MATIUS 12

Putu neng puyan Tau Kelineʹ

(Un te neng Markus 2.23-28; Lukas 6.1-5)

1Abeʹ majan ʹo ina, neng ca Tau Kelineʹ, tai Yesus peging ngan diaʹ bayaʹ katuk ke masat kaʹ dalau uma padai gandum. Tai laʹu ne diaʹ bayaʹ katuk ke dina, sulo re nuget ulo padai gandum dina ngan uman luang nge. 2Tegoʹ kelunan Perisi taʹan seʹ puyan ini, un dau re neng Yesus: “Naʹat ne, puyan diaʹ bayaʹ katuk koʹ dini, ida ngesa Katuk Adet Musa tegoʹ Tau Kelineʹ.”

3Un dau Yesus mipa ida: “Abeʹ lepe ikem ban baca puyan Daut dalau ue ngan diaʹ tuyang nge laʹu are? 4Tai Daut kaʹ amin sebayang peging ngan diaʹ tuyang nge, sulo re uman ruti iaʹ lepa dulu mencai palaʹ Allah. Naʹ pe pekina, atek de ngesa Katuk Adet Musa lete, moʹ de uman ruti dina are. Bang diaʹ detaʹu diaʹ ngkang adet le diaʹ tekep uman ne. 5Ngan abeʹ lepe ikem ban baca dalem Katuk Adet Musa iaʹ kuma ha, singket Tau Kelineʹ diaʹ detaʹu diaʹ ngkang adet kaʹ dalem Umaʹ Palan Allah, iaʹ lan ne ida ngesa katuk ukum sihoʹ Tau Kelineʹ? Naʹ pe pekina, abeʹ de salaʹ. 6Akeʹ badaʹ mikem, kini un ca inu iaʹ lapa bioʹ neng ʹo Umaʹ Palan Allah. 7Lepa un ne surat dalem Kitap iaʹ kuma ha: ‘Abeʹ e liwa iaʹ akeʹ ubaʹ, di lareʹ pengelesau iaʹ akeʹ ubaʹ.’ Buk lan ncem tisen sen isiu ini, mpi hem ke mekem salaʹ me kelunan diaʹ teneng? 8Ban ne Anak Sio ini iaʹ atek Tuʹa le neng Tau Kelineʹ.”

Laki iaʹ uping ujoʹ

(Un te neng Markus 3.1-6; Lukas 6.6-11)

9Tai Yesus mecin ukoʹ o kina, penco tai ie neng ca amin sebayang. 10Kina un ca kelunan iaʹ uping ujoʹ o. Dalau ini un palai kelunan diaʹ ubaʹ ke pita ukan man nte ke mekem salaʹ me Yesus. Un dau re lemutu ia: “Kumpin buk le paget kelunan tegoʹ Tau Kelineʹ? Un puyan ina ke ngesa adet le tupe?”

11Un dau Yesus mipa ida: “Kumpin buk un ca usa neng ahang ikem iaʹ un ca pun dumba, sulo tai dumba ina laboʹ neng ca lubang iaʹ dalem le tegoʹ Tau Kelineʹ. Masaʹ kem ketai alaʹ ia ngan naʹ ia kawang cen lubang ina? 12Lapa dioʹ selum le neng ca kelunan, neng ʹo selum le neng ca usa dumba. Tuman ina, abeʹ adet le ke mulen ilu lesau ca kelunan tegoʹ Tau Kelineʹ.” 13Sulo dau Yesus neng laki ina: “Mejo ne ujoʹ koʹ.”

Penco laki ina mejo ujoʹ o. Dalau ina lete tiga ne ujoʹ laki ina, koʹ baʹan iaʹ ceng bese are. 14Dalau ina sulo tai kelunan Perisi dina mecin cen ukoʹ de ngan peseket ubaʹ ke lematai Yesus.

Lawa iaʹ Allah lemileʹ

15Dalau Yesus kenahan dau puyan ina, sulo tai ie mecin cen ina, ngan kadoʹ dulu diaʹ tai bayaʹ ia. Kun ne paget mung kelunan diaʹ sakit. 16Mentung nge mulen ida tai badaʹ puyan ne ina me dulu diaʹ ca, 17apan tai palup ne dau tiraʹ Allah iaʹ pegawa Yesaya lepa badaʹ cen naʹaʹ are, iaʹ pekini dau ue:

18“Ini ne lawa heʹ iaʹ lepa akeʹ lemileʹ,

iaʹ akeʹ malaʹ, ngan iaʹ sihoʹ neng pengubaʹ keʹ.

Akeʹ ke mahung Berua heʹ mia,

ngan ia iaʹ ke badaʹ pengebetep tiraʹ keʹ me ketoʹ naʹan lepoʹ.

19Un sepuʹo abeʹ e ke pesakat ngan dulu,

ngan abeʹ e bioʹ dau nyakat dulu, katuk ke neng ahang janan.

20Ngan abeʹ e ke lemetup buloʹ iaʹ pelet

ngan pekina pe abeʹ e ke lemataʹ apeʹ peritaʹ iaʹ mesap.

Ia ke pegayeng ngan tangen, pa ha ke uyan

puyan iaʹ teneng ngan iaʹ un usun.

21Ngan ketoʹ lepoʹ ke napi saheʹ neng ia.”

Yesus ngan bali Balsibul

(Un te neng Markus 3.20-30; Lukas 11.14-23)

22Uʹo ina nai dulu ngkin palaʹ Yesus ca kelunan butaʹ ngan ameng, moʹ bali nelasek ia. Sulo Yesus paget kelunan ina, pa ha mencam pisiu ngan naʹat. 23Tai salam ne tekaʹ kelunan kadoʹ taʹan seʹ puyan ina. Kun nte lemutu ida selepeʹ: “Un ne ke Anak Daut taʹin?”

24Dalau kelunan Perisi kenahan dau ina, un dau re: “Ia senteng pekarap bali moʹ Balsibul, iaʹ tuʹa bali, iaʹ naʹ nyingan me ia.”

25Tisen ne Yesus kimet de neng ia, sulo dau ue neng ida: “Ca lepoʹ iaʹ tai peselepeʹ kimet ke pepatai neng ahang ida, abeʹ majan lepoʹ ina ke petebulung. Ca lepoʹ bioʹ, ngan pekina pe ca pengamin iaʹ tai peselepeʹ kimet ke pepatai neng ahang ida, mpi un majan kena lepoʹ ina ketai pasi ʹo. 26Pekina pe buk ca mpun ke pepatai ngan mpun diaʹ ca dalem pengaren Bali Sitan, ini ne iaʹ ke ngkin pengaren nte ketai pasi ngan ke salai laho. 27Un dau hem neng akeʹ, ban Bali Balsibul iaʹ naʹ nyingan makeʹ man nceʹ pekarap bali. Buk ke pekina, aheʹ iaʹ naʹ nyingan me diaʹ bayaʹ katuk kem man nte pekarap bali dini? Diaʹ bayaʹ katuk kem tengen iaʹ badaʹ kimet cem ina salaʹ. 28Un sepuʹo Berua Allah iaʹ naʹ nyingan man nceʹ pekarap bali, puyan ini iaʹ badaʹ ban puyan pengaren Allah lepa un neng ahang ikem.

29“Ca kelunan pe abeʹ un senteng tai kaʹ dalem amin ca kelunan iaʹ pali ngan ke munan galen ne, buk ke abeʹ un lemeka kelunan iaʹ pali ina ading. Ina le ia senteng ke munan galen ne.

30“Aheʹ iaʹ abeʹ un ubaʹ ke mayo dau heʹ, iaʹ lan ne ia iaʹ nyakat akeʹ. Ngan aheʹ iaʹ abeʹ un mepo ke kelimpun ngan nceʹ, iaʹ lan ne ia iaʹ lemurat te. 31Tuman ina akeʹ badaʹ mikem, mele inu pe penyalaʹ kelunan, koʹ baʹan pemuyan nte ngan isiu re iaʹ jaʹat, uban mung dina senteng pesau. Un sepuʹo, aheʹ iaʹ ke pejaʹat Berua Buheʹ, nyahut penyalaʹ a ketai pesau ne. 32Aheʹ iaʹ ke pejaʹat Anak Sio ini, penyalaʹ a senteng pesau. Un sepuʹo aheʹ iaʹ ke pejaʹat Berua Buheʹ ina, nyahut penyalaʹ a ketai pesau ne, naʹ pe ia naʹkini, ngan pekina pe abeʹ bayaʹ.”

Ca inan buaʹ ngan buʹan ne

(Un te neng Lukas 6.43-45)

33“Cen inan buaʹ iaʹ tiga le ilu senteng ke alaʹ buʹan iaʹ tiga. Un sepuʹo buk inan buaʹ ina jaʹat, pekina lete buʹan ne jaʹat. Mele tiga ngan jaʹat pe ca inan buaʹ, ilu ngetisen ne kuʹun buʹan ne. 34E lepoʹ ncung ulai, kumpin ncem senteng ke menco isiu iaʹ tiga idi pe petem jaʹat dalem kimet cem? Ban ne inu iaʹ sangan dalem kimet kelunan, ina lete iaʹ kenai kawang cen paʹ de. 35Ca kelunan iaʹ tiga, ia lete iaʹ ke pisiu inu iaʹ tiga cen pengetiga dalem kimet te. Ngun ca kelunan iaʹ jaʹat, ia lete iaʹ ke pisiu inu iaʹ jaʹat cen pengejaʹat dalem kimet te.

36“Akeʹ badaʹ mikem, neng Tau Bioʹ iaʹ ke pebetep ukum kusun tanaʹ ini, singket usa le kelunan ke pebaʹ neng singket luʹung isiu le iaʹ pebareng-areng, iaʹ ilu ban lepa pisiu. 37Ban ne isiu hem tengen iaʹ ke pebetep tiraʹ neng ikem, iaʹ ke badaʹ teneng buk ke are salaʹ.”

Dulu nyat tedanaʹ nyingan

(Un te neng Markus 8.11-12; Lukas 11.29-32)

38Lepa ina, kelunan Perisi ngan diaʹ guru Katuk Adet Musa pisiu ngan Yesus. Un dau re: “Guru, ubaʹ meʹ ke taʹan seʹ koʹ ke uyan ca tedanaʹ nyingan.”

39Penco dau Yesus: “Kelunan diaʹ mudip ngajan ini un jaʹat kimet de, ngan puyan nte pejaʹat Tuhan Allah. Ikem ke cuk akeʹ uyan ca puyan nyingan mo? Naʹun. Bang ca tuaʹ tedanaʹ nyingan iaʹ akeʹ ke peluhaʹ mikem uʹo, iaʹ ina tedanaʹ nyingan pegawa Yunus. 40Koʹ baʹan puyan pegawa Yunus telu tau ngan telu alem me kaʹ dalem batek ca atuk bioʹ, pekina lete Anak Sio ini telu tau ngan telu alem me kaʹ iaʹ pengedalem-dalem tanaʹ uʹo. 41Tegoʹ Tau Ukum Bioʹ ʹo, mung kelunan lepoʹ Niniwe kenai beteʹ ngan ke mekem salaʹ mikem, moʹ de nyepuleʹ kimet de cen penyalaʹ de, ʹo re lepa kenahan dau pegawa Yunus penco katuk. Lan dau heʹ badaʹ mikem, naʹkini un ca iaʹ lapa bioʹ neng ʹo pegawa Yunus. 42Tegoʹ Tau Ukum Bioʹ ʹo, ke nai ca paren bioʹ leto cen tahaʹ kabing asat tau, kenai ie beteʹ ngan ke mekem salaʹ mikem, ban lepa ne ia tai masat teliling pa beluaʹ usun tanaʹ ini uban ne ubaʹ ke ngeringa dau katuk Suliman iaʹ tudi ina. Ngan akeʹ badaʹ mikem pelaʹa, naʹkini un ca iaʹ lapa bioʹ neng ʹo Suliman.”

Puyan kenai bali jaʹat ke ngeliwet

(Un te neng Lukas 11.24-26)

43“Dalau bali jaʹat tai kelap cen ca kelunan, sulo tai ie masat neng ukoʹ iaʹ muhang megang, tai pita ukoʹ o ke ngelineʹ ngan mesun. Buk ke abeʹ un tegoʹ ca ukoʹ o, 44un dau ue pisiu neng ata ha tengen: ‘Tiga sepe akeʹ tai ngeliwet ne palaʹ amin iaʹ akeʹ lepa mecin idai laʹa.’ Sulo nai ie ngeliwet, tegoʹ amin idai kelangan, buheʹ, ngan demeng seʹ ban ne. 45Penco tai ie kawang, tai ie mengin tujoʹ de bali jaʹat iaʹ lapa jaʹat neng ʹo ia. Sulo re nai ngelineʹ neng amin ina. Ina ukoʹ batung kelunan ina abeʹ un tuman diseʹ ketai kuʹo ho, lapa jaʹat neng ʹo pemuyan ne iaʹ cen kena are. Ini ne iaʹ ke nuyan neng kelunan diaʹ jaʹat ngajan ini uʹo.”

Ueʹ ngan diaʹ cenganak Yesus

(Un te neng Markus 3.31-35; Lukas 8.19-21)

46Dalau Yesus pisiu ngan kelunan kadoʹ, tegoʹ ina kenai ueʹ e ngan diaʹ cenganak ke abeʹ. Ida nekejeng kawang ngan nyat awang apan nte senteng ke pisiu ngan Yesus. 47Ina ukoʹ ca usa tai pisiu ngan Yesus. Un dau ue: “Naʹat coʹ ading. Un ueʹ koʹ de, ngan diaʹ cenganak koʹ kaʹ awang ne, ke mengin ikoʹ, moʹ de ubaʹ ke pisiu ngan ncoʹ.”

48Un dau Yesus mipa ia: “Aheʹ iaʹ ueʹ keʹ tupe? Ngan aheʹ diaʹ cenganak keʹ tupe?” 49Sulo ho mencai ujoʹ o, nujoʹ diaʹ bayaʹ katuk ke dina, ngan un dau ue: “Naʹat ne ading. Ini ne ueʹ keʹ ngan diaʹ cenganak keʹ. 50Aheʹ iaʹ uyan pengubaʹ Amai heʹ iaʹ kaʹ surga, kelunan ina ne cenganak laki heʹ, ngan cenganak leto heʹ, ngan pekina pe ueʹ keʹ.”

Currently Selected:

MATIUS 12: KNT

Highlight

Copy