LUKAS 18

Kata katuk cen leto balu, ngan laki iaʹ pebetep ukum

1Kun Yesus ti ca kata katuk mida kina, apan nte lemameʹ lemuto, nga ayen tai puʹek tawai. 2Un dau ue: “Dalem ca lepoʹ, un ca laki iaʹ pebetep ukum. Abeʹ e takut neng Allah. Abeʹ pe ia nyingo kelunan. 3Dalem lepoʹ ina un ca leto balu iaʹ nai tesep tesep palaʹ ia, mentung dau ue nyat lesau: ‘Peteneng ne puyan nceʹ ading, neng ia iaʹ ubaʹ ke munan inu heʹ.’ 4Majan laleʹ le laki pebetep ukum ina are nyingo dau ue. Tai kebayaʹ a, un dau ue kedalem kimet te selem: ‘Naʹ pe akeʹ abeʹ un takut neng Allah, ngan abeʹ pe akeʹ pesingo kelunan, 5un sepuʹo moʹ un leto balu ini, bayet nai le ia pemiat akeʹ, inu pia akeʹ peteneng ne ia ading, malap ketai kuʹo ho ia ke pelelat ceʹ ʹo.’ ”

6Kun dau Tuhan laʹa: “Ikem pekimet kumpin dau laki iaʹ pebetep ukum, iaʹ are telit ina. 7Moʹ abeʹ Allah iaʹ ke peteneng puyan kelunan diaʹ anun ne, diaʹ lemuto lemameʹ neng ia utung tau utung alem ne? Kumpin baʹan ncem, malun kaʹ a kenai mepo ida? 8Lan dau heʹ mikem, atek ke ke nyelarai ke peteneng puyan nte dina. Un sepuʹo, kumpin Anak Sio ini, un ne ke taʹan seʹ pengelan kusun tanaʹ ini tegoʹ ke kenai ie ʹo taʹin?”

Kata katuk cen laki Perisi, ngan laki iaʹ nemo pupu

9Kun Yesus badaʹ ca kata katuk laʹa me dulu diaʹ naʹ ida tengen le kaʹ teneng, mentung nte muau neng dulu diaʹ ca. 10Un dau Yesus: “Tai kun dua usa laki kedalem Umaʹ Palan Allah, tai re ke lemameʹ. Un ca usa Perisi, iaʹ tuʹa re neng Adet Yahudi, ngan un laʹa ca usa iaʹ jaʹat baʹan dau dulu, moʹ o nemo pupu. 11Un laki Perisi ina nekejeng ngan lemameʹ mia tengen, un dau ue: ‘Ahaʹ Tuhan Allah, akeʹ nyuaʹ tiga saheʹ keʹ palaʹ ikoʹ, moʹ abeʹ keʹ koʹ baʹan kelunan diaʹ ca are, diaʹ tutun, ngan diaʹ are telit, ngan diaʹ pemung nyelem, pekina pe koʹ baʹan kelunan diaʹ nemo pupu ini are. 12Ake lemalan abeʹ un uman dua tau dalem ca mingku. Akeʹ naʹ ca tulat puloʹ penalan nceʹ mikoʹ.’ 13Un sepuʹo laki iaʹ nemo pupu ina nekejeng cen coʹ te. Abeʹ e makang ke nekadaʹ kaʹ langit, bang seʹ e mepan usuk ke, mentung dau ue: ‘Ahaʹ Tuhan Allah, lesau ne akeʹ iaʹ kelunan penyalaʹ ini.’ ”

14Un dau Yesus laʹa: “Un iaʹ nemo pupu ina, tai ie uleʹ kaʹ amin ne, lepa tai teneng ne ia kuʹun Allah. Tengeca laleʹ laki Perisi ina. Moʹ mung dulu diaʹ ngempau ngadan nte tengen, ida iaʹ tai libaʹ ʹo. Un sepuʹo diaʹ ngelibaʹ ngadan nte tengen, ida iaʹ ke tai mpau ʹo.”

Yesus un saheʹ neng anak dumit

(Un te neng Matius 19.13-15; Markus 10.13-16)

15Un palai nai ngkin anak dumit de palaʹ Yesus, moʹ de ubaʹ ia ke napoʹ ujoʹ o neng anak de. Kun diaʹ bayaʹ katuk Yesus taʹan seʹ puyan nte, penco re ngenca ida. 16Sulo Yesus mengin anak dina nai palaʹ ia. Un dau ue: “Pawang nai anak dina palaʹ akeʹ. Ayen mulen ida, moʹ aheʹ diaʹ koʹ baʹan dini are, ida diaʹ ke un puyan pengaren Allah ngaren ida. 17Lan dau heʹ mikem, aheʹ diaʹ abeʹ un ke alaʹ puyan pengaren Allah ngkang ida pekuaʹ koʹ baʹan ca anak dumit ina are, nyahut de senteng ketai kedalem puyan pengaren Allah ne.”

Ca laki kayaʹ

(Un te neng Matius 19.16-30; Markus 10.17-31)

18Un ca laki paren Yahudi lemutu Yesus, un dau ue: “Ahaʹ Guru iaʹ tiga, inu iaʹ tekep akeʹ ke uyan, idi heʹ keʹ un udip saheʹ kelineʹ ʹo?”

19Kun Yesus neng ia: “Inu hoʹ naʹ akeʹ tiga tupe? Abeʹ un aheʹ tiga, pit Allah. 20Lan lete ikoʹ tisen neng katuk ukum Allah iaʹ kuma ha: ‘Ayen nco petaro, ayen ncoʹ lematai kelunan, ayen ncoʹ ngelau, ayen ncoʹ palo, tunuk ne neng ueʹ ngan amai hoʹ.’ ”

21Un dau laki paren ina: “Mung katuk dina lepa ne akeʹ kanan ne cen tading iʹut ceʹ te.”

22Uʹo Yesus kenahan dau ue ina, penco dau ue: “Un lepe ca puyan iaʹ tepa neng ikoʹ. Pebeli ne ketoʹ inu iaʹ un neng ikoʹ, ngan naʹ ne suaʹ a me diaʹ taru mudip, apan ncoʹ ke un kayaʹ dalem surga. Uʹo ina nai hoʹ bayaʹ akeʹ.” 23Dalau ue kenahan dau pekina, bahat laleʹ ne tekaʹ kimet te, moʹ o kayaʹ laleʹ.

24Yesus taʹan seʹ pengebahat tawai ie, un dau ue: “Mahan laleʹ le diaʹ kayaʹ ketai kedalem puyan pengaren Allah. 25Masaʹ melai ca usa untaʹ tai kedalem lubang lo, neng ʹo ca kelunan kayaʹ ketai kedalem puyan pengaren Allah.”

26Un diaʹ ngeringa dau Yesus kina lemutu ia: “Buk pekina, aheʹ le iaʹ sukat ke un udip dalem Tuhan ʹo?”

27Kun dau Yesus: “Inu iaʹ kelunan are senteng ke uyan, senteng te ina neng Allah.”

28Un dau Peterus: “Kumpin ne ameʹ dini ʹo, lepa ne ameʹ mecin amin meʹ moʹ nai bayaʹ ikoʹ?”

29Dau Yesus mida: “Lan dau heʹ mikem, aheʹ diaʹ mecin amin nte, mecin leto re ngan cenganak de, pekina pe ueʹ de ngan amai re, ngan anak de; mecin ida suaʹ puyan pengaren Allah, 30atek de ke alaʹ kadoʹ tempan suaʹ a neng pengudip de ini, ngan udip saheʹ kelineʹ iaʹ ngeriman dalem udip iaʹ kenai ʹo.”

Iaʹ ketelu liwai Yesus badaʹ neng puyan ne ke matai

(Un te neng Matius 20.17-19; Markus 10.32-34)

31Kun Yesus ngkin puloʹ dua usa diaʹ bayaʹ katuk ke didai tai nengen. Un dau ue neng ida: “Ayen ncem tai talu. Ini ketai le kaʹ Yerusalim ini. Mung puyan iaʹ ban pegawa Tuhan lepa nyurat suaʹ akeʹ iaʹ Anak Sio ini, ketai ie palup lete kaʹ Yerusalim ʹo. 32Moʹ dulu ke mencai heʹ me lepoʹ diaʹ ca, diaʹ ke pelunyeʹ akeʹ, ngan diaʹ ke ngejaʹat dau neng akeʹ, ngan lemulaʹ akeʹ ʹo. 33Un pelaʹa ida ke lemeta heʹ ʹo, ngan ke lematai akeʹ. Un sepuʹo neng tau iaʹ ketelu ue, kenai heʹ numpak mudip pelaʹa.”

34Un nte diaʹ bayaʹ katuk ke dina, peletoʹ de are tisen sen tiraʹ ina. Sen tiraʹ ina suhuk neng ida. Nyahut de tisen dau Yesus ne.

Yesus naʹ penaʹat me ca laki iaʹ butaʹ

(Un te neng Matius 20.29-34; Markus 10.46-52)

35Dalau nai Yesus nyeng kata lepoʹ Yeriko, un ca laki butaʹ madung kaʹ sada janan, iaʹ nyat nyat inu. 36Kun ne kenahan dau kahi kahi dulu tai lapa ia, kun ne lemutu: “Inu ne tupe?”

37Un dau dulu mipa ia: “Moʹ Yesus lepoʹ Nasarit kenai lapa kini.”

38Penco ho ngelengap, un dau ue: “Yesus Anak Daut, lesau ne akeʹ ading.”

39Un diaʹ masat tahaʹ tena Yesus penceng ia, cuk ia pekenaʹ pisiu. Bang uyan ukoʹ o bioʹ kuʹo dau ngelengap: “Anak Daut, lesau ne akeʹ ading.”

40Ina ukoʹ Yesus pekenaʹ, mentung nge cuk dulu nai ngkin laki butaʹ ina palaʹ ia. Lepa nyeng ne ia, kun Yesus lemutu ia: 41“Inu iaʹ ikoʹ ubaʹ akeʹ ke uyan neng ikoʹ?”

Un dau ue: “Ahaʹ Tuhan, pengenyat ceʹ ke taʹan laʹa.”

42Un dau Yesus neng ia: “Naʹat ne. Pengelan ncoʹ iaʹ paget ikoʹ.”

43Dalau ina lete ia taʹan, penco tai ie bayaʹ Yesus, mentung nge nyuaʹ tiga saheʹ palaʹ Allah. Dalau dulu diaʹ kadoʹ dina taʹan puyan ina, mung nte pempau Allah.

Currently Selected:

LUKAS 18: KNT

Highlight

Copy