YAYA 3
3
Yesus ngan Nikudimus
1Un ca laki, ngadan ne Nikudimus, ca iaʹ pengebioʹ lepoʹ Yahudi. Ia kenahum neng mpun diaʹ Perisi. 2Ca alem me Nikudimus tai palaʹ Yesus ngan kuma ha: “Guru, ameʹ tisen ikoʹ ca guru iaʹ nai kuʹun Allah. Abeʹ un aheʹ senteng ti puyan nyingan ukoʹ baʹan ncoʹ ti ne, buk Allah abeʹ un ngan ne.”
3Un dau Yesus mipa ia: “Akeʹ badaʹ mikoʹ lan: ca usa pe abeʹ senteng taʹan puyan pengaren Allah buk ke abeʹ un numpak ke pempet neng ca udip iaʹ mading.”
4Un dau Nikudimus lemutu Yesus: “Kumpin kelunan iaʹ lepa lataʹ senteng ke numpak pempet laʹa tupe? Atek abeʹ un nyatan kelunan senteng tai ngeliwet kaʹ dalem batek ueʹ e, numpak pempet ngedua liwai laʹa.”
5Un dau Yesus: “Akeʹ badaʹ mikoʹ lan, ca usa pe abeʹ un senteng tai kaʹ dalem puyan pengaren Allah buk ke abeʹ pempet kuʹun sungai ngan kuʹun Berua Tuhan pelaʹa. 6Singket usa kelunan iaʹ un usa un pempet cen tuʹa re, un sepuʹo singket diaʹ un udip berua nai pempet neng udip berua re kuʹun Berua Tuhan. 7Ayen ncem mateng tecu kuʹun dau heʹ badaʹ mikem: ‘Tekep lete ikem mung ke pempet neng ca udip ia mading.’ 8Ilu pekata ukoʹ baʹan keput bahiu. Mele kempi ie ubaʹ tai, ikem kenahan dau tuyau ue. Un sepuʹo abeʹ kem tisen cen mpi kenai ie, ngan kempi ketai ie. Kuaʹ ngan ina lete puyan singket usa kelunan diaʹ pempet kuʹun Berua Tuhan.”
9Un dau Nikudimus lemutu: “Kumpin ne pekini tupe?”
10Un dau Yesus mipa ia: “Ikoʹ ca guru lepoʹ Israil, abeʹ pe ikoʹ tisen ini tupe? 11Akeʹ badaʹ mikoʹ lan, ameʹ pisiu inu iaʹ ameʹ tisen, ngan ameʹ badaʹ inu iaʹ ameʹ taʹan. Naʹ pe pekina, pabeʹ ca usa mikem diaʹ lataʹ dina pe abeʹ un ubaʹ alaʹ dau katuk meʹ. 12Abeʹ kem un ngelan akeʹ dalau heʹ badaʹ mikem puyan katuk usun tanaʹ ini are. Buk pekina, abeʹ nyatan ncem ke ngelan dau heʹ buk keʹ ke badaʹ puyan surga mikem. 13Ngan abeʹ un aheʹ iaʹ lepa tai kaʹ surga lepe, bang Anak Sio iaʹ lepa nai cen surga.”
14Ukoʹ baʹan Musa mejung ncung ulai jangin kempau kayu tecek kaʹ tanaʹ lenga are, ngan pekina lete Anak Sio ketai pejung ʹo, 15apan ketoʹ dulu diaʹ ngelan neng ia setneng un udip saheʹ kelineʹ iaʹ ngeirman. 16Bioʹ puyan Allah malaʹ neng ilu kelunan kusun tanaʹ ini, ina ukoʹ o mencai Anak ke iaʹ bang ca ina le milu, apan mung kelunan diaʹ ngelan neng ia abeʹ un tai matai penco, un sepuʹo ida ke alaʹ udip saheʹ kelineʹ iaʹ ngeriman. 17Abeʹ Allah cuk Anak ke nai pebetep ukum kusun tanaʹ ini, un sepuʹo Allah uyan ia Laki iaʹ keniga udip kelunan kusun tanaʹ ini.
18Aheʹ diaʹ ngelan neng Anak ina, abeʹ un ukum penyalaʹ betep neng ia. Un sepuʹo aheʹ diaʹ abeʹ un ngelan, un ne ukum lepa betep neng ia uban ne are ngelan neng Anak Allah iaʹ bang ca ina le. 19Pekini ne puyan ukum nuyan: dema lepa nai kusun tanaʹ ini, un sepuʹo kelunan malaʹ aleʹ neng puyan iaʹ mentem cen ʹo iaʹ dema, uban pemuyan nte jaʹat. 20Aheʹ aheʹ iaʹ ti puyan jaʹat, ia miʹi neng puyan dema, ngan abeʹ un ubaʹ nai palaʹ dema uban ne abeʹ un ubaʹ pemuyan iaʹ jaʹat ina luhaʹ neng dulu. 21Un sepuʹo aheʹ iaʹ ti puyan iaʹ telit lan, ia ubaʹ nai palaʹ dema apan dema ina ke peluhaʹ diseʹ pemuyan ne telit bayaʹ dau Allah.
Yesus ngan Yaya
22Uʹo ina Yesus ngan diaʹ bayaʹ katuk ke tai masat kaʹ dale Yudia. Un pe kudaʹ kudaʹ majan ia ngelineʹ ngan nte kina, ngan ia ngebatis kelunan. 23Un pe Yaya lete ngebatis kelunan kaʹ sungai Ainun, abeʹ un coʹ cen Salim, uban kadoʹ sungai kina, ngan kadoʹ pe kelunan tai palaʹ ia, ngan ia ngebatis ida. 24Yaya pe abeʹ un awai sihoʹ sepin.
25Un palai diaʹ bayaʹ katuk Yaya ne paseʹ ngan ca kelunan Yahudi, paseʹ kuaʹ baʹan adet de muheʹ inu re. 26Sulo ketai re palaʹ Yaya ngan badaʹ mia: “Guru, masaʹ koʹ petawai laki iaʹ un ngan ncoʹ tahaʹ dipa Yardin are, iaʹ ikoʹ pisiu mameʹ de. Ia ngebatis kelunan naʹkini, ngan mung dulu tai palaʹ ia.”
27Un dau Yaya mipa: “Aheʹ aheʹ pe milu kelunan ne, abeʹ un aheʹ senteng alaʹ gayeng buk Tuhan Allah abeʹ un naʹ a mia. 28Usa hem tengen senteng nugen kumpin dau heʹ lepa badaʹ mikem: ‘Abeʹ keʹ Keristus iaʹ ngkang pungu udip, un sepuʹo Allah iaʹ cuk akeʹ nai tahaʹ tena neng ia.’ 29Seleket laki iaʹ metip leto ina, anun ne lete leto ina. Tuyang laki iaʹ metip leto ina are, nekejeng kata ia ngan ngeringa dau ue, ngan banget tekaʹ kimet te kenahan dau isiu laki iaʹ metip leto ina are. Pekin ane puyan bangen nceʹ tengen iaʹ tai daʹam lan. 30Tekep lete Yesus tai bioʹ, ngan akeʹ ini iaʹ ketai iʹut.”
Ia iaʹ nai cen surga
31Aheʹ iaʹ nai cen mpau, ia iaʹ bioʹ cen ʹo mung dulu. Aheʹ iaʹ nai cen tanaʹ, ia iaʹ bang pekimet usun tanaʹ, ngan pisiu puyan pengudip kusun tanaʹ tuaʹ le. Aheʹ iaʹ nai cen surga, ina iaʹ tahaʹ mpau neng dulu mung. 32Ia badaʹ inu iaʹ ia taʹan ngan kenahan, un sepuʹo abe un aheʹ iaʹ alaʹ dau katuk ke. 33Aheʹ iaʹ alaʹ dau katuk ke, ida iaʹ ke tisen lan, uban Allah iaʹ puʹun puyan iaʹ telit. 34Laki iaʹ Allah lepa cuk nai are, ia iaʹ penco dau isiu Allah, uban Allah iaʹ lebang naʹ Berua ha mia. 35Amai Bioʹ iaʹ malaʹ neng Anak ke ngan mahung ketoʹ inu dalem gaham penyukat te. 36Aheʹ iaʹ ngelan neng Anak ina, ia lete iaʹ un udip saheʹ kelineʹ iaʹ ngeriman. Aheʹ iaʹ muau bayaʹ dau Anak ina, nyahut te senteng ke alaʹ udip ne, bang kenca Allah iaʹ ke pencit neng ia pabeʹ bayaʹ.
Currently Selected:
YAYA 3: KNT
Highlight
Share
Copy
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
