LUKAS 9
9
Puloʹ dua usa tai nuyan Lawa Injil
(Un te neng Matius 10.5-15; Markus 6.7-13)
1Kun Yesus mengin diaʹ puloʹ dua usa diaʹ bayaʹ katuk ke are, penco ho naʹ mida nyingan ngan penyukat man nte ke sau mung bali, ngan paget mung penyakit. 2Sulo kun ne cuk ida tai badaʹ denga puyan pengaren Allah, mentung paget diaʹ sakit. 3Un dau ue neng ida: “Ayen ncem ngkin inu inu neng pengaset cem. Ayen ngkin sekut, pekina pe belanyat, pekina pe ngebalun, pekina pe ligit, ngan pekina pe keliwa sapai hem. 4Buk kempi diaʹ selama dau alaʹ ikem kaʹ amin, ngelineʹ ne kidi, pa ketai hem mecin cen lepoʹ ina. 5Buk kempi dulu diaʹ abeʹ un alaʹ dau hem. Mecin ne lepoʹ ina, ngan nekaʹ abu cen taket cem, idi re ke tisen seʹ ban nte abeʹ un dapit neng ikem.”
6Tai kun nte diaʹ bayaʹ katuk dina mecin Yesus, sulo tai re masat pa tipo lepoʹ, mentung nte badaʹ Denga Injil, ngan paget dulu kempi kempi tai asat de.
Pengentam tawai Herudis
(Un te neng Matius 14.1-12; Markus 6.14-29)
7Kun Herudis, iaʹ paren ngkang tanaʹ Galilia ina, kenahan dau denga neng ketoʹ puyan iaʹ nuyan dalau ina. Mentam ne tekaʹ kimet te, moʹ un palai kuma ha: “Nai Yaya Batis numpak mudip ne ini.” 8Un pe diaʹ kuma ha ban nai Ilia luhaʹ laʹa. Un pe dau dulu diaʹ ca laʹa kuma ha ban nai ca pegawa cen naʹaʹ numpak mudip. 9Sulo dau Herudis: “Ban un Yaya are, lepa ne akeʹ ngulep batuk ke re. Aheʹ pe ia ini laʹa, iaʹ akeʹ kenahan denga dau puyan ne pekini tupe?” Sulo Herudis pelaseʹ pita janan ke taʹan Yesus nuʹo.
Yesus lemakan lema ibu usa kelunan
(Un te neng Matius 14.13-21; Markus 6.30-44; Yaya 6.1-14)
10Nai kun diaʹ puloʹ dua usa lawa Injil didai uleʹ ngeliwet palaʹ Yesus, ngan badaʹ mia ketoʹ puyan ban tai re are. Sulo Yesus ngkin ida tugung ia tai ngerada kaʹ ca lepoʹ, ngadan ne Bit-saida. 11Dalau dulu diaʹ kadoʹ tisen neng puyan ina, sulo tai re bayaʹ ia. Ngan tiga saheʹ Yesus alaʹ ida, penco ho badaʹ mida neng puyan pengaren Allah, mentung nge puhat diaʹ are maget mida.
12Dalau ketai tahup, nai kun diaʹ puloʹ dua usa didai are, pisiu ngan Yesus: “Tiga hoʹ cuk diaʹ kadoʹ dini tai uleʹ, idi re sukat tai kaʹ lepoʹ ngan lumpung uma iaʹ un teliling ilu kini, idi re sukat ke alaʹ penguman mida, ngan un pe ukoʹ de ke tudo, moʹ lenga ukoʹ le kini.”
13Un dau Yesus neng ida: “Ikem naʹ penguman mida.”
Un dau re mipa ha: “Abeʹ meʹ un anun, bang iaʹ lema luʹung ruti paun dini le, ngan siai atuk bang dua usa le. Bang buk koʹ ke cuk, ameʹ ketai lemeli pit te me diaʹ kadoʹ dini.” 14Moʹ un kihoʹ kihoʹ lema ibu laki tebaya re mung.
Kun dau Yesus neng diaʹ bayaʹ katuk ke dina: “Cuk ne ida pempun madung, kihoʹ kihoʹ lema puloʹ usa neng ca mpun ne.”
15Kun nte uyan koʹ baʹan dau ue, mentung nte cuk dulu madung mung. 16Kun Yesus alaʹ ruti paun lema luʹung dina, ngan atuk dua usa, penco seʹ e nekadaʹ kaʹ langit, nyuaʹ tiga saheʹ e me Allah. Uʹo ina ha pepiding pepiding ruti paun dina, ngan naʹ a mida diaʹ bayaʹ katuk ke, apan nte tai patu ue me diaʹ kadoʹ dina. 17Mung nte uman ne pa beso. Kun diaʹ bayaʹ katuk Yesus dina nemo ban laʹa ha, sangan puloʹ dua ingen.
Peterus badaʹ kimet te neng Yesus
(Un te neng Matius 16.13-19; Markus 8.27-29)
18Un ca liwai pelaʹa, dalau Yesus lemameʹ tengen, nai kun diaʹ bayaʹ katuk ke ngenyeng ia. Kun ne lemutu ida, kun dau ue: “Kumpin kaʹ dulu keneng akeʹ, aheʹ keʹ baʹan nte?”
19Un dau re mipa ia: “Yaya Batis; un dau palai kuma ha Ilia; un pelaʹa diaʹ kuma ha ban ca pegawa cen naʹa iaʹ numpak nai mudip laʹa.”
20Kun Yesus lemutu ida laʹa: “Moʹ ikem ke naʹ aheʹ sepe akeʹ ʹo?”
Un dau Peterus mipa ha: “Ikoʹ lete Keristus iaʹ man pungu udip, iaʹ Allah naʹ me kelunan.”
Yesus badaʹ neng tuyen ne ngan patai ie
(Un te neng Matius 16.20-28; Markus 8.30–9.1)
21Dau Yesus penco mida: “Ayen peletoʹ kem ke badaʹ tiraʹ ini, naʹ pia ke me aheʹ aheʹ pe.” 22Kun dau ue pelaʹa: “Atek ke sihoʹ keta bioʹ te Anak Sio ini. Moʹ diaʹ lataʹ lepoʹ, ngan diaʹ detaʹu lataʹ, ngan diaʹ guru Adet Yahudi, mung nte ke nyekang akeʹ ʹo. Dulu ke lematai heʹ ʹo. Uʹo ina kenai heʹ ke ngeliwet mudip neng iaʹ ketelu tau ue ʹo.”
23Un dau Yesus neng dulu mung: “Buk aheʹ iaʹ ubaʹ ke tugung akeʹ, atek ia ke lepo te pengubaʹ usa ha tengen, ngan singket singket tau ue ke nyuʹun tecek ke iaʹ ukoʹ o kematai, sulo ho bayaʹ dau heʹ; ina le ia senteng ke tugung akeʹ. 24Moʹ aheʹ iaʹ malaʹ ke pedemun udip pe palaʹ usa ha tengen, atek ke pesau lete udip pe ʹo. Un sepuʹo, aheʹ iaʹ ke pesau udip pe tuman akeʹ, ia lete iaʹ atek ke pedemun udip pe ʹo. 25Buk nalan mung peniga usun tanaʹ ini kuʹun ca usa, inu le ke bang nge petem berua ha tengen ke durat buk are supeʹ? Nyahut ca bang nge ke un. 26Moʹ aheʹ iaʹ saʹe ke ngahaʹ akeʹ ngan katuk keʹ nyeripa dulu, pekina te Anak Sio ini saʹe ke ngahaʹ ia ʹo, tegoʹ o kenai ʹo ngan serema peniga ha tengen, ngan serema peniga Amai Bioʹ, ngan serema peniga mung melikat diaʹ buheʹ. 27Ngetawai le ikem tiga tiga ʹo. Akeʹ badaʹ mikem, un palai mikem diaʹ nekejeng kini, abeʹ de tisen ke matai kena re ke taʹan puyan pengaren Allah.”
Pekaliu diseʹ Yesus
(Un te neng Matius 17.1-8; Markus 9.2-8)
28Kihoʹ kihoʹ aya tau uʹo tiraʹ katuk ina, kun Yesus ngkin Peterus ngan Yaya re dua Yakup tai serengan ia kusun ca mudung, moʹ de ketai lemameʹ. 29Dalau Yesus lemameʹ, tai pekaliu diseʹ silung nge. Tai puteʹ laleʹ diseʹ gelam me, pa selaʹ tekaʹ de naʹat te. 30Nyeluman kenai dua usa laki pata pisiu ngan ne, iaʹ ina Musa ngan Ilia. 31Kenai re dua luhaʹ cen serema peniga surga. Kun nte petiraʹ ngan Yesus neng tengangan ban kimet Allah iaʹ Yesus ke pedaʹam neng patai ie kaʹ Yerusalim, iaʹ abeʹ majan laʹa. 32Un Peterus de telu, luntoʹ gahaʹ ne ida kina. Kenai re telu taga, belekaʹ de taʹan serema peniga Yesus, ngan dua usa iaʹ pata nekejeng ngan ne kina. 33Dalau ketai re dua ke mecin Yesus, un dau Peterus neng Yesus: “Ahaʹ Guru, tiga pe ilu ngelineʹ ne kini. Inu pia ameʹ uyan lepau telu re, ca mikoʹ, ca me Musa, ngan ca laʹa me Ilia.” (Iaʹ lan ne, abeʹ Peterus tisen inu iaʹ ia pisiu.)
34Dalau ue pisiu pekina dau, kenai ca abun mekep ngelingau ida. Tai bisau ne tekaʹ de telu dalau kenai abun ina nampun ida mung. 35Sulo dau kenai ca isiu cen abun ina kuma ha: “Ini ne Anak keʹ iaʹ atek tenileʹ keʹ. Ngeringa ne ikem dau ue.”
36Uʹo dau isiu ina, belekaʹ de taʹan Yesus tengen le iaʹ un kina laʹa. Nyahut de telu diaʹ bayaʹ katuk Yesus dina pisiu neng pemuyan ina ne, naʹ pia ke me aheʹ aheʹ pe dalau ina.
Yesus paget demanai iaʹ sakit sepen
(Un te neng Matius 17.14-18; Markus 9.14-27)
37Neng kenempam me, dalau kenai re puno mudung ina, kadoʹ laleʹ kenai dulu nyelalang Yesus. 38Nai ca laki lemikaʹ cen ahang dulu dina, kuma ha: “Guru, kudaʹ ne ikoʹ nai naʹat anak keʹ ading. Bang ia le anak keʹ. 39Un ca bali iaʹ nelasek ia ngan kecet dau ue lemikaʹ. Kun bali ina lemintet lemintet ia pa ha budaʹ paʹ a. Lemuto laleʹ bali ini paleʹ neng ia, bang kediʹut le ahang nge. 40Lepa ne akeʹ nyat lesau neng diaʹ bayaʹ katuk koʹ. Supeʹ de ke sau ue.”
41Un dau Yesus: “Seʹ kem kelunan dini abeʹ un pengelan, ngan salaʹ seʹ kimet cem. Kudaʹ majan laʹa akeʹ ke pemung ngan ncem, ngan ke pedenaʹ ngan ncem tupe?” Sulo Yesus pisiu laki idai: “Ngkin ne anak koʹ kini.”
42Dalau kenai demanai ina masat ngenyeng Yesus, sulo bali sepen ina nubang ngan lemintet ia kaʹ tanaʹ, pa kenyarem seʹ e. Kun Yesus cuk bali ina kelap, penco ho paget anak ina. Kun ne naʹ ia uleʹ me amai ie. 43Tai muʹo tekaʹ tawai dulu mung taʹan seʹ ban bioʹ nyingan Allah.
Yesus badaʹ laʹa neng puyan ne ke matai ʹo
(Un te neng Matius 17.22-23; Markus 9.30-32)
Caʹ muʹo tawai lepe seʹ dulu neng puyan Yesus, un dau ue pisiu diaʹ bayaʹ katuk ke: 44“Ini ca tiraʹ iaʹ akeʹ ubaʹ ikem ketisen. Ayen ncem tai lingu kidi. Dulu ke naʹ Anak Sio ini kentaʹ penyukat kelunan ʹo.” 45Abeʹ ne ida tisen sen tiraʹ ina, moʹ o linget neng ida, idi re are mencam pekimet sen tiraʹ ina. Ngan takut pe ida ke lemutu ia neng idi.
“Aheʹ iaʹ pengebioʹ le?”
(Un te neng Matius 18.1-5; Markus 9.33-37)
46Tai paseʹ dau diaʹ bayaʹ katuk Yesus. Seʹ de paseʹ aheʹ iaʹ atek bioʹ mida. 47Tisen ne Yesus seʹ kimet de, ina ukoʹ o alaʹ ca anak dumit, pejeng dudo ia. 48Mentung dau ue neng ida: “Aheʹ iaʹ alaʹ anak ini moʹ tuman akeʹ, ia lete iaʹ alaʹ akeʹ, ngan aheʹ iaʹ alaʹ akeʹ, ia lete iaʹ alaʹ ia iaʹ cuk akeʹ. Moʹ aheʹ iaʹ ke ngelibaʹ ngadan ne moʹ o ke petubo ikem mung, ia lete iaʹ pengebioʹ kem ʹo.”
Aheʹ iaʹ are nyakat ilu, ia iaʹ mepo ilu
(Un te neng Markus 9.38-40)
49Un dau Yaya: “Guru, ameʹ lepa taʹan ca kelunan iaʹ sau bali man ngadan ncoʹ. Kun meʹ mulen ia, moʹ abeʹ e pemung ngan meʹ bayaʹ ikoʹ.”
50Dau Yesus neng ia, ngan neng ida mung: “Ayen mulen ia, uban aheʹ iaʹ are nyakat ikem, ia lete iaʹ pepo ngan ncem.”
Lepoʹ Samaria, abeʹ de ubaʹ ke alaʹ Yesus
51Dalau ketai nyeng tau Yesus ketai kayang kaʹ surga, sulo ho ti ngan pengahing kimet te tai kaʹ Yerusalim. 52Kun ne cuk palai lawa ha tai tahaʹ tena ia. Kun nte mecin ia cen ina, penco tai re kedalem lepoʹ Samaria, moʹ de ke petenup kukoʹ o ke tudo ʹo. 53Belekaʹ dulu kina leko ke alaʹ ia, moʹ tugen dau ue ketai masat kaʹ Yerusalim. 54Dalau diaʹ bayaʹ katuk Yesus dina taʹan seʹ puyan ina, sulo dau Yakup ngan Yaya neng Yesus: “Ubaʹ te Tuhan ameʹ cuk luten nai cen langit ke nutung ida?”
55Kun Yesus pupa, mentung nge ngenca ida dua. 56Penco ketai re neng lepoʹ diaʹ ca laʹa.
Pekata seʹ ke bayaʹ Yesus
(Un te neng Matius 8.19-22)
57Dalau ketai re masat, un dau ca usa neng Yesus: “Ubaʹ keʹ kenai bayaʹ ikoʹ, mele kempi kempi tai hoʹ.”
58Kun Yesus mipa ia: “Di pia lencau, ina ha un lubang pe; di pia ketoʹ sui, un sala pe dia; un sepuʹo Anak Sio ini, abeʹ un ukoʹ o ke penteng nyara ha.” 59Kun dau Yesus neng diaʹ ca: “Nai ne bayaʹ akeʹ.”
Dau ue mipa ia: “Ahaʹ Tuhan, pawang keʹ tai mekat liang me amai heʹ ading.”
60Un dau Yesus neng ia: “Talan pia diaʹ abeʹ un pengudip dalem Tuhan masek patai neng ata re tengen. Iaʹ un ncoʹ ini, tai ne pedenga puyan pengaren Allah.”
61Un pe dau diaʹ ca laʹa: “Ubaʹ keʹ kenai bayaʹ Amai, areʹ pawang ketai heʹ uleʹ badaʹ nyaheʹ tawai me diaʹ dalem amin nceʹ ading.”
62Un dau Yesus neng ia: “Kelunan iaʹ ngkang gut nelesa tanaʹ, ngan tesep tesep ke nyileʹ bayaʹ, nyahut te un tak dalem puyan pengaren Allah.”
Currently Selected:
LUKAS 9: KNT
Highlight
Share
Copy
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
