ikoʹ denaʹ ne tawai neng akeʹ ading. Atek keʹ ke nyuaʹ lete utang ngkeʹ ne mung ʹo. 30Un sepuʹo panyen ina, abeʹ e ubaʹ, bang tai ie ngkin ia kaʹ dalem amin sepin, pa ha nyuaʹ utang nge are.

31“Tegoʹ panyen diaʹ ca tisen neng puyan ina, jaʹat laleʹ ne tekaʹ kimet de, sulo tai re badaʹ mung ban puyan ina me laki bioʹ idai. 32Penco laki bioʹ ina mengin panyen ne iaʹ jaʹat idai kaʹ dalem. Un dau ue neng ia: ‘E ikoʹ panyen iaʹ jaʹat, lepa ne akeʹ lematai mung utang ngkoʹ neng akeʹ tuman ncoʹ nyat lesau dau neng akeʹ. 33Tekep pe ikoʹ ke peluhaʹ pengelesau hoʹ neng tuyang ngkoʹ, kuaʹ koʹ baʹan puyan pengelesau heʹ neng ikoʹ are.’ 34Pelapa buseʹ ne laki bioʹ ina, sulo ho ngukum panyen ne iaʹ jaʹat ina, naʹ ia kaʹ dalem amin sepin pa ha ke nyuaʹ mung utang nge.”

35Un dau Yesus pelepek katuk ina: “Pekina lete puyan Amai heʹ iaʹ kaʹ surga keneng ikem, singket singket usa hem, buk kem abeʹ un ke sau penyalaʹ cenganak kem ngan tekaʹ keluʹung kimet cem.”

Currently Selected:

MATIUS 18: KNT

Highlight

Copy